Annassagutta qanoq iliortariaqarpugut?

ILAANNI angutip Jesus ima aperisimavaa: ’Naalagaq, annattussat ikippat?’ Jesus qanoq akiva? Ima oqarpa: ’Naalakkattut Annaassisuttullu ilassiinnannga, taava annassaatit’? Naagga, Jesus oqarpoq: ’Isertarfikkut nerukitsukkut iserumallusi assoruunniaritsi; oqarfigaassimi: amerlasuut iserniarumaarput, sapissallutilli.’ — Lúkarse 13:23, 24.

Angutip apeqqutaa Jesusip akinngitsoorpaa? Naagga, angut aperinngilaq annannissaq qanoq ajornartigissasoq; aperivoq annattussat ikinnersut. Jesusip ersersinniarpaa pilluaqqussutissanik nuanningaartunik piumallutik assoruuttut ilimagisamik ikinnerussasut.

’Taamatut oqaluttuunneqarsimanngilanga,’ atuartut ilaat oqarumasinnaavoq. Immaqa Juánase 3:16 issuassavaa ima allassimasoq: ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ Uagut akissaagut: ’Suna upperisariaqarparput? Jesusip ilumut inuusimanera? Soorunami. Guutip ernerigaa? Ilaana! Biibilip Jesus ’Ajoqersuisumik’ ’Naalakkamillu’ taammagu, ajoqersuutai upperisariaqannginnerpavut, naalattariaqannginnerparput malittariaqannginnerparpullu? — Juánase 13:13; Matîuse 16:16.

Jesus malillugu

Aarit, ajornartorsiut tikipparput. Inuit ’annannerarneqarsimasut’ amerlasuut Jesusip malinnissaanut naalannissaanulluunniit kajumissuseqarpasinneq ajorput. Naaggaartut palasiat allassimavoq: „Soorunami Kristusimut uppertuaannartariaqarpoq. Uppertariaqarnermulli uppertuaannarnissamulluunniit piumasaqaat, Biibilimi tapersersorneqanngilaq.“

Akerlianilli ’annassimasutut’ misigisut akornanni ileqqorlunnerit Biibilimi taagorneqarput. Taamatullu pissuseqartoqaannarpat kristumiut peqquneqarput: ’Ajortoq taanna ilissinnit peersiuk.’ Soorunami Guutip ilagiissimi kristumiut ajortunit mingutsitaanissaat kissaatiginngilaa. — 1 Korintumiut 5:11-13.

Jesusimik malinninneq qanoq isumaqarpa, qanorlu ililluta malissinnaavarput? Jesus qanoq ittuusimava? Ileqqorluttuusimava? Kinguaassiuutitigut kanngunartuliortarsimava? Imerajuttuusimavaa? Sallutuujusimava? Niuernikkut peqquserluttuusimava? Soorunami naamik! ’Tamakkuli tamaasa asooruttariaqarpakka?’ aperiumasinnaavutit. Tamanna akiniarlugu Evfisumiut 4:17-miit 5:5-imut allassimasut eqqarsaatigeriakkit. Allassimanngilaq qanorluunniit ilioraluarutta Guutimut iluarisaassasugut. Akerlianilli inuit imaattut assigeqqunngilai: ’Ileqqorinnissamik misigissuseerullutik kanngunartuliornermut tunniupput . . . ilissili Kristusimik taama ilinnianngilasi . . . inutoqaq siornagut angalaaserisarsi iperassagissi . . . Tillittartoq tillissaarli . . . Uersaanerli mingunnartullu nalinnginnaat piumatuunerlu taaneqassanngillalluunniit ilissinni, iluartut taama ileqqussaqarmata . . . Mannami nalunngilarsi ilisimallugulu, kinaluunniit  uersaasorluunniit minguttoorluunniit piumatoorluunniit (tassa guutipilussiortoq) kingornussassaqanngimmat Kristusip Guutillu naalagaaffianni.’

