Ilinniagaqarneq — Jehovamik unnersiutiginninnermut atoruk

’Imminik oqaluttoq imminik naalannartinniararaaq; aallartitsisiminilli naalannartitsiniartoq ilumoorpoq ilumigullu iluaassuseqarani.’ — JUÁNASE 7:18.

1. Qanga qanorlu ililluni ilinniartitsineq aallartissimava?

ILINNIARTITSINEQ itsarsuarli aallartissimavoq. Jehova Guutip, Ajoqersuisorsuup Perorsaasorsuullu, ernini angajulliliani pinngortissimatsiaannaraalu ilinniartitsineq aallartippoq. (Jesaja 30:20; Kulorsamiut 1:15) Ajoqersuisorsuarmit namminermit erneq taanna ilinniartinneqarpoq! Ukiorpassuit kisissaanngitsut ingerlaneranni Ataatami qanimut najornerani erneq taanna — kingorna inuttut Jesus Kristusitut ilisimaneqalersoq — Jehova Guutip pissusii, suliai siunertaalu pillugit nalilerujussuarnik ilikkagaqarsimavoq. Taamaattumik kingorna nunarsuarmi inuttut inuunermini Jesus ima oqarsimavoq: ’Isumannik qanoq iliunngilanga; kisianni soorlu Ataatama ajoqersoraanga taama oqaluppunga.’ — Juánase 8:28.

2-4. (a) Juánase kapitali 7 naapertussagaanni ukiumi 32-mi tupiusaliorfissiornermi Jesusip najuunnera qanoq qisuariarfigineqarpa? (b) Sooq juutit Jesusip ajoqersuillaqqissusia tupigusuutigaat?

² Jesusip ilinniartinneqarsimanini qanoq atorpaa? Ukiuni pingasuni affarmilu nunarsuarmi kiffartornermini qasujuilluni inuit allat ilinniarsimasaminik oqaluttuuttuartarsimavai. Tamannalu aalajangersimalluinnartumik siunertaqarfigineqarpoq. Sumik? îvangkîlio Juánasip agdlagâ kapitali 7 misissoriartigu, tassani ajoqersuutiminut pilerfiusoq siunertaasorlu Jesusip nassuiarpaa.

³ Kapitalimi tassani oqaluttuarineqarput ukiumi 32-mi ukiakkut, Jesusip kuisinneranit ukiut pingasut qaangiuttut, pisimasut. Juutit tupiusaliorfissiorniarlutik Jerusalemimi katersuussimapput. Nalliuttorsiornerup ulluini siullerni inuit Jesus oqallisigisorujussuuaat. Nalliuttorsiorneq qiterartoq Jesus naalaffiliarpoq ajoqersuilerlunilu. (Juánase 7:2, 10-14) Aasiit ajoqersuillaqqissutsi takutippaa. — Matîuse 13:54; Lúkarse 4:22.

⁴ îvangkîlio Juánasip agdlagâ 7:15-imi ima allassimavoq: ’Juutillu tupigusupput oqarlutik: „Qanoq ililluni uuma ilinniartitaanani allakkat ilisimavai?“’ Paasisinnaaviuk sooq tupigusuttut? Jesus juutit ilinniarfiini atuarsimanngilaq, taamaattumik taakkua isumaat malillugu ilinniagaqarsimasuunngilaq! Taamaakkaluartoq Allakkani Illernartuni allassimaffiit nalornisiginagit nanisarpai issuaaffigisarlugillu. (Lúkarse 4:16-21) Aap, allaat sanasup Galileamiup taassuma Mosesip inatsisaanik ilinniartissinnaavai! (Juánase 7:19-23) Tamanna qanoq ililluni pisinnaava?

5, 6. (a) Jesusip ajoqersuutini suminngaanneernerarpaa? (b) Jesusip ajoqersorneqarsimanini qanoq atorpaa?

