Silarsuarmi uiverneqarfiusumi eqqissineq nanivaat

ATUAGASSIAP matuma saqqaani Bosnia-Herzegovinami sorsunnermi pisimasoq takuneqarsinnaavoq. Tamaani eqqissineqarsinnaava? Aap, tupinnaraluartumik. Nunami tamatumani katuullit Romalerisut, ortodoxit musliimillu nuna pillugu sorsutsillugit inuppassuit eqqissinissaq erinigaat, ilaasalu nanereersimavaat.

Ilaqutariit Djoremikkut Sarajevomi najugaqarput Jehovamut nalunaajaasuullutik. Illoqarfimmi sorsuffiusumi tamatumani akuttunngitsumik inoqatitik kasuttorfigisarpaat Guutip naalagaaffianik nutaarsiassaq nuannersoq nalunaajaassutiginiarlugu. (Matîuse 24:14) Sooq? Djoremikkut nalunngilaat Naalagaaffik tamanna piviusuusoq, qilammi pilersinneqareersimasoq tassaallunilu inuiaat eqqissinissamut neriuutissatuaat. Jehovap nalunaajaasuisa apustilip Paulusip „eqqissinermik nutaarsiassaq nuannersoq“-mik taasimasaa tatigilluinnarpaat. (Evfisumiut 2:17, NV) Inuit Bozo aamma Hena Djoremikkutut ittut pissutigalugit Bosnia-Herzegovinami inuppassuit eqqissineq nanisimavaat.

Eqqissineq piviusoq atuutilingajalerpoq

Djoremikkut eqqartoqqitsinnagit aappariit allat Guutip naalagaaffianik neriugisaqalersimasut eqqartussavavut. Tassaapput Artur Arinalu. Taakku ernitik ilagalugit nunami Sovjetunioniusimasumi najugaqarsimapput. Nunap inui imminnut sorsuummata Artur sorsoqataasimavoq. Erniinnarli imminut ima aperisimavoq: ’Sooq inuit sanilerisimasakka sorsuffigaakka?’ Nunagisani qimappaa ajornakusoornartorsioreeqalunilu ilaquttani ilagalugit Estlandimut tikilluni.

Sankt Petersborgimut tikeraarnermini Arturip Jehovap nalunaajaasui naapippai, Guutillu naalagaaffia pillugu tusakkaminit killinneqartorujussuulluni. Jehovap piumasaa tassaavoq Guutip naalagaaffiata qanittukkut inuiannut aqutsisutuaalernissaa. (Daniel 2:44) Taava nunarsuaq eqqissineqarfiussaaq sorsuffiujunnaarluni. Pruffiiti Esajasip piffissaq tamanna ima siulittuutigisimavaa: „Ajortumik iliortoqarnanilu ajoqusiisoqassanngilaq qaqqanni illernartumi, Jehovamik ilisarsinerup nuna tamakkerumaarmagu soorlu ermit matoqqagaat immap naqqa.“ — Jesaja 11:9.

Nalunaajaasut ilaata atuakkami Biibililersaarummi titartagaq nunarsuassamik eqqissineqarfiusumik ersersitsisoq takutimmagu Arturip nunagisimasaminut eqqaanartissimaqaa. Maannakkulli nunap inuisa imminnut  sorsuunnerata nuna tamanna aserorsimavaa. Maanna Estlandimi Artur ilaqutaalu Guutip naalagaaffia pillugu ilinniarput Jehovap nalunaajaasui ilagalugit Biibilip atuaqqissaarneratigut.

Uivernersuarmi eqqissineq

Tussiaat 37:37-mi allassimavoq: „Peqqusersuitsoq malugiuk, assuarnaatsoq isiguuk! Qanilaartoq siunissaqarumaarpoq.“ Aap, Guutip isaani peqqusersuitsoq assuarnaatsorlu eqqissinermik maannangaaq angusisinnaavoq. Qanoq ililluni? Angutip Paulimik atillip misigisimasaa eqqarsaatigiuk.

Paul Etiopiap kujataata kitikanniani qimaasut inissiaanni avinngarusimasumi najugaqarpoq, nunami saniliusumeersuugaluarluni. Nunavigisimasamini Jehovap nalunaajaasuisa ilaat uuliasiorfimmi sulisoq naapissimavaa. Taassuma atuakkamik Biibililersaarummik sagdlusuíssut inûnigssamut nâgssáungitsumut sangmissoĸ-mik tunisimavaa. * Paulip nalunaajaasoq taanna naapeqqinngilaa, atuagarli peqqissaartumik misissorpaa. Nunap inuisa imminnut sorsuunnerat pillugu Etiopiami qimaasut inaanni najugaqalerpoq, tassanilu ilinniarsimasani pillugit allat oqaluttuuttarpai. Inuit arlallit oqaluttuarisai sallusuissutitut ilassivaat. Taakkuattaaq ilinniarsimasatik tunngavigalugit qimaasut allat oqaluussiffigisalerpaat.

