Jehovap piumasaa malissimavaat

Moses aamma Aron — Guutip oqaasianik oqaluussisartut sapiitsut

TAKORLOORIASSAGIT: Angut 80-inik ukiulik, Moses, qatanngutaalu Aron Nunarsuarmi pissaaneqarnerpaap — Egyptenimi Faraop — saavani qeqarput. Egyptenimiut Farao guutit aallartitaannit annerusutut isigaat. Ilami guutitut isigaat. Horusip, guutip kissaviarsuttut niaqullip, Isis Osirisilu peqatigalugit ataasiullunilu pingasuusup Egyptenip guutiisa angutit arnallu akornanni pingaarnerpaamut ilaasup, ingerlaqqissutaatut Farao isigineqarpoq.

Faraomut palliguttup kialuunniit maluginngitsuugassarinngilaa niaqorutaata qeqqani pulateriaarsuup niaquata assinga mersernarpasissoq. Upperineqarpoq pulateriaarsuk taanna Faraop akeraanut innermik aseruinermillu qanerminit aniatitsisinnaasoq. Maanna Moses Aronilu kunngimut guutiuutigisumut taassumunnga sassarput qaqutigoorluinnartumik qinnuiginiarlugu — Israelikkut inussiaataasut aallartissagai Guutertik, Jehova, nalliuttorsiutiginiassammassuk. — 2 Moses 5:1.

Jehovap siulittuutigereersimavaa Faraop uummataa manngertikkumaartoq, taamaattumik Moses Aronilu tupaallanngillat Faraop unammillerpaluttumik ima akimmatik: „[Jehova] taanna kinaammat naalassavara Israelikkullu aallarnissaat akueralugu? [Jehova] taanna naluara, Israelikkullu aallarnissaat akuerissanngilara.“ (2 Moses 4:21; 5:2) Akerleriinnersuaqalernissaa ilimanarsivoq. Tullianik Faraomut sassaramik Moses Aronilu Guutimit ajugaqanngitsumit ilumoortumillu aallartitaanerminnut tupinnartunik nalunaajaateqarput.

Tupinnartuliamik pisoqarpoq

Aron Jehovap ilitsersuussutai malillugit tupinnartuliorpoq takutillugu Jehova Egyptenip guutiinit qutsinnerungaartoq. Ajaappissani Faraop saannguanut miloriuppaa, ingerlaannarlu pulateriaarsussuanngorpoq! Farao nalornisoortorujussuuvoq angakkuartartullu aggeqqutillugit. * Angutit taakkua anersaapilunnit ikiorneqarlutik tupinnartuliorlutik ajaappissatik aamma pulateriaarsunngortippaat.

Farao palasiilu nuannaarsimassagunik, nuannaarnerat sivikitsuinnaasimassaaq. Pulateriaarsuutitik tulleriiaarlugit Aronip pulateriaarsuutaata iioralermagit kiinaat takorluukkit! Najuuttut tamarmik takusinnaavaat Egyptenip guutii Guutimut ilumoortumut, Jehovamut, nallersuussinnaanngitsut. — 2 Moses 7:8-13.

Allaalli tamatuma kingorna Faraop uummataa manngerteqqajuarpoq. Aatsaat Guuti perlunnik qulinik Egyptenimut nalliutititsereermat kiisami Farao Mosesimut Aronimullu oqarpoq: „Ilissi Israelikkullu tamassi uanga innuttakkalu qimalluta aallarasuarniaritsi, [Jehovalu] guutisiorfigiartorsiuk soorlu taamaaliorumallusi qinnuteqarsimasusi.“ — 2 Moses 12:31.

Sumik ilinniarfigisinnaagipput

Egyptenip naalagarsuanut Faraomut palligunnissaminnut Mosesip Aronillu suna sapiillissutigaat? Siusinnerusukkut Mosesip nammineq piginnaanerminut tatiginninnginnini ersersereersimavaa, oqarsimalluni ’oqallorissuunani oqalunniarnerlu eqarisarlugu’. Allaat Jehovap najorumaaraani neriorsoqqissaarneqareeraluarluni Moses ima oqarpoq: „Immaqa pitsaanerussagaluarpoq allamik aallartitaqaruit.“ Allatut oqaatigalugu ilungersorluni Guuti qinnuigaa allamik aallartitseqqullugu. (2 Moses 4:10, 13) Jehovalli Moses qanilaartoq  suliassamik tamatuminnga naammassinninnissaanut ilisimassuseqalersereerlugu nakussatsereerlugulu aallartippaa. — 4 Moses 12:3.

Ullumikkut Jehova Guutimut Jesus Kristusimullu kiffaasut ’inunnik inuiannit tamaneersunik ajoqersuganngortitseqqussut’ naalappaat. (Matîuse 28:19, 20) Piginnaanivut Biibilimillu ilisimasavut pitsaanerpaamik atoraangatsigik suliamut tamatumunnga peqataasarpugut. (1 Timûtiuse 4:13-16) Piginnaaneqanngiffigisatta eqqarsaatigivallaarnissaannut taarsiullugu Guutip suliassiissutaanut tamanut akuersisarniarta. Piumasami malinnissaanut naammattumik nakussatsillutalu piginnaassusilertassavaatigut. — 2 Korintumiut 3:5, 6; Filípimiut 4:13.

Moses inunnit anersaapilunnillu akerlilersorneqartussaasimavoq, taamaattumillu Guutimit ikiorneqarnissani assut atorfissaqartissimallugu. Tamaattumik Jehovap manna qulareqqunngilaa: „Faraomut guutisut ilersippakkit.“ (2 Moses 7:1) Aap, Guutip Moses annertoqqusersorpaa oqartussaassusilerlugulu. Jehovap anersaavanit ikiorneqarami Faraomut naalakkalluunniit pingaarniartup taassuma iliinut ersisariaqanngilaq.

Uaguttaaq kiffartornerput naammassisinnaassagutsigu Jehovap anersaava illernartoq, pissaanera sulisoq, tunaartarisariaqarparput. (Juánase 14:26; 15:26, 27) Guutip ilagippatigut Davidip oqaasii uku ilaarsinnaavavut: „Guuti tunaarigakku siooranngilanga. Inuit soriarsinnaanngilaannga.“ — Tussiaat 56:12.

Jehovap naakkinninnermini Moses suliassaminik naammassinninniarnerani kisimiitinngilaa. Guuti oqarpoq: „Angajut Aron ilinnut pruffiitiussaaq. Ilinnut peqqussutigisakka tamaasa Aronimut oqaatigisassavatit, taassumalu Faraomut oqaatigisassavai.“ (2 Moses 7:1, 2) Ilumut Jehova asannik Moses sapinngisai qaangerlugit piumaffiginnginnamiuk!

Uppeqatitsinnik Jehovamut, Qutsinnerussaartumut, nalunaajaasuunermik unamminiarnartumik ilassinnissimasunik peqateqartarnissarput Guutip isumagisarpaa. (1 Pîtruse 5:9) Taamaattumik akornutissarsisaraluarluta Mosesitut Aronitullu Guutip oqaasiinik oqaluussissutiginnittartuuniarta sapiitsut. (wE 15/1 96)

[Quppernerup ataani ilanngussaq]

[Qupp. 23-mi assiliartaq]

Moses Aronilu Jehova sinnerlugu sapiillutik Faraomut sassarput