Takusigik ilumoorfiginnittut!
Takusigik ilumoorfiginnittut!
’Kia mianerissannginneraatit, Jehova, aqqillu unnersiutiginagu? Kisivit [ilumoorfiginnittuugavit, NV]?’ — SARKÚMERSITAT 15:4.
1. J. F. Rutherford kingoraakkani, C. T. Russell, pillugu qanoq oqarsimava?
JOSEPH F. RUTHERFORD, C. T. Russell kingoraarlugu 1917-imi Napasuliaq Alapernaarsuiffiup Peqatigiiffiani præsidentinngortoq, Russellip ilisaanerani oqalugiaanni aallarnerlugu ima oqarpoq: „Charles Taze Russell Guutimut ilumoorsimavoq, Jesus Kristusimut ilumoorsimavoq, naalagaaffiup Messiasikkoortup soqutigisaanut ilumoorsimavoq. Ilumoorfiginnilluinnartuusimavoq, aap, toqussi tikillugu ilumoorfiginnissimalluni.“ Jehova Guutip kiffaanik aalajaatsumik eqqartuineq kusanartoq. Inuk ilumoorfiginninnerminik attassiinnarsimanerarlugu, ilumoorfiginnilluinnartuusimanerarlugu, oqarnermit annerusumik qanoq nersualaarneqarsinnaanerpa?
2, 3. (a) Sooq ilumoorfiginnittuaannarniarneq imaannaanngitsuua? (b) Aamma kia kristumiut ilumoortut ilumoorfiginninnerat aserorniarsaraa?
2 Ilumoorfiginnittuarniarneq imaannaanngilaq. Sooq? Inuup namminissarsiussusianut akerliummat. Allanit tamanit annermik Guutimut ilumuunngissimasut tassaapput kristumiuuneraqatigiit palasii. Aappariinnermilu ilumoorfigeqatigiinnginneq ullumikkut aatsaat taama ingasatsigilersimavoq. Allasiorneq nalinginnaaqaaq. Aamma niuernerup silarsuaani ilumoorfiginninnginneq atugaaqaaq. Tamanna pillugu ima oqartoqarsimavoq: „Siuttut suliffeqarfinnilu sulisut ilarpassui . . . isumaqarput ullumikkut inuit sianiitsut kisimik niuernermi ilumoorfiginnittuusut.“ Inuit „ilumoorfiginnippallaartut“ nikagineqartarput. „Pingaarnerpaamik imminut ilumoorfigisariaqarpoq,“ taama oqarsimavoq siunnersuisarfimmi direktøriusoq, ilaatigut siulersuinermik aaqqissuusseriaatsit assigisaallu pillugit siunnersuisartoq. Imminulli ilumoorfiginissamik oqalunneq oqaatsip isumaanik sangutitserujussuarneruvoq. Tamatuma Mika 7:2-mi allassimasumik eqqaasippaatigut: „Nuna inuerussimavoq peqqusersuitsunik unneqqarissunillu [ilumoorfiginnittunillu, NV].“
3 Ullumikkut ingasannerujussuarmik Satanip inngilipiloqataasalu Guutimut ilumoorunnaarsinniarluta persaraatigut. Taamaattuminguna kristumiut Evfisumiunut agdlagkat 6:12-imi ima oqarfigineqartut: ’Aak uinillu paaniagassarinnginnatsigik, siulersuisulli naalakkersuisullu taarsuullu matuma pissaanilissui anersaallu ajortut qilaap ataani.’ Aap, mianersoqqussut manna malittariaqarparput: ’Putumatsaalillusilu eqqumagitsi, akerartortersi Diaavulu liivertut uiannisaartutut angalasarmat iisassarsiorluni.’ — 1 Pîtruse 5:8.
