Katikkavit neriorsuutit eqqortikkumaviuk?

ULLOQ katiffik ulluuvoq nuannersoq. Ilungersunartortaqarporli. Nuliassaq uissarlu neriorsuisarput inuunermik sinneranut sunniuttussamik. Katinnermi najuuttut neriorsuummut pingaartumut tamatumunnga ilisimannittuupput, Jehova Guutilu ilisimannittuuvoq pingaarneq.

Katinnermi aalajangersimasunik malittarisaqarnissaq immikkulluunniit ileqqulersuuteqarnissaq Biibilip piumasarinngilaa. Aaqqissuussinerulli Guutimit pilerfeqarnera paasillugu katittut neriorsoqatigiinnerat upperisarsiornikkut nalliuttorsiutigineratigut nalliussineqartarpoq. Jehovap nalunaajaasui katinnermi neriorsuigaangamik, ukiuni kingulliunerusuni apeqqummut imaattumut angernikkut taamaaliortarput: „Illit — — Jehova Guutip saavani maanilu najuuttut ilisimannittoralugit — — aapparilerusuppiuk, neriorsuillutillu marluullusi inuutillusi, imaluunniit Guutip aappariinnermik aaqqissuussinera atuuttuartillugu, asajumallugu ataqqiumallugulu (sernissorumallugulu) Guutip nuliaasunut (uiusunut) inatsisai Allakkani Illernartuni allassimasut naapertorlugit?“ *

Eqqarsaatigisariaqakkat

Katinnissat eqqarsaatigigukku ulloq katiffissaq sioqqullugu neriorsuutip tamatuma qanoq isumaqarnerata eqqarsaatiginissaa iluaqutigissavat. Salomon oqarsimavoq: „Eqqarsaqqaarlutit oqaluttassaatit, isumaliutigilluaqqaarsimanngisannillu Guuti neriorsorniaqinagu.“ (Nalunaajaasup oqaasii 5:1) Katereersimaguimmi? Taava Jehovamut neriorsuutigisimasavit persuarsiornartup pingaaruteqassasusiata eqqarsaatigeqqissaarnera iluaqutigissavat. Eqqortippiuk? Kristumiut neriorsuutitik ilumooruttarpaat. Salomon aamma oqarsimavoq: „Neriorsuutit eqqortissavat, eqqortissinnaanngikkukkuli ajunnginnerussaaq neriorsuinngiinnaruit.  Oqaatsit aniatitatit mianersuutigikkit pisuutitaassutigeqqunagit, [inngilillu saani oqaqinak kukkusimallutit, NV].“ — Nalunaajaasup oqaasii 5:4-5.

Katinnermi neriorsuummik misissuinerup qularnanngitsumik neriorsuummik persuarsiornartumik tamatuminnga paasinninnerit annertunerulersissavaa.

„Illit . . . aapparilerusuppiuk“: Apeqqut taama aallartippoq. Tamatuma ersersippaa katinnissamut aalajangerneq nammineerlutit akisussaaffigigit.

Kristumiut aaqqissuussaanerata ataani katinnissaq Biibilimi piumasaqaataanngilaq. Jesus Kristus aappaqarsimanngilaq, ’siunersisaqarsinnaasullu’ aappartaannginnissaannik siunnersorsimavai. (Matîuse 19:10-12) Aappaatigulli Jesusip apustilii amerlanerit aappaqarput. (Lúkarse 4:38; 1 Korintumiut 9:5) Ersarippoq katissanerluni inuup nammineq aalajangigassarigaa. Kinaluunniit Biibilimit pisussaatitaanngilaq inuk alla kateqqullugu pinngitsaaliniassallugu.

Taamaattumik katikkumallutit aalajangernerit nammineerlutit akisussaaffigaat. Kinalu aappartaarissanerlugu qularnanngitsumik aamma nammineerlutit aalajangersimassavat. Apeqqummut angeruit, aappassavit pissusii ajunngitsut aammataarli ajortut akuerissavatit.

