Pissutsit ungataannut isigigit!

TAPPISSUUNEQ pilluaqqussutisiaavoq. Isigisinnaassuseq inuit amerlanersaasa pigisamik naleqarnerpaartaattut isigaat. Takunnissinnaanerli alla Paulusip eqqartugaa timikkut tappissuunermit kristumiunut naleqarneroqaaq. ’Takussaasut pinnagit takussaanngitsut isigaavut,’ Paulus allassimavoq. (2 Korintumiut 4:18) Takunnissinnaassuseq tamanna takussaanngitsunik takunnitsitsisinnaasoq immikkorluinnaq ittuusimassaaq! Takunnissinnassuseq tamanna taasinnaavarput anersaakkut takunnissinnaassutsimik pitsaalluinnartumik.

Sooq pisariaqarpa?

Ukiuni hundredelinni siullerni kristumiut anersaakkut takunnissinnaassutsimik tamatuminnga pisariaqartitsilluinnarsimapput. Kiffartornerminni atugarliortitaasaqaat. Tamanna Paulusip ima allaatigisimavaa: ’Tamatigut naalliukkaluarpugut annikilliornatali; nikagaluarpugut nikallornatali; qinugineqaraluarpugut qimagaanatali; qunutinneqaraluarpugut nungutitaanatali.’ — 2 Korintumiut 4:8, 9.

Pissutsinik taama ittunik atugaqaraluarlutik ajoqersukkat aalajaatsut ilumoortuaannarsimapput. Guutimut uppernermikkut nukittuujugamik Paulusitut ima oqarsinnaasimapput: ’Tamanna pillugu nikallunngilagut, kisianni naak inuuserput qalleq aseroraluartoq, taamaattoq ilorleq ullut tamaasa nutaanngoriartorpoq.’ Ullut tamaasa nutaanngoriartornermut tamatumunnga suna pissutaava? Paulus nangilluni ima allappoq: ’Naalliussuserpummi sivikitsoq artornanngitsoq naalannassusermik naassaanngitsumik tamaviaarnartumik uuttugassaanngilluinnartumik uatsinnut kinguneqassavoq, takussaasut pinnagit takussaanngitsut isigigatsigik; takussaasummi naassaapput, takussaanngitsulli naassaanngillat.’ — 2 Korintumiut 4:16-18.

Paulusip anersaakkut qatanngutini kajumissaarpai ajornartorsiutit, atugarliuutit qinugisaanerlu — annikilliuutit qanorluunniit ittut — imminnut akissarsiassarititaasumik naalannangaartumik ’takunnissinnaanerminnut’ akornutaateqqunagit. Pissutsit maannakkut atukkamik ungataannut isigisinnaasariaqarput, kristumiutut inooriaatsimik kingunissaa pilluarnartoq siumut isigalugu. Tamannarpiaavoq akiuuttuarniarlutik aalajangiusimanninnermikkut ullut tamaasa nutaannguallaatigisartagaat. Ullumikkuttaaq kristumiut taamatut anersaakkut ’tappissuunissartik’ pisariaqartippaat.

Misilinneqaatit atuukkallaannartutut isigikkit!

Takorusunngisaraluatsinnik ullut tamaasa takusaqartarpugut. Tarrarsuummut qiviarutta ippinnartunik kissaatiginngisatsinnik, timikkut naammalluinnanngissutsimut  utoqqaliartornermullu ersiutaasunik, takusaqanngitsoorneq ajorpugut. Guutip oqaasianut tarrarsuutitut ittumut alakkarutta immitsinni allanilu anersaakkut ippinnaatit innarluutillu takusinnaalersarpavut. (Jâko 1:22-25) Aamma aviisinik tv-kkulluunniit isiginnaaraangatta naapertuilluanngissutsimik, peqqarniissutsimik alianartunillu qamuuna attorneqaatigisatsinnik takusaqartarpugut.

Satanip kissaatigaa isigisatsinnit nikallortinneqarnissarput, allamut saatsinneqarnissarput uppernikkullu sanngiillisinneqarnissarput. Tamanna qanoq ililluta pinngitsoortissinnaavarput? Jesus Kristusip maligassiaa malittariaqarparput, soorlumi apustili Peter ima oqartoq: ’Tamatumunngami qaaqqusimavusi, Kristusissaaq anniarmimmat ilissi pillusi maligassaqartillusi, tumini atuaqqullusigik.’ (1 Peter 2:21) Kristumiutut inuunermi sutigut tamatigut Jesus maligassat pitsaanerpaartaraat.