4. Pissutsit suut ilumoorfiginnittuaannarnissamik ajornakusoortitsisarpat?
4 Aamma namminissarsioriartarnivut siuaasatsinnit siullernit kingornussimasavut ilumoorfiginnittuarnissamik ajornakusoortitsisarput, soorlu Mosesimik allakkat siulliit 8:21-mi allassimasoq inuit „inuusunnerminniilli ajortussaq“, aamma namminissarsiorneq, ’kisiat eqqarsaatigisaraat’. Paulusip ajornartorsiutigalugu nassuerutigisaa tamatta ajornartorsiutigaarput: ’Piumasarami ajunngitsoq suliarisarinngilara, kisianni piumanngisara ajortoq suliarisarpara.’ — Rûmamiut 7:19.
Oqaatsip isumaa
5, 6. Ilumoorfiginninneq sunaava, oqaaserlu tamanna qanoq nassuiarneqarsimava?
5 Oqaaseq „ilumoorfiginninneq“ isumalerujussuuvoq. Oqaatsinik ujarlerfissiami Hjælp til forståelse af Bibelen-imi oqaaseq tamanna pillugu ima allassimasoqarpoq: „Oqaatsit hebriiarisuut griikerisuullu [„ilumoorfiginninneq“-mik nutserneqartut] qallunaatut eqqoqqissaartumik oqaasertassaqarunanngillat, kisianni ’ilumoorluni tunniusimaneq’ aamma ’ilumoorfiginninneq’ isumavianut qanipput. Biibilimi oqaatsit isumaat Biibilimi atorneqarneranni ataqatigisaat ilaatillugit paasineqarsinnaapput.“ * „Ilumoorfiginninneq“ pillugu Napasuliaq Alapernaarsuiffik-mi ilaanni ima allassimasoqarpoq: ’Aalajaanneq, ataqqinninneq, asanninneq, pisussanngortinneq, ilumoorsuserlu sumik peqatigiissuteqarpat? Tassaapput ilumoorfiginninnerup immikkoortui assigiinngitsut.’ Aap, pissutsit assigiinngitsorpassuit tassaapput ilumoorfiginninnerup immikkoortui assigiinngitsut. Assut malugisariaqartuuvoq Biibilimi ilumoorfiginninneq naapertuilluassuserlu ataqatigiisinneqakulasorujussuummata.
6 Nassuiaatit matuma kingulianiittut aamma paasissutissiilluarput: ’Ilumoorfiginninneq tassaanerarneqarsinnaavoq ataavartumik tutsuiginartumillu aalajaanneq ilumoornerlu, qularnermik ussernartunillu aalassatsinneqarsinnaanngitsoq.’ ’Ilumoorfiginninnerup nassataraa oqaatsinik eqqortitsineq imaluunniit ilumoorfigisassanut najoqqutassanulluunniit ileqqussatigut unioqqutitassaanngitsutut isigisanut ilumoorneq; oqaaseq ilumoornerinnarmik imaqanngilaq, aammali isumaqarluni ilumoornerup tamatuma unioqqutinnissaanut usserneqarumannginneq imaluunniit nakkaannartinneqarumannginneq.’ Taamaattumik misilinneqartaraluarlutik, akerlilersorneqaraluarlutik qinugisaagaluarlutilluunniit aalajaattuaannartut ilumoorfiginnittutut eqqortumik taaneqarsinnaapput.
7. Ilumoorfiginninnerup aalajaannerullu suna assigiinngissutigaat?
7 Ilumoorfiginninnerulli aalajaanneq assigerluinnanngilaa, tamannalu assersuusiarineqarsinnaavoq. USA-p kippasinnerusortaani puilasoqarpoq nalunaaquttap-akunneranut ataasiarluni tissaluttartumik. Tissaluttarnera akuttoqatigiingaarmat taaneqartarpoq „Old Faithful“-mik („Aalajaatsutoqarsuaq“). Aamma Biibilimi oqaatigineqarpoq uumassuseqanngitsoq, soorlu qaammat, aalajaassinnaasoq, tutsuiginartuugami. Tussiaat 89:38-mi qaammat oqaatigineqarpoq ’naassaanngitsumut aalajaatsuusoq’. Tassa Guutip pinngortitaasa uumassuseqanngitsut ilaat aalajaatsutut tutsuiginartutulluunniit oqaatigineqarsinnaapput, taamaakkaluartorli tunniusimaffiginnissinnaanngillat imaluunniit ileqqussatigut pissutsinik, soorlu ilumoorfiginninnermik, allanut ersersitsisinnaanatik.