⁵ Jesus versini 16-imi 17-imilu atuarsinnaasatsitut ima nassuiaavoq: ’Ajoqersuutiga uanga piginngilara, aallartitsisimali pigaa. Kinaluunniit taassuma peqqusaanik iliorumasoq misigissavoq ajoqersuut tamanna Guutimit pisimanersorluunniit uannilluunniit oqalunnersunga.’ Kimit ilinniartinneqarsimanini paaserusummassuk akivai Guutimit ilinniartinneqarsimalluni! — Juánase 12:49; 14:10.

⁶ Jesusip imminut ilinniartitsissutigineqarsimasut qanoq atorpai? Juánase 7:18-imi oqaluttuarineqartutut Jesus oqarpoq: ’Imminik oqaluttoq imminik naalannartinniararaaq; aallartitsisiminilli  naalannartitsiniartoq ilumoorpoq ilumigullu iluaassuseqarani.’ Jesusip ajoqersorneqarsimanerminik Jehovap, „tamanik nalusaqanngitsup“, naalannaatissaanut atuinera pissusissamisoorluinnarpoq. — Job 37:16.

7, 8. (a) Ilinniakkavut qanoq atortariaqarpavut? (b) Tamatigoortumik ilinniartitaaneq sunik sisamanik tunngaviusunik immikkoortoqarpa?

⁷ Taamaalilluta naleqangaartumik Jesusimit ilikkagaqarpugut — ilinniarsimasavut imminut ataqqinaatissamuunngitsoq Jehovalli unnersiutigineqarnerulernissaanut atortariaqarpavut. Ilinniarsimasat allatut pitsaanerusumik atorneqarsinnaanngillat. Qanorli ililluni Jehovamut unnersiutiginninnerulernissamut atorneqarsinnaappat?

⁸ Ilinniartitsineq isumaqarpoq „aalajangersimasumik periaaseqarluni, nakkutigineqartumillu sungiusaanikkut, piginnaassuseq, assassorluni suliassaq ilinniagassarluunniit alla pillugu atuartumik ilisimasaqalersitsineq“. Ilinniagaqarnerup siunertai tunngaviusut sisamat maanna sammeriartigik paasiniarlugu qanoq ilillutik Jehovap unnersiutigineqarnerulernissaanut atorneqarsinnaanersut. Oqimaaqatigiissumik tamatigoortumillu ilinniagaqarneq iluaqutigisariaqarparput (1) atuffarissunngornissamut (2) ersarissumik allassinnaanngornissamut, (3) ilisimasatigut ileqqussatigullu ineriartornissamut kiisalu (4) ulluinnarni suliassanut sungiusarnissamut.

Atuffarissarneq

9. Sooq atuffarissuunissaq pingaaruteqarpa?

⁹ Siullermik atuffarissunngornissaq sammissavarput. Sooq atuffarissuunissaq taama pingaartigaa? The World Book Encyclopedia-mi ima nassuiarneqarpoq: „Atuarsinnaaneq . . . ilinniarnissamut tunngaviuvoq ulluinnarnilu piginnaassutsinut pingaarnernut ilaavoq. . . . Inuit atuffarissut inuiaqatigiinnik pisuunerulersitseqataallutillu naammassisaqarnerulersitseqataasarput. Tamannalu ilutigalugu namminneq nalerisimaarnarnerusumik inuusarlutik.“

