Tuppallersarneqarneq qiimmassarneqarnerlu

AMERLANERSATTA ’samanerujussuarmiinneq’ misigisareersimavaat — aningaasatiguunngikkaluartoq, misigissutsikkulli. Immaqa nikallungasimavugut imaluunniit nanertisimarujussuarsimalluta. Taamaannitsinnili qularnanngitsumik naleqartumik, atukkatsinnik oqinnerulersitsisumik, tunineqarsimavugut, tassa qiimmassarneqarnermik.

Biibilimi oqaaseq griikerisooq ataasiinnaq ’qiimmassaanermut’ ’tuppallersaanermullu’ atorneqarpoq. Oqaatsit taakku marluk tamarmik sapiissuseqalersitsinermik, nakussatsitsinermik neriuuteqalersitsinermillu imaqarput. Taamaattumik sanngiitsutut nanertisimasutullu misigigaangatta tuppallersarneqarnissarput qiimmassarneqarnissarpullu tamanit pisariaqartinnerpaasarparput. Qanorli ililluta tuppallersarneqarlutalu qiimmassarneqarsinnaavugut?

Biibilimi neriorsoqqissaarneqarpugut Jehova tassaasoq ’Guuti tamanik tuppallersaasoq’. (2 Korintumiut 1:3) Aamma allassimavoq Guuti ’tamatsinnit ungasinngikkaluaqisoq’. (apustilit suliait 17:27) Tassa tuppallersaatissinneqarnissaq qiimmassaatissinneqarnissarlu ajornanngillat. Jehovap qiimmassaatissiuinerpaaffii sisamat sammilaariartigik.

Nammineq Guutimut attaveqarnikkut

Nammineq inuttut Jehova Guutimut attaveqarneq tuppallersaatissarsiffissat annerpaartaraat. Attaveqarnerup taamaattup anguneqarsinnaanerinnaaluunniit qiimmannartuuvoq. Silarsuarmi naalakkat ilaata sianerfigigutsinni oqaluukkumassanerpaatigut, imaluunniit ajornartorsiutitsinnik inuttut soqutiginninnermik ersersitsiumassanerpa? Jehova inunnit taakkunannga qutsinnerulluinnarpoq. Taamaakkaluartorli maniguuttuuvoq — inukulunnguit naammalluinnanngitsut samminissaannut pinaasinngisaannarpoq. (Tussiaat 18:36) Jehova allaat siulliulluni iliuuseqarsimavoq uagutsinnullu asanninnini ersersissimallugu. Juánasip agdlagai sujugdlît 4:10-mi allassimavoq: ’Tamassa asanninnerup pissusia: uagut Guuti asagatsigu pinngilaq, kisianni taassuma asammatigut, ernilu aallartimmagu ajortitta matoorneqaatissaannik.’ Aammalu Jehovap asannilluni ernerminut kajungersippaatigut. — Juánase 6:44.

Asanninneq tamanna qisuariarfigereerpiuk Guutimillu ikinnguteqarnikkut tuppallersaatissarsisimallutit? (Naleqqiuguk Jâko 2:23.) Qularnanngitsumik nuannaraat isumakuluutitit soqutigisatillu, ilimasuutitit nuannaarutitillu pillugit qanimut ikinngummik tatigisamik ammasumik oqaloqateqassallutit. Jehovap imminut taamatut attaveqarnissannik kajumissaarpaatit. Qinunikkut imminut qanoq sivisutigisumik oqaluttarnissarput killilinngilaa — aamma tusarnaartarpoq. (Tussiaat 65:3; 1 Tásalûníkamiut 5:17) Jesus qamannga pisumik qinukulasarsimavoq. Ilami apustilini aqqaneq-marluk qinernialeramigit unnuaq naallugu qinusimavoq. — Lúkarse 6:12-16; Eprîarit 5:7.