Jehova, tamatigut ilumoorfiginnittoq
8. Biibili naapertorlugu kina tamanit ilumoorfiginninnerpaava?
8 Qularutissaanngilluinnarpoq Jehova Guuti ilumoorfiginninnermik ersersitsisarneq eqqarsaatigalugu tamanit maligassaalluarnerpaammat. Jehova inunnut ilumoorsimavoq allaallu ernermi pilliutiginissaanut piumassuseqarsimalluni taakku naassaanngitsumik inuusinnaaleqqullugit. (Juánase 3:16) Jeremia 3:12-imi ima allassimavoq: „’Saanniarit Israel tunussisimasoq,’ oqarpoq [Jehova]. ’Kamaakkunnaassavassi saammaasuugama [ilumoorfiginnittuugama, NV].’“ Aamma sarĸúmersitat 16:5-imi Jehovap ilumuussusia eqqartorneqarpoq: ’Naapertuilluarputit, maannakkut ittutit siornagullu ittutit, illernartutit [ilumoorfiginnittuusutit, NV].’ Tussiaat 145:17-imi ima allassimavoq: „Iluartuuvoq [Jehova] ingerlavimmini tamani, qanoq iliornermini tamani nallittuisarpoq [ilumoorfiginnitttarpoq, NV].“ Jehova ima ilumoorfiginnitsigaaq sarĸúmersitat 15:4-mi ima allassimasoqarluni: ’Kia mianerissannginneraatit, [Jehova], aqqillu unnersiutiginagu? Kisivit illernartorsuugavit [ilumoorfiginnittuugavit, NV].’ Ilumummi Jehova Guuti ilumoorfiginnilluinnartuuvoq.
9, 10. Jehovap Israelikkunnik ilumoorfiginnissutsini qanoq ersersissimavaa?
9 Ingammik Israelitoqqap oqaluttuarisaanerani Jehovap innuttaminik ilumoorfiginninneranik takussutissarpassuaqarpoq. Eqqartuussisoqarnerup nalaani Israelikkut pallorfiginninnermit ilumoortumit nakkaqattaartuartarsimapput, Jehovalli nalligilertuartarsimavai annaattarlugillu. (Eqqartuussisut 2:15-22) Ukiuni 500-ni Israelikkut kunngeqarneranni Jehovap inuiannut taakkununnga ilumoornini ersersittuartarsimavaa.
10 Jehovap ilumoorfiginninnini pissutigalugu innuttani naammagittarfigisimavai, soorlumi 2 Israelikkut 36:15, 16-imi ima allassimasoqartoq: „[Jehova] Israelikkut siuaasaasa Guutiata aallartitani aqqutigalugit mianersoqqujuartaraluarpai innuttani naalaffinilu asattuunniaramigit. Kisianni Guutip aallartitai mitaatigisarpaat, Guutip oqaasii asiginnartarlugit pruffiitiilu salloqittarsaarisarlugit; kiisa naggataatigut [Jehovap] innuttani kamaatingaaramigit ikioriarfissaaruppai.“
11. Jehovap ilumoorfiginnissusianik ilisimanninnerput qanoq ililluni uagutsinnut tuppallernarlunilu toqqissinarpa?
11 Jehovap ilumoorfiginninneranit killinneqarluni apustilip Paulusip Rûmamiunut agdlagkat 8:38, 39-mi atuarsinnaasavut allassimavai: ’Nakimanaveerpunga toqulluunniit inuunerulluunniit, inngililluunniit naalagaanerilluunniit, maannakkut ittulluunniit piumaartussalluunniit, pissaanerilluunniit, qutsissulluunniit atsissulluunniit, suulluunniit pinngortitap allaasup avissaartinnaviassanngikkaatigut Guutip asannissusianit Kristus Jesusimi Naalakkatsinni.’ Jehovap ima neriorsoqqissaarpaatigut: ’Iperassanngilakkit qimassanatillu.’ (Eprîarit 13:5) Tuppallernaqaaq nalunagu Jehova Guuti tamatigut ilumoorfiginnittuusoq.
