Naalagaaffimmik oqaluussissutiginninnermit nutaarsiassat

’Silarsuarmi qaammaqqutaasutut qaamasut’

JEHOVAP NALUNAAJAASUI allanit immikkoorput aalersortikkumannginnertillu pissutigalugu kusanaatsumik avammut saqqummiunneqartarlutik. Aalajangiusimanninneralli tamanna Biibilimik tunngaveqarluinnarpoq. Biibilimi ersersinneqarpoq Guutip aammik atornerluineq ajorigaa, aak isimini nalilerujussuummat. (1 Moses 9:3, 4; 3 Moses 17:14) Biibilimik misissueqqissaarnermikkut Jehovap nalunaajaasuisa paasisimavaat Biibilimi ’aammik nereqqusinngissummut’ ilaasoq ullumikkut aalersuisarneq. — apustilit suliait 15:19, 20, 28, 29.

Ukiuni kingulliunerusuni nunat ilaanni nakorsaanermik eqqartuussinermillu suliaqartut tamatumunnga tunngatillugu Jehovap nalunaajaasuinik tapersiisarsimapput. Assersuutigalugu, Danmarkimi anaanaq inuusuttoq aak pillugu Biibilip isumaanik ilisimannittoq biilimik ajutoornikkut ajunaarpoq. Aalersortikkumasimannginnera pissutigalugu tusagassiuutit taassuma nakorsaanit ikiorneqarlutik qaammatini arlalinni Jehovap nalunaajaasuinut akeqqersimaarpaluttumik saqqummiusseqattaarput.

Arnap inuusuttup angajoqqaavi maalaarummik allagaqarput, apriilimilu 1994-imi suliaritittut maalaartarfiat aalajangiivoq. Nalunaarutigineqarpoq aalersortikkumannginnini pissutiginagu nakorsalli kukkunerat pissutigalugu toqusimasoq. Aalajangiussineq Retslægerådip peqqinnissaqarnikkullu oqartussaasut misissuinerinik tunngaveqarpoq. Kingusinnerusukkut sundhedsstyrelsep Danmarkimi napparsimmaveqarfinnut tamanut kaajallaasitami nalunaarutigaa nakorsat nukinginnartumik pisoqartillugu pisussaatut Jehovap nalunaajaasui aalersortikkumanngikkaluartut nakorsaariaatsit allat atorlugit pitsaanerpaamik suliarissallugit.

Dan, nalunaajaasoq 15-inik ukiulik, aammigut kræfterluni toquvoq. Tamatumuunakkut nakorsat Danip sapiilluni aalersortikkumanani aalajangiusimanninnera ataqqivaat. Tamannattaaq tusagassiuutitigut assut eqqartorneqarpoq, nakorsat Danip toquneranut pisuutinneqarlutik. Pisuutitsiniaanerli tamanna amerlasuunit isumaqatigineqanngilaq.

Assersuutigalugu, Danip atuarfigisimasaani pisortaq taassuma ilisaanerani naalagaaffilersaarfimmi najuussimavoq. Danip toquneranut atatillugu tusagassiuutitigut saqqummiunneqartunik illuinnarsiortunik ingasaginninnini oqaatigaa. Oqaluussisartoq atuarfimmi sulisoq Jehovap nalunaajaasui pillugit arlalissuarnik apersoreerlugu atuarfiup pisortaa videomik Jehovas Vidner og deres organisation-mik tunineqarpoq. Video tupigusuutigingaaramiuk ilinniartitsisoqatiminut takutippaa. Kingorna atuartunut tamanut, klassit tamaasa ataasiakkaarlugit, takutippaa.

Aamma Danmarkimi peqqinnissaqarnikkut naalakkersuisup nakorsat Danip aalajangiusimanninneranik ataqqinnissimasut ajortumik eqqartorneqarnerat isumaqatiginngilaa. Oqarpoq nakorsat eqqortumik iliorsimasut Danip aalajangiusimanninnera inersimarpaluttoq upperneralu tunngaveqarluartoq ataqqisimagamikku.

Guutip naalagaaffianik oqaluussissutiginnittartut Guutip inatsisaanut naalattut millionilikkuutaajupput. Naalannertik tamanna pissutigalugu allanit immikkoorput ’silarsuarmi qaammaqqutaasutut qaamallutik’. — Filípimiut 2:12, 15. (wE 1/2 96)