Takuuk! Niuemi naalagaaffilersaarfik

NIUE qeqertaarannguuvoq Manerassuarmiittoq, New Zealandimit avannamut-kangimut 2160 kilometerisut ungasissuseqartumiittoq. Angalanermut najoqqutassiaaraq naapertussagaanni ateq Niue marlunnik isumaqartinneqarpoq: Niu, isumaqarpoq „palme qaqqortariarsualik“, taavalu e, isumaqarluni „takuuk“. Atuagassiaaraq ima allaaserisaqarpoq: „Itsarnitsanik oqaluasaarutini eqqaaneqarpoq Polynesiamiut nunasisut siulliit tikeqqaaramik palme-t qaqqortariarsuallit takoqqaaramikkik oqaatsit taakku atorsimagaat.“

Ullumikkut Jehovap nalunaajaasuisa Niuemiittut tulluusimaarutigisinnaavaat tikeraanut ima oqarsinnaagamik: „E! Fale he Kautu ha mautolu!” Ima isumaqartut: „Takuuk! Naalagaaffilersaarfipput!“ Sooq taama illu taanna pingaartitsigivaat? Jehovap nalunaajaasuisa tamarmik naalagaaffilersaarfitik tulluusimaarutigisarpaat, ingammik namminneq sanasimagaangamikkik, kisianni qeqertami Manerassuarmiittumi taama avinngarusimatigisumiittumi naalagaaffilersaarfiliorneq immikkut illuinnartuuvoq. Niue 260 kvadratkilometeriinnarnik angissuseqarpoq, qeqertarlu tamakkerlugu taamaallaat 2300-inik inoqarluni.

Kikkut naalagaaffilersaarfimmik sananissamik ikiuussinnaanersut paasiniarneqarsimavoq. Ilagiinni Niuemiittuni oqaluussisartut 32-iinnaapput. Maskiinat atorneqartussat tamarmik, assersuutigalugu biilit usisaatillit, bulldozerit kivittaatillu naalagaaffimmit pigineqarput. Tamatumalu saniatigut sanaartornermi atortussat pingaarnerusut tamarmik — sisaat, gasbetonimik qarmasissiat, qaliassiat, innaallagissamut atortussat, nipilerinermut atortut issiaviillu — New Zealandimiit umiarsuarmik pajuttaammik sapaatip-akunneri tallimat qaangiukkaangata aatsaat tikittartumik nassiunneqassapput. Suli ajornakusoorneruvoq qeqertami qaarsumik tunngavilimmik illuliornissaq, naalagaaffilersaarfillu kiattup anorersuini napasinnaasussatut sananeqartariaqarpoq. Suliassaq mersernarpaseqaaq.

Jehovalli nalunaajaasuisa taama isiginngilaat. Taakkununnga naalagaaffilersaarfik pallorfiginninnermut ilumoortumut qitiuvoq, Jehova Guutimut unnersuuteqqusarput ikioqqusarlutillu. (Tussiaat 56:12; 127:1) Kristumiut qatanngutit New Zealandimiittut, ilaatigut Aucklandimi ilagiinnut Niuemiunut ilaasut aggerput, Jehovap Nalunaajaasuinut Niuemiittunut ikiuukkiartorlutik sanaartorneq tapersersorluinnarlugu.

Sananeq aallarnisarneqartoq

Juunimi 1994-imi Rotoruami New Zealandimiittumi naalagaaffilersaarfimmik sanasimasut kikkulluunniit soqutiginnittut Niuemi sananissamut ikiuukkusuttut nalunaarnissaannik kajumissaarneqarput. Qiimmaallannaqaaq qatanngutit arnat angutillu 200-it nalunaarmata. Taakkunanngalu inuit 80-it toqqarneqarput — sanasut, saffiortut, ruujorilerisut, qalialersuisartut, gipsilerisut, qalipaasut, kallerup innilerisut, nipilerisut, betonilerisut, qarmaasut sulisartullu.

Qatanngutit titartagartaa suliaraat, Jehovalu tatigalugu suliassartik aallartillugu. Niuemi utoqqaanertat qatanngutit marluusut aappaata niuernermik suliaqartuusup atortussat pingaaruteqarnerusut nassiussuunneqarnissaat isumagaa. Ilanngullugulu New Zealandimiit namminneq piumassutsiminnik sanajartoqataasussat namminneq angalanerminnut aningaasartuuteqarumasut, timmisartukkut billettissaasa inissaannut atasut akissaat isumaqatigiissutiginiarneqarput. Ulloq sananerup aallartiffissaa aalajangerneqarpoq. Naalagaaffilersaarfik sananeqarlunilu naammassineqartussaavoq ullut 20-it atorlugit, marsip 4-niit 23-nut 1995, taavalu naalagaaffilersaarfik atoqqaarfissiorneqassalluni.