Jesus Kristus, erneq ilumoorfiginnittoq
12, 13. Suup takutippaa Guutip ernera ilumoorfiginnittuusoq?
12 Jesus Kristus Jehovap ilumoorfiginnissusianik malinninneq eqqarsaatigalugu naammalluinnartumik maligassaajuaannarsimavoq. Taamaattumik apustilip Peterip eqqortumik iliorluni Tussiaat 16:10-p Jesus Kristusimut eqquunnera tikkuarsimavaa, apustilit suliait 2:27-mi ima allassimalluni: ’Tarniga toqusut inaanniittuaqqussannginnakku, aserornerlu iluartortannut takoqqussannginnakku.’ Jesus Kristus eqqortumik taaneqarsimavoq ’kiffaq ilumoortoq’-mik, Ataataminut Guutillu naalagaaffianut neriorsuutigisaasumut ilumoorluinnartuugami. Satanip siullermik Jesusip assuarnaassusia aseroriaraluarsimavaa usserneratigut namminissarsiortumillu iliortinniaraluarneratigut. Iluatsitsinngeriarami qinugineqartilerpaa naggataatigullu qisummi naalliutsitsivimmi toqutaatillugu. Jesusili Ataataminut qilammiusumut, Jehova Guutimut, ilumoortuaannarpoq. — Matîuse 4:1-11.
13 Jesus Kristus ajoqersukkaminut ilumoorsimavoq neriorsuullu Matîuse 28:20-mi atuarsinnaasarput eqqortissimallugu: ’Atalu, ullut tamaasa najorpassi silarsuup naggatissaanut allaat.’ Neriorsuunni tamanna eqqortissimavaa ilagiissini ukiumi 33-mi piinsip ullua aallarnerfigalugu ulloq manna tikillugu ilumoorluni siulersortuarlugit.
Inuit naammalluinnanngitsut ilumoorfiginnittut
14. Ilumoorfiginninneq eqqarsaatigalugu Job qanoq maligassiuisimava?
14 Aamma inuit naammalluinnanngitsut Guutimut ilumoorsinnaappat? Jobip maligassiaatigut taamaattoqarsinnaanera erserpoq. Tamanna Satanip qassiiliuutissatut saqqummiussimavaa. Ilumut Job Jehova Guutimut aalajaappa, imaluunniit namminissarsiuinnarluni Guutimut kiffartorpa? Satan pingaakujulluni oqarpoq Job atuagarliortinneratigut Jehovamik tunussitissinnaallugu. Jobip pigisani tamaasa, meeqqani allaallu peqqissutsini, annaareeraalu nuliata ima oqarfigaa: „Guuti perloqquinnaruk, toquinnaruit pitsaanerummat.“ Jobili ilumoortuaannarpoq, nulianimi ima oqarfigaa: „’Arnatut silaatsutut oqalupputit! Ajunngitsut Guutimit pisut tigusinnaasaratsigit ajortut aamma tigusariaqannginnerpavut?’ Job tamakkuninnga tamanit pineqaraluarluni oqaatsimigut ajortuliunngilaq.“ (Job 2:9, 10) Job allaat tuppallersaaniarnerartunut ima oqarpoq: „[Guutip] toqukkaluarpangaluunniit neriuffigissavara.“ (Job 13:15, New International Version) Tupinnanngilaq Jehovap Job iluarimmagu, Temanimiumulli Elifasimut ima oqarluni: „Illit ikinngutitillu assut kamaappassi kiffattut Jobitut iliornasi eqqortumik oqaluuserinnginnassinga.“ — Job 42:7, 10-16; Jâko 5:11.
