’Peqqusineratorluinnaq iliorput’

’Guutimik asanninneq tassaavoq inassutai maleruarutsigik.’ — 1 JUÁNASE 5:3.

1. Guutip asanninnerata annertussusia qanoq oqaatigineqarsinnaava?

’GUUTI ASASSUTAAVOQ.’ Guutimik ilisarsisut inassutaanillu maleruaalersut asanninnerup tamatuma itissusianik assut pingaartitsilersarput. ’Tamassa asanninnerup pissusia: uagut Guuti asagatsigu pinngilaq, kisianni taassuma asammatigut, ernilu aallartimmagu ajortitta matoorneqaatissaannik.’ Jesusip pilliutaanut utertitsissutaasumut naleqangaartumut uppernermik ersersitsiuartilluta ’Guutip asanninneraniittuassaagut’. (1 Juánase 4:8-10, 16) Tamatuma kingunerisaanik maannangaaq anersaakkut pilluaqqusaangaarsinnaavugut, aaqqissuussaanissamilu nutaami inuunermik naassaanngitsumik akissarsissalluta. — Juánase 17:3; 1 Juánase 2:15, 17.

2. Guutip kiffaasa taassuma inassutaanik malinninnertik qanoq iluaqutigisarsimavaat?

² Guutip inassutaanut naalattut tamatumalu kingunerisaanik pilluaqqusaangaarsimasut pillugit Biibilimi oqaluttuarpassuaqarpoq. Taakkununnga ilaapput kristumiussuseq sioqqullugu Guutimut nalunaajaasuusimasut, apustilip Paulusip ima allaatigisai: ’Upperlutik taakku tamarmik toqupput unnersuutigisat angumerinagit, ungasissumilli takullugit ilassillugillu, nassuerlutillu nunami tikeraagamik takornartaallutillu.’ (Eprîarit 11:13) Kingorna Guutip kiffaasa kristumiuusut tunniusimasut ’saammaanneq sallusuissullu Jesus Kristusikkut pisut’ iluaqutigilerpaat. (Juánase 1:17) Ukiut 6000-it ingerlaneranni inuiaat oqaluttuarisaaneranni Jehovap nalunaajaasuni aalajaatsut inassutiminut ’artornanngitsunut’ naalattut akissarsisingaartarsimavai. — 1 Juánase 5:2, 3.

Noap nalaani

3. Qanoq Noa Jehovap ’peqqusineratorluinnaq iliorsimava’?

³ Biibilimi ima oqaluttuaqarpoq: ’Uppernikkut Noap mianerinnilluni umiarsuaq inoqutimi annaffissaat piareersarpaa, takussaanngikkallartut pillugit Guutimit oqaaseq pigamiuk; taamaannermigullu silarsuarmiut pillagassaanerarpai, iluarnerlu uppernermit pisoq kingornussaraa.’ Noa ’iluarnermik oqaluussisutut’ Guutimut naalalluinnartuusimavoq ulersuarlu sioqqullugu silamiunut nakuusertunut Guutip eqqartuussutissaa pillugu oqaluussisimalluni. (Eprîarit 11:7; 2 Pîtruse 2:5) Umiarsualiorami Guutip ilitsersuussutai maleqqissaarpai. Taava peqquneqarnermisut uumasunik taquassanillu katersuivoq. „Noa Guutip peqqusineratorluinnaq iliorpoq.“ — 1 Moses 6:22.

4, 5. (a) Sunniineq ajortoq suna ullumimut inuiannik eqquisimava? (b) Sooq Guutip ’peqqusineratorluinnaq iliortariaqarpugut’?