„Tunngavissaa takoqqaarakku paatsiveerutileraluarpunga,“ taama oqaluttuarpoq sananeqarnissaanut siulersuisussaq, New Zealandimiit sananeqarnissaanut sapaatip-akunnerinnanngortorlu tikissimasoq. „Eqqaa tamarmi qaarsuinnarsuuvoq. Tunngavilersornerinnaa ullunik 14-inik sivisussuseqassaaq.“ Kingornatigulli nassuerpoq Jehovap Nalunaajaasui tassani najugaqartut nikagisoorsimagaluarlugit. „Qatanngutit Niuemiut qaarsut ilisimasaqarfigilluarpaat,“ oqarpoq. „Nalunngilaat qaarsoq sukkut eqqorneqarpat annertoorujussuaq kaanngartissinnaassallugu.“ Tunngavissaa ullut marluk ingerlaneranni naammassineqarpoq!

 Marsip 4-ni namminneq piumassutsiminnik sulisussat siulliit betonilerisussat New Zealandimiit timmisartukkut tikipput. Assigiinngitsunik sanasussat tikeraleriarmata sanaartugassat immikkoortui assigiinngitsut inertiterneqarput. Sulineq ullaakkut arfineq-marlunut sivikitsumik ullormut allassimaffik eqqartorlugu aallartittarpoq. Qatanngutit ilaat ilaanni 36-it missaanni kiattoq ullormut akunnerit 12-it sulisarput. Naammassineqarpoq marsip 23-ni eqqaa naasortalersorneqarluni. Kusanartumik orpiup mangop qisuttaani allassimavoq: „Jehovap Nalunaajaasuisa naalagaaffilersaarfiat.“

Qeqertami najugaqartut inoroorsaarnerat suleqatiginnikkusussuseqarnerallu

Suliap iluatsilluarneranut ilasaaqataasut pingaaruteqartut ilagaat Niuemi najugaqavissut suleqatiginerat. Anersaaq sanasut ersersittagaat najugaqavissut sunnertissutigisorujussuuaat, nerisassanillu aningaasanillu tunissuteqarput, namminneq suliassamittut isigalugu. Naalagaaffimmi atorfillit niuertullu pisussaaffitik qaangerlugit iliuuseqarput. Maskiinat atorneqarsinnaasut pisariaqartut atoqqullugit innersuussutigineqarput, taamattaarlu sannavik maskiinanik atortulik. Umiarsuarnik pajuttaatinik piginnittup umiarsuup angalanera allanngortippaa atortussat pisariaqartut piffissakkut anngunniassammata.

Niuemi oqaluussisartut eqiasuissusiat inoroorsaassusiallu angerlarsimaffitik pigisatillu atortimmatigit tikeraat suliartortut nuannaarutigeqaat. „Qatanngutit arnat najugaqavissut nersornaqaat,“ sanajartoqataasut ilaat taama oqarpoq. Ullup-qeqqasiutissat piareersarnerisa saniatigut ullaakkorsiutissanik ullaakkut arfineq-marlup qeqqanut sassaalliisarput. Ilaat ullaaralaakkut tallimap qeqqanut makittarput nerisassiorniarlutik. Sanajartortut ilaat oqarpoq: „Isumaqarpunga angerlarsimaffitsinninngaanniilluunniit Niuemi pitsaanerusumik inuulluta.“

Marsip 10-ni aviisimi Niue Star-mi ilanngutassiap saqqaani ima qulequtaqarpoq: „Niuemi naalagaaffilersaarfik siulleq“, assiliartaaniippullu Newzealandimiut Niuemiullu tassani sulisut. Ilanngutassiap eqqartorpaa naalagaaffilersaarfiup angissusia 280 kvadratmeteriusoq, inersuarlu 70-100-inik inoqarsinnaasoq. Ilanngutassiaq ima nangippoq: „Illu sapaatip-akunnerini marlunni naammassineqarluni sananeqarsinnaavoq, tamatumanili sivisunerulaartumik ingerlanneqassasoq. Maannakkut ullut marluk sanallugu aallartilaaginnartoq naatsorsuutigisat qaangerlugit suliaqarsimapput. Tunngavissaa kuineqareersimavoq, saarngi napparneqareersimallutik, qaliatalu quassuttoortai napparneqareersimallutik.“

Niuvertoq oqarsimavoq kissaatiginartoq qeqertami najugaqartut tamarmik sananeqartoq takusassagaat ilinniarfigalugulu. Oqarpoq neriulluni tamanna asannilluni suleqatiginnikkusussuseqarlunilu qanoq naammassisaqartoqarsinnaaneranut maligassaassasoq.

Naalagaaffilersaarfik atoqqaarfissiorneqarmat inuit 204-it takkussimapput. Misigisaq najuuttunut tamanut attortinnaqaaq Niuemiut qatanngutit angutit, arnat meeqqallu immikkut ittumik takutitsimmata erinarsorlutik qitillutillu. Sanasimasunut Jehovamullu qujassuteqarluni oqaaseqartoqarpoq, isumaat uummataat assaallu taassuma anersaavanik sunnerneqarlutik suliassaq naammassineqarsinnaasimammat. — Jesaja 40:28-31. (wE 15/12 95)