Nakuuserneq ataavartumik nungutinneqassaaq — qanoq ililluni?

NAKUUSERNERUP ingasakkiartuinnarnera unitsinniarlugu USA-mi illoqarfiit ilaanni nutaamik misiliineqarpoq — inuit sakkutik aggiukkunikkik aningaasanik nioqqutissanilluunniit tunineqarsinnaapput, apersorneqaratillu. Illoqarfimmi St. Louisimi sakkut 8500-it dollarsinik 341.000-inik taarserneqarput. New Yorkimilu sakkut 1000-init amerlanerusut katersorneqarsimapput.

Tamanna pinerluttuliornermut qanoq kinguneqarpa? Ajoraluartumik malunnarpallaanngitsumik kinguneqarpoq. Ukiup tulliani St. Louisimi inuit aatsaat taama amerlatigisut aallaaneqarlutik toqutaapput. Naatsorsuutigineqarpoq New Yorkimi suli sakkut 2 millionit ’aqqusinermiittut’. USA-mi sakkut 200 millionit inunnit pigineqarput, tassa angutinut, arnanut meeqqanullu tamanut sakku ataaseq. Nunani allani sakkut atorlugit nakuusernerit annilaarnartumik amerliartuinnarput. Tuluit nunaanni aviisimi The Economist-imi ima allassimasoqarpoq: „1983-ip 1993-illu akornanni sakkut atorlugit pinerluttuliornerit politiinut nalunaarutigineqartut marloriaatingajammik amerliartorsimapput, 14.000-inngorlutik.“ Naak inuarnerit amerlasoorsuunngikkaluartut Tuluit nunaanni sakkut 1 millionit missaat inatsisinik unioqqutitsisumik pigineqarput.

Kisitsisit annilaarnartut tamakku millisinneqarsinnaappata soorunami ajunnginnerussagaluarpoq. Kisianni misiliinerit qulaani eqqaaneqartut nakuusernermut pissutaasartunik tunngaviunerusunik iluarsiisinnaanngillat. Pissutaasartunik sunik? Pissutaasinnaasut arlalippassuit eqqartorneqartarput, ilaannaalli tunngaviunerupput. Inuusuttorpassuit arlaannut atasutut misigiumallutik inupilunnut ilannguttarput ilaquttaminni ileqqussatigut ajoqersorneqannginnamik toqqissisimanatillu. Iluanaarniarlutik amerlasuut nakuusertalersimapput. Inuit naapertuilluanngitsumik iliorfigineqarsimasut nakuuserneq atorlugu ajornartorsiutitik aaqqinniartarpaat. Inuiaqatigiissutsimik, naggueqatigiissutsimik innuttaaqatigiinniluunniit inissisimaffimmik pingaartitsivallaarneq pissutigalugu inuit allat naalliuttut misigeqatigineq ajorpaat. Ajornartorsiutit taamaattut itisuunik sorlaqaramik imaaliallaannaq aaqqinneqarsinnaanngillat.

Qanoq iliortoqarsinnaava?

Politiit amerlanerusut, parnaarussaanikkut sukannernerusumik pillagaaneq, sakkunik pigisaqarnermik nakkutilliineq, toqumik pillaaneq — tamakku tamarmik misilinneqartarsimapput pinerluttuliorneq nakuusernerlu millisinniarlugit. Ilaat sunniuteqalaarsimapput, kisianni suli nakuusernermik avatangerneqarsimavugut. Sooq? Periaatsitigut tamakkunatigut malunniutit kisimik iliuuseqarfigineqartaramik.

Immikkut paasisimasallit amerlasuut isumaqarput nakuuserneq ilinniartitaanikkut peerneqarsinnaasoq. Isuma tamanna ajunngissinnaagaluarpoq, kisianni miserratigisinnaanngilarput  nunat ilinniartitaanikkut periarfissagissaarfiunnginnerusut kisimik pinnatik nakuusernermik eqqorneqartanngitsut. Taamaattumik ersarippoq ilinniartitaanerinnaq naammanngitsoq, eqqortumilli ilinniartitaaneq pisariaqartoq. Ilinniartitaaneq suna? Inunnik eqqissinermik nuannarisaqalernissamut peqqusersuitsunngornissamullu ilinniartitsisinnaasumik nassaassaqarpa?

„Uanga tassa [Jehova], Guutit, iluaqutaasunik ilinnik ajoqersuisoq, ingerlavigisassakkut ingerlatitsisoq. Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ (Jesaja 48:17, 18) Jehovap qanoq ililluni inuit eqqissinermik naapertuilluarnermillu nuannarisaqalernissaannik ilinniartittarpai? Pingaartumik oqaatsini Biibili aqqutigalugu.