Peterip Jesus maligassatsitut eqqartoramiuk ingammik anniarsimanera erseqqissarpaa. Jesusimmi nunamiitilluni naalliuuterpassuit atorsimavai. Inuit pinngortinneqalermata Jehovap ’sulillaqqissorsuutitaatut’ Jesusip nalunngeqqissaarsimavaa inuit qanoq ittuunissaat Guutip siunertarigaa. (Ussatit 8:30, 31, NV) Nunamiinnerminili qanimut takusimavaa ajorti naammalluinnanngissuserlu qanoq inunnut timikkut sunniussimasoq. Ullut tamarluinnaasa inuit naammalluinnanngissusii sanngiissusiilu isigisariaqaannarnagit aamma isumassortariaqartarpai. Tamanna qamuuna assut attorneqaatigisimassavaa. — Matîuse 9:36; Mákorse 6:34.

Allat annikilliuutaannik isigisaqarnermi saniatigut aamma nammineq Jesus annikilliortitaasarpoq. (Eprîarit 5:7, 8) Anersaakkulli ’tappissutsi’ naammalluinnartoq atorlugu annikilliuutit tamakku ungataannut isigisarpoq akissarsiassarlu siumut isigiuarlugu: assuarnaassutsi pillugu inuunermut toqujuitsumut makititaanissani. Kunngitut Messiasiusutut immikkut pisinnaatitaaffigissavaa inuiaat pissutsinik ajortunik atukkaminnik naalliuutiginnittut aniguisissallugit naammalluinnartunngorteqqissallugillu — Jehovap inuk pinngortikkamiuk taassumunnga pissuserititaanut utertillugit. Siunissami pisussat tamakku eqqarsaatigiuaannarnerisigut atugarliorneq ullut tamaasa takusaraluarlugu Guutimut kiffartornermini nuannaarneq pigiuaannarsinnaasimavaa. Paulus kingusinnerusukkut ima allassimavoq: ’Taassuma tipaatsuutissaq imminut saqqangiussaq pillugu ilalaarluni [nappagaq anniartitsivik, NV] atorpaa, mitaatigineqarnini soqutiginagu, ingissimavorlu Guutip issiavissaarsuata talerpiata tungaanut.’ — Eprîarit 12:2.

Jesusip annikilliuutit misilinneqaatillu nuannaarnerminut aseruutaatinngisaannarpai, allamut saassutiginngisaannarlugit uppernikkulluunniit sanngiillissutiginngisaannarlugit. Taassumunnga ajoqersukkatut taassuma maligassiaa naammalluinnartoq maleqqissaarniartariaqarparput. — Matîuse 16:24.

Takussaanngitsut naassaanngitsumik atasussat sammiuakkit!

Jesus suup nikallujuitsissimaneraa eqqartuutigalugu Paulusip erseqqissarpaa aqqut suna uagut ingerlavigisariaqaripput: ’Nikallujuerluta arpanniarta assoruunnitsinni uatsinnut siunertarititaasumi, uppernermillu aallarniisoq inerititsisorlu Jesus aarlorfigisigu.’ (Eprîarit 12:1, 2) Aap, nuannaarluta kristumiutut arpassagutta ajugaassaguttalu uungaannaq isiginaveersaartariaqarpugut. Qanorli isumaqarpa Jesus ’aarlorfigissagipput’, taamaaliornerpullu uagutsinnut qanoq isumaqassava?

Ataasiinnaq assersuutitut taasinnaavarput. 1914-imi Jesus Guutip naalagaaffiani kunnginngortitaavoq taamanimiillu qilammit naalakkersuilerluni. Soorunami tamanna uagut isitsinnut takussaanngilaq. Taamaattorli Jesus ’aarlorfigigutsigu’ anersaakkut takunnissinnaassuserput iluaqutigalugu takusinnaassavarput akuliunnissaminut pissutsillu aaqqissuussaanerata ajortup maannakkut atuuttup suujunnaarsinnissaanut kiisalu Satanip inngilipiluisalu susinnaajunnaarsitaanerup itinersuanut iginnissaannut piareeqqasoq. Sulilu ungasinnerusumut qiviarutta anersaakkut takunnissinnaassutsitta qulaassavaa silarsuaq nutaaq nuanningaartoq, silarsuaq ’toqup, aliasuutit, nillianerup, anniaatillu’ atuuffiginngisaat aammalu ’siulliit peeruffiat’. — sarĸúmersitat 19:11-16; 20:1-3; 21:4.

