Annareerpit?

JOHNNY qulinik ukioqartoq tuniniaasarfimmi angutip unitseriarlugu aperisimavaa: „Inuusuttoq uumaa, Jesus Kristus Naalakkattut Annaassisuttullu ilassiviuk?“ Taama aperinera Johnnymut eqqumiilluinnarpoq, Jesusimi upperiuaannarsimavaa. Taamaattumik akisimavoq: „Soorunami upperaara.“ „Naalagaq unnersiutigisiuk!“ angut kikkut tamarmik tusaasinnaasaannik nillerpoq. „Tarneq suli alla Kristusimut annappoq!“

Annannissaq taama ajornanngitsigaa? Johnny oqaatsit taakkua aninniariarlugit „annappa“, inuunermi sinnerani qanoq iliornissani apeqqutaatinnagu? Inuit ilumoortut amerlasuut angerusussapput. Naqitaaqqat upperisarsiornermik imallit ilaanni ulloq „annaffik“ allaqquneqartarpoq eqqaamasinnaaqqullugu.

Palasit ilaat allassimavoq: „Kristusimut uppiummernerup . . . inuunerup sinnera aalajangertarpaa.“ Taassuma Biibilimi allassimanerarpaa annanneq ataasiarluni „uppernikkut iliuuseqarnerusoq, tassaanani uppernikkut iliuuseqartuaannarneq.“ Upperisarsiorneq pillugu allattartoq alla allassimavoq: „Inaarutaasumik iliuuseqarneruvoq. Annareerputit . . . ’Sorsugunnaareerputit.’ ’Ajortit peerneqareerpoq.’“ Inuilli tamatuminnga qularutiginninngikkaluartut eqqunngitsoqartoq takusinnaasarpaat. Ersarilluinnarpoq inuit ’annareersutut’ oqarfigineqartut amerlasuut Biibilimik maleruaanngitsut. Nalinginnaasumik nassuiarniarneqartarpoq Kristusimik ’ilassinninnertik’ immaqa ilumoorussimanngikkaat.

Jesusimik ’ilassinninneq’ qanorpiaq isumaqarpa? Uppernermut ersiutaasumik iliuuseqarnerua ataasiinnaq, ataavartumilluunniit inooriaasiua? Uppernerput ima sakkortigisariaqarpa iliuuseqarnissatsinnut kajumissisilluta? Jesusip pilliutaata iluaqutissartaa ilumut ilassisinnaavarput taassuma malinnissaanut akisussaaffeqanngikkaluarluta?

Inuppassuit Jesusimut malinninnerup naalannerullu pilluaqqussutissartai piumasarpaat akisussaaffeqarumanatilli. Oqaaseq „naalanneq“ eqqissiunnaarutigisarpaat. Jesusili oqarsimavoq: ’Malinnga’. (Lúkarse 18:18-23) Biibilimilu allassimavoq: ’Naalakkatta Jesusip iivankkiiliuanut naalakkumanngitsut . . . pillaammik atugaqassapput tammarnissamik naassaanngitsumik.’ — 2 Tásalûníkamiut 1:8, 9; Matîuse 10:38; 16:24.

Biibilimi allassimasorpassuaqarpoq annannissaq pillugu ajoqersuutaasimasut pillugit apeqqutinik annertuunik pilersitsisunik. Tamanna pillugu Biibilimi qanorpiaq allassimasoqarnersoq qulakkeerusukkukku, quppernerni tulliuttuni allaaserisat soqutiginartissavatit. Biibilit quppertaruk, pingaaruteqartorlu tamanna pillugu Jesus apustiliilu qanoq ajoqersuuteqarnersut atuartakkit.