10. Guutip oqaasianik atuartarnerput qanoq ililluta inuunermi nalerisimaarnerulissutigisarparput?

¹⁰ Nalinginnaasumik atuarsinnaaneq pissutigalugu ’nalerisimaarnarnerusumik inuusinnaagutta’ Guutip oqaasianik atuaqqissaarneq suli annerungaartumik nalerisimaalissutigisinnaassavarput! Biibilimik atuaqqissaarnermi isumarput uummaterpullu Jehovap eqqarsaataanut siunertaanullu ammarneqartarput, tamakkuninngalu erseqqissumik paasinninneq inuunitsinnik siunertaqalersitsisarpoq. Aammami soorlu Eprîarinut agdlagkat 4:12-imi allassimasoq ’Guutip oqaasia uumavoq killinnartorsuullunilu’. Guutip oqaasia atuaraangatsigu eqqarsaatigeqqissaarlugulu atuakkiortua ornigilertarparput, taassumanngalu iluarisaanerulerumalluta inuunitsinni allannguinissatsinnut kajumissisinneqartarluta. (Galâsiamiut 5:22, 23; Evfisumiut 4:22-24) Aamma sallusuissutsit naleqangaartut ilikkakkatta allanut oqaluttuarinissaannut kajumissisinneqartarpugut. Tamakku tamarmik Ajoqersuisorsuarmut, Jehova Guutimut, unnersiutissaapput. Ilumummi, atuarsinnaassuserput allatut pitsaanerusumik atorsinnaanngilarput!

11. Tamatigoortumik nammineq atuaqqissaartarnitsinnut suut ilaasariaqarpat?

¹¹ Utoqqaagaluarutta inuusuttuugaluaruttaluunniit tamatta atuffarissarnissatsinnut kajumissaarneqarpugut, atuarneq kristumiutut inuunitsinnut ilaammat pingaartoq. Guutip oqaasianik atuaqqissaartarnitta saniatigut ullormut allassimaffimmik Ullut tamaasa Allakkat misissortakkit-meersumik, Napasuliaq Alapernaarsuiffik-mik Iteritsi!-millu atuartarneq kiisalu kristumiut ataatsimiinnerinut piareersarneq tamatigoortumik atuartakkatsinnut ilaasariaqarput. Oqaluussisarnermi? Tamanut oqaluussinermi, soqutiginnittunik pulaaqqiinermi angerlarsimaffimmilu Biibilimik atuaqqissaaqatiginninnermi atuffarissuunissaq soorunami pisariaqarpoq.

Ersarissumik allannermik ilinniarneq

12. (a) Sooq erseqqissumik allassinnaalernissaq pingaaruteqarpa? (b) Allanneqarsimasuni suna pingaarnersaava?

¹² Aappassaanik, tamatigoortumik ilinniagaqarneq ersarissumik allassinnaalernissamut iluaqutigisariaqarparput. Allassinnaaneq  oqaatsinik ingerlatitsinissamut piinnarani aamma oqaatsinik atatitsinissamut atorneqartarpoq. Ukiorparpassuit matuma siorna juutit 40-t missaanniittut allaffissianut naasunik amermillu sanaanut isumassarsisitaallutik allatsinneqarsimapput ataatsimut tassaalersunik Allakkat Illernartut. (2 Timûtiuse 3:16) Tamanna allagaqarsimanerit pingaarnerpaartaraat! Oqaatsinik illernartunik tamakkuninnga ukiut hundredelikkuutaat ingerlaneranni assiliilluni allattarneq qularnanngitsumik Jehovap siulersortarpaa, taamaalillutik allanngornatik uagutsinnut anngussinnaaqqullugit. Qujamasuutiginnginnerparput Jehovap oqaatsini oqaatsitigut ingerlateqqitassanngortiinnarnagit allanneqartissimammagit? — Naleqqiuguk Mosesimik allakkat aappaat 34:27, 28.

13. Suup takutippaa Israelikkut allassinnaasimasut?

¹³ Itsaq inuit nuimasuinnaat, soorlu Mesopotamiami Egyptenimilu allattartut, kisimik ilinniagaqartarsimapput. Tamatuma akerlerluinnaanik inuiaat Israelikkut akornanni kikkut tamarmik ilinniagaqarnissaminnik kajumissaarneqartarsimapput. 5 Moses 6:8, 9-mi allassimasutut Israelikkut illuminni matserfimmut allaqquneqarput; allannissaannik peqqussut tamanna assersuutaannaagunaraluartoq taamaattoq allassinnaanerannik ersersitsivoq. Meeqqat mikisunnguunerminnit allannermik  ilinniartinneqalertarsimapput. Gezerip Qaammatisiutai, hebriiarisuutoqqatut allakkat pisoqaanerpaat ilaat, tassaasorineqarput nukappiaqqap atuartup eqqaamallaqqissunngorniarluni sungiusaatitut allagarisimasai.

