Nanertuutigisat Jehovamut tunniuttuaannaruk

ULLUMIKKUT inuppassuit nammagassaminnit artorsinneqarsimasutut misigipput. Aningaasatigut imaluunniit ilaqutariit iluanni ajornartorsiutit, nappaateqarneq, allanit tatineqarneq naalliutsitaanerlu pissutigalugit anniaatit nanertuutigisallu atortariaqartarpaat. Tatineqarnerup tamatuma avataaneersup saniatigut ilaasa aamma namminneq naammalluinnanngissusertik pissutigalugu naleqanngitsutut misigineq artorsaatigisarpaat. Amerlasuut nakkaannarusuttaraluarput. Nammagassat artornarpallaaleraangata qanoq iliorsinnaavit?

Ilaanni Israelikkut kunngiat David nanertuuteqarpallaartutut misigisimavoq. Tussiaat 55 naapertorlugu akeqqami tatisinerat pissutigalugu annilaangalluni paatsiveerulluinnarsimavoq. Uummatikkut anniaateqarlunilu siooravoq. Kappialaneq nimaarnerlu kisiisa atugarilerpai. (Tussiaat 55:3, 6, 18) Taamaattoq aniguinissamut periarfissaqarpoq. Qanoq ililluni? Annertoqqutissatut Guutini tatigaa. Allat imminut assingusumik misigiumaartut ima siunnersorpai: „Nanertuutigisat Jehovamut tunniuguk.“ — Tussiaat 55:23.

„Nanertuutigisat Jehovamut tunniuguk“ qanoq paasisariaqarpa? Tassaannaava isumakuluutit pillugit Jehovamut qinuneq? Imaluunniit ajornartorsiutivut aaqqinniarlugit nammineq iliuuseqarsinnaanerpugut? Taavami Jehova qinnuigissallugu qinngaqqunnartutut misigigutta? Davidip oqaasii qanoq isumaqarnersut paasisinnaavarput taassuma misigisimasaasa ilaat allannermini eqqaamalluarsimassagunagai misissorutsigik.

Jehova pissatsissutigalugu iliuuseqarit

Eqqaamaviuk qanoq Israelikkut sakkutoorpassuisa Goliat ersigisimagaat? Inorujussuup taassuma, 2,7 meterinit annerusup, annilaangatissimaqai. (1 Samuel 17:4-11, 24) Davidili annilaanganngilaq. Sooq? Nammineerluni Goliatimut akiuuttussanngilaq. Israelikkunnut kunnginngortussatut taninneqaramili Guutip anersaavanit siulersorneqarluni inuuvoq iliuutsiminilu tamani taassumannga nakussatsinneqartarluni. (1 Samuel 16:13) Taamaattumik Goliat ima oqarfigaa: „Uanga ornippakkit katersaarsuit [Jehovaata] Israelikkut Guutiata mitallerfigisavit aqqani. Ullumi Jehovap uanga assannut tunniuppaatit.“ (1 Samuel 17:45, 46) David illusarnermik sungiussisimalluarpoq, qularnanngivissumilli Jehovap anersaavata illernartup ujarak Davidip Goliatimut illusariagaa aqullugulu toqunarnerusunngortissimavaa. — 1 Samuel 17:48-51.

Davidip unamminiarnartoq tamanna sapinngilaa, tatigigamiullu Guutip tapersersussagaani nakussatsissagaanilu ajugaavoq. Guutimut ajunngitsumik tatiginnittumillu attaveqarpoq. Nalunanngitsumik siornatigut  Jehovamit aniguisinneqarsimanini attaveqarnermut tamatumunnga nakussatsissutigisimavaa. (1 Samuel 17:34-37) Daviditut illit nammineq Jehovamut attaveqarluarsinnaavutit taassumalu sutigut tamatigut nakussatsissallutit atatissallutillu piginnaassuseqarnera piumassuseqarneralu tatigilluinnarlugit. — Tussiaat 34:8, 9.