Tamatta aalajangersimasumik Jehova kisimeeqatigisarsinnaavarput. Assersuutigalugu, kisimiilluta igalaap saavani issiatilluta imaluunniit pisuttuartilluta qinunikkut Jehovamut uummatitta ammarnissaanut periarfissaqarluartarpugut. Tamanna assut toqqissinarlunilu tuppallernarsinnaavoq. Eqqarsarluarlutalu Jehovap pinngortitarsua qimerloorsinnaagutsigu — immaqa nuissat, naasut imaluunniit timmissat — qularnanngitsumik Jehovap uagutsinnik qamannga asanninneranik eqqaasinneqassaagut. — Rûmamiut 1:20.

Guutip oqaasianik nammineq atuaqqissaarnikkut

Pingaarnerpaamik nammineq Biibilimik atuaqqissaarnikkut Jehovap pissusii paasilluinnarneqarsinnaapput. Biibilimi ersersinneqartuartarpoq Jehova tassaasoq „Guuti nallittuisoq, saammaasoq, kamajasuunngitsoq, isumassuingaartoq unneqqaringaartorlu“. (2 Moses 34:6; Nehemja 9:17; Tussiaat 86:15) Jehovap kiffaminik nunarsuarmiittunik tuppallersaarusussusia pissusianut ilisarnaataavoq tunngaviusoq.

 Assersuutigalugu, Jehovap oqaasii Jesaja 66:13-imi allassimasut eqqarsaatigeriakkit: „Soorlu anaanaasup qitornani tuppallersartaraa, taamatut uanga tuppallersassavassi.“ Anaanaasoq meeqqaminik ilumoorfiginnittussatut imminullu pilliutigeriaannaalluni asannittussatut Jehovap piliarisimavaa. Anaanamik asannittumik meeqqaminik annertumik tuppallersaasumik takunnissimasup kialuunniit paasisinnaassavaa Jehova qanoq isumaqartoq oqarami innuttani tuppallersassallugit.

Biibilimi oqaluttuarineqartut ilarpassuini taamatut tuppallersaaneq takuneqarsinnaavoq. Dronningip ajortup Jesabelip toqumik sioorasaarmani pruffiiti Elias sapiissuseerussimavoq annakkumallunilu qimaasimalluni. Ima sapiissuseerussimatigaaq ulloq naallugu inoqajuitsumi pisuinnaq ingerlaarsimalluni, imermik taquassaminilluunniit nassataqarunarani. Ernumaqaluni Eliasip Jehova oqarfigaa toqorusulluni. (1 Kunngit 19:1-4) Pruffiitini tuppallersarniarlugu qiimmassarniarlugulu Jehova qanoq iliorpa?

Kiserliornera, ersinera atorsinnaanngitsutullu misiginera pillugu Jehovap Elias naviinngilaa. Pruffiitilli „nipi eqqissisimarpaluttoq sallaatsorlu tusarpaa“. (1 Kunngit 19:12, NV) Kunnginik allakkat siulliit, kapitali 19, atuarukku malugissavat Jehovap qanoq ililluni Elias tuppallersarlugulu eqqissisaraa, uppernikkullu nakussatsillugu. Tuppallersaanera qallikkuinnaanngilaq. Eliasip uummataanik ernumasumik killiivoq, suliaminik nangitsinissaanut kajumissisillugu. (Naleqqiuguk Jesaja 40:1, 2.) Erniinnarlu suliassani ingerlateqqilerpaa.

Jesus Kristusip ajoqersukkani aalajaatsut assingusumik tuppallersarlugillu qiimmassartarpai. Esajasip Messias ima siulittuutigisimavaa: „Guutip [Jehovaasup] . . . aallartippaanga . . . neriuutaaruttut neriuuteqalerseqqullugit, . . . aliasuttut tamaasa tuppallersaqqullugit.“ (Jesaja 61:1-3) Jesusip nunarsuarmi inuunermini uppernarsarsimavaa oqaatsit taakku imminut tunngatinneqartut. (Lúkarse 4:17-21) Tuppallersarneqarnissat pisariaqartikkukku Jesusip nikallungasunik annikilliortunillu inussiarnersumik asannittumillu isumassuisarsimanera isumaliutigeqqissaassagukku iluaqutigissaqaat. Ilumummi Biibilimik peqqissaartumik atuarneq annertuumik tuppallersarneqaataallunilu qiimmassaataasarpoq.