14, 15. Allassinnaanerput sunut pitsaasunut iluaqutaasunullu atorsinnaavarput?

¹⁴ Qanorli ajunngitsumik peqqinnartumillu allassinnaanerput atorsinnaavarput? Kristumiut ataatsimiinnerini ataatsimeersuarnerinilu allattuisarnitsigut. Allakkat naatsunnguugaluit napparsimasumut qiimmassaataasinnaasorujussuupput, imaluunniit qatanngummut angummut arnamulluunniit inoroorsaarsimasumut qujalluni allattoqarsinnaavoq. (1 Pîtruse 5:12) Ilagiinnut ilaasut ilaat asasaminik toqukkut annaasaqarsimappat allakkat naatsunnguit sinnerluta taassuminnga tuppallersaasissinnaavavut. (1 Tásalûníkamiut 5:14) Qatanngut arnaq anaanaminik kræftertumik toqusoorsimasoq ima oqarpoq: „Ikinngutit ilaata nuannersunik allaffigaanga. Tamanna iluaqutaaqaaq, tassa atuaqattaartuarsinnaagakkit.“

¹⁵ Aamma allakkatigut Guutip naalagaaffia pillugu nalunaajaanikkut Jehovamik unnersiutiginnittoqarsinnaavoq. Soqutiginnilerlaat avinngarusimasumi najugallit allakkatiguinnaq attaveqarfigineqarsinnaasarput. Napparsimaneq pissutigalugu illumiit illumut angalaarsinnaajunnaarallaraanni oqaasissaraluit allakkatigut ingerlateqqinneqarsinnaapput.

16, 17. (a) Guutip naalagaaffia pillugu nalunaajaalluni allannerup naleqassusia misigisimasap suup takutippaa? (b) Misigisimasamik assingusumik taasaqarsinnavit?

¹⁶ Misigisimasaq manna eqqarsaatigeriassagit: Ukiorpassuit matuma siorna nalunaajaasoq uillarnermut, uia toqusoq aviisikkut nalunaarutigineqarmat, Guutip naalagaaffia pillugu nalunaajaalluni allassimavoq. Akineqanngilaq. Taavali 1994-imi novembarimi, ukiut 21-nit amerlanerusut qaangiuttut, nalunaajaasoq uillarnerup panianit allagarsivoq. Taanna ima allappoq:

¹⁷ „1973-imi apriilimi ataatama toqunerata kingorna anaanannut allapputit. Taamani uanga qulingiluanik ukioqarpunga. Anaanaga Biibilimik atuaqqissaaqatigineqartaleraluarpoq, sulili Jehovamut kiffanngunngilaq. Atuaqqissaartarnerali pissutigalugu uanga sallusuissut ilikkarsimavara. 1988-imi Biibilimik atuaqqissaartalerpunga — ilinnit allagarsinitsinnit ukiut 15-it qaangiuttut. 1990-imi marsip 9-ani kuisippunga. Ukiorpassuit matuma siorna allakkannut qujamasoqaanga, nuannaaqaangalu ilisimatissinnaagakkit naatsiiassat siaruartersimasatit Jehovap ikiuineratigut inerititaqalersimasut. Allakkatit anaanama uannut tunniunnikuuai, maannalu kinaanerit paaserusukkaluarpara. Neriuppunga allakkakka ilinnut apuutissasut.“ Allagai, najukkaminik oqarasuaatimilu normuanik ilanngussiffigisimasai, nalunaajaasumut ukiorpassuit matuma siornatigut allassimasumut apuupput. Takorlooruk arnaq inuusuttoq qanoq tupaallatsigisoq nalunaajaasumit — Guutip naalagaaffia pillugu nalunaajaalluni suli allattartumit — sianerfigineqarami!