Ajornartorsiut aaqqinniarlugu sapinngisannik iliuuseqarit

Taamaattoq ilaannikkut anniaatit, isumakuluutit allaallu annilaanganeq misigisarpavut, soorlu Tussiaat 55-imi erseqqissumik takutinneqartoq. Assersuutigalugu Jehovamut qunusuitsumik tatiginnittuliorsimanermi tamatuma kingorna ukiualuit qaangiuttut David akeqqaminut sioorarujussuarsimavoq. Kunngimit Saulimit iluarisaajunnaarami aniguiniarluni qimaasariaqarpoq. Takorlooruk uiverluni misigisoq isumamigullu Jehovap siunertaa pillugu apeqqutissaqalersoq. Tassami Israelikkunnut kunnginngortussatut taninneqareersimavoq, taamaattorli inuilaami qimaasutut inuusariaqarpoq, uumasutut nujuartatut piniarneqarluni. Illoqarfimmut Gatimut, Goliatip najugaqarfigisimasaanut, qimaagami ilisarineqarpoq. Tamanna qanoq kinguneqarpa? Allassimavoq David ’ersingaalersoq’. — 1 Samuel 21:10-12.

Naalli annilaangassuteqaraluarluni Jehovap ikiuinissaa tatigiuarpaa. Tussiaat 34-mi (pisimasup tamatuma kingunerisaanik allanneqartumi) David ima allassimavoq: „[Jehovap] ujaranni akivaanga, aniguisippaangalu siooqqatigisannit tamanit. Nallinnartut torlulammata tusarpai [Jehovap,] annikilliuutaannillu tamanit annaallugit.“ — Tussiaat 34:5, 7.

Soorunami Jehovap tapersersorsimavaa. Malugiulli Davidip iliuuseqarnani Jehovamit aniguinissani utaqqiinnanngikkaa. Paasivaa nammineq sapinngisaminik aniguinissaminut iliuuseqartariaqarluni. Nalunngilaa Jehova aniguisimanerminut peqataasimasoq, namminerli aamma iliuuseqarpoq, silaaruttuusaarluni taamaalillunilu Gatip kunngianit toqunneqanngitsoorluni. (1 Samuel 21:14–22:1) Uaguttaaq sapinngisamik nanertuutigisavut iliuuseqarfigisariaqarpavut Jehovallu ikiuinissaa utaqqiinnarnagu. — Jâko 1:5, 6; 2:26.

Nanertuutigisatit amerliseqinagit

Kingusinnerusukkut David ilungersuanermigut suli ilinniagaqarpoq. Suna ilinniarpaa? Ilaannikkut nammineq nammagassavut amerlisittarpavut. Filisterit ajugaaffigereersimallugit aalajangerami angerutsip illerfia Jerusalemimut nuutsinniarlugu, ajornartorsiuteqalerpoq. Ima oqaluttuarineqarpoq: „Sakkutuunilu tamaasa ilagalugit Ba’al-Judamut aallarpoq, Guutip angerusiata illerfia . . . tassannga aallugu. Angerutsip illerfia qamutinut nutaanut ikillugu . . . aallaruppaat. Ussa Akjolu Abinadibip erneri ingerlassisuupput.“ — 2 Samuel 6:2, 3.

Qamutit atorlugit illerfimmik angallassinerat Jehovap tamanna pillugu ilitsersuutaanut unioqqutitsineruvoq. Erseqqissarneqarsimavoq nammattut aalajangersimasut, Kehatikkut Levikkuusut, kisimik illerfik akiassagaat illerfiup akiarfii atorlugit. (2 Moses 25:13, 14; 4 Moses 4:15, 19; 7:7-9) Ilitsersuutit tamakku sumiginnarneqarnerat ajunaarnermik kinguneqarpoq. Ussigit qamutinik uniartut orloqqajarmata qamutillu uppittussanngormata, Uzzap Levikkuugaluartup palasiunngitsulli illerfik najumminiarlugu attorpaa, naalannginninilu pissutigalugu Jehovamit toqunneqarpoq. — 2 Samuel 6:6, 7.

 David kunngiugami tamakkununnga akisussaaffeqaqataavoq. Taassuma qisuariarnerata takutippaa allaat inuup Jehovamut ajunngitsumik attaveqaraluartup ilaannikkut atukkat artornartut ajortumik qisuariarfigisinnaagai. Siullermik David kamangaqaa. Kingorna siooralerpoq. (2 Samuel 6:8, 9) Jehovamut tatiginnilluni attaveqarnera assut misilinneqarpoq. Tamatumani nanertuutigisani Jehovamut tunniunngitsoorpai peqqussutai maleruarnagit. Uaguttaaq ilaannikkut taamaaliortarpugut? Ilaannikkut Jehova pisuutittarnerparput peqqussutaanik maleruaanngitsoorsimanerput pissuteqaraluarpata ajornartorsiuleraangatta? — Ussatit 19:3.

