Ajoqersuganngortitsinikkut nuannaarneq naniuk

NUANNAARNERIT anguneqarsinnaasut annerpaartaasa ilaat tassaavoq Guutimut suleqataaneq. Ullumikkut inuit naapertuilluartumik isumallit kristumiut ilagiissaannut katersorneqarnissaat, maannakkut kristumiutut inuunissamik siunissamilu silarsuassamut nutaamut aniguinissamik ajoqersorneqarnissaat Guutip suliareqqusaasa ilagaat. — Mika 4:1-4; Matîuse 28:19, 20; 2 Pîtruse 3:13.

Amerika kujallermi qiterlermilu Jehovap nalunaajaasuisa nuannaarutigingaarpaat takullugit 1980-imiit inuit 1 millionit sinnerlugit Jesus Kristusimut ajoqersuganngorsimasut. Oqaluussiffimmi tamatumani Biibili ataqqineqarlunilu upperineqarmat piffissaq tamaat oqaluussisartut ilaasa inuit qulillit arlallit Jehovamut tunniulluinnarnissaannut ikiorsimavaat. Taama misilittagaqarluartigigamik immaqa ajoqersuganngortitsinermut atatillugu nuannaarneq pillugu oqaluttuussinnaavaatigut. Immaqa taakkua siunnersuutaat iluaqutigalugit illit najugaqarfinni ajoqersuganngortitsinikkut nuannaarneq nanisinnaavat.

’Savat’ nanillugit

’Sumulli illorpalimmut nunaqarfimmulluunniit pigaangassi, siunersiuisaritsi, qinngaqqunnanngitsumik tassaniittoqarnersoq,’ Jesus apustilini oqaluussiartortileramigit taama oqarsimavoq. (Matiuse 10:11) Inuit kasuttorfigigaangakkit qanoq ilillutit nalunngissinnaaviuk kikkut anersaakkut ikiorneqarsinnaanersut? Edward, ukiut 50-t sinnerlugit piffissaq tamaat oqaluussisartuusoq, ima oqarpoq: „Inuit taamaattut ilumoorlutik aperisarput  Biibililu tunngavigalugu akineqaraangamik nalerisimaarutigisarlugu.“ Carol ima ilaliivoq: „Inuup ajornartorsiumminik isumakuluutigisaminilluunniit paasitippanga nalunarneq ajorpoq ikioqqusoq. Taava Napasuliaq Alapernaarsuiffiup Peqatigiiffiata naqitigaani paasissutissanik iluaqutaasinnaasunik ujarlertarpunga. Taamatut inuttut soqutiginninnermik ersersitsineq Biibilimik atuaqqissaaqatigineqalernerannik kinguneqarsinnaasarpoq.“ Taamaattoq peqqusersuitsut naniuminaannartanngillat. Luis ima oqaluttuarpoq: „Ilaat assut soqutiginnippasikkaluartut paasinarsisinnaasarput soqutiginninngitsut, allallu aallaqqaammut assortuisuugaluartut Biibilimi qanoq allassimasoqarnersoq paasileraangamikku allanngortarput.“ Amerika kujallermi inuppassuit Biibilimik ataqqinnittuupput. Luis oqarpoq: „Paasisimavara inuk anersaakkut ikiorneqarsinnaasartoq Biibilimi ajoqersuutigineqartunik takutinneqaraangami akuerinasuartarunigit.“ Inunnik ’qinngaqqunnanngitsunik’ anersaakkut siumukarnissamik ikiuineq nuannaarnermik nalerisimaarnermillu nassataqartarpoq. Qanoq ilillutit taamaaliorsinnaavit?

Biibilimik atuaqqissaaqateqalerneq

Allat sallusuissummik Biibilimeersumik paasitinniarlugit Biibililersaarutit ’inussiap aalajaallunilu silatuup’ pilersitaasa atornissaat pitsaanerpaasarpoq. (Matîuse 24:45, NV) Qanoq ililluta allat Biibililersaarutit tamakkua naleqassusiannik pingaartitsilernissaannik ikiorsinnaavavut? Edward ima oqarpoq: „Inuit atukkamikkut, pissutsimikkut isummamikkullu assigiinngimmata Biibilimik atuaqqissaaqateqalerniarninni periaatsit assigiinngitsut atortarpakka.“ Tassa kikkunnut tamanut periaaseq ataasiinnaq atorsinnaanngilarput.