Ilisimasaqarnerulerneq ileqqussatigullu anersaakkullu ineriartorneq

18. Biibilip nalaani angajoqqaat meeqqaminnik ilisimasassatigut ileqqussatigullu qanoq ilinniartitsisarsimappat?

¹⁸ Pingajussaanik, oqimaaqatigiissumik ilinniagaqarneq ilisimasatigut ileqqussatigullu ineriartornissatsinnut iluaqutigisariaqarput. Biibilip nalaani meeqqanik ilinniartitsineq ileqqussatigullu unnersuussineq angajoqqaat pisussaaffiisa pingaarnerit ilaattut isigineqarsimavoq. Meeqqat atuarnermik allannermillu ilinniartinneqaannaratik, pingaarnerpaamik, Guutip inatsisaanik, inuunermi sunut tamanut attuumassuteqartunik, ilinniartinneqartarsimapput. Upperisarsiornikkut pisussaaffiinik aammalu aappariinnut, ilaqutariinnut kinguaassiuutitigullu najoqqutassianik kiisalu inoqatiminnut pisussaaffiinik ilinniartinneqartarsimapput. Taamatut ilinniartitaanertik ilisimasassatiguinnaanngitsoq ileqqussatiguinnaanngitsorlu aammali anersaakkut ineriartornissaminnut iluaqutigisarsimavaat. — 5 Moses 6:4-9, 20, 21; 11:18-21.

19. Ilinniartitsineq ileqqussatigut najoqqutassanik pitsaanerpaanik takutitsisoq anersaakkullu ineriartornissamut iluaqutigisinnaasarput sumi nassaassaava?

 ¹⁹ Ullumikkummi? Pitsaasumik ilinniagaqarnissaq pingaaruteqarpoq. Sianissutsikkut ilisimasatigullu ineriartornissamut iluaqutaasarpoq. Sumili inuunermi ileqqussatigut najoqqutassatsinnik anersaakkullu ineriartuutigisassatsinnik ilinniartinneqarsinnaavugut? Ilagiinni kristumiuni allami nassaassaanngitsumik teokratii tunngavigalugu ilinniartinneqarsinnaavugut. Nammineq Biibilimik atuaqqissaartarnitsigut atuagassianillu Biibililersaarutaasunik atuartarnitsigut, kiisalu ilagiit ataatsimiittarneri ataatsimeersuartarnerillu aqqutigalugit unnersuunneqartarnitsigut nalissaqanngitsumik siuariartortumik ilinniartinneqarsinnaavugut — tassa akiliinngikkaluarluta Guutimit ajoqersorneqarsinnaavugut! Sunik ajoqersorneqartarpugut?

20. Guutimit ajoqersorneqarnermi sunik ilinniartinneqartarpugut, qanorlu kinguneqartarpa?

²⁰ Biibilimik atuaqqissaaleratta ajoqersuutit tunngaviusut, ’ajoqersuutaasut aallaqqaataat’, ilinniarsimavavut. (Eprîarit 6:1) Piffissap ingerlanerani ’mattusuunik nerisalerpugut’ — tassa sallusuissutsinik itisuunik. (Eprîarit 5:14) Tamatumali saniatigut aamma qanoq inooriaaseqarnissatsinnut Guutip najoqqutassiai ilinniarpavut. Assersuutigalugu, ileqqut iliuutsillu ’uinimmut mingunnartut’ ingalannissaat aammalu oqartussaasunut, inunnut allallu pigisaannut ataqqinninnissaq ilinniarpavut. (2 Korintumiut 7:1; Títuse 3:1, 2; Eprîarit 13:4) Tamakkualu saniatigut unneqqarissuunissap eqiasuitsuunissallu pingaaruteqassusiat paasivarput; kinguaassiuutitigullu ileqqussatigut Biibilip maleruaqqusaanik maleruaanissap naleqassusia ilikkarlutigu. (1 Korintumiut 6:9, 10; Evfisumiut 4:28) Najoqqutassiallu tamakku inuunitsinni atornerujartuinnartillugit anersaakkut ineriartorpugut  Guutimullu attaveqarnerput nukittunerujartorluni. Guutimik mianerinnilluta inooriaaseqarnitta sumiikkaluaruttaluunniit innuttaalluartunngortippaatigut. Tamannalu pissutigalugu inuit allat Ajoqersuisorsuarmik — Jehova Guutimik — unnersiutiginnilernissaminnut kajumissisinnaapput. — 1 Pîtruse 2:12.