Imminut ajorineq iliuuseqarfigalugu

Tamatuma kingorna David annertuumik imminut ajorinermik nanertuuteqarpoq Jehovap ileqqussanut tunngasutigut najoqqutassiaanut ajortuliungaarsimanini pissutigalugu. Taamani Davidip sorsunnermi sakkutuuni siulersunngitsoorsimavai. Taakku sorsutsillugit nammineq Jerusalemimiiginnarpoq. Tamanna ajornartorsiutinik sualuttunik kinguneqarpoq. — 2 Samuel 11:1.

Kunngi Davidip Batseba pinnersoq uffartoq takuaa. Kanngunartuliorfigaa naartulersillugu. (2 Samuel 11:2-5) Ajortuliani isertorniarlugu isumagaa uiata Uriasip sorsuffimmit Jerusalemimut uternissaa. Uriasilli Israelikkut suli sorsutsillugit nuliani atoqatigiumanngilaa. (2 Samuel 11:6-11) David maanna ajoqisumik iliuuseqalerpoq ajortuliani isertorniarlugu. Peqqussutigaa Urias sorsunnermi navianartumut sakkutooqatiminit qimataassasoq, toqunneqarniassammat. Ajortuliap amiilaarnassusia! — 2 Samuel 11:12-17.

Naggataatigulli ajortuliornini isertorneqarsinnaajunnaarmat David qulaarneqarpoq. (2 Samuel 12:7-12) Takorlooriaruk Davidip pilerissutsimi kingunerisaanik qanoq iliorsimalluni paasileramiuk qanoq pisuusutut misigisimangaartigisoq. Angutaagami misigittaatsuunngitsoq ajortuliorsimanini unittoorutigilluinnarsimasinnaagaluarpaa. Qularnanngitsumillu naleqanngivissutut misigisimassaaq!

Erniinnarli Davidip ajortuliorsimanini nassuerutigaa, pruffiitilu Natan ima nassuerfigaa: „[Jehovamut] ajortuliorsimavunga!“ (2 Samuel 12:13) Tussiaat 51-imi oqaluttuarineqarpoq qanoq misigisimasoq qanorlu Jehova qinnuigigaa minguersaqqulluni isumakkeerfigeqqullunilu. Ima qinuvoq: „Salinnga pinerluutaarulluinnarlunga, minguersannga ajortaarutillunga; massami unioqqutitsinikka ilisimavakka, ajortuliaralu takkunniitittuaannarpara.“ (Tussiaat 51:4, 5) Peqqissimilluinnarami Jehovamut ajunngitsumik attaveqarnini ineriartorteqqissinnaavaa. Imminut avoqqaarinini naleqanngitsutullu misiginini attatiinnanngilai. Pisuussutsini akueralugu, peqqissimissutigingaarlugu Jehovalu qamannga pisumik isumakkeerfigineqarnissaminik qinnuigalugu nanertuutigisani Jehovamut tunniuppai. Guutimut iluarisaaqqilerpoq. — Tussiaat 51:9-14, 17-21.

Killuussisoqaraangat

Maanna pisimasoq Davidip Tussiaat 55-imik allassimaneranut pissutaasoq tikipparput. Misigissutsikkut annertuumik tatineqarpoq. „Uummatiga qussalavoq ilunni, toqumut siooranerup tikippaanga,“ taama allassimavoq. (Tussiaat 55:5) Qussalaneranut suna pissutaava? Davidip ernerata Absalomip pikitsitsilluni David kunngiuneranik arsaarniarpaa. (2 Samuel 15:1-6) Ernermit killuutigineqarneq atussallugu artornartorujussuuvoq, ajorneruvorli  Davidip siunnersuisua tatiginartoq Akitofel pikitsitsinermut peqataalermat. Tussiaat 55:13-15-imi Davidip allaatigisaa tassaavoq Akitofel. Pikitsitsineq killuussinerlu pissutigalugit David Jerusalemimit qimaasariaqarpoq. (2 Samuel 15:13, 14) Ila Davidimut annikilliornarsimassaqaaq!