Ilagiit aqqutigalugit

Ilagiit kristumiut annertuumik tupallersaatissarsiffiullutillu qiimmassaatissarsiffiusarput. Apustili Paulus isumassarsisitaalluni ima allassimavoq: „Taamaattumik tuppallersaqatigiillusilu ineriartorteqatigiigitsi.“ (1 Tásalûníkamiut 5:11, NV) Ilagiit ataatsimiinnerini tuppallersarneqarneq qiimmassarneqarnerlu qanoq ililluni misigineqarsinnaappat?

Soorunami pingaarnerpaamik ’Guutimit ajoqersorneqarniarluta’, aammalu taanna taassumalu aqqutigeqqusai pillugit ilinniartinneqarniarluta, kristumiutut ataatsimiittarpugut. (Juánase 6:45) Ilinniartitsinerup tamatuma qiimmassarneqarnissarput tuppallersarneqarnissarpullu siunertaraa. apustilit suliáinik agdlagkat 15:32-mi Ny Verden-nutsigaq naapertussagaanni ima allassimavoq: ’Judasip Silasillu qatanngutigiit oqaatsinik amerlasuunik qiimmassarpaat nakussatsillugillu.’

Misiginikuuiuk nikallungallutit ataatsimiigiarlutit qiimmallutillu angerlarlutit? Immaqa oqalugiaammi, oqaaseqartoqarnerani qinunermiluunniit saqqummiunneqartoq pisariaqartumik tuppallersarneqaatigalugulu qiimmassutigisimavat. Taamaattumik ataatsimiigianngitsoornaveersaartarit. — Eprîarit 10:24, 25.

Qatanngutivut angutit arnallu oqaluussinermi allamiluunniit ilagigaangatsigik assingusumik misigisaqarsinnaasarpugut. Oqaluutit hebriiarisuut arlallit „qilerpaa“-mik isumaqartut piffissap ingerlanerani „nakussatsippaa“-mik isumaqartilerneqarsimapput — nassuitsumik ilumoortoq manna aallaavigalugu: suulluunniit imminnut kattutitinneqaraangamik nukittunerulersarput. Tamanna ilagiinnut aamma atuuppoq, katisimaqatigiittarnitsigut tuppallersarneqarlutalu, qiimmassarneqarlutalu nakussatsinneqartaratta. Katisimasarnitsinni asanninnerup, qilerutit tamarmik nukittunerpaartaata, kattutsittarpaatigut. — Kulorsamiut 3:14.

Ilaannikkut aalajaassuseq qatanngutitta angutit arnalluunniit ersersitaat qiimmassaatigisarparput. (1 Tásalûníkamiut 3:7, 8) Ilaannikkut asanninneq uagutsinnut ersersitaat. (Fîlimût 7) Ilaannikkullu Guutip naalagaaffianik allanut oqaluussissutiginninnitsinni aaqqiagiilluta suleqatigiinnerinnarput. Oqaluussinermi qiimmassarneqarnissat nakussatsinneqarnissallu pisariaqartikkukku  utoqqarmik oqaluussisartumilluunniit misilittagaqarluartumik oqaluussiartoqatissarsiorniarit! Qularnanngivissumik nakussatsinneqaatigissavat. — Nalunaajaasup oqaasii 4:9-12; Filípimiut 1:27.