Paul Napasuliaq Alapernaarsuiffiup Peqatigiiffiata qullersaqarfianut allappoq ikioqqulluni. Nalunaajaasoq Addis Abebamit aallartitaasoq tupigusoqaaq inuit 35-it Guutip naalagaaffianik ilinniarusullutik utaqqisut tikikkamigit. Taakkua aalajangersimasumik ikiorneqarnissaat isumagineqalerpoq.

Sooq oqarsinnaavugut inuit Paulitut ittut eqqissinermik peqartut? Atoruminartumik inuuneqanngikkaluarput, kisianni Guuti upperaat. Silarsuarmi uivernersuarmit eqqorneqaraangamik unnersuussut Biibilimeersoq manna maleruartarpaat: ’Suulluunniit pillugit isumakulunnaveeritsi, nungullugillu kissaatigisasi Guutimut nalunaarsigik torlulallusi qinullusilu qujallusilu.’ Tamannalu nalerisimaarnermik ullutsinni nalinginnaavallaanngitsumik kinguneqartarpoq. Apustili Paulusip ilagiinnut Filippimiittunut allagai taakkununngattaaq ilumoorput: ’Eqqissinerup Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ Aap, ’Guutimut eqqissisaasumut’, Jehovamut, qanittumik attaveqarput. — Filípimiut 4:6, 7, 9.

Maannakkut eqqissineq

Guutip naalagaaffiani kunnginngortitaq tassaavoq Jesus Kristus, Biibilimi „Naalagaq eqqissisitsisoq“-mik taaneqartoq. (Jesaja 9:6) Taanna pillugu pruffiititoqqat ilaat ima allappoq: „Kunngigisassi inuiaat eqqissivissioqatigiumaarpai; naalagaajumaarpoq immamit immamut, kuussuarmit Eufratimit nunarsuup isuanut!“ (Sakarja 9:10) Oqaatsit isumassarsiarititaasut taamaattut angutip Josémik atillip inuuneranut sunniuteqartorujussuusimapput.

Ilaanni José parnaarussaavoq. Peqqarniisaarniaavoq politiillu inaannik qaartartumeeriniartilluni tigusaalluni. Isumaqarsimavoq peqqarniisaarnikkut aatsaat naalakkersuisut nunami tamatumani pissutsinik pitsaanerulersitsinissaminnut pinngitsaalineqarsinnaasut. Parnaarussivimmiitsillugu nulia Jehovap nalunaajaasuisa Biibilimik atuaqqissaaqatigisalerpaat.

Iperagaagami Joséttaaq Biibili atuaqqissaalerpaa, erniinnarlu oqaatsit Tussiaat 85:9-miittut malerualerlugit: „Tusassavakka Guutip oqaasissai; Jehovammi eqqissinissamik neriorsuiffigai innuttani imminut unneqqarissut.“ Versi taanna mianersoqqussummik naggateqarpoq: „. . . Sianiitsuliornermut saaqqunagit.“ Taamaattumik Jehovamik eqqisseqatiginnikkusuttoq attaveqanngitsuujumananilu Taassuma piumasaanik akerliusumik iliorusunngilaq.

 Maanna José nulialu kristumiutut oqaluussisartuupput. Inunnut allanut Guutip naalagaaffia tikkuartarpaat ajornartorsiutit — ajornartorsiutit Josép siornatigut qaartartulianik nammineq sanasimasaminik aaqqinniarsimasaraluisa — aaqqiissutissaattut. Biibili tutsuigilluinnarpaat tassani ima allassimammat: „[Jehova] nammineq iluanaarnermik tunisissaaq.“ (Tussiaat 85:13) Aap, ungasinngitsukkut Josép politiit inaat qaartartumeerniarsimasaraluani pulaarpaa. Sooq? Ilaqutariit tassani najugaqartut Guutip naalagaaffia pillugu oqaluussiffiginiaramigit.

Inuit eqqissinermik nuannarisaqartut

Tussiaat 37:10, 11-mi ima allassimavoq: „Guutiitsoq erniinnaq peeruttussaavoq, inaani takuniaraluarukku peerutereersimassaaq. Kisianni qanilaartut nuna kingornutissavaat, pilluangaarlutillu inuussapput.“ Ila, siunissaq nuannerunaq!

Malugiuk eqqissinermik Jehovap pianik piginnittut tassaasut „qanilaartut“. Eqqissineq nanissagutsigu nammineq eqqissinermik nuannarisaqartunngorniartariaqarpugut. Keithip, New Zealandimeersup, tamanna misigisimavaa. Keith tassaanerarneqarsimavoq inuk ’nerinnartoq, inuttut nukittooq, kamajasoq oqqassiumatoorlu’. Inupiloqatigiinnut ilaasortaavoq, angerlarsimaffia pallittaalisapajaajuvoq naatsiivianilu qimmit pingasut paarsisuutitat iseqqusaanngitsunik isertoqannginnissaa isumagaat. Nuliaminit, meeqqami arfinillit anaanaannit, avissimavoq.

