„Assatit nakkangatinnaviikkit“

„Assatit nakkangatinnaviikkit, ilinniimmat [Jehova] Guutit, pissarsuaq, annaassisoq!“ — SEFANJA 3:16, 17.

1. Zefaniasip siulittuutaa pillugu Biibilimik ilisimasalik qanoq oqarsimava?

ZEFANIASIP siulittuutaa ukiunik naatsorsuisalerfitta siornagut ukiut hundredellit arfineq aappassaanni arfinilissaannilu taamaallaat eqquuttussaanngilaq. Professori C. F. Keil Biibilip atuagartaa taanna pillugu nassuiaateqarnermini ima allappoq: „Zefaniasip siulittuutaa . . . silarsuaq tamakkerlugu eqqartuussummik tusarliussamik aallartiinnanngilaq, tassami Judap ajortuliai pillugit silarsuarmilu inuiaat Jehovap innuttaanut akeqqersimaarnerat pillugu taakkununnga eqqartuussut kingusinnerusukkut eqqartorneqarpoq; siulittuummi tamarmi Jehovap ullussarsua amiilaarnartoq allaatigineqarpoq.“

2. Zefaniasip nalaani pissutsit ullumikkullu kristumiuunerartut akornanni pissutsit sukkut assigiissuteqarpat?

² Ullumikkut Jehova aalajangersimavoq inuiaat katersortinniarlugit aseruinermillu Zefaniasip nalaani pisimasumit annertunerujussuarmik eqqorniarlugit. (Sefanja 3:8) Ingammik inuiaat kristumiuunerartut Guutip isaani assuarnaatilipilussuupput. Soorlu Jerusalem Jehovamut ilumuunnginnini pillugu annertuumik pillaatissinneqarsimasoq, taamatut kristumiuunerartut ileqqorlungaarnertik pillugu Guutimit pisuutitassaapput. Zefaniasip nalaani Judamut Jerusalemimullu Guutip eqqartuussutai ullumikkut oqaluffeqarfinnut kristumiuunerartunullu assigiinngitsunut annertunerujussuarmik tunngapput. Taakkuattaaq pallorfiginninneq minguitsoq ajoqersuutiminnik Guutimik ataqqinaataajaasunik, ilarpassui Guutimik nalusuneersunik, mingutsissimavaat. Ernitik peqqissut millionilikkuutaat nalitsinni sorsunnerup pilliivianut pilliutigisimavaat. Kiisalu Jerusalemitoqqap assingani innuttaasut kristumiussutsitut taasartik ullorissat najoqqutaralugit siulittuiniarnermik, anersaarsiornermik kinguaassiuutitigullu kanngunartuliornermik maajunnartumik Ba’alisiornermut eqqaanartumik akoorsimavaat. — Sefanja 1:4, 5.

3. Ullumikkut silarsuarmi siuttut naalakkersuisullu qanoq oqaatigineqarsinnaappat, Zefaniasilu qanoq siulittuiva?

³ Kristumiuunerartut iluini naalakkersuinikkut siuttuusut ilaasa naalagiartartutut ilisimaneqassallutik nuannarisaqaat. Judamili „kunngit erneri“ assigalugit ilarpassuisa „løvesut uiannisaartutut“ ’amaqqutullu’ perlilersutut inuit atornerluttarpaat. (Sefanja 3:1-3) Naalakkersuinikkut kiffaasa ’naalakkamik illui nakuusernikkut peqquserluttuliornikkullu katersukkaminnik immersimavaat’. (Sefanja 1:9, NV) Akiliilluni peqquserlutsitsineq ileqqorlunnerlu atugaaqaat. Kristumiuunerartut iluini avataannilu naalakkersuinikkut oqartussaasut amerliartuinnartut katersaarsuit Jehovaataa innuttai, nalunaajaasui, makitasaarfigisarpaat ’immikkoorniaqatigiittullu’ narrunartutut iliorfigisarlugit. (Sefanja  2:8; apustilit suliait 24:5, 14) Naalakkersuinikkut siuttut taama ittut malittaallu pillugit Zefanias ima siulittuivoq: „Sølviutitik kuultiutitillu annaanneqaatigisinnaanngilaat ullormi [Jehovap] kamaffissaani. Nunarsuaq tamarmi nungutinneqarumaarpoq taassuma ilungersorneranit innertut ittumit, nunarsuarmi ineqartut tamaasa nungutikkumaarmagit tassaanngaannaq nungutilluinnarlugit.“ — Sefanja 1:18.