Ilaannikkut pisariaqarpoq atuakkamik atuaqqissaaqatigiissutissamik neqerooruteqartinnani Biibilimut tunngasumik arlaleriarluni oqaloqatigeeqqaarnissaq. Kisianni aappariit ajoqersuiartortitat ima oqaluttuarput: „Amerlanertigut pulaaqqaarnermi atuaqqissaaqatigiinnissaq neqeroorutigisarparput.“ Nalunaajaasoq alla, inunnik 55-inik tunniulluinnarnissamut ikiuisimasoq, assingusumik ima oqarpoq: „Biibilimik atuaqqissaaqateqalerniaraangama atuagaq pâratîsime nuname nâgssáungitsumik inûsínauvutit ingerlaannaq innersuussuteqarfigisarpara.“ Naak ilaasa atuaqqissaarneq nuannarinngikkaat allat inuunerminni iluaqutaasinnaasut tamaasa misissorusuttaqaat. Inuit taamaattut angerlarsimaffimminni akeqanngitsumik Biibilimik atuaqqissaaqatigineqarnissartik pissanganartittarpaat. Ajoqersuiartortitat ilaasa periarfissaq tamanna neqeroorutigisarpaat, taava oqartarput: „Takutikkusuppara qanoq iliortartugut. Iluarigukku ingerlaqqissinnaavugut. Iluarinngikkukku illit aalajangiisussaavutit.“ Taamatut neqeroorfigineqaraangamik inuit akuerissallugu nangaannginnerusarput.

Nalunaajaasoq alla piitsunik ilinniagaqarsimanngitsunillu arlalinnik ikiuisimasoq oqarpoq: „Paasisimavara Biibilimik atuaqqissaaqateqalernermi naqitaaqqat iluaqutaasorujussuusut.“ Naqitat suulluunniit atoraluaraangamikkik ajoqersuiartortitat Biibili pingaarnerpaatittarpaat. Carola oqarpoq: „Atuaqqissaaqqaarnermi assilissat aamma allassimaffiit tallimat missaannaat atorniartarpakka pingaarnersat erseqqissarniarlugit Biibililu paasiuminarsarniarlugu.“

Soqutiginninneq atatinniarsariuk

Inuit siumukarnissartik nuannarisarpaat, taamaattumik Jennifer ima siunnersuivoq: „Atuaqqissaarneq uummaarissumik siumukariartortumillu ingerlaguk.“ Atuaqqissaarneq aalajangersimasumik sapaatit-akunneri tamaasa ingerlanneqartarpat  ilinniartut siumukarlutik misigissapput. Specialpioneerit ilaasa nunaannarmi alliartorsimasup tikkuarpaa paasiuminartumik nassuiaanerit aamma pingaarnerusunik erseqqissaaneq qanoq pingaaruteqartigisut, inuit ilinniagakitsut aamma siumukarsinnaassappata. Soqutiginnittut ilaat amerlasuunik apeqqutissaqartarput aalajangersimasumik sammisaqarnissartik saperlugu. Ajoqersuiartortitat ilaat ima oqarpoq: „Ullut tamaasa pingasoriarlutit nerisartarputit — ullaakkorsiortarputit, ulloqeqqasiortarlutit unnukkorsiortarlutillu. Nerisassalli tamakku tamaasa ataatsikkut neriniaraluarukkit aqajaqquit artussavai. Biibili tunngavigalugu paasissutissat amerlavallaartut ataatsikkut paasiniaraluarukkit anersaakkut artussavatit. Taamaattumik ullumi eqqartukkavut amerlanngitsut eqqarsaatigiinnassavatit, sapaatillu akunnerata tullia taakkununnga allanik ilanngussissaagut.“ Allaat inuit paasisaqarusuttorujussuit siumukassagunik aalajangersimasumik ataasiinnarmik sammisaqarnissartik ilinniartariaqarpaat. Jesusip apustilini ima oqarfigisimavai: ’Ilissinnut suli oqaasissaqangaaraluarpunga, maannali artorallarpasi.’ — Juánase 16:12.