„Inussiaq aalajaallunilu silatooq“ aqqutigalugu

Pallorfiginninnitsinni qiimmassaataasut tamakku kimit aaqqissorneqartarpat? Jesusip eqimattat „inussiaq aalajaallunilu silatooq“-mik taasani piffissanngoraangat anersaakkut inuussutissiuisussanngortissimavai. (Matîuse 24:45, NV) Kristumiut anersaamik kinguaassiarititaasut eqimattat taakku ukiuni hundredelinni siullerni sulilereersimapput. Utoqqaanertat siulersuisoqatigiiusut Jerusalemimiittut ilagiinnut ajoqersuutaasunik unnersuussutaasunillu allagaqartarsimapput. Qanoq kingunilimmik? Biibilimi ima oqaluttuarineqarpoq: ’Tamakkulu atuaramikkik tuppallersaat tipaatsuutigaat.’ — apustilit suliait 15:23-31.

Ulluni ajornakusoortuni makkunani inussiaq aalajaallunilu silatooq assingusumik anersaakkut inuussutissiuisarpoq. Inuussutissat tamakku Jehovap innuttaanut tupallersaataallutillu qiimmassaataasaqaat. Inuussutissat tamakku aamma illit iluaqutigisarpigit? Anersaakkut inuussutissat tamakku atuagassiani inussiaqatigiit nunarsuaq tamakkerlugu siaruartigaanni pissarsiarineqarsinnaapput. Atuagassiat Napasuliaq Alapernaarsuiffik aamma Iteritsi!, kiisalu atuakkat, atuagassiaaqqat naqitaaqqallu Napasuliaq Alapernaarsuiffiup Peqatigiiffianit naqiterneqartartut atuartartorpassuaminnut tuppallersaataasarsimaqaat.

Nakkutilliisoq angalasartoq ima allassimavoq: „Qatanngutitta angutit arnallu amerlanersaasa eqqortumik iliornissartik kissaatigaat, amerlasuutigulli pakatsinermik, siooranermik imminullu ikiorsinnaanngitsutut misiginermik akiugassaqartarput. Atuagassiaatitsinni ilanngutassiat inuppassuit inuunerminnik misigissutsiminnillu aqutsilernissaminnut iluaqutigisimavaat. Aammalu utoqqaanertat ilanngutassiat tamakku atorlugit nakussatsissutaalluinnartumik qiimmassaasinnaapput.“

Atuagassiat inussiaqatigiinnit aalajaatsuneersut tamakkiisumik atortarniakkit. Atuagassiat, atuakkat atuagassiaaqqallu tamakku ulluni ajornakusoortuni makkunani inuttut ataasiakkaatut tuppallersaatissarsiffigisinnaavavut. Allanittaaq nikallungasunik qiimmassaanissannut periarfissaqaruit atuagassiani paasissutissat Biibilimut tunngasut atortakkit. Ilanngutassiat qinunikkut siulersorneqarluni peqqissaartumillu allagaapput, amerlasuutigut sapaatit-akunnerpassuini qaammaterpassuarniluunniit misissuereernikkut peqqissaartumillu atuaqqissaareernikkut allataasarlutik. Siunnersuutit Biibilimik tunngaveqarput, misilerarneqareerlutillu iluaqutaanerat paasineqareersimalluni. Ilaat ilanngutassiamik ataatsimik marlunnilluunniit nikallungasumik atuaqateqarnermikkut ikiuisinnaasimapput. Nikallungasumut tuppallersaataallutillu qiimmassaataasaqaat.

Nalilerujussuarmik allanut tunniussinnaasaqarputit. Ilagiinni qatanngutinnut angutinut arnanullu tuppallersaasarnissat qiimmassaasarnissallu anguniagariniaruk. Isaterinak qarmaasaruit, ’eqqarsariaqqaarnak panatut kapisisunik oqalunnak’ ’ajoqersukkap oqaanik’ oqaluttaruit, allanut ajunngitsumik iliorsinnaasassaatit. (Ussatit 12:18; Jesaja 50:4) Tassaassaatit tuppallersaatip qiimmassaatillu puilaffiat. (wE 15/1 96)

[Qupp. 32-mi assiliartaq]

Jehova, Guuti tamanik tuppallersaasoq, qinnutitsinnut tusarnaartarpoq