Piffissap ingerlanerani aapparpit inuttut pissusii aallaqqaammut malugisimanngisatit takusalissavatit. Ilaannikkut aamma pakatsisassaatit. Biibilimi allassimavoq kikkut ’tamarmik ajortuliortut Guutimilu nersornaammik ajorsarlutik’. (Rûmamiut 3:23) Aappannut naleqquttunngorsarniarlutit allannguuteqartariaqarsinnaavutit. Tamanna ajornakusoorsinnaavoq, immaqalu ilaannikkut taamaatiinnarusussinnaassaatit. Eqqaamajulli katinnermi neriorsuut Jehovap saani neriorsuutigineqartarmat. Taassuma angusaqarluarnissannik ikiorsinnaavaatit.

„Aapparilerusuppiuk“: Katinnermi siullerpaami, Adam Evalu katimmata, Jehova Guuti oqarpoq ’uiniussasut ataaseq’. (1 Moses 2:24; Matîuse 19:4-6) Taamaattumik aappariinneq inuit akornanni attaveqarnerni tamanit qaninnerpaavoq. Katinnermi ilaqutariinnut nutaanut ilaalerputit. Inuk alla ’aapparilerpat’. Attaveqarnermik allamik taama ittumik nassaassaqanngilaq. Immaqa inunnut allanut attaveqarnermi ajornartorsiutaavallaanngitsoq, aappariinni ajoqutaasorujussuarsinnaavoq.

Biibilip Evfisumiunut agdlagkat 4:26-mi siunnersuutaa assersuutigeriartigu. Tassani allassimavoq: ’Kamatsillusi ajortulinnginniaritsi; seqineq tarrisinaveersiuk narrutsassimanissinni.’ Immaqa eqqarlivillu ikinngutivilluunniit akunnissinni ajornartorsiutersi sukkanerpaamik aaqqinniarneq ajorpat. Aappalli eqqarlinnit ikinngutinnilluunniit allanit tamanit qaninnerpaavat. Isumaqatigiinngissutaasoq sukkanerpaamik aaqqinnianngikkussiuk qanimut attaveqarnersi artorsartinneqalissaaq.

Aappavillu akornassinni isumaqatigiinngissutaasut puffassimaarutigiuarlugillu uumitsassimaarutigiualertarpigit? Paatsooqatigiinnerit isumaqatigiinngerujoornerillu ullorpassuarni ataannartinneqartarpat? Neriorsuutit eqqortissagukku ajornartorsiuteqaleraangat ulloq naatinnagu aappallu eqqisseqatigiinniartariaqarpusi. Tamatumunnga ilaapput isumakkeerfiginnikkumassuseq puiguinerlu, aammattaarlu nammineq kukkussutigisanik nassuerutiginninneq. — Tussiaat 51:7; Lúkarse 17:3, 4.

„Asajumallugu“: Uisaaq nuliassani „asajumallugu sernissorumallugulu“ neriorsuivoq. Tamatumunnga ilaavoq arnap angutillu akornanni asanninneq qularnanngitsumik katinnerannut pissutaasoq. Asanninnerli taamaattoq naammanngilaq. Asanninneq kristumiup aapparminut neriorsuutaa itinerullunilu annertuneruvoq.

Evfisumiunut agdlagkat 5:25-mi allassimavoq: ’Ilissi angutit, nuliasi asaniarsigik, sorluttaaq Kristusip ilagiit asagai’. Jesusip ilagiinnut asanninnera angutit arnallu akornanni asanninnerup assiginngilaa. Oqaatsit ’asaniarsigik’ aamma ’asagai’ allassimaffimmi tassani atorneqartut oqaatsimik agaʹpe-mik naggueqarput, asanninneruvorlu najoqqutassianik tunngaviusunik siulersorneqartoq. Tassani  Biibilip angutit peqquai nuliatik allanngujuitsumik, aalajaatsumik atajuartumillu asassagaat.

Pineqaannanngilaq imatut misigineq: „asagamma asavakkit“. Uiusup nuliami soqutigisai salliutittarpai nammineq soqutigisani tunulliullugit, nuliaasullu uini taamatuttaaq asassavaa. (Filípimiut 2:4) Aappannut asanninneq itisooq ineriartortikkukku, katinninni neriorsuutivit eqqortinniarnerani iluaqutigissavat.