Soqutiginninneq aamma atatinneqarsinnaavoq pulaarfigisavut kajumissaartarutsigik anigutta Guutip oqaasia eqqarsaatigeqqeqqullugu. Yolanda ima siunnersuivoq: „Anileruit eqqarsariaallannartumik kingorna oqaluuseriumaagassassinnik apeqquteqarit. Atuagassaannik suliassaqartikkit, soorlu Biibilimi allassimaffiit aalajangersimasut atuarnissaannik imaluunniit imminnut soqutiginaatilimmik misissuinissaannik.“

Jehovamut asanninnermik ineriartortitsineq

Atuaqqissaaqativut ’oqaaseq naammassillugu tusaaginnarnagulu pinissaannik’ ikioraangatsigik nuannaarnerulertarpugut. (Jâko 1:22) Qanoq ililluta taamaaliorsinnaavugut? Kristumiut ilumoortut Jehovamik asanninnerminnit killinneqarlutik iliuuseqartarput. Pedro Mexicomeersoq ima nassuiaavoq: „Inuit ilisarisimanngisartik asasinnaanngilaat, taamaattumillu atuaqqissaaqatigeeqqaarnermiit Guutip aqqanik Biibilimiittumik ilinniarteqqaartarpakka, Jehovallu pissusiisa erseqqissarsinnaanissaanut periarfissat eqqumaffigisarlugit.“ Oqaloqatigiinnissinni atuaqqissaaqatit Jehovamik pingaartitsilersinniarsinnaavat nammineq taassumunnga misigissutsivit oqaluttuarisarnerisigut. Elizabeth ima oqarpoq: „Jehovap ajunngissusia eqqartortuarniartarpara. Atuaqqissaaqateqartillunga naasoq kusanartoq, timmiaaraq qitsuararluunniit pinnguartoq takugaangakkit oqartarpunga tassaasut Jehovap piliai.“ „Guutip silarsuassaa neriorsuutigisaasoq piviusutut eqqartortaruk, tassami nalunnginnakku taamaattoq,“ Jennifer taama siunnersuivoq. „Aperisakkit silarsuassami nutaami sulererusussinnaanersut.“

Inuup ilinniarsimasani pingaartillugit eqqarsaatigeqqissaartarunigit uummamiugilissavai iliuuseqalernissaminullu killinneqassalluni. Aatsaalli eqqaamagunigit eqqarsaatigeqqissaarsinnaassavai. Atuaqqissaaqatigiinnerup kingorna pingaarnerit pingasut sisamalluunniit uteqqittaraanni eqqaamasaqarnissamut iluaqutaasorujussuussaaq. Biibilimik ilinniartitsisut amerlasuut soqutiginnittut kajumissaartarpaat allassimaffinnik pingaarnernik eqqaamasassaminnik oqaasertalilaarlugit Biibilimik tunuani allattueqqullugit. Ajoqersuiartortitap Tuluit Nunaanneersup uteqqiisarnerup iluaqutissartaasa ilaat alla ima eqqaavaa: „Aperisarpakka paasissutissat oqaloqatigiissutigisimasavut iluaqutigisimaneraat. Tamatuma Jehovap aqqutaanik inatsisaanillu pingaartitsinermik eqqarsaatiginnilersittarpai.“

Nalunaajaasoq aalajaatsoq Atuarfimmi Gileadimi klassit pingajuannit soraarummeersimasoq oqarpoq: „Angorniornissaq pingaartorujussuuvoq. Atuaqqissaaqatitta malugisinnaasariaqarpaat ilinniartitsissutigisavut upperigivut.“ Upperisaq ilinnik ’pilluarlutit suliassamik naammassinnilersitsisoq’ allanut sunniuteqarluarsinnaavoq oqaatigigukku. — Jâko 1:25.