15. Jehovap kiffaasa ilumoorfiginnissusiat Biibilimi qanoq eqqartorneqarpa?
15 Angutit arnallu uppertut Eprîarinut agdlagkat-ni, kapitali 11-mi, eqqartorneqartut tamarmik ilumoorfiginnissimapput. Tatineqarnerminni aalajaaginnaratik aamma ilumoorfiginnittarsimapput. Taakku ima allaaserineqarput: ’Taakkua uppernikkut . . . liivit qarni milippaat, innerup ikumarna qamippaat, panap kiinaa ingalappaat, . . . ilaasa mitagaanerit iperartugaanerillu kalunnerillu parnaarussiviillu atorpaat; ujaqqanik milluugaapput, pilattugaapput, ussigaapput, panamik toqutaapput, savallu savaasallu amiinik atisaqarlutik angalapput ajorsarlutik naalliullutillu innarligaallutillu.’ — Eprîarit 11:33-37.
16. Ilumoorfiginninnermut atatillugu apustili Paulus qanoq maligassiuisimava?
16 Aammattaaq Kristumiut Allagaataat Griikerisuut-ni apustilip Paulusip maligassiaa pitsaasoq eqqartorneqarpoq. Kiffartornini pillugu kristumiut Thessalonikamiittut taassuma eqqortumik ima oqarfigisinnaasimavai: ’Ilisimannittuuvusi Guutilu, ilissinnut uppertunut piuaalluta iluarlutalu assuarnaallutalu qanoq akornassinniittugut.’ (1 Tásalûníkamiut 2:10) Paulusip oqaasii Korintumiunut agdlagkat áipait 6:4, 5-imi allassimasut taassuma ilumoorfiginnissusianik aamma takutitsipput: ’Tamatigut Guutip kiffaasut malunnartinniarpugut ilalaangaarluta, annikillisaraangatta, ajorsaraangatta, qussalagaangatta, unatarneqaraangatta, parnaarussivimmiikkaangatta, pikitsitsivigineqaraangatta, qasunartorsioraangatta, pigaaraangatta, iisinnginniaraangatta.’ Tamakkua tamarmik takutippaat Paulus ilumoorfiginninnini pissutigalugu imminut ataqqissuseqarsimasoq.
Nalitsinni kristumiut ilumoorfiginnittut
17. J. F. Rutherfordip ilumoorfiginnittuaannarnissaminik aalajangiusimanninnini qanoq oqaatigisimavaa?
17 Nalitsinni ilaatigut maligassaq pitsaasoq ilanngutassiap matuma aallartinnerani eqqartorneqartoq qimerloorsinnaavarput. Atuakkami Sikkerhed i verden under Fredsfyrsten-imi * (kalaallisuunngortitaanngitsumi) quppernermi 146-imi, immikkoortumi „Loyalitet under fængselsopholdet“-imik (Parnaarussaanermi ilumoorfiginninneq) qulequtalimmi, qanoq allassimasoqartoq malugiuk: „Parnaarussaanermini Napasuliaq Alapernaarsuiffiup Peqatigiiffiata præsidentiata, J. F. Rutherfordip, Jehovap peqatigiissortaanik ilumoorfiginninnini 25. decembari 1919-imi allakkamini ersersippaa. ’Babylonimut akuersiinnannginnera aalajaallungalu Naalakkannik kiffartuussiniarsimanera pissutigalugit parnaarussaavunga, tamannalu qujamasuutigaara. . . . Taassumannga iluarisaanissara parnaarussivimmiinnissaralu piumaneruakka Nersummut akuersiinnarnissaminngarnit imalunniit nakkaannarnissaminngarnit aammalu iperagaanissaminngarnit silarsuarmillu tamarmit iluarisaanissaminngarnit.’“
18, 19. Ullumikkut ilavut ilumoorfiginninnerminnik qanoq takutitsisimappat?