Ulluinnarni suliassanik ilinniarneq

21. Biibilip nalaani meeqqat ulluinnarni suliassanik sunik ilinniartinneqartarsimappat?

²¹ Sisamassaanik, pitsaasumik tamatigoortumillu ilinniagaqarneq ulluinnarni suliassanut sungiusarnissamut iluaqutigisarparput. Biibilip nalaani angajoqqaat meeqqanik ilinniartitsinerannut ulluinnarni suliassanut sungiusaaneq ilaasimavoq. Niviarsiaqqat illumi suliassanik ilinniartinneqartarsimapput. Ussatit kapitaliisa kingullianni erserpoq tamakku assigiinngitsorpassuusimasut. Qissineq, ikaartiterineq, nerisassiorneq illumilu pissarsianik atuineq nakkutiginninnerlu ilinniartarsimavaat, kiisalu nioqqutissianik pigisanillu pisinissartik tuniniaanissartillu ilinniartarsimallugit. Nukappiaqqat ataatamik suliaannik ilinniartinneqartarsimapput, soorlu nunalerinermik, assassorluni suliamik allamilluunniit. Jesus ataatassaminit Josefimit sanasutut ilinniartinneqarsimavoq; taamaattumik ’sanasup erneranik’ taaneqaannarani aamma ’sanasumik’ taaneqartarsimavoq. — Matîuse 13:55; Mákorse 6:3.

22, 23. (a) Meeqqat suut ilinniartariaqarpaat? (b) Pisariaqassappat ilinniagaqaqqinnissatsinnut suna siunertarisariaqarparput?

²² Ullumikkuttaaq tamatigoortumik ilinniartitaaneq ullut arlaanni ilaqutariinnik pilersuilernissamut piareersarnermik ilaqarpoq. Apustili Paulusip 1 Timûtiuse 5:8-mi oqaasiisigut erserpoq ilaquttanik pilersuineq pisussaaffiusoq illernartoq. Ima allappoq: ’Kialuunniit ilani annerusumillu inoqutini isumaginngikkunigit, taassuma upperneq soraarussimavaa uppinngitsumit ajornerulluni.’ Taamaattumik meeqqat ulluinnarni akisussaaffinnik tigusinissartik inuiaqatigiinnilu sulilluartunngornissartik ilinniartariaqarpaat.

²³ Silarsuarmi ilinniartitaaneq qanoq annertutigisumik kristumiup inuusuttup anguniagaqarfigissavaa? Tamanna nunamit nunamut assigiinngissinnaavoq. Suliffittaarnissamulli inatsisitigut piumasarineqartumit annerusumik ilinniagaqarnissaq piumasarineqarpat angajoqqaat meeqqatik ilinniakkamik qinersinissaannik ikiorsinnaavaat, iluaqutaasut ajoqutaasullu isumaliutigalugit. Taavami ilinniagaqaqqittariaqarluta aalajangerutta suna siunertarisariaqarparput? Pisuussutit imminullu ataqqinartinniarnissaq soorunami pinnagit. (Ussatit 15:25; 1 Timûtiuse 6:17) Jesusip maligassiaanit ilinniarsimasarput eqqaamajuk — ilinniagaqarneq Jehovap unnersiutigineqarnerulernissaanut atortariaqarpoq. Ilinniagaqaqqinniarluta aalajangerutta siunertarisariaqarparput Jehova sapinngisamik tamakkiisumik kiffartuussinnaaqqullugu naammattumik imminut pilersorsinnaanissarput. — Kulorsamiut 3:23, 24.