„Inuit Guutimut qaninnerusutut misigisarput qinnutiminnut akissutit takusinnaalernissaannut ikiorneqarunik,“ nalunaajaasoq arlalinnik Jehovamik pallorfiginnittunngornissamut ikiuisimasoq taama oqarpoq. „Nammineq misigisimasakka assersuutigisarpakka, soorlu manna: Pioneereqatigalu oqaluussiffigisassatsinnut nutaamut tikeqqaaratta naatitaalunnguit makkariinalu kisiisa pigaavut, aningaasaateqaratalu. Unnukkut tamaasa nerivavut oqarluta: ’Aqagussamut sussaqanngilagut.’ Tamanna Guutimut saqqummiupparput. Aqaguani nalunaajaasut ilaat tamaani najugaqartoq aggerpoq ima oqarluni: ’Jehova qinnuigisimavara pioneerinik maanga aallartitseqqullugu. Maanna taamaalioreermat ulloq naangajallugu angalaaqatigisinnaalerpassi, nunaannarmili najugaqarama ilissinnut neriartortariaqarpunga, tamatsinnullu nerisassanik nassarpunga.’ Nassatai tassaapput nersussuup neqerujussua naatitarpassuillu. Atuaqqissaaqatikka oqaluttuuttuartarpakka Naalagaaffik salliutsikkaangatsigu Jehovap qimanngisaannaraatigut.“ — Matîuse 6:33.

Arlaatigut ikiuigit

Kristusimut ajoqersuganngortitsiniarneq Biibilimik atuaqqissaaqatiginninnerinnaanngilaq. Ajoqersuiartortitaq ukiorpassuit nakkutilliisutut angalasartutut kiffartorsimasoq oqarpoq: „Piffissaqarfiginiartakkit. Atuareerussi anippallassanngilatit. Naleqquppat isersimaannarit oqaloqatigilaarlugillu.“ Elizabeth ima oqarpoq: „Soqutigaakka inuunerat pineqarmat. Nammineq meeqqattut pillugit isukuluutigisarpakka.“ Nalunaajaasut allat ima siunnersuipput: „Napparsimagaangata pulaartakkit.“ Angerlarsimaffiata eqqaaniikkaangavit, assersuutigalugu oqaluussitillutit, iserfigilaartakkit nalunaajaasut allat taakkununnga ilisaritinniarlugit.“ Eva oqarpoq: „Tusarnaaqqissaartarit soqutiginnittup tunuliaqutaa pissutsillu atugai paasiniarlugit. Tamakkua inuup sallusuissummut qisuariarneranut sunniuteqartaqaat siumukarnissaanullu akornutaasinnaallutik. Taakkununnga ikinngutaagit tatiginnilersinniarlugit ajornartorsiutiminnik oqaluttuarsinnaaqqullugit.“ Carolilu ima nangippoq: „Pingaaruteqarluinnarpoq atuaqqissaaqatip inuttut soqutigilluarnissaa, tassami sallusuissut inuuneranut allanngortitsissammat immaqa ilaquttat ikinngutillu alarnerannik kinguneqartumik. Amerlanertigut pitsaassaaq atuaqqissaaqatitta najugaqarfipput nalunngippassuk misigalutillu sukkulluunniit pulaarsinnaallutik.“ Soqutiginnittut ikiortakkit ilagiit ilaquttamissut nutaatut isigileqqullugit. — Matîuse 10:35; Mákorse 10:29, 30.

„Arlaatigut ikiuisinnaanissat eqqumaffigiuk. Ataatsimiinnerni issiaqatigisakkit meeraannillu ikiortarlugit,“ Yolanda taama oqarpoq. Qanoq ilillutik meeqqaminnik ajoqersuisinnaanerannik, eqqiluisaarnerulersinnaanerannik, ataatsimiinnerni akinissaminnut teokratiimillu atuarfimmi saqqummiussassamik piareersarsinnaanerannik nutaanik ilinniartitsineq ajoqersugaanngortitsiniarnermut ilaavoq. Qatanngut arnaq alla ima ilanngussivoq: „Nutaat oqaluussinissamut ilinniartinneqarnissaat pingaaruteqarluinnarpoq. Tamanna sumiginnarneqarpat ilaasa oqaluussinissartik nangaassutigiuassavaat, Jehovamik kiffartornermi nuannaarnertik katassallugu naggataatigullu nakkaannassallutik.“  Taamaattumik illumiit-illumut oqaluussinissamut, pulaaqqiinissamut Biibilimillu atuaqqissaaqateqalernissamut ilinniarteqqissaakkit. Atuaqqissaaqatit ilinnit ikiorneqarluni siumukarpat nuannaarutigingaassavat.