18 Aammattaaq kristumiorpassuit allat qinugineqarnerminni nikallujuinnermikkut maligassiuilluarsimapput, ilaatigut Tysklandimi nazistit nalaanni Jehovap nalunaajaasui, tuluit videoliaanni Purple Triangles-imi, siammarneqarluarsimasumi, takutinneqartut. Aamma Afrikami Jehovap nalunaajaasorpassui, ilaatigut Malawimi qatanngutit, ilumoorfiginninnerminnik takutitsisimapput. Tamaani Jehovap nalunaajaasuisa ilumoorfiginnissusiat parnaarussivimmi paarsisup uppernarsarpaa: „Nakkaannanngisaannarput, amerliartuinnarlutillu.“
19 Jehovas Vidners Årbog-it nutaanerusut ilaat atuaraanni kristumiut ilumoortut, ilaatigut Grækenlandimiittut, Moçambiquemiittut Polenimiittullu, ilumoorfiginnissusiat killitsinnanngitsoortanngilaq. Ilaat peqqarneeqisumik anniartitaasimapput; ilaat toqutaasimapput. Jehovas Vidners Årbog 1992-imi quppernermi 177-imi Etiopiami kristumiut angutit toqutaasimasut, taamaattorli toqussartik tikillugu ilumoorfiginnittuarsimasut, assingi takuneqarsinnaapput. Uagut Jehovamut nalunaajaasuusutut ilumoorfiginnittuarniarluta ilungersornitsinni pitsaasunik maligassarpassuaqaratta nuannaarutiginnginnerparput?
20. Ilumoorfiginnittuaannarutta qanoq kinguneqassava?
20 Ilumoorfiginnilluta ussernartunut tatineqarnernullu akiuukkaangatta imminut ataqqinitsigut nakussatsinneqartarpugut. Inuit ilumoorfiginnittuaannarnissaat pillugu apeqqummi akerleriissutaasumi kimut illiunnissarput kissaatigaarput? Ilumoorfiginnittuaannarnitsigut apeqqummi akerleriissutaasumi Jehova Guutimut illiuttarpugut uppernarsartarlugulu Satan Diaavulu ajorluinnartuusoq sallutoorsuusorlu. Taamaalilluta Pinngortitsisumit, Jehova Guutimit, iluarisaasarpugut, taassumalu pilluarluta naassaanngitsumik inuunissatsinnik akilerumaarpaatigut. (Tussiaat 37:29; 144:15b) Ilanngutassiami tulliuttumi sammissavarput ilumoorfiginnittuaannassagaanni suut pisariaqartut. (wE 15/3 96)
[Quppernerup ataani ilanngussaq]
^ imm. 5 Oqaatsinik ujarlerfissiaq Biibilimut tungasoq, Napasuliaq Alapernaarsuiffiup Peqatigiiffianit naqiterneqartoq.
^ imm. 17 Napasuliaq Alapernaarsuiffiup Peqatiiffiata naqitigaa.
Apeqqutit uteqqiissutissat
□ Sooq ilumoorfiginnittuaannarniarneq imaannaanngitsuua?
□ „Ilumoorfiginninneq“ qanoq isumaqarpa?
□ Inuit naammalluinnanngitsut ilumoorfiginnittut pillugit Biibili sunik imaqarpa?
□ Nalitsinni ilumoorfiginnissutsiminnik takutitsisimasut ilaannik taasaqarit.
[Atuaqqissaarnermi apeqqutit]
[Qupp. 10-imi assiliartaq]
Charles Taze Russell
[Qupp. 11-imi assiliartaq]
Jesus tassaavoq Jehovap ’kiffaa ilumoortoq’
[Qupp. 12-imi assiliartaq]
Job naammalluinnanngitsuugaluarluni ilumoorfiginnittuarsimavoq
[Qupp. 13-imi assiliartaq]
Paulus Jehovamut ilumoortuarsimavoq