Keithip Jehovap nalunaajaasui naapeqqaaramigit nutaarsiassamit nuannersumit assut killinneqarpoq. Erniinnaq meeqqanilu nalunaajaasut ataatsimiinnerinut najuuttalerput. Nutsani qitini tikillugu takitigisut kipivai ikinngutigisimasanilu Guutip naalagaaffianik nalunaajaaffigisalerlugit. Taakkua ilaasattaaq Biibili atuaqqissaartalerpaat.

Inuit allat millionilikkuutaat silarsuarmi sumi tamaaniittut assigalugit Keithip apustili Peterip oqaasii makku malerualerpai: ’Inuunermimmi nuannarinnikkumasup ullussallu ajunngitsut takujumallugit . . . ajortoq nigorlugu ajunngitsuliorli, eqqissinissaq kajungeralugulu noqqaassutigiliuk.’ (1 Peter 3:10, 11) Keithip nuliarisimasaata kateqqinnissartik akueraa maannalu Keithip ’eqqissinissaq kajungeralugu noqqaassutigisarpaa’.

Eqqissineq Jehovap pia iluaqutigalugu inuppassuit inuunertik annaassimavaat, ilaatigut timersortartoq Sovjetunioniusimasumi inunngorsimasoq. Olympiademi ajugaasimavoq, kisianni pakatsineq pissutigalugu ikiaroornartunik imigassanillu atornerluisalerpoq. Ukiut 19-it tamatuma kingorna, ilaatigut ukiut pingasut Sibiriami pinngitsaaliissummik sulisitsivimmeereerluni, marloriarlunilu ikiaroornartutornini pissutigalugu toqungajavissimalluni, Guuti qinnuigaa inuunerup siunertaata piviusup naninissaanut ikioqqulluni. Jehovap nalunaajaasui russisut oqaasillit Biibilimik atuaqqissaaqatigisaleramigit apeqqutissani akissutissarsivai. Ullumi angut taanna allat millionilikkuutaat ilagalugit Guutimik imminillu eqqisseqateqalersimavoq.

Makinnissamik neriuut

Naggataatigut Bozo aamma Hena Djoremikkut, Sarajevomiut, uterfigilaariartigik. Aappariit taakku paneqarput, Magdalenamik atilimmik, sisamanik ukiulimmik. Siorna juuliugaa tamarmik angerlarsimaffimminnit anipput oqaluussiartorniarlutik. Tamarmilli qaartartumit toqutaapput. Allanut eqqissineq pillugu oqaluussisaraluarput. Qaartartumit eqqorneqarmata ima paasisariaqarpa eqqissineq oqaluussissutigisaat piviusuunngitsoq? Naamerluinnaq! Aaqqissuussaanermi matumani alianartunik pisoqartarpoq. Inuit qaartartunik toqutaasarput. Allat nappaateqarnikkut ajunaarnikkulluunniit toqusarput. Amerlasuut utoqqalillutik toqusarput. Eqqissinermik Guutip pianik peqaraluarluta aamma eqqorneqartarpugut, kisianni  alianartut tamakkua neriuutaarutsinngilaatigut.

Jesusip ikinngunni Marta ima neriorsorpaa: ’Uanga makissutaallungalu inuussutaavunga; uannut uppertoq naak toqugaluaruni inuussaaq.’ (Juánase 11:25) Djoremikkut tamanna upperisimavaat, soorluttaaq Jehovap nalunaajaasuisa tamarmik upperigaat. Djoremikkut upperisimavaat toqugaluarunik nunarsuarmi eqqissineqarfiusumi pilerumaartussami makikkumaarlutik. Jehovap ’qulliit tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ — sarĸúmersitat 21:4.

Toqunissani sioqqutitsiarlugu Jesusip malitsini ima oqarfigai: ’Eqqississummik uanga pinnik tunivassi; . . . Uummatisi annilaanngikkilit.’ (Juánase 14:27) Nuannaarutigaarput Djoremikkut eqqissineq taama ittoq pigisimammassuk makinnissamilu qularnanngitsumik annerusumik pigiumaarlugu. Inuppassuit Jehova, eqqissinerup Guutia, pallorfigimmassuk nuannaarutigaarput. Taakku isumakkut eqqissisimapput. Guuti eqqisseqatigaat. Inuit allat eqqisseqatigaat. Siunissamillu eqqissineqarfiusumik neriuuteqarput. Aap, silarsuarmi uivertoqarfiusumi eqqissinermik pigisaqarput. Aap, Guutimik anersaakkut ittumik ilumoortumillu pallorfiginnittut tamarmik eqqissineq tamanna pigaat. Illittaaq eqqissineq tamanna qanortoq misigigiuk. (wE 1/1 96)

[Quppernerup ataani ilanngussaq]

[Qupp. 7-imi assiliartaq]

Silarsuarmi uiverneqarfiusumi inuugaluarlutik eqqissineq nanivaat