24. Jesusimit ilikkagarput suna puiunngisaannartariaqarparput?

²⁴ Taamaattumik eqiasuilluta pisariaqartumik ilinniagaqarniarta. Qanortoq siumukariartortumik Guutimit ajoqersorneqarneq Jehovap peqatigiissortaani pissarsiarisinnaasarput tamakkiisumik iluaqutigisigu. Qanortorlu Jesus Kristusimit, nunarsuarmi inuit ilinniarluarsimanerpaartaannit, ilikkagarput naleqangaartoq puiunngisaannartigu — illinniartitaaneq imminut ataqqinaatissamuunngitsoq ilinniartitsisulli annerpaartaannut, Jehova Guutimut, unnersiutiginninnerulissutissatut atussagipput! (wE 1/2 96)

Qanoq akissavit?

□ Jesusip ajoqersorneqarsimanini qanoq atorsimavaa?

□ Sooq atuffarissarnissaq pingaaruteqarpa?

□ Allassinnaanerput qanoq ililluta Jehovamik unnersiutiginninnermut atorsinnaavarput?

□ Guutimit ajoqersorneqarneq qanoq ililluta ileqqussatigut anersaakkullu ineriartornissatsinnut iluaqutigisarparput?

□ Ulluinnarni suliassat suut oqimaaqatigiissumik ilinniartitsinermut ilaasariaqarpat?

[Atuaqqissaarnermi apeqqutit]

[Qupp. 20-mi ungalusaq]

Ilinniartitsisunut ikiuut

1995/96-imi ataatsimeersuarnerni „Unnersiutiginnittut nuannaartut“-​mik qulequtalinni Napasuliaq Alapernaarsuiffiup Peqatigiiffiata saqqummersippaa atuagassiaaraq Jehovas Vidner — skole og undervisning. Atuagassiaaraq 32-​nik quppernilik qalipaatilillu tamanna ilinniartitsisut eqqarsaatiginerullugit naqitigaavoq. Manna tikillugu oqaatsinut 58-inut nutserneqarsimavoq.

Sooq ilinniartitsisut eqqarsaatigalugit atuagassiaaraliortoqarpa? Atuartuutimik Jehovamut nalunaajaasuusunik angajoqqaallit upperisaannik paasinnissinnaaneruleqqullugit. Atuagassiaaraq sunik imaqarpa? Ilinniagaqaqqinneq, inuuissiornerit, juulli erfalasumillu ilassinninneq pillugit isummavut erseqqissumik ajunngitsumillu nassuiarneqarput. Atuagassiaaqqami aamma erseqqissarneqarpoq kissaatigigipput meeqqatta atuarnerminni sapinngisamik annertuumik pissarsiaqarnissaat, kiisalu ilinniartitsisunik suleqatiginnikkusuttugut, meeqqatta atuarnerat soqutigilluinnarlugu.

Atuagassiaaraq nutaaq qanoq atorsinnaavarput? Atuagassiaaraq ilinniartitsisut eqqarsaatiginerullugit allagaammat ilinniartitsisunut, atuarfiup pisortaanut allanullu atuarfimmut attuumassuteqartunut agguaanniartigu. Qanortoq atuagassiaaqqap ilinniartitsisut isumatsinnik upperisatsinnillu kiisalu sooq ilaannikkut allaanerunissamut pisinnaatitaaffitsinnik atuisarnitsinnik paasisaqarnerulernissaannik ikiorligit. Angajoqqaat meeqqamik ilinniartitsisuinik oqaloqateqartarnerminni atuagassiaaqqap aallaavittut atortarnissaanut kajumissaarneqarput.

[Qupp. 18-mi assiliartaq]

Itsaq Israelimi ilinniartitsineq assut pingaartinneqarsimavoq