Jesusip maligassiuineranut naapertuuttumik minnerpaamilluunniit inuuniarsarinngikkutta malissavarput? Inuunerput Kristuserpalaartunngortinniarlugu sulissutigisariaqannginnerparput? Apeqqut pingaartoq tamanna inuit upperisarsiorneq pillugu allattartutut imatut oqartutut isumaqartut qaqutiguinnaq eqqarsaatigisarpaat imaluunniit eqqarsaatiginngisaannarpaat: „Maanna Kristus ilassiuk — allanngornak.“

Jesusip ajoqersugaasa ilaat mianersoqqusivoq angutit guutiitsut ’Guutitta saammaanneranik kanngunartuliornermut atornerluisut naalakkersuisutuarpullu Naalagarput Jesus Kristus miserratigalugu’. (Jûtarse 4) Guutip nallittuinera qanoq ililluta ’kanngunartuliornermut atornerlussinnaagatsigu’? Taamaaliorsinnaavugut isumaqarutta piaaraluta ajortuliariuakkavut Jesusip pilliutaata matussagai naammalluinnanngitsuunerput pissutigalugu ajortuliavut qaangerniakkavut pinnagit. Amerikami iivangkilistit ilisimaneqarluarnerit ilaat ima oqarsimasoq isumaqatigerusussanngilarput: „Allannguisariaqanngilatit, asoorussisariaqanngilatit allamilluunniit isumataartariaqanngilatit.“ — Naleqqiukkit apustilit suliait 17:30; Rûmamiut 3:25; Jâko 5:19, 20.

Upperneq iliuuseqartitsisarpoq

Amerlasuut oqarfigineqarsimapput „Jesusimut upperneq“ ataasiaannarluni iliuuseqarnerusoq uppernerlu ima sakkortutigisariaqanngitsoq naalannissamut kajumissisitsilluni. Biibilili tamatumani isumaqataanngilaq. Jesus oqanngilaq inuit kristumiutut inuulersut annattut. Oqarporli: ’Naggatissamulli aalajangersoq annakkumaarpoq.’ (Matîuse 10:22) Kristumiutut inuunerput Biibilimi arpaliunnermut assersuunneqarpoq, naanerani annannermik akissarsiassalik. Kajumissaarivorlu: ’Taama arpagitsi pisaariumallugu.’ — 1 Korintumiut 9:24.

Taamatut ’Kristusimik ilassinninneq’ Jesusip pilliutaata naleqangaartup pilluaqqussutissartaanik ilassinninnerinnaanngilaq. Naalannissaq pisariaqarpoq. Apustili Peter oqarpoq eqqartuussineq ’Guutip inoqutaanit aallartissasoq’ imalu nangippoq: ’Uatsinnilli aallarnissappat, Guutip iivangkiiliuanut naalasseriitsut qanoq-ittumik naggateqassanerpat?’ (1 Pîtruse 4:17) Tusaaginnarnata uppiinnarnatalu aamma allamik iliuuseqartariaqarpugut. Biibilimi allassimavoq ’oqaaseq naammassillugu pissasugut tusaaginnarnagulu, uatsinnut salloqittaqinagatta’. — Jâko 1:22.

Jesusip nammineq oqariartuutaa

Biibilip atuagartaasa ilat sarĸúmersitat Johannes aqqutigalugu kristumiut ilagiivinut siullernut arfineq-marlunnut Jesusip  oqariartuutaanik imaqarput. (sarĸúmersitat 1:1, 4) Jesus oqarpa ilagiinni taakkunaniittut ’ilassereermanni’, tamanna naammattoq? Naagga. Suliaat, assoruunnerat nikallujuissusiallu pillugit nersualaarpai, asannissusiallu, uppissusiat kiffartornerallu eqqartorlugu. Oqarporli Diaavulumit misilinneqassasut ’immikkullu suliaat naapertorlugit’ akissarsissasut. — sarĸúmersitat 2:2, 10, 19, 23.