Naalli misigissutsikkut artorsaateqaraluarluni annikillioraluarlunilu Jehova tatigiuaannarsimavaa. Jehova qinnuigaa killuussisut pilersaarutaat maangaannarteqqullugu. (2 Samuel 15:30, 31) Malugaarput Davidip Jehovap iliuuseqarnissaa utaqqiinnarsimanngikkaa. Periarfissaqalermat erniinnarluinnaq imminut killuussineq akiorniarlugu sapinngisaminik iliuuseqalerpoq. Siunnersortimi ilaat alla, Husjaj, Jerusalemimut aallartippaa killuussisunut ilaalersuusaaqqullugu, killuussinerulli maangaannartinnissaa siunertaralugu. (2 Samuel 15:32-34) Jehovap ikiuineratigut pilersaarut tamanna iluatsippoq. Husjajip isumagaa Davidip innuttaasalu imminnut illersuiniarlutik aaqqissuussinissaminnut naammattumik piffissaqarnissaat. — 2 Samuel 17:14.

Davidip inuunini naallugu Jehovap illersuiniarluni isumaginninnera aammalu kamagittarnera isumakkeerfiginnikkumaneralu pingaartingaarsimassavai! (Tussiaat 34:19, 20; 51:19) Tamakkuninnga tamanik misigisaqarsimagami Davidip tatiginnilluni kajumissaarpaatigut annikillioraangatta Jehovamut saaffiginninnissatsinnik ikioqqulluta ’nanertuutigisavut Jehovamut tunniullugit’. — Naleqqiuguk 1 Pîtruse 5:6, 7.

Jehovamut nukittuumik tatiginnittumillu attaveqarnerup ineriartortinnissaa atatinnissaalu

Qanoq ililluta Daviditut Jehovamut attaveqarsinnaavugut, attaveqarnermik uatsinnut annikilliornartuni misilinneqarnermilu napassutigisinnaasatsinnik? Attaveqarneq taama ittoq ineriartortissinnaavarput Guutip oqaasia, Biibili, eqiasuilluta atuaqqissaartarutsigu. Taassuma inatsisiminik, najoqqutassiaminik kinaassutsiminillu ajoqersussavaatigut. (Tussiaat 19:7-11) Guutip oqaasia eqqarsaatigeqqissaarnerujartortillugu taassumunnga qanilliartortarpugut tatigilluinnarnissaalu ilinniarlugu. (Tussiaat 143:1-5) Guutimut attaveqarnerput nakussatsittarparput uppeqativut ilagigaangatsigik Jehovamit ajoqersorneqarnerujumalluta. (Tussiaat 122:1-4) Jehovamullu attaveqarnerput aalajaallisikkiartortarparput qamannga pisumik qinusarnikkut. — Tussiaat 55:2.

Aap, David uatsitut nikallungalersinnaasarsimavoq Jehovamut attaveqarnini pitsaavallaarunnaaraangat. Qunutinneqaraangatta ’sianiitsuliorsinnaasarpugut’. (Nalunaajaasup oqaasii 7:7) Jehovalli suut tamaasa takusinnaavai, uummammiugisavullu takusarlugit. (Nalunaajaasup oqaasii 4:1; 5:8) Jehovamut attaveqarluartuaannarniarluta ilungersortariaqarpugut. Sumilluunniit nanertuutigisaqaraluarutta tatigisinnaavarput Jehovap tatineqarneq oqilisissinnaagaa imaluunniit nammannissaanut nakussatsissinnaalluta. (Filípimiut 4:6, 7, 13) Uagut Jehovamut qanimut attaveqartuaannarnissarput tamanit pingaarnerpaavoq. David Jehovamut qanimut attaveqaraangami toqqissisimalluinnartarsimavoq.

Taamaattumik, David taama oqarpoq, suulluunniit atortaraluarlugit nanertuutigisatit Jehovamut tunniuttuaannakkit. Taava misigiumaarparput neriorsuut manna ilumoortoq: „Taava isumagiumaarpaatit. Iluartoq patajatinngisaannassavaa.“ — Tussiaat 55:23. (wE 1/4 96)