’Ullormi Jehovap kamaffissaani qimarnguissarsisut’

4. Suup takutippaa Jehovap ullussarsuani aniguisoqarumaartoq, aniguisussalli qanoq iliortariaqarpat?

⁴ Judap inui tamakkeratik ukiunik naatsorsuisalerfitta siorna ukiut hundredellit arfineq aappassaanni nungutitaapput. Taamatuttaaq Jehovap ullussarsuani aniguisoqarumaarpoq. Taakku Jehovap pruffiiti Zefanias aqqutigalugu ima nalunaarfigai: „Teqqalatinneqanngikkallartillusi karrit qalipakuisut, [Jehovap] kamanneranit innertut ittumit eqqorneqanngikkallartillusi, ullussaq [Jehovap] uumitsaffissaa ilissinnut nalliutinngikkallartillugu. [Jehova] ujarsiuk nunap inuini makitajuitsortaasusi, peqqussutaanik maleruaasusi tamassi. Iluarsuseq noqqaassutigisiuk, makitajuissuseq noqqaassutigisiuk. Immaqa taava qimarnguissarsiumaarpusi ullormi [Jehovap] kamaffissaani.“ — Sefanja 2:2, 3.

5. Ullumikkut naggatissap nalaani kikkut siulliullutik Zefaniasip siulittuutaa qisuariarfigaat, taakkulu Jehovap qanoq atorsimavai?

⁵ Silarsuup naggatissaata nalaani maani kajumissaarummik siulittuutaasumik ilassinnittut siulliit tassaapput anersaakkut Israelikkut, kristumiut tanitaasut, sinneri. (Rûmamiut 2:28, 29; 9:6; Galâsiamiut 6:16) Iluarsuseq maniguussuserlu noqqaassutigereerlugu Jehovallu eqqartuussissutissatut aalajangigaanut ataqqinninnermik ersersitsereerlutik 1919-imi Babylonimit Angisuumit, upperisarsiornerup ilumuunngitsup silarsuarmi tamarmi naalagaaffissuanit, aniguisitaapput Guutimillu iluarisaaqqilerlutik. Taamanimiit, ingammillu 1922-miit, sinneruttut aalajaatsut Jehovap oqaluffeqarfinnut kristumiuunerartunullu assigiinngitsunut, kiisalu naalakkersuinikkut naalagaaffinnut, eqqartuussutai qunusuillutik oqaluussissutigisalerpaat.

6. (a) Aalajaatsut sinneruttut pillugit Zefanias qanoq siulittuisimava? (b) Siulittuut tamanna qanoq ililluni eqquussimava?

⁶ Sinneruttut aalajaatsut taakku pillugit Zefanias ima siulittuivoq: „Akornassinni amiakkuutikkumaarpakka inuiaqatigiit sanngiitsut [nikanartut, NV] makitajuitsut, Israelikkunnilu amiakkuutitaasut atera tunaarissavaat. Iluaatsuliussanngillat sallussanatillu, oqaatsinik peqquserluutaasunik qanermiugisaqassanngillat; nerisassaqarfimminni uninngaarumaarput annilaarsarneqaratik.“ (Sefanja 3:12, 13) Kristumiut tanitaasut taakkua Jehovap aqqa salliutittuaannarsimavaat, ingammik 1931-mi Jehovap nalunaajaasuinik taaguuteqaleramik. (Jesaja 43:10-12) Jehovap kisimi oqartussaassusianik apeqqutip erseqqissarneratigut Guutip aqqanik naalannartitsisimapput, tamannalu taakkununnga qimarnguinngorsimavoq. (Ussatit 18:10) Jehovap naammattorsuarnik anersaakkut nerisassaqartissimavai, sioorassutissaqaratillu anersaakkut paratiisimiipput. — Sefanja 3:16, 17.