Pisussaaffik upperisarsiortut ataatsimiinneranni Jesus ’ilassiniariarlugu annannerarneqarsimasut’ amerlanersaasa paasisimasaannit annerujussuaq Jesusip eqqartorpaa. Ima oqarsimavoq: ’Uannik malinnikkumasoq imminik isumakkiissavoq, [napasorlu anniartitaaffini, NV] ersullugu malissavaanga. Inuunerminik annatsitsiumasup inuunini annaajumaarpaa; uangalu pillunga inuunerminik annaasup inuunini nassaarissavaa.’ — Matîuse 16:24, 25.

Imminik isumakkeerluni? Jesus malillugu? Taamaaliussagaanni iliuuseqartariaqarpoq. Inuunerput allanngortittariaqarpoq. Ilumut Jesus oqarpa allaat ilatta ’inuunini annaassagaa’ — taanna pillugu toqussasut? Aap, upperneq taama ittoq aatsaat pineqarsinnaavoq Guutip oqaasiata atuaqqissaarneratigut nuanningaartunik ilisimasaqalernikkut. Ullormi Stefanusip upperisarsiortunit ingasaassiniartunit ujaqqanik milloorneqarfiani tamanna ersarippoq taakkua ’ilisimassut anersaarlu [Stefanusip] oqalutsigisaa assortorneq sapermassuk’. (apustilit suliait 6:8-12; 7:57-60) Upperneq taama ittoq ersersinneqarsimavoq Jehovap nalunaajaasuinit tusindilikkuutaanit nazistit pillakkanut katersuutsitsiviini nalunngeqatiginnissutsiminnik Biibilimit ilinniartinneqarsimasumik unioqqutitsinatik toqusunit. *

Kristumiutut ilungersorneq

Kristumiutut uppernerput aalajangiusimasariaqarparput, oqaluffiimmi ilaanni TV-kulluunniit upperisarsiortut aallakaatitaanni tusartakkannut akerliusumik Biibilimi allassimavoq tammarsinnaasugut. Kristumiut ’aqqummik narlusuumik’ qimatsisut oqaluttuarineqarput. (2 Pîtruse 2:1, 15) Taamaattumik ’annannissarput sulissutigisariaqarparput mianersorluta uulillutalu’. — Filípimiut 2:12; 2 Pîtruse 2:20.

Ukiuni hundredelinni siullerni kristumiut, Jesusip apustiliisalu ajoqersuinerannik tusartut, taamatut paasivaat? Aap. Nalunngilaat iliuuseqartariaqarlutik. Jesus oqarsimavoq: „Taamaattumik aallaritsi inunnillu inuiannit tamaneersunik ajoqersuganngortitsigitsi, . . . ajoqersorsigillu ilissinnut peqqussutikka tamaasa maleruaqqullugit.“ — Matîuse 28:19, 20 NV.

Jesusip taamatut oqarnerata kingorna qaammatit marluk qaangiuttut, ullormi ataatsimi inuit 3000-it kuisipput. Uppertut 5000-inut amerleriapallapput. Uppertut allanik ajoqersuisarput. Qinuginninnerup siammartikkaangagit, oqariartuutaat siammaannartarpoq. Biibilimi allassimavoq siulersuisut ikittuinnaat kisimik pinnatik ’siammartitaasut angalallutik oqaaseq iivanngkiiliu oqaluutigigaat’. Ukiut 30-t kingorna apustili Paulus allassinnaasimavoq nutaarsiassaq nuannersoq ’pinngortitani tamani qilaap ataaniittuni oqaluussissutigineqarsimasoq’. — apustilit suliait 2:41; 4:4; 8:4; Kulorsamiut 1:23.

Paulus tv-kkut oqaluussisartut assiginagit ima oqarluni allat allamik isumataaqqunngilai: ’Massakkorpiaq Jesus ilassisiuk, taava annannissarsi qulakkiissavarsi.’ Amerikamiulluunniit palasiattut qulanngitsiginngilaq ima allassimasutut: „Nukappiaraallungali . . . annappunga.“ Jesusip nammineerluni Paulus kristumiussutsimik inuiannut allanut ingerlateqqitsitsisussatut toqqarmagu ukiut 20-t sinnerlugit qaangiutereersut, apustili sulilluartoq taanna allappoq: ’Timiga artorsartippara kiffaasutut ilillugu, allanut oqaluussisartunga nammineq angiluttoqqunanga.’ — 1 Korintumiut 9:27; apustilit suliait 9:5, 6, 15.