⁴ Noa ilaqutaalu inngilit naalanngitsut sunniiniapilunnerannut akiuuttariaqarsimapput.  Guutip erneri taakkua inuttut timeqalerlutik arnanik inooqateqalersimapput, inorujussuarnik inunnik qunusiarinnittunik kinguaassiorlutik. „Nunarsuarmili aserorsimaneqarpoq Guutip takkuani iluaatsuliornernik ulikkaarluni.“ Kinguaariit ajortut taakku nungutinniarlugit Jehova ulersuarmik nalliutititsivoq. (1 Moses 6:4, 11-17; 7:1) Taamanimiilli inngilipiluit inuttut timeqaleqqissinnaajunnaarsitaapput. Taamaakkaluartorli suli ’silarsuaq tamaat ajortup pissaaneqarfigaa’, Satan Diaavulumit aqunneqarmat. (1 Juánase 5:19; sarĸúmersitat 12:9) Jesusip kinguaariit pikitsitsiumatuut Noap nalaani inuusut siulittuutaasumik assersuussimavai kinguaariinnut ’najuinerminut’ nalunaaqutit 1914-imi takussaalermatali imminik ilassinnikkumanngitsunut. — Matîuse 24:3, 34, 37-39; Lúkarse 17:26, 27.

⁵ Ullumikkut Noap nalaanisut iliorsimanermisut Satanip inuiaat nunarsuarpullu aserorniarsarai. (sarĸúmersitat 11:15-18) Taamaattumik pingaarluinnarpoq peqqussutip isumassarsiarititaasup matuma maleruarnissaa: ’Sakkutuussutit tamaasa Guutip pii atiniarsigik Diaavulup qoqassiniaraangasi aalajaassinnaaqqullusi.’ (Evfisumiut 6:11) Guutip oqaasiinik atuaqqissaarneq tamakkuninngalu inuunitsinni atuineq nakussatsissutissaraavut. Aamma Jehovap peqatigiissortai isumassuisut ikiortissaraavut, „inussiaq aalajaallunilu silatooq“ utoqqaanertallu asannittut, naammagittarlutik aqqutissatsinnik ilitsersuussisut, ilanngullugit. Nunarsuaq tamakkerlugu oqaluussineq suliassaraarput. (Matîuse 24:14, 45-47, NV) Noatut iliorluta Guutip peqqussutai tamaasa maleqqissaarniartigik.

Moses — inuit anneruniajuinnersaat

6, 7. (a) Mosesip suna qineramiuk pilluaqqusaangaarpa? (b) Mosesip qanoq sapiitsumik maligassiuuppaatigut?

⁶ Angut upperluartoq alla, Moses, sammeriartigu. Taanna Egyptenip pisuussussuinik inuulluataarutiginnilluni inuusinnaasimagaluarpoq. Kisianni ’Guutip innuttaanut perlussioqataanissani nuannaarnermit naajasumit ajortip pianit iluarinerusimavaa’. Jehovap kiffaatut piginnaaneqartitaatut uppernikkut akissarsiassani siumut isigiuarlugu ’takussaanngitsoq isigalugulusooq iperarnaveersaarsimavaa’. — Eprîarit 11:23-28.

⁷ Mosesimik allakkat sisamaat 12:3-mi ima allassimasoqarpoq: „Mosesili inuuvoq anneruniajuitsoq, nunarsuarmi inunnit tamanit anneruniajuinnerpaasoq.“ Akerlianilli Egyptenimi Farao inuit tamarmik anneruniarnerpaartaattut pissuseqarsimavoq. Moses Aronilu Jehovap eqqartuussutiminik Faraomut nalunaariartoqqummatik qanoq qisuariarpat? Ima oqaluttuarineqarpoq: „Moses Aronilu [Jehovap] peqqussutaa malillugu iliorput.“ (2 Moses 7:4-7) Uagutsinnut ullumikkut Guutip eqqartuussutissaanik nalunaarutiginnittunut tassa maligassat sapiitsut!

8. Qanoq Israelikkut Jehovap ’peqqusineratorluinnaq iliornissaminnik’ piumaffigineqarpat, uagullu siunissami qanittumi nuannaarneq taakkua misigisimasaat qanoq misigisinnaavarput?