„Tamarmik akornanni tusaamasaalersissavassi ataqqinarsisissallusilu“

7, 8. (a) Siulittuut alla suna anersaakkut Israelikkut sinnerinut qanoq ililluni eqquussimava? (b) Inuit millionilikkuutaat suna paasilersimavaat, tamatumunngalu atatillugu qanoq isumaqarpit?

⁷ ’Sinneruttut’ Jehovap aqqanik najoqqutassianillu naapertuilluartunik taassuma oqaasianiittunik aalajangiusimannilluinnarnerat arajutsisimaneqanngilaq. Sinneruttut inooriaasiata aamma silarsuarmi naalakkersuinikkut  upperisarsiornikkullu siuttut ileqqorlunnerata ilumoortuusaassusiatalu assigiinngissutaat inuit peqqusersuitsut takusinnaalersimavaat. Anersaakkut ’Israelikkunni amiakkuutitaasut’ Jehovap pilluaqqusimavai. Aterminik taaguuteqarnermik immikkut pisinnaatitaaffilernerisigut ataqqinaatississimavai, nunarsuarmilu inuit akornanni tusaamasaalluarnissaat isumagisimallugu. Zefaniasip siulittuisimaneratut ippoq: „Ullussami issumani katersussavassi nunassinnullu angerlartillusi. Inuiaat nunarsuarmiittut tamarmik akornanni tusaamasaalersissavassi ataqqinarsisissallusilu pineqaatersi allanngortikkukku isigitillusi!“ — Sefanja 3:20.

⁸ 1935-miit inuit millionilikkuutaat paasisalerpaat sinneruttut Jehovap pilluaqqusaatikkai. Anersaakkut juutit, imaluunniit Israelikkut, nuannaarlutik malilerpaat ima oqarlutik: „Ingerlaqatigissavassi tusaratsigu Guutip najoraasi.“ (Sakarja 8:23) ’Savat allat’ taakkua paasivaat sinneruttut taakku tassaasut ’inussiaq aalajaallunilu silatooq’, Kristusip nunarsuarmi ’pigisaminik tamanik’ paarsisunngortitaa. Inussiaqatigiit piffissaq eqqorlugu anersaakkut nerisassiaat ’savat allat’ qujamasullutik ’nerisarpaat’. — Juánase 10:16; Matîuse 24:45-47.

9. „Oqaatsit“ suut inuit millionilikkuutaat ilinniarsimavaat, suliarlu annertooq suna savat allat tanitallu sinneruttut „isumaqatigiillutik“ suliaraat?

⁹ Savat allat millionilikkuutaat sinneruttut peqatigalugit „oqaatsit minguitsut“ naapertorlugit inuunissartik oqalunnissartillu ilinniarpaat. * Jehova Zefanias aqqutigalugu ima siulittuisimavoq: „Kingorna inuiaqatigiit allanngortissavakka minguitsunik [oqaaseqalersillugit, NV]; taava tamakkerlutik uanga atera torlorfigissavaat isumaqatigiillutillu kiffartuutissallunga.“ (Sefanja 3:9) Aap, Guutip naalagaaffia pillugu nutaarsiassamik nuannersumik ’inuiaqatigiit tamarmik nalujunnaarutissaannik’ oqaluussissutiginnillutik savat allat ’savarpannguillu’ sinneri ataasiussuseqarlutik ’isumaqatigiillutillu’ Jehovamut kiffartorput. — Lúkarse 12:32; Matîuse 24:14.

