’Oqaaseq sallusuissutip pia eqqortumik atoruk’

GUUTIP oqaasii najoqqutassianik inuunermi ajunngitsumik ingerlassagaanni pinngitsoorneqarsinnaanngitsunik imaqarput. Ilinniartitsinissamut, naveersinissamut naqqiinissamullu Guutimut kiffartortup iluaqutigisinnaavai. (2 Timûtiuse 3:16, 17) Unnersuussutilli Guutimeersut tamakkiisumik iluaqutigissagutsigik apustilip Paulusip Timoteusimut kajumissaarutaa manna malittariaqarparput: ’Ilungersorniarit misiligaalluartutut sulisartutullu pakatsisussaanngitsutut oqaatsimik sallusuissutip pianik [eqqortumik atuisutut, NV] Guutimut sassarteqqullutit.’ — 2 Timûtiuse 2:15.

Guutip oqaasii ilaatigut assersuunneqarsimapput immummut inuussutissartaqarluartumut, nerisassamut pikkunartumut, imermut inuummarissinarlunilu ipeerunnartumut, tarrarsuummut panamullu ipittumut. Tamakku isumaat paasilluarukkit Biibilimik atuinermut pikkorinnerulissaatit.

Guutip oqaasii immuttut ittut siaruartikkit

Immuk inuussutissaavoq naalungiarsuit inoorlaat pisariaqartitaat. Meeraq alliartortillugu kimittunerujartuinnartunik nerisaqartinneqartarpoq, aallaqqaataanili immuk kisiat aqajaruata uussinnaavaa. Sorpassuit eqqarsaatigalugit Guutip oqaasiinik ilisimasakitsut naalungiarsunnut assersuunneqarsinnaapput. Inuk Guutip oqaasiinik soqutiginnilerlaajugaluaruni imaluunniit sivisungaatsiartumik Guutip oqaasiinik ilinniarsimagaluaruni Biibilimi eqqartorneqartunik tunngaviusuniinnaq ilisimasaqaruni, anersaakkut naalungiarsuuvoq oqitsunillu nerisaqartariaqarluni — anersaakkut ’immummik’. Suli ’mattusuunik nerisaqarnissani’, Guutip oqaasiisa paasiuminaatsortaanik ilinniarnissani, saperallarpaa. — Eprîarit 5:12.

Korinthimi ilagiinni pilersinneqaqqammersuni pissutsit taama ittut atuussimapput, taamaammat Paulusip ima allaffigisimavai: ’Immummik immippassi neqissamik pinnasi taamani suli saperassi.’ (1 Korintumiut 3:2) Korinthimiut ’Guutip oqaasiisa ilinniaqqaariaqartortaannik’ ilinniaqqaartariaqarsimapput. (Eprîarit 5:12) Anersaakkut aatsaat tamaannga killikkamik ’Guutip itissusiinik’ ilinniarnissartik suli saperallarsimavaat. — 1 Korintumiut 2:10.

Paulusitut iliorlutik ullumikkut kristumiut kiffartortut anersaakkut naalungiarsunnut isumassuinertik ersersittarpaat ’immummik’ nerlersortarnerisigut, tassa kristumiut ajoqersuutaannik tunngaviusunik ilinniarnerminni aalajaatsumik tunngavissaqalernissaannik ikiorlugit. Nutaanik imaluunniit anersaakkut naalungiarsunnik kajumissaarisarput ’immummik piviusumik oqaasiusumik kajungerisaqarnissamik’. (1 Pîtruse 2:2) Apustilip Paulusip ersersippaa paasigini nutaat pisariaqartitaannik immikkut isumagineqartariaqartut ima allakkami: ’Immummik pisariaqartoq oqaatsinik iluartunik siuneqanngilaq, merlertunnguugami.’ (Eprîarit 5:13) Guutip kiffaasa Biibilimik atuaqqissaaqatiginninnermikkut ilagiinnilu ajoqersuinermikkut nutaanik immummik piviusumik nerlersuinerminni naammagittartuusariaqarlutillu, isumassuissusariaqarlutillu, paasinnittuusariaqarlutillu inussiarnersuusariaqarput.