⁸ Israelikkut Moses ilumoorlutik tapersersorpaat? Jehovap Egyptenimiut qulingiluassaanik perlussiortereeramigit Israelikkut qaangiiffissiortarnissaannik sukumiisumik ilitsersuuppai. „Taava Israelikkut qinullutik [Jehova] pallorfigaat, [Jehovallu] Mosesimut Aronimullu peqqussutaa malillugu iliorput.“ (2 Moses 12:27, 28) Ullormi pisoqarfioqisumi, nisanip 14-iani, ukiumi 1513-imi u.n.s., unnuap qiterarnerani Guutip inngiliata Egyptenimiut  angajulliliaat toqorarpai Israelikkulli angerlarsimaffii qaangiinnarlugit. Sooruna Israelikkut angajulliliaat asattuunneqartut? Qaangiiffissiornermi savaaqqap aava matserfimminnut tagiussimasartik sernissorneqaatigaat. Jehovap Mosesimut Aronimullu peqqussutaa malilluinnarlugu iliorsimapput. (2 Moses 12:50, 51) Immami Aappalaartumi Jehova tupinnartulioqqippoq innuttani naalattut annaallugit Farao sakkutoorpassuilu suujunnaarsikkamigit Israelikkut nuannaarutigeqisaannik! Ullumikkuttaaq Jehovap peqqussutaanut naalattut Harmagedonimi taassuma iliuuseqarneranik takunnikkunik nuannaassaqaat. — 2 Moses 15:1, 2; sarĸúmersitat 15:3, 4.

9. Ullumikkut immikkut pisinnaatitaaffiit suut tupiusaliornermut atatillugu Israelikkut Jehovap ’peqqussutaatorluinnaq iliorneratigut’ siumut assersuutaappat?

⁹ Jehovap inoqajuitsumi tupiusaliornissamut tunissuteqaqqummatik Israelikkut tukkoqalutik tapersersuisimapput. Taava Mosesip suleqataasalu kajumittut Jehovap sananissamut ilitsersuusiaa, annikitsualuttai tamaasa ilanngullugit, malillugu sanapput. „Taamaalilluni illernartuummut tupermut naapeqatigiittarfimmut suliarisassat tamarmik naammassipput, Israelikkullu suliassat suliarisimavaat [Jehovap] Mosesimut peqqussutai maleruaqqissaarlugit.“ Taamatuttaaq palasinngortitsineqarmat „Moses [Jehovap] peqqussutaa maleruaqqissaarlugu iliorpoq“. (2 Moses 39:32; 40:16) Ullumikkut uagut oqaluussilluni suliamut peqatigiiffiullu iluani allilerinerpassuarnut uummammik tamakkiisumik tapersersuinissatsinnut periarfissaqarpugut. Taamatut ataasiussuseqarluta ’peqqussutaata maleruaqqissaarnissaanut’ immikkut pisinnaatitaaffeqarpugut.

Josua — sapiitsoq nakooqisorlu

10, 11. (a) Josuap iluatsitsineranut suna pissutaava? (b) Ullumikkut misilinneqarnitta nammassinnaanissaannut qanoq nakussatsinneqarsinnaavugut?

¹⁰ Mosesip Josua Israelikkunnik nunamut neriorsuutigisaasumut eqqussisussanngortimmagu Jehovap oqaasii isumassarsiarititaasut allanneqarsimasut tassaannaagunarput Mosesip allagai tallimat, tussiaatit ataatsit marlulluunniit Jobimillu allakkat. Mosesip Josua ilitsersuussimavaa nunamut neriorsuutigisaasumut apuukkunik inuit katersortittassagai ’taavalu inatsisit atuarneqartassasut Israelikkut tamarmik tusaatillugit’. (5 Moses 31:10-12) Jehovallu nammineq Josua ima peqquaa: „[Inatsisit allassimaffiat] ullukkut unnuakkullu eqqarsaatigiuaannaruk tassanilu allassimasut tamaasa maleruaqqissaarlugit; taava iluatsitsilluassaatit.“ — Josva 1:8.

