Guuti kaasarilu
Guuti kaasarilu
’Taamaattumik kaasari tunisiuk kaasarip pissaanik, Guutilu Guutip pissaanik.’ — LÚKARSE 20:25.
1. (a) Jehova qanoq qutsissumik inissisimaffeqarpa? (b) Kaasarimut tunniussinnaanngisarput suna Jehovamut tunniuttariaqarparput?
JESUSIP taama peqqusigami qularinngivippaa Guutip kiffaminut piumasaqaatai kaasarip, imaluunniit naalagaaffiup, taakkununnga piumasarisinnaasaannit tamatigut salliutinneqartariaqartut. Jesusip allanit tamanit nalunnginneruaa tussiaasiortup Jehovamut qinnutaa manna qanoq ilumoortigisoq: „Naalagaaffiit atassaaq naassaanngitsumut, naalagaassutsillu [kisivit oqartussaassutsit] * kinguaariikkuutaani.“ (Tussiaat 145:13) Diaavulup naalagaaffinnut tamanut nunarsuarmiittunut pissaanermik neqeroorfigimmani, Jesus ima akivoq: ’Allassimavoq: „Jehova Guutit pallorfigissavat kiffartuullugulu taanna kisiat.“’ (Lúkarse 4:5-8) ’Kaasari’, tassaagaluarpat Romamiut kaasariat, inulluunniit alla, immaqaluunniit naalagaaffik, pallorfigineqartussaanngilaq.
2. (a) Satan silarsuarmi matumani qanoq inissisimaffeqarpa? (b) Kia akuerisaanik Satan taama inissisimaffeqarallarpa?
2 Jesusip assortunngilaa silarsuup matuma naalagaaffii Satanip pigigai. Tamatuma kingorna Satan ’silarsuup matuma naalagaa’-nik taasarpaa. (Juánase 12:31; 16:11) Ukiut hundredellit siulliit naalerneranni apustili Johannes ima allappoq: „Ilisimavugut Guutimit pisugut, silarsuarli tamaat ajortup pissaaneqarfigaa.“ (1 Juánase 5:19, NV) Imali paasisariaqanngilaq Jehovap nunarsuarmut oqartussaassutsini taamaatissimagaa. Eqqaamajuk Satanip Jesus naalakkersuinikkut naalagaaffinnut pissaaneqartikkumallugu neqeroorfigigamiuk qanoq oqartoq: ’Piginnaassut manna tamaat taakkualu pingaartorsuussutaat ilinnut tunniukkumaarpara; uannut pigititaammata kimullu piumasannut tunniuttarakkit.’ (Lúkarse 4:6) Tassa Satanip silarsuarmi naalagaaffiit pissaaneqarfigai aatsaat Guutip akuersineratigut.
3. (a) Nunarsuarmi naalagaaffiit