Guutip oqaasii — inuussutissat kimittuut

Annaanneqarnermik kinguneqartumik kristumiu ineriartussaguni ’immuinnaanngitsoq’ pisariaqartippaa. Biibilimi sallusuissutsit tunngaviusut paasilluareersimagunigit ilassereersimagunigillu, ’inersimasut nerisassaannik mattusuunik’ nerisaqalernissaminut piariissaaq. (Eprîarit 5:14) Qanoq ililluni taamaaliorsinnaava? Aalajangersimasumik nammineq atuaqqissaartarnermigut kristumiullu ataatsimiinnerinut najuuttarnermigut. Iliuutsit pitsaasut tamakku  iluaqutigalugit kristumiu anersaakkut nukittuunngortarpoq inersimasunngortarlunilu, oqaluussinermullu pikkorissisarluni. (2 Pîtruse 1:8) Aamma puiussanngilarput ilisimasatiguinnaanngitsoq anersaakkut nerisaratta, aammali Jehovap piumasaanik iliornitsigut. — Juánase 4:34.

Ullumikkut „inussiaq aalajaallunilu silatooq“ Guutip innuttaanik piffissaq eqqorlugu anersaakkut inuussutissalersuisussatut ’Guutillu nalinginnarpassuarnik ilisimatuussusianik’ paasinninnissaannik ikiuisussatut toqqarneqarsimavoq. Jehovap anersaamigut Biibilimi sallusuissutsit itisuut qulaartarpai kiffani ilumoortoq taanna, ’anersaakkut inuussutissanik piffissaq eqqorlugu’ aalajaalluni naqiteriuartoq, ikiortigalugu. (Matîuse 24:45-47, NV; Evfisumiut 3:10, 11: naleqqiuguk sarĸúmersitat 1:1, 2.) Kristumiut tamarmik immikkut akisussaaffigaat naqitikkanik taama ittunik tamakkiisumik atuinissartik. — sarĸúmersitat 1:3.

Soorunami allaat kristumiunut inersimalluartunut ’paasineq ajornartunik’ Biibili aamma imaqarpoq. (2 Pîtruse 3:16) Oqaatsit, siulittuutit assersuutillu ilaat paasiuminaatsuupput annertuumik atuaqqissaarnikkut eqqarsaqqissaarnikkullu aatsaat paasineqarsinnaallutik. Taamaattumik nammineq atuaqqissaarneq Guutip oqaasiinik paasiniaaqqissaarnermik ilaqarpoq. (Ussatit 1:5, 6; 2:1-5) Ingammik utoqqaanertat ilagiinnik ilinniartitsisartut tamatumani akisussaaffeqarput. Ilagiit atuakkamik atuaqqissaarnerannik imaluunniit ’napasuliamik’ atuaqqissaarnerannik aqutsinerminni, tamanut oqalugiarnerminni allatulluunniit periaaseqarlutik ilinniartitsinerminni utoqqaanertat sammineqartoq iserfigilluarsimasariaqarpaat ilagiinnullu anersaakkut inuussutissanik sassaalliuteqarnerminni ajoqersuinertik eqqumaffigisariaqarlugu. — 2 Timûtiuse 4:2.