 ’Jehovap ullussaa nalliukkumaarpoq’

10. Tanitat sinneruttut suna qularinngittuaannarsimavaat, eqimattatullu suna misigissavaat?

¹⁰ Apustilip Peterip oqaasii uku tanitat sinneruttut eqqaamajuarsimavaat: ’Jehovap unnersuutigisani mullutinngilaa, soorlu qassiit mullussisorigaat, kamajuillunili pivaasi tammarsimasoqaqqusinnginnami, tamaasali allamik isumataaqqullugit. Jehovalli ullussaa tillittutut nalliukkumaarpoq.’ (2 Pîtruse 3:9, 10) Inussiaqatigiinnut aalajaatsunut ilaasut nalitsinni Jehovap ullussaata nalliunnissaa qularinngisaannarsimavaat. Ullussarsuaq tamanna Guutip kristumiuunerartunut, Jerusalemitoqqamut assingusumut, Babylonillu Angisuup sinneranut eqqartuussutaata naammassineqarneranik aallartissaaq. — Sefanja 1:2-4; sarĸúmersitat 17:1, 5; 19:1, 2.

11, 12. (a) Zefaniasip siulittuutaata ilaa alla suna sinneruttunut eqquussimava? (b) ’Assaat nakkangatinnaveernissaannik’ kajumissaarut tanitat sinneruttut qanoq qisuarfigisimavaat?

¹¹ Sinneruttut aalajaatsut Babylonimit Angisuumit, upperisarsiornerup ilumuunngitsup silarsuarmi tamarmi naalagaaffissuanit, anersaakkut tigusaaqqanerminnit 1919-imi aniguisitaagamik nuannaaqaat. Zefaniasip siulittuutaata matuma eqquunnera misigaat: „Qiimmattarit, Sionip pania, tipaatsullusi torlulagitsi, Israelikkunaa! Uummatikkut iluunngarlutit tipaatsungaarit, Jerusalaap pania! Ilinnimmi eqqartuussiniaraluartut [Jehovap] peersippai akeqqatillu ajattorlugit. [Jehovap] Israelikkut kunngiata najorpaasi, kingorna perlussamik ilimasussanngilasi. Ullussami issumani Jerusalaamiut ima oqarfigineqarumaarput: ’Siooraqinak, Sion, assatit nakkangatinnaviikkit, ilinniimmat [Jehova] Guutit, pissarsuaq annaassisoq.’“ — Sefanja 3:14-17.

¹² Jehovamit najorneqarnertik qularutiginngivillugu tamatumunngalu uppernarsaatissarpassuaqarlutik tanitat sinneruttut Guutip imminnut suliassiissutaa qunusuillutik suliarisimavaat. Guutip naalagaaffia pillugu nutaarsiassaq nuannersoq oqaluussissutigisimavaat Jehovallu kristumiuunerartunut, Babylonip Angisuup sinneranut kiisalu pissutsit aaqqissuussaanerannut ajortumut tamarmut Satanimut atasumut eqqartuussutai tusarliussimallugit. 1919-imiit atoruminaatsuni atoruminartunilu Guutip peqqussutaa manna naalattuarsimavaat: „Siooraqinak, Sion, assatit nakkangatinnaviikkit.“ Assatik sarliaannarsimanngilaat eqiasuillutilli naqitaaqqat, atuagassiat, atuakkat atuagassiaaqqallu Jehovap naalagaaffianik tusarliisut millionilikkuutaat siaruartersimallugit. Savanut allanut, 1935-miilli imminnut ilaaqqussorsimasunut millionilikkuutaanut, uppernikkut nakussatsinnartumik maligassaasimapput.

Illit assatit nakkangatinnaviikkit

13, 14. (a) Sooq juutit ilaat Jehovamut kiffartorumanngillat, tamannalu qanoq ililluni erserpa? (b) Uagutsinnut suna silatusaarnerunngila, suliamilu sumi assavut nakkangatinnaveersaartariaqarpavut?

¹³ Jehovap ullussarsuata ’utaqqinerani’ qanoq ililluta Zefaniasip siulittuutaa iluaqutigisinnaavarput? Siullermik, Zefaniasip nalaani juutit Jehovap ullussaata qaninneranik qularutiginninnertik pissutigalugu Jehovamik malinninnissaminnut tunuarsimaartut assiginaveersaartariaqarpavut. Juutit taakkua qularnertik ammasumik oqaatiginngikkaluarpaat, inooriaatsimikkulli takutillugu Jehovap ullussaata qaninnera upperivinngikkitsik. Jehovap utaqqiuaannarnissaanut taarsiullugu pisuussutinik katersuinissartik kisiat ulapputigaat. — Sefanja 1:12, 13; 3:8.