Guutip oqaasiata pissaanera

Biibilip imai tassaanngilluinnarput oqaluttualiaannaat ullumikkumut naleqqukkunnaarsimasut soqutiginarunnaarsimasullu. Inuiaalli Pinngortitsisaata, iluaqutissamik ilisimasaqarnerpaasup inuullu pissusianik tamanit ilisimasaqarnerpaasup, najoqqutassiaanik isumaanillu Biibili imaqarpoq. Taanna, tassaasoq Jehova Guuti, ima oqarpoq: „Soorlumi qilak nunarsuarmit qutsinnerusoq, taama aqqutigisakka ilissi aqqutigisassinnit qutsinnerupput.“ — Jesaja 55:9.

Tamanna pillugu apustili Paulus ima nalunaajaavoq: ’Guutip oqaasia uumavoq killinnartorsuullunilu pananillu illuttut kiinalinnit tamanit ipinnerulluni pulallunilu tarnerlu anersaarlu, naggussallu paqqillu avissaartissinnaallugit, uummatillu eqqarsaatai isumaalu killisiorsinnaallugit.’ (Eprîarit 4:12) Aap, Guutip oqaasia inuup uummataanut anngunnissamut killiinissamullu kiisalu eqqarsartaasianik ileqquinillu allannguinissamut pissaaneqarpoq. Tamannarpiaq ullumikkut inuit nakuusertarnerannik allannguinissamut pisariaqannginnerpa?

Jehovap nalunaajaasui, ullumikkut 5 millionit missaanniittut nunanilu 230-nit amerlanerusuni siammarsimasut, Guutip oqaasiata inooriaatsimik ajunnginnerulersitsisinnaassusianut uppernarsaatissaalluarput. Inuiannit assigiinngitsuneersuupput, assigiinngitsunik oqaaseqarlutik naggueqarlutillu. Inuusaatsikkut inuttullu atugarisatigut assigiinngitsunik tunuliaqutaqarput. Ilaat nakuusertartuusimagaluarput ajornartorsiuteqaqalutillu inuusimagaluarlutik. Akeqqersimaarnermulli, qaangerniunnermut, ammip qalipaataa tunngavigalugu assigiinngisitsinermut uumissuinermullu pissutaasinnaasut taama ittut akunnerminni atuutsinnissaannut taarsiullugu assiaqutit tamakku ajugaaffiginissaat ilinniarsimavaat nunarsuarlu tamakkerlugu tassaalersimallutik inuit eqqissinermik nuannarisaqarlutillu ataasiussuseqartut. Suna tamatuminnga ajornarunnaarsitsisimava?

Suliniarnersuaq nakuuserunnaarsitsisoq

Jehovap nalunaajaasui Guutip siunertai taassuma oqaasiani, Biibilimi, saqqummersinneqartut pillugit inunnik allanik eqqorluartumik ilisimasaqalernissaannik ikiuinissaminnik suliassinneqarsimapput. Nunarsuarmi sumi tamaani inunnik Jehovap aqqutigeqqusaanik ilinniarusuttunik taassumanngalu ajoqersorneqarusuttunik ujarlertarput. Suliniutaat tamakku inerititaqarsimapput. Ajoqersuinerup annertuup tamatuma kingunerisaanik siulittuut tupinnangaartoq eqquuppoq.

Ukiut 2700-it missaanniittut matuma siorna pruffiiti Esajas isumassarsisitaalluni ima allassimavoq: „Ullussani kingullerni . . . inuiaat ornigutissapput, inuiaqatigiippassuillu . . . oqassapput: ’Qaa, majuarta [Jehovap] qaqqaanut, Jaakup Guutiata illuanukarluta; aqqutigeqqusaminik ajoqersussavaatigut ingerlavigeqqusamigut ingerlasinnaaleqqulluta.’“ — Jesaja 2:2, 3.