 Misilinneqaatit atuukkallartut ullut tamaasa aqqusaartakkatta nanertuutiginissaannut taarsiullugu naassaanngitsunut qiviaqqajuarutta pitsaanerussannginnerpa? Nunarsuarmi mingutsinneqarsimasumi matumani nappaatit piumatussutsillu ungataannut isigaluta Paratiisimi inuit peqqillutillu, pilluarlutillu isumassuisut takorloortarniartigik. Timikkut anersaakkullu ajuutivut ’qulaallugit’ Kristusip pilliutaata utertitsissutaasup ullut arlaanni tamakkunannga aniguisitsiumaarnera eqqarsaatigiuartarniartigu. Sorsunnerit aammik kuisiffioqisut, inatsisaassuseq nakuusernerlu qaangiinnarlugit inuit makeqqitsitaaqqammersut eqqissinerup naapertuilluassutsillu Jehovap pigisaasa qanoq sunniuteqarsinnaanerannik ilinniartinneqalersut ’isigisarniartigik’.

Jesusimut ’aarlornitsinnut’ ilaassaartaaq Naalagaaffiup takussaanngikkaluarluni nunarsuarmi Guutip innuttaasa akornanni naammassereersimasaanik anersaakkut takunnissinnaassuseq: ataasiussutsimik, eqqissinermik, asanninnermik, qatanngutigiittut tunniusimaqatigiinnermik anersaakkullu ineriartornermik. Tysklandimi kristumiu arnaq video ’Guutimit ajoqersorneqarneq ataasiussuseqalersitsisarpoq’-mik taaguutilik takoreerlugu ima allappoq: „Nunarsuaq tamakkerlugu kristumiut qatanngutit angutit arnallu amerlasoorpassuit maannakkorpiaq, tamanit akerlilersorneqaraluarlutik, ilumoorlutik Jehovamut kiffartornerannik eqqaamanninnerulernissannut filmi iluaqutigaara. Aap, silarsuarmi nakuuserfioqisumi uumissuineqarfioqisumilu maani qatanngutigiittut ataasiussuserput ilumut erlinnartorujussuuvoq.“

Qamuuna takusinnaavigit Jehova, Jesus, inngilit aalajaatsut kristumioqatitillu millionilikkuutaat illit ilitit? Taamaappat ’silap matuma piinik isumakuluutiginninnermit’ artorsinneqassanngilatit, sapiissuseerunnerlu pissutigalugu uniinnassanak kristumiutullu kiffartornermi ’inerititaqanngitsuussanak’. (Matîuse 13:22) Taamaattumik Guutip naalagaaffiata pilersinneqarsimasup tamatumalu ullumikkut siunissamilu pilluaqqussutissartaasa anersaakkut isigiuaannarnerisigut Jesusimut ’aarlortuaannarit’.

Takussaanngitsunik takunnissinnaassuseqarlutit inuugit!

Guutip silarsuassaata nutaap naassaanngitsumik atasussap ullumikkullu silarsuatoqqap aseroqqajaasup assigiinngissutaat annertooq eqqarsaatigigaangatsigu inuuginnarnissatsinnut naleqquttumik inooriaaseqarnissatsinnut killinneqartariaqarpugut, taamaalilluta ullumikkut uppernerup isaanit taamaallaat takusinnaasatta isivitsinnik takusinnaalernissaannut periarfissaqaqqulluta. Toqusunit makititaasussat ilarpassuisa takusatik upperiuminaatsissaqaat nunarsuarmi paratiisiusumi naapertuilluassuseqarfiusumi silarsuarmillu toqunngikkallaramik inuuffigisaminnit allaanerulluinnartumi makititaagunik! Takorlooruk qanoq nuannertigissasoq uumaannartitaasimalluni makittunik tikilluaqqusissalluni Guutillu iliuuserisimasaanik tamanik oqaluttuussissalluni! — Naleqqiuguk Joel 2:21-27.

Aap, anersaakkut isigisinnaassuseq ilumut nalilerujussuuvoq, ingammik ersarissarneqartuaannaruni! Taamaaliorsinnaavugullu Biibilimik atuaqqissaarnitsinni itisilerisarnitsigut, kristumiut ataatsimiinnerinut najuuttarnitsigut, Biibilip neriuutigititaanik allanut oqaluttuartarnitsigut tamanillu pingaarnerpaamik, Guutimut siulersoqqulluta qinusarnitsigut. Taamaalilluta anersaakkut isigisinnaassuserput tappissuutissavarput pissutsillu ungataannut isigisinnaassalluta! (wE 15/2 96)