¹⁴ Ullumikkut uummatikkut qulalernissamut piffissaanngilaq. Jehovap ullussaata nalliunnissaa isumakkut uummatikkulluunniit kinguartitissallugu silatusaarnerunngilaq. (2 Pîtruse 3:1-4, 10) Jehovap malinnissaanut tunuarsimaarnaveersaartariaqarpugut taassumunngaluunniit kiffartornitsinni  ’assavut nakkangatinnaveersaartariaqarlugit’, nutaarsiassamik nuannersumik oqaluussissutiginninnitsinni ’eqiasuttunik assaqarnaveersaarnitsigut’. — Ussatit 10:4; Mákorse 13:10.

Soqutigisaqanngissutsimut nakkaannannginneq

15. Jehovamut kiffartornitsinni suna ’assatta eqiasulissutigisinnaavaat’, ajornartorsiullu tamanna qanoq Zefaniasip siulittuutigaa?

¹⁵ Aappassaanik, soqutigisaqanngissutsip sanngiillissutiginissaa mianersuutigisariaqarparput. Nunat killiit ilarpassuini anersaamut tunngasunik soqutigisaqannginnerujussuaq oqaluussisartut ilaannut nikallussutaasinnaasarpoq. Taamatut soqutigisaqanngissuseq aamma Zefaniasip nalaani atuussimavoq. Jehova pruffiitini aqqutigalugu nalunaarsimavoq inuit uummatimikkut ima oqartut pillarumaarlugit: „Pilluarnartumik perluutaasumilluunniit [Jehova] iliornavianngilaq.“ (Sefanja 1:12) Atuakkiarsuarmi Cambridge Bible for Schools and Colleges-imi A. B. Davidson allappoq immikkoortumi tassani innersuussutigineqartut inuit „ilatsiinnalerlutik soqutigisaarussimasut immaqaluunniit allaat pissaaneqarnerusup pissutsinut inuit atugaannut akuliunnissaanik qularutiginnittut.“

16. Ullumikkut kristumiuunerartut akornanni isuma suna atuuppa, Jehovalli qanoq kajumissaarpaatigut?

¹⁶ Ullumikkut nunarsuup ilarujussuani, ingammik nunani pigissaarnerusuni, soqutigisaqanngissuseq annertoqaaq. Allaat kristumiuunerartut Jehova Guutip nalitsinni inuit atugaannut akuliunnissaa upperinngilluinnarpaat. Guutip naalagaaffia pillugu nutaarsiassamik nuannersumik tusarliiniarnerigaluarput tunuartittarpaat qularpasissumik qungujullutik imaluunniit oqaannarlutik: ’Soqutiginninngilanga!’ Pissutsini taama ittuni oqaluussiuaannarnissaq unamminiarnartorujussuusinnaasarpoq. Nikallujuissutsikkut misilinneqaataasarpoq. Jehovalli Zefaniasip siulittuutaatigut innuttani aalajaatsut nutaamik sapiissuseqalersippai oqarluni:“Assatit nakkangatinnaviikkit, ilinniimmat [Jehova] Guutit, pissarsuaq, annaassisoq! Qiimmattarluni tipaatsuutigaasi kingumullu asannissutsiminik tuniumallusi. Qiimasulluni nuannaarutigaasi.“ — Sefanja 3:16, 17.