Annanneq Guutimit tunissutaavoq. Akissarsissutaasinnaanngilaq. Iliuuseqartariaqarpugulli.  Erlinnartumik arlaannik tuniniarneqaruit tigunissaanullu pingaartitsinermik naammattumik ersersitsinngikkuit, qujamasunnermik amigaateqarnerit pissutigalugu tunisiniaraluartup ingerlaannaq allamut tunniutissagaluarpaa. Jesus Kristusip aava qanoq erlinnartigaa? Tunissutaavoq, piniarluguli pingaartitsingaarnermik ersersitsisariaqarpugut.

Kristumiut ilumoortut Guutimut iluarisaasutut inissisimagunik annassapput. Ataatsimut isigalugit annannissaat qulakkiigaavoq. Ataasiakkaarlutilli Guutip peqqussutai maleruartariaqarpaat. Tammarsinnaavugut, Jesusimi oqarsimavoq: ’Uanniittuanngitsoq avalequtitut igitaassavoq toqullunilu.’ — Juánase 15:6.

’Guutip oqaasia uumavoq’

Ilanngutassiami siullermi oqaloqatigiinneq eqqaaneqartoq ukiut 60-ingajaat matuma siorna pisimavoq. Jesus Kristus kisiat aqqutigalugu annattoqarsinnaasoq Johnnyp suli upperaa, paasisimavaali anguniarlugu iliuuseqartariaqartugut. Upperiuaannarsimavaa inuiaat neriuutissatuaat Biibilimi tikkuarneqartoq atuagarlu naleqangaartoq taanna atuaqqissaartariaqaripput, qisuariarfigisariaqaripput, asanninnermullu, uppernermut, inussiarnernermut, naalannermut nikallujuinnermullu kajumissaatigisariaqaripput. Qitornani tamakkununnga uppertussatut perorsarsimavai,  maannalu nuannaarutigaa takullugu taakkua meeqqatik taamatulli perorsaraat. Kissaatigaa inuit tamarmik taamatut uppernissaat, allallu uummatimikkut isumamikkullu taamatut uppilersinniarlugit sapinngisani tamaat iliuuseqartarpoq.

Apustili Paulus isumassarsitinneqarluni allappoq ’Guutip oqaasia uumasoq killinnartorsuullunilu’. (Eprîarit 4:12) Inuunermik allanngortitsisinnaavoq. Uummammit pisumik asanninnermik, uppernermik naalannermillu kajumissisissinnaavaatit. Biibilimili allassimasunik ’ilassinninnerinnaq’ naammanngilaq. Atuaqqissaaruk namminerlu iliuuseqarnissannut kajumissisinneqarit. Ilisimassusianit siulersorneqarit. Nunani 230-nit amerlanerusuni Jehovamut nalunaajaasut 5.000.000-it missaat angerlarsimaffinni Biibilimik atuaqqissaaqateqarnissamik neqerooruteqartarput. Atuaqqissaaqateqarnermi taamaattumi sunik ilikkagaqarsinnaanerlutit paasiniarlugu atuagassiap matuma saqqummersisitsisuanut allagit. Uppernikkut anersaakkullu nukittornikkut angusatit nuannaarutigissavatit. (wE 1/2 96)

[Quppernerup ataani ilanngussaq]

[Qupp. 7-mi ungalusaq]

Sooq ’upperisassaq assoruutigeqquneqartoq’?