¹¹ ’Inatsisit allassimaffiannik’ Jehovameersumik ullut tamaasa atuartarnini Josuap misilinneqarnermi anigornissaannut iluaqutigisarsimavaa, soorlu ullumikkut Jehovap oqaasiinik, Biibilimik, atuartarneq taassuma nalunaajaasuisa ulluni ajornakusoortuni makkunani misilinneqarnerminnut akiuunnissaminnut nakussatsissutigisaraat. (2 Timûtiuse 3:1) Silarsuarmit nakuuserfiusumit avatangerneqarsimatilluta Guutip Josuamut oqaassutaa manna uaguttaaq uummammiuliunniartigu: „[Sapiissuseqarit, NV] pissatsillutillu. Erseqinak nikallornalluunniit; uangami [Jehova], tassaasunga Guuti, najorpakkit qanoq iliorninni tamani.“ (Josva 1:9) Kana’an ajugaaffigereeramikku Israelikkut naggueqatigiissortaat pilluaqqusaangaarput kingornussassaminni nunassikkamik. „Israelikkut nuna agguarpaat [Jehovap] Mosesimut peqqusisimaneratut.“  (Josva 14:5) Uaguttaaq ullumikkut Guutip oqaasiinik atuartartut inuunitsinnilu atuisut tamatta taassuma ’peqqussutaa maleruaqqissaarutsigu’ taamatut akissarsissaagut.

Kunngit — aalajaatsut naalasseriitsullu

12. (a) Israelimi kunngit qanoq peqquneqarsimappat? (b) Kunngit naalanngitsoornerat qanoq kinguneqartarsimava?

¹² Israelimi kunngit Jehovap ima peqqusimavai: „Kunnginngortup inatsisit ukua assilinerat palasinit Levikkuusunit pissavaa; allaffissanut imusanut allagaassaaq. Allakkat imusat imminiitissavai inuuninilu tamaat atuartassallugit, ilikkaqqullugu [Jehova] Guutini mianerissagamiuk. Peqqussutit ileqqoreqqusallu inatsisini taakkunani allassimasut ataqqissavai maleruassallugillu.“ (5 Moses 17:18, 19) Israelikkut kunngiisa peqqussut tamanna maleruarpaat? Amerlanertigut maleruanngitsoortarpaat perloqqussutinillu Mosesimik allakkat tallimaat 28:15-68-imi allaatigineqartunik eqqorneqarlutik. Naggataatigut Israelikkut ’siammartinneqarput inuiaat nunarsuup isuata illuanit illuanut najugaqartut tamarmik akornannut’.

13. Daviditut iliorluta Jehovap oqaasiinik nuannarisaqarnerput qanoq iluaqutigisinnaavarput?

¹³ Davidili — Israelimi kunngi aalajaatsoq siulleq — Jehovamut tunniusimalluinnarnermik ersersitsisimavoq. Paasinarsisimavoq taassuma assigigaa ’liiveeraq Juda’ siumullu assersuutaasoq Jesus Kristusimut, ’liivimut Judap naggueqatigiissortaanit pisumut Davidip sorlaanut’, ajugaasumut. (1 Môrsase 49:8, 9; sarĸúmersitat 5:5) Davidip suna nakuussutigisimavaa? Jehovap oqaasiinik allassimasunik pingaartitsilluinnartuusimavoq inuunerminilu atorlugit. Tussiaat 19-imi, ’Davidip tussiaasiaani’, allassimavoq: „[Jehovap] inatsisai innarluitsuupput.“ Jehovap maleruagassiai, peqqussutai eqqartuussutaalu pillugit ima allappoq: „Erlinnarnerupput kuultimit, kuultimit akuinnerpaamit, tungusunninnerupput tungusunnitsuummit igutsaat tungusunnitsuusivianniittumit. Kiffat taakkununnga ilitsersortippoq, maleruaraanni tamanna naammattumik akissarsissutaassaaq.“ (Tussiaat 19:8-12) Jehovap oqaasiinik ullut tamaasa atuarneq tamakkuninngalu eqqarsaatiginneqqissaarneq ukiut 3000-it matuma siorna iluaqutaasimappat, atamanna ullumikkut iluaqutaasoq! — Tussiaat 1:1-3; 13:6; 119:72, 97, 111.