17. Kikkut maligassiaat pitsaasoq savat allat akornanni nutaat malittariaqarpaat, qanorlu ilillutik?

¹⁷ Nalitsinni Jehovap innuttaasa oqaluttuarisaanerannit erseqqeqaaq tanitat ’savanullu allanut’ ilaasut utoqqaanerusut ullussani kingullerni katersuilluni suliami annertoorujussuarmik naammassisaqarsimasut. Kristumiut aalajaatsut tamakkua tamarmik ukiorpassuarni nikallujuissutsimik ersersitsiuarsimapput. Inuit amerlanersaasa soqutiginninngissusiat nikalluutigisimanngilaat. Taamatuttaaq savanut allanut ilaasut nutaanerusut anersaakkut soqutigisaqanngissuseq nunat ilarpassuini nalinginnaaqisoq nikalluutiginaveersaartariaqarpaat. Qanortoq taakkua ’assatik nakkangatinnaveerlisigik’, imaluunniit ilatsiinnalinngisaannarlik. Qanortoq Napasuliaq  Alapernaarsuiffik-mik, Iteritsi!-mik atuagassianillu allanik, inuit savatut pissusillit Jehovap ullussaa pilluaqqussutissallu tamatuma malitsigisassai pillugit sallusuissummik ilinniarnissaannik ikiorniarlugit sanaajusut, saqqummiunnissaannut periarfissat tamaasa atorluarniartarlisigik.

Ullussarsuaq utaqqitillugu siumut ingerlasa!

18, 19. (a) Matîuse 24:13-imi Jesaja 35:3, 4-milu nikallujuinnissatsinnut qanoq qiimmassaatissinneqarpugut? (b) Jehovamut kiffartornitsinni ataasiussuseqarluta siumut ingerlajuaannarutta qanoq pilluaqqusaassaagut?

¹⁸ Jesus ima oqarsimavoq: ’Naggatissamut aalajangersoq annakkumaarpoq.’ (Matîuse 24:13) Taamaattumik Jehovap ullussarsua utaqqitillugu ’assavut nukillaartinngisaannartigik’ imaluunniit ’seeqquvut patajalertinngisaannartigik’! (Jesaja 35:3, 4) Zefaniasip siulittuutaani toqqissinartumik oqaatigineqarpoq Jehova tassaasoq „pissarsuaq, annaassisoq“. (Sefanja 3:17) Aap, Jehovap ’annikilliornartumi angisuumi’ naalakkersuinermik suliaqartut innuttaminik ’anneruniarfiginnittut’ ernerminut suujunnaarseqqugunigit ’amerlangaartut’ asattuutissavai. — sarĸúmersitat 7:9, 14; Sefanja 2:10, 11; Tussiaat 2:7-9.

¹⁹ Jehovap ullussarsua qanilliartuinnartillugu suliniarluarluta siumut ingerlajuarta, „isumaqatigiilluta“ taassumunnga kiffartorluta! (Sefanja 3:9) Kajumissaarut siulittuutaasoq manna malikkunnaanngisaannartigu: „[Jehova] ujarsiuk nunap inuini makitajuitsortaasusi, peqqussutaanik maleruaasusi tamassi. Iluarsuseq noqqaassutigisiuk, makitajuissuseq noqqaassutigisiuk.“ Taamaaliorutta nammineq allallu kisissaanngitsut ’ullormi Jehovap kamaffissaani qimarnguissarsisussanngortissinnaavavut’ aqqatalu illernartup naalannaatissaanut nalunaajaateqassalluta. — Sefanja 2:3. (wE 1/3 96)

[Quppernerup ataani ilanngussaq]

Atuaqqissaarnermi apeqqutit

□ Ullumikkut kristumiuunerartut akornanni upperisarsiornikkut pissutsit Zefaniasip nalaani pissutsinut qanoq assingussuteqarpat?

□ Ullumikkut naalakkersuinikkut siuttut ilarpassui qanoq ilillutik Zefaniasip nalaani ’naalagarsuarnut’ assinguppat?

□ Zefaniasip siulittuutaani neriorsuutit qanoq ilillutik sinneruttunut eqquussimappat?

□ Inuit millionilikkuutaat suna paasisimavaat?

□ Sooq Jehovamut kiffartornitsinni assavut nakkangatinnaveersaartariaqarpavut?

[Atuaqqissaarnermi apeqqutit]

[Qupp. 16-mi assiliartat]

Zefanias assigalugu kristumiut tanitat sinneruttut Jehovap eqqartuussutai qunusuillutik nalunaarutigisarsimavaat

[Qupp. 19-mi assiliartat]

Inuit soqutigisaqanngissusiat ’savat allat’ nikalluutigisimanngilaat