Biibilimi Jûtarsip agdlagai ’qaaqqusimasunut . . . Jesus Kristusikkut paarisaasunut’ allagaapput. Tassani pineqarpa ’Jesus ilassigamikku’ annannissaat qulakkeerneqarsimasoq? Naagga, Judasip kristumiut allaffigai ’upperisassaq assoruutigissagaat’. Taamaaliornissaannut pingasunik pissutissalersorpai. Siullermik, Guutip ’innuttani Egyptenimiut nunaannit aniguisissimavai’, kingusinnerusukkulli amerlasuut allamut saassimapput. Aappassaanik, allaat inngilit pikitsitsisimapput anersaapilunngorlutillu. Pingajussaanik, Guutip Sodoma Gomorralu piuneerussimavai, illoqarfinni taakkunani kinguaassiuutitigut ileqqorlunnerup annertussusia pissutigalugu. Oqaluttuat Biibilimeersut taakkua Judasip ’anusinngorsaatitut’ allaatigai. Allaat uppertut ’Jesus Kristusikkut paarisaasut’ uppernermit ilumoortumit tammaqqunatik mianersortariaqarput. — Jûtarse 1-7.

[Qupp. 8-mi ungalusaq]

SUNA EQQORTUUA?

Biibilimi allassimavoq: ’Inuk iluartuutitaassavoq uppernikkut, inatsisit suliareqqusaasigut pinnani.’ Aamma allassimavoq: ’Inuk sulianit iluartuutitaasarpoq uppernerinnarmillu pinnani.’ Sorleq ilumoorpa? Uppernikkut suliatigulluunniit iluartuutitaavugut? — Rûmamiut 3:28; Jâko 2:24.

Akissut ataqatigiissoq Biibilimeersoq tassa: marluullutik ilumoorput.

Ukiut hundredelikkuutaat matuma siornagut Moses aqqutigalugu juutit guutisiornerminni aalajangersimasunik pilliuteqartarnissaannik tunissuteqartarnissaannillu, nalliuttorsiortarnissaannik, maleruaqqussutinillu peqqussutinillu allanik Guutip piumasaqarfigai. ’Inatsisit suliareqqusai’ imaluunniit ’suliat’ taamaattut Jesusip naammalluinnartumik pilliuteqarnerata kingorna pisariaarupput. — Rûmamiut 10:4.

Jesusilli pilliutaata naleqangaartup Mosesip inatsisaanik atorunnaarsitsinera isumaqanngilaq Biibilip maleruaqqusaanik sumiginnaassasugut. Allassimavoq: ’Angeqqinganik Kristusip . . . aavata tarnissi nalunngissusiat minguersassavaa suliat inuussutaanngitsut piiarlugit Guutimut uumasumut kiffaalersillusi.’ — Eprîarit 9:14.

Qanoq ililluta ’Guutimut uumasumut kiffaalersinnaavugut’? Biibilimi allassimavoq uinngup suliai akiussagivut, silarsuullu ileqqorlunnera assortussagipput napititsiniaanerilu ingalanniassagivut. Allassimavoq: ’Iluartumik sorsunniarit upperluarlutit’, ’ajorti uatsinnik ninniortitseqqajaaginnartoq’ iperassagipput aammalu ’nikallujuerluta arpanniarta assoruunnitsinni uatsinnut siunertarititaasumi, uppernermillu aallarniisoq inerititsisorlu Jesus aarlorfigisigu’. Biibilillu kajumissaarpaatigut ’qasuleqqunata tarnitsigullu nikalloqqunata’. — 1 Timûtiuse 6:12; Eprîarit 12:1-3; Galâsiamiut 5:19-21.

Tamakkua iliuuseriinnarlugit annanneq akissarsiarisinnaanngilarput, pilluaqqussutit taama tupinnartigisut nalinginik inuk kinaluunniit iliuuseqarsinnaanngilluinnarpoq. Tunissulli taama naleqartigisoq pisinnaanngilarput asanninnerput naalannerpullu Guutip Kristusillu suliareqqusaanik Biibilimi allassimasunik iliuuseqarnikkut nittanngikkutsigik. Uppernerput Jesusimullu malinninneraanerput ersersinniarlugu sulissuteqanngikkutta uniuerujussuassaagut, Biibilimimi allassimavoq: ’Upperneq sulianik ilaqanngitsoq taamaannermini toqungavoq. — Jâko 2:17.

[Qupp. 7-mi assiliartaq]

Biibili atuaqqissaaruk taassumanngalu kajumissisinneqarit