14. Salomonip iliuusiata suup takutippaa ilisimasaqarnerinnaq naammanngitsoq?

¹⁴ Ilisimasaqalernissaannarli naammanngilaq. Aamma ilisimasat naapertorlugit iliuuseqarnissaq Guutip kiffaanut pingaartorujussuuvoq, ilisimasat Guutip piumasaanut naapertuuttumik atorlugit — aap, ’peqqusineratorluinnaq iliorluni’. Tamanna naleqqiunneqarsinnaavoq Davidip erneranut Salomonimut, ’Jehovap kunngimut issiavissaarsuarititaani issiasussanngorlugu Israelimilu naalakkersuisussanngorlugu qinersimasaanut’, pisimasumut. Salomon naalaffiliortussanngortinneqarsimavoq sananissamut ilitsersuutit Davidip isumassarsisitaalluni pisimasai najoqqutaralugit. (1 Israelikkut 28:5, 11-13) Salomonip qanoq ililluni suliassarujussuaq tamanna naammassisinnaasimavaa? Qinunerminut akissutitut Jehovap ilisimassuseqalersimmani. Ilisimassut tamanna ikiortigalugu, Guutillu ilitsersuusiaasa malinnerisigut, Salomonip illussaarsuaq tamanna, Jehovap naalannassusianik ulikkaarneqartoq, naammassisinnaasimavaa.  (2 Israelikkut 7:2, 3) Kingornali Salomon kukkuluttorpoq. Sukkut? Israelimi kunngi pillugu Jehova ima inatsiseqarpoq: „Kunngi amerlasuunik nuliaqalissanngilaq tamatumuuna tammartinneqaqqunani.“ (5 Moses 17:17) Salomonili ima pisimavoq: „Arnanik akimasunik 700-nik nuliaqarpoq 300-nillu panerfaqarluni, nuliaasalu uummataa killormut sangutippaat . . . guutinut allanut saatsippaat.“ Ukiuni inuuffigisamini kingullerni Salomon Jehovap ’peqqussutaa malillugu iliunngilaq’. — 1 Kunngit 11:3, 4; Nehemja 13:26.

15. Josias qanoq Jehovap ’peqqusineratorluinnaq iliorsimava’?

¹⁵ Judami kunngiusut naalattut ikittuinnaapput, taakkunannga kingullersalluni Josias. Ukiumi 648-mi u.n.s. nunami guutipilussiorneq nungusarpaa Jehovallu naalaffia iluarsaallugu. Tassani palasiunerup nassaarai „allagaq [Jehovap] inatsisaanik [Jehovap] Mosesikkut nalunaarutigisimasaanik imaqartoq“. Josiasip taakku qanoq pivai? „Kunngi [Jehovap] illuanukarmat Judakkut Jerusalaallu inuisa tamarmik — tassa palasit Levikkullu inuillu tamarmik akimasut inuinnaallu — malippaat. Josiap angerutsip allassimaffiani [Jehovap] illuani nassaami allassimasunik tamanik atuffappai. Taava kunngip naalaffiup sioraani inigisartakkaminut inissilluni [Jehova] angerfigeqatigaa. Inuit neriorsuissapput [Jehova] malikkumallugu kiisalu peqqussutai inatsisaalu ileqqoreqqusaalu maleruarumallugit uummatimikkut tarnimikkullu iluunngarlutik. Taamaalillutik angerutsip oqaasertai allassimaffimmi tassani allassimasut tamaasa maleruassavaat.“ (2 Israelikkut 34:14, 30, 31) Aap, Josias ’Jehovap peqqusineratorluinnaq iliorpoq’. Josiasip ajugaanerata kingunerisaanik Jehovap Judamut ilumuunngitsumut eqqartuussutaa uninngatinneqarallarpoq, aatsaallu ernerisa ilumuunngitsut naalakkersuinerisa nalaanni naammassineqarluni.