Nikallujuittuarnissaannut nakussatsikkit

„Nutaat ilaasa kuisereeraangamik atuaqqissaartarneq sumiginnartarpaat,“ ajoqersuganngortitsinikkut misilittagaqarluartoq taama mianersoqqusivoq. Ilinniartitsisup ilinniartullu tamarmik eqqaamasariaqarpaat kuiserlaaq suli anersaakkut inersimasunngunngimmat. Uppernikkut, Guutip inatsisaanik pingaartitsinikkut aammalu Jehovamut asanninnikkut ineriartortuartariaqarpoq. Nammineq atuaqqissaartarnermik ileqquliussilluarnissaanik kajumissaarneqarnissaa pingaartorujussuuvoq, siumukartuarsinnaaqqullugu. — 1 Timûtiuse 4:15.

Nutaaq immaqa qatanngutigiinnut ilaasortaasutut inoroorsaarumatulernissaminut ikiorneqartariaqarpoq. Immaqa qatanngutit allat attavigileriartortillugit taakkua naammalluinnanngissusiannik kamaginninnissaminik unnersuunneqartariaqarpoq. (Matîuse 18:15-35) Allanik ajoqersuillaqqissunngussaguni namminerlu itisiliilluni atuaqqissaarsinnaalissaguni ikiorneqarnissani pisariaqartissinnaavaa. Ajoqersuiartortitaq oqaluttuarpoq: „Ilinniartut ilaat kuisereerluni ajoqersuisinnaanikkut siumukarusuppoq, taamaattumik oqarfigaanga: ’Sapaatip-akunnerata tulliani nutaamik atuaqqissaaqateqalissaanga, kisianni kapitalit atuarsimasakka siulliit eqqaamaniarlugit uteqqilaartariaqarpakka. Illit ikiorsinnaavinga kapitalinik tamakkuninnga atuaqqissaaqatigalunga, taava allassimaffiit assersuutillu nassuiarneqarnerat maluginiarluassavakka namminerlu atuaqqissaaqatissannut atorlugit?’ Taanna ilinniartitsillaqqissorujussuanngorpoq, atuaqqissaaqataasalu ilaat sisamat ataatsimeersuarnermi ataatsikkut kuisipput.“

Sooq ajoqersuganngortitsiniarneq imminut akilertartoq

„Ajoqersuganngortitsigaangatta Jehovamik unnersiutiginnittut amerliartortarput. Sallusuissummik ilassinnittut inuunissamik periarfissaqalertarput,“ Pamela taama oqarpoq. „Allat sallusuissummik ajoqersorlugit nuannareqaara — suliaq nuanneqimmat! Isigalugit ilinniartut siumukariartortut, inuunerminni allanngortitsillutik akornutissarpassuillu Jehovap anersaava ikiortiginagu qaangerneqarsinnaanngitsut ajugaaffigisarlugit. Jehovamik asannilersimasut ilarpassui ikinngutigillualersimavakka.“

„Ajoqersuganngornissamut ikiorsimasakka eqqarsaatigigaangakkit,“ ajoqersuiartortitaq Tysklandimeersoq oqaluttuarpoq, „ilaat inuttut ittoortorujussuusimagaluit Guutimut kiffatut tupinnaqisumik siumukarsimapput. Takusimavakka akornutissarpassuarnik ajugaaffiginnissimasut, nalunanngivissumik Jehovap ikiuineratigut. Takusarpakka ilaqutariit avissaarsimagaluartut maanna inooqatigiilluartut — meeqqat pilluartut angajoqqaallu akisussaassuseqarluartut. Takusarpakka inuit inuuneq siunertaqarluartoq nuannaarutigalugu Jehovamik unnersiutiginnittut. Tassa ajoqersuganngortitsinerup nuannersua!“

Aap, Jehova Guuti suleqatigalugu ajoqersuganngortitsineq nuannaarnermik nalissaqanngitsumik kinguneqartarpoq. Ajoqersuiartortitat pioneerillu misilittagaasa tamanna takutittarpaat. Illittaaq nuannaarneq assingusoq misigisinnaavat siunnersuutit eqqartorneqareersut qamannga pisumik atortarukkit. Jehovap pilluaqqusineratigut nuannaarnerit alliartuinnassaaq. — ússatit 10:22, nutsigaq pisoqaq; 1 Korintumiut 15:58. (wE 15/2 96)