Jehovamit ajoqersorneqarneq taassumalu ingerlavigeqqusaasigut ingerlaneq inuit inuunerannut ajunngitsumik allannguutaasarpoq. Allanngornerit ilaat siulittuummi aamma tassani eqqaaneqarpoq: „Saffiussavaat panatik assallatserummut savissaliaralugit, qalugiusatillu saviliaralugit viinnequtilerissutit.“ (Jesaja 2:4) Allassimaffik tamanna inuppassuit atuarsimavaat. Assersuutigalugu, Naalagaaffiit Peqatigiit allaffeqarfiata New Yorkimiittup silataani allassimaffik tamanna atuarneqarsinnaavoq. Naalagaaffiit Peqatigiit anguniagaannik  angunngitsoorsimasaannilli eqqaasitsissutaalluni. Sorsunnernik nakuusernernillu nungutitsinissaq naalakkersuinikkut suliniaqatigiiffikkut inuit piliaatigut anguneqarsinnaanngilaq. Jehova Guuti kisimi taamaaliornissamut pissaaneqarpoq. Qanoq iliorluni tamanna naammassissavaa?

’Jehovap qaqqaanut majuarnissamik taassumalu aqqutigeqqusaanik ingerlavigeqqusaanillu ajoqersorneqarnissamik’ neqeroorut inuit ilaannaasa ilassissavaat; taamatuttaaq inuit tamakkeratik ’panatik saffiorumassavaat assallatserummut savissaliaralugit, qalugiusatillu saviliaralugit viinnequtilerissutit’. Inuit taamaaliorumanngitsut Jehovap qanoq pissavai? Naassaanngitsumik periarfissinnaavianngilai allanngornissaalluunniit utaqqinaviarnagu. Jehovap nakuuserneq nungutilluinnarniarlugu aamma inuit nakuusernerminnik aalajangiusimanniinnartut nungutissavai.

Ilinniutissaq pingaarluinnartoq

Noap nalaani Guutip iliuuserisimasaa uagutsinnut ullumikkut inuusunut mianersoqqussutaavoq. Silarsuaq qanoq ittoq taamanikkut atuussimasoq Biibilimi oqaluttuarineqarpoq: „Nunarsuarmili aserorsimaneqarpoq Guutip takkuani iluaatsuliornernik ulikkaarluni.“ Taamaattumik Guutip Noa ima ilisimatippaa: „Aalajangerpunga pinngortitat uumassuseqartut tamaasa nungutinniarlugit, ajortuliornerisigut nunarsuaq iluaatsuliornernik ulikkaarmat. Taamaammat nungutillugit nunarsuarmit piiassavakka.“ — 1 Moses 6:11, 13.

Pingaartoq malugisariaqarparput. Kinguaariinnut taamanikkut inuusunut ulersuaq nalliutitikkamiuk Guutip Noa ilaqutaalu asattuuppai. Sooq? Biibilimi allassimavoq: „Noa angutaavoq iluartoq, naligisami akornanni assuarnaatsumik inuuseqartoq. Noa Guutip saavani inuuvoq.“ (1 Moses 6:9; 7:1) Taamanikkut inuusut tamakkerlutik iluaatsuliortanngikkaluarput, kisianni Noa ilaqutaalu kisimik ’Guutip saavani inuupput’. Tamannarpiarlu pissutigalugu silarsuaq nakuuserfiusoq suujunnaarsinneqarmat aniguisitaapput.

Takusinnaasatsitut nunarsuaq ’iluaatsuliornernik ulikkaaqqissimavoq’, qularissanngilarpulli Guutimit arajutsineqanngitsoq. Noap nalaani iliorsimanermisut qanittukkut iliuuseqassaaq nakuusernerlu nungutillugu — ataavartumik. Aammali massakkut ’Guutip saavani inuunermik’ ilinniartut, eqqissinermik ajoqersuisitsinersuarminut ilassinnittut, aniguiffissarsitissavai.

Tussiaasiortoq aqqutigalugu Jehova ima neriorsueqqissaarpoq: „Guutiitsoq erniinnaq peeruttussaavoq, inaani takuniaraluarukku peerutereersimassaaq. Kisianni qanilaartut nuna kingornutissavaat, [eqqissinangaartorlu nuannarissavaat; nutsigaq pisoqaq.]“ — Tussiaat 37:10, 11.

Jehovap nalunaajaasuisa Biibilimik atuaqqissaaqatigerusuttorujussuuaatsit, taamaalillutit ima oqartut ilaaqquffigisinnaaniassagakkit: „Qaa, majuarta [Jehovap] qaqqaanut, Jaakup Guutiata illuanukarluta; aqqutigeqqusaminik ajoqersussavaatigut ingerlavigeqqusamigut ingerlasinnaaleqqulluta.“ (Jesaja 2:3) Taamaalioruit ajussutsip nakuusernerullu nungutitaanerannik takunnittut akornanniissinnaassaatit. Taava ’eqissinangaartoq nuannaarutigissavat’. (wE 15/2 96)

[Qupp. 5-mi suminngaanneernerat]

Reuters/Bettmann