Guutip oqaasii malillugit inuugit

16, 17. (a) Jesusip tumai sukkut malittariaqarpavut? (b) Guutip kiffai aalajaatsut allat kikkut uagutsinnut maligassaalluarpat?

¹⁶ Inunni inuusimasuni tamani Guutip oqaasiinik isumaliutigineqqissaarnikkut malinninnikkullu maligassaalluarnerpaaq tassaavoq Naalagaq Jesus Kristus. Guutip oqaasii taassumunnga nerisassatut issimapput. (Juánase 4:34) Taanna ima oqarsimavoq: ’Erneq isumaminik iliorsinnaanngilaq, kisianni Ataataq taamaaliortoq takuguniuk; taanna qanoq-ilioraangat Ernertaaq taamaalioraraaq.’ (Juánase 5:19, 30; 7:28; 8:28, 42) Jesus Jehovap ’peqqusineratorluinnaq iliorsimavoq’, imami oqarsimavoq: ’Qilammimmi aqqarpunga peqqusara naammassiniarnagu, aallartitsisimali peqqusaa naammassiartorlugu.’ (Juánase 6:38) Uagut Jehovamut nalunaajaasuusugut tunniulluinnarsimasut Jesusip tumaanik malinninnitsigut Jehovap ’peqqusineratorluinnaq ilioqquneqarpugut’. — Lúkarse 9:23; 14:27; 1 Pîtruse 2:21.

 ¹⁷ Guutip piumasaanik iliornissani Jesusip pingaarnerpaatittuaannarsimavaa. Guutip oqaasii iserfigilluarsimavai taamaattumillu tamakku tunngavigalugit akisinnaasarsimalluni. (Matîuse 4:1-11; 12:24-31) Uaguttaaq Guutip oqaasiinik sammisaqartuaannarnitsigut ’inerilluarlutalu ajunngitsuliornernut tamanut piginnaanngorsagaasinnaavugut’. (2 Timûtiuse 3:16, 17) Malinniartigik itsaq kingusinnerusukkullu Jehovap kiffaasa aalajaatsut maligassiaat, kiisalu tamanit pingaarnerpaamik Naalakkatta Jesus Kristusip maligassiaa. Taanna ima oqarsimavoq: ’Silamiut ilisimaqqullugit Ataataq asagiga, taamaaliortungalu soorlu Ataatap inakkaanga.’ (Juánase 14:31) Uaguttaaq Guutimut asanninnerput ersersinniartigu taassuma ’peqqusineratorluinnaq iliortuarnitsigut’. — Lúkarse 12:29-31.

18. ’Oqaaseq naammassillugu pinissatsinnut’ suup kajumissisittariaqarpaatigut, tullianilu suna sammissavarput?

¹⁸ Biibilip nalaani Guutip kiffaasa naalallutik inuusimanerat isumaliutigeqqissaaraangatsigu Satanip aaqqissuussaanerata ajortup ulluisa qaangiutingajalerneranni aalajaalluta kiffartornissatsinnut kajumissisinneqartannginnerpugut? (Rûmamiut 15:4-6) Tamanna iluamik oqaatigalugu ’Oqaaseq naammassillugu pinissatsinnut’ kajumississutigisariaqarparput. Tamanna ilanngutassiami tulliuttumi sammineqassaaq. — Jâko 1:22. (wE 15/12 95)

Eqqaamaviuk?

□ ’Guutimut asanninnerup’ qanoq iliornissatsinnut killittariaqarpaatigut?

□ Noap, Mosesip Josuallu maligassiaat qanoq ilinniarfigaavut?

□ Qanoq annertutigisumik Israelimi kunngit Guutip ’oqaasii’ naalassimavaat?

□ Jehovap ’peqqusineratorluinnaq iliorneq’ eqqarsaatigalugu Jesus qanoq ililluni uagutsinnut maligassaalluarpa?

[Atuaqqissaarnermi apeqqutit]

[Qupp. 15-mi assiliartaq]

Noa, Moses Josualu Jehovap ’peqqusineratorluinnaq iliorsimapput’