Imeq inuummarissinarlunilu minguiaasoq

Jesusip arnaq Samariamiu puilasuliap eqqaani oqarfigisimavaa ’imermik taassuma iluani puilasunngorumaartumik inuunermullu naassaanngitsumut puilajuassasumik’ tuniumaarlugu. (Juánase 4:13, 14; 17:3) Imermut inuunermik tunisisumut tamatumunnga ilaapput Guutip Savaaraq aqqutigalugu tunniussai inuunermik kinguneqartut tamarmik, tunniussaalu tamakku Biibilimi nassuiarneqarput. Inuttut ataasiakkaatut ’imermik’ tamatuminnga qilalersutut anersaap Kristusillu nuliassaata neqeroorutaat ’imeq inuunartoq akeqanngitsoq’ ilassivarput. (sarĸúmersitat 22:17) Imermik tamatuminnga imerneq inuunermik naassaanngitsumik kinguneqarsinnaavoq.

Aammattaaq Biibili kristumiunut ilumoortunut ileqqussatigut anersaakkullu najoqqutassaqartitsivoq. Najoqqutassat Guutimeersut tamakku atoraangatsigik Jehovap oqaasiinit minguiarneqartarpugut, iliuutsit Jehova Guutip uumigisai piiarlugit ’uffarneqarluta’. (1 Korintumiut 6:9-11) Tamanna pillugu sallusuissut oqaatsit isumassarsiarititaasut imarisaat ’imermik uffaammik’ taaneqarsimavoq. (Evfisumiut 5:26) Sallusuissummit Guutimeersumit taamatut ’uffartinngikkutta’ pallorfiginninnerput taassumannga iluarineqarsinnaanavianngilaq.

Soqutiginarpoq utoqqaanertat ’oqaatsimik sallusuissutip pianik eqqortumik atuisut’ aamma imermut assersuunneqarsimammata. Esajas oqarsimavoq taakkua assigissagaat „inoqajuitsumi kuunnguit kuuttut“. (Jesaja 32:1, 2) Utoqqaanertat asannittut allassimaffik tamanna eqquutitittarpaat anersaakkut paarsisutut qatanngutitik pulaaraangamikkik, Guutip oqaasii nutaannguallannartut ineriartuutaasumik, tuppallersaataasumik, anersaakkut paasissutissiisumik, nakussatsitsisumik aalajaallisitsisumillu atoraangamikkik. — Naleqqiuguk Matîuse 11:28, 29. *

Ilagiinnut ilaasortaasut utoqqaanertanit pulaarneqarnissartik qilanaarisarpaat. „Nalunngilara utoqqaanertanit pulaarneqarluni qanoq eqqissiallannartartigisoq, Jehovallu tamatuminnga aaqqissuussisimanera nuannaarutigeqaara,“ Bonnie oqarpoq. Lynda, anaanaq kisimiittoq, allappoq: „Biibili aallaavigalugu kajumissaarinermikkut utoqqaanertat sapiukkunnaarsippaannga. Tusarnaarpaannga misiginneqatiginninnermillu ersersitsivigalunga.“ Michael oqarpoq: „Misigilersippaannga peqatigiiffimmut isumassuisumut ilaasunga.“ Allalu oqarpoq: „Isumakkut artorsaateqarujussuarninni utoqqaanertat pulaarnerat iluaqutigeqaara.“ Utoqqaanertat pulaarnerata anersaakkut qiimmaallannartup  assigaa imermik nillarissumik inuummarissinartumik imminneqarneq. Inuit savatut ittut pissutsini atukkaminni Biibilimi najoqqutassat qanoq atorneqarsinnaasut paasitinneqaraangamik tuppalliutigisarpaat. — Rûmamiut 1:11, 12; Jâko 5:14.