„Sernissorumallugulu“: Sernissuineq isumaqarpoq erligisamik asasamilluunniit illersuineq. Oqaatsitigut suliatigullu asanninnerit nittartariaqarpat. Ingammik nuliaasoq uimi asanninneranik nittaavigiuarneqarnissaminik pisariaqartitsisarpoq. Immaqa nuliami timikkut pisariaqartitaanik isumassuiniarluartuuvoq, tamannali naammanngilaq. Nuliaasut ilaat nunap piinik kissaatigiumasinnaasaminnik tamanik peqarput, taamaakkaluartoq uiminnit misigissutsikkut sumiginnarneqarnertik soqutigineqannginnertilluunniit pissutigalugu pilluanngeqaat.

Nuliaasorli asaneqarnerminik isumassorneqarnerminillu ilisimannittoq pilluarnissaminut pissutissaqarluarpoq. Soorunami uiusoq pillugu taama aamma oqartoqarsinnaavoq. Asanninneq ilumoortoq tunniusimanermik ilumoorluni ersersinneqartumik sakkortusisinneqartarpoq. Biibilip atuagartaasa ilaanni Taalliat Asanninnilersaarutit-ni savanik paarsisoq nillerpoq: „Asasannguara nuliassara, annaajumanngeqaara asanninnerit, asanninnerit pikkunarneruvoq viinnimit, tarnutivillu tipiginnera naamajuminarnerulluni balsamip tipiginneranit.“ — Taalliat Asanninnilersaarutit 4:10.

„Ataqqiumallugulu“: Ukiut hundredelikkuutaat ingerlaneranni angutit arnanik atornerluisarsimapput nikanarsaasarsimallutillu. Nalerput pillugu atuagassiami World Health-imi allassimavoq: „Arnanut nakuuserneq nunani tamani, innuttaaqatigiinni sumiluunniit inissisimagaluartuni aningaasat tungaatigullu qanorluunniit atugaqaraluartuni atuuppoq. Kulturini amerlasuuni uiusup nuliaminik unataasinnaaneq pisinnaatitaaffigaa.“ Ikinnerinnaalli taamatut pisuutinneqarsinnaagunarput. Anguterpassuilli apeqqutinik arnat sammisagaannik soqutiginninnermik ilumoortumik ersersitsineq ajorunarput. Taamaattumik arnarpassuit angutinut akerliuneq ineriartortissimavaat. Nuliaasut ilaat oqarsimapput: „Uiga asavara, ataqqisinnaanngilarali.“

Jehova Guutilli arnat uiminnik ataqqinninniartut — naak aamma naatsorsuutigisaminik naammassinnittuaannanngikkaluartoq — pingaartippai. Uimi Guutimeersumik suliassaqarnera inissisimaneraluunniit nuliaasup akueraa. (1 Korintumiut 11:3; Evfisumiut 5:23) Taamaalilluni nuliaasup uiminut ataqqinningaarnera Jehovamut pallorfiginninneranut naalanneranullu ilaavoq. Guutip arnat Guutimik mianerinnittut naalannerat malugisarpaa. — Evfisumiut 5:33; 1 Pîtruse 3:1-6; Naleqqiuguk Eprîarinut agdlagkat 6:10.

Aappariit ataqqeqatigiittariaqarput, tamanna piumasarineqartariaqanngilaq naatsorsuutigisariaqarnaniluunniit, iliuuseqarnikkulli pissarsiarisariaqarpoq. Soorlu aappariit iluanni mitallertumik ajuallannartumilluunniit oqalunneq inissaqanngilaq. Aappaq pillugu nikanarsaataasunik oqalunneq asannittuliornerunngilaq ataqqinnittuliornerunaniluunniit. Aappap kukkussutaanik allanut oqaluttuarneq ajunngitsumik angusaqarfiunavianngilaq. Quiasaarinerinnaagaluaruniluunniit, tamatuma tungaatigut ataqqinninnginnermik ersitsinerussaaq. Evfisumiunut agdlagkat 4:29, 32-mi oqaatsit uiusumut nuliaasumullu tunngapput. Tassani allassimavoq: ’Oqaatsinik mikiaasunik qanissinnit anisitseqinasi, kisianni ineriartornissamut pisariaqartumut ajunngitsut oqaaserisigik . . . Ajunngitsumilli iliorfigeqatigiigitsi isumassuigajullusilu.’

„Guutip . . . inatsisai Allakkani Illernartuni allassimasut naapertorlugit“: Qinersinissamut iliuuseqarnissamullu kiffaanngissusermik Guutip tunisimavaatigut. Aappariinneq pillugu maleruagassarpassuarnik pisarissersunngilaatigut. Iluaqutaasunilli najoqqutassissimavaatigut.

Aappariinnermut tunngasunik atuagarpassuaqarpoq, inuppassuillu immikkut tamatumunnga  tunngasumik eqqarsaatersuuteqarput. Mianersorilli, ullumikkut aappariinnut siunnersuutit amerlanersaat Biibilimut akerliupput.

Eqqarsaatigiuttaaq aappareeqanngilaq marlunnik assigiimmik atugaqartunik. Aappariit nittaalamut assersuunneqarsinnaapput; ungasianit isigalugit assigiissorinarsinnaapput, asseqanngitsuuppulli, tamarmik assigiinngitsuupput. Aappariillu ataatsit inuttut pissusiisa katinnerat silarsuarmi aappariinni allani kikkunniluunniit assigineqanngilaq. Taamaattumik allat namminneq isiginnittaasiannut maleruutiavallaaqinak. Unnersuussut inummit pisoq sunaluunniit aappariinni sunut tamanut aaqqiissutissatut atorneqarsinnaanngilaq.

Akerlianilli Biibilip inassutai ilumoortuupput atoriaannaallutillu. Apustili Paulus allassimavoq: ’Allakkat illernartut tamarmik Guutip sunniineratigut isumassarsiarititaapput iluaqutaallutik ajoqersuutaallutillu inerteqqutaallutik, iluarsiartuutaallutik.’ (2 Timûtiuse 3:16, NV; Tussiaat 119:151) Biibili atuartarukku ajoqersuutaalu ulluinnarni atortarukkit, katikkavit neriorsuutit eqqortissinnaassavat. — Tussiaat 119:105.

„Marluullusi inuutillusi“: Ataqatigiinneq atajuartussaq pineqarpoq. Guuti peqqusisimavoq ’angutip ataatani anaananilu qimallugit nuliani attavigissaga’. (1 Moses 2:24) Jehovap kissaatigaa peqatigiissasusi, Guuti pallorfigissagissi peqatigiillusi, oqaasii atuaqqissaaqatigiissutigisassagisi, pisuttuaqatigiinnissarsi, issiaqatigiinnissarsi nereqatigiinnissarsilu piffissaqarfigissagisi. Aap, ataatsimoorlusi inuuneq nuannaarutigissagissi!

Aappariit ilaasa ullut tamaasa oqaloqatigiinnissartik piffissaqarfiginiartarpaat. Naak ukiorpassuarni aappareereeraluarluni attaveqatigiinneq tamanna appariit pilluarnissaannut pingaaruteqarpoq.

„Guutip aappariinnermik aaqqissuussinera atuuttuartillugu“: Aappariinneq Jehova Guutimit, aappariinnermik aaqqissuussamik pilersitsisumit, tunissutaavoq. (Ussatit 19:14) Aaqqissuussineq tamanna naapertorlugu inuunngikkaanni, aappariinneq navianartorsiortiinnarnagu, aamma Pinngortitsisumut attaveqarneq navianartorsiortinneqassaaq. Uiusulli nuliaasullu Jehovamut ajunngitsumik attaveqarneq ineriartortikkunikku, tamannalu aaqqissuussineranut naalannikkut ersersikkunikku, eqqissisimasumik allanut imminnullu attaveqassapput. — Ussatit 16:7.

Katinnermi neriorsoqatigiinnermut Jehovap pingaarnertut ilisimannittuunera puigunngisaannartariaqarpoq. Neriorsuut pingaartoq tamanna eqqortittuaraanni, aappariinneq Jehova Guutimut nersornaataallunilu ataqqinaataassaaq. (wE 1/3 96)

[Quppernerup ataani ilanngussaq]

[Qupp. 31-mi issuagaq]

Aappariit nittaalamut assersuunneqarsinnaapput; ungasianit isigalugit assigiissorinarsinnaapput, tamarmilli assigiinngitsuupput

[Suminngaanneernera]

Nittaallat/Dover