Guutip oqaasii tarrarsuutitut atukkit

Inuk kimittuunik nerigaangat siunertaasoq tassaaginnartanngilaq mamarsarnissaq. Inuussutissanik sulisinnaanissaminut nukissaqartitsisussanik pinissani naatsorsuutigisarpaa. Meeraaguni nalusanngilaa nerisaruni alliartussalluni inersimasunngorumaarlunilu. Anersaakkut inuussutissat eqqarsaatigalugit aamma taamaappoq. Nammineq Biibilimik atuaqqissaarneq nuannersuusinnaavoq, tamannaannarli siunertaanngilaq. Anersaakkut inuussutissat allannguutigisariaqarpavut. Anersaap inerititaanik paasinninnissatsinnut inerititaqarnissatsinnullu ikiortarpaatigut ’inuttaallu ilisarsissalluni pinngortitsisi assigilerlugu nutaanngortup atinissaanut’ ikiortarluta. (Kulorsamiut 3:10; Galâsiamiut 5:22-24) Anersaakkut inuussutissat aamma inersimasunngornissatsinnut iluaqutigisarpavut, ajornartorsiutinillu aaqqiiniarnitsinni allallu ajornartorsiutiminnik aaqqiiniarneranni ikiuiniarnitsinni Biibilimi najoqqutassat atorsinnaallualernissaannut iluaqutigisarlugit.

Biibili uagutsinnut taamatut sunniuteqarnersoq qanoq ililluta paasisinnaavarput? Biibili tarrarsuutitut atorsinnaavarput. Jakob ima oqarsimavoq: ’Oqaaseq naammassillugu pigitsi tusaaginnarnagulu . . . Oqaasermi naammassinagu tusaaginnartoqarpat, taassuma angut kiinnaminik inuuserisaminik tarrarsuutikkut qimerluuisoq assigeqqajarpaa; qimerloorsimallunimi aallararaaq qanoq-issutsilu erniinnaq puiorlugu. Inatsisinullu naammalluartunut kiffaanngissutsip piinut soraarani itsuartoq tusartaalluni puiutunngitsoq suliassamillu naammassinnittoq taanna qanoq iliornermini pilluarumaarpoq.’ — Jâko 1:22-25.

Guutip oqaasii misissoqqissaaraangatsigik qanorlu issuserput atuagarput naapertorlugu qanoq ittuusariaqarnitsinnut naleqqiukkaangatsigu Guutip oqaasiinut ’itsuartarpugut’. Taamaaliorutta ’oqaaseq naammassillugu pissaagut tusaaginnarnagulu’, Biibililu pitsaasumik uagutsinnut sunniuteqassaaq.

Guutip oqaasii panatut

Kiisalu apustilip Paulusip paasitippaatigut qanoq ililluta Guutip oqaasii panatut atorsinnaagivut. ’Siulersuisunut naalakkersuisunullu taarsuullu matuma pissaanilissuinut anersaanullu ajortunut qilaap ataaniittunut’ mianersoqquaatigut, oqaaqqissaarlutalu ’panaleqqulluta anersaap pianik, tassa Guutip oqaasianik’. (Evfisumiut 6:12, 17) Guutip oqaasii ’isumaliutinut inornarniartunut Guutimik ilisarsinermut makitaniartunut’ akiuunnitsinni pinngitsoorsinnaanngilluinnarpavut. — 2 Korintumiut 10:3-5.

Qularutissaanngitsumik ’Guutip oqaasia uumavoq killinnartorsuullunilu’. (Eprîarit 4:12) Jehova inuiannut oqaluttarpoq oqaatsini isumassarsiarititaasut aqqutigalugit. Allat ilinniartikkaangakkit upperisarsiornerlu ilumuunngitsoq qulaaraangakku oqaasii atorluartakkit. Allat kajumissaarlugit, qiimmassarlugit, tuppallersarlugit, anersaakkullu nukittorsarlugit ’oqaaseq’ atortaruk. Qanortoq Jehovap ’tamanik ajunngitsuliorsinnaanngortillitit peqqusani naammasseqqullugu’, taamaalillutit ’taassuma iluarisaanik’ iliortuaannarsinnaangortillutit. — Eprîarit 13:21.

[Quppernerup ataani ilanngussaq]

[Qupp. 31-mi assiliartaq]

Utoqqaanertat allanik kajumissaarisarput ’oqaaseq sallusuissutip pia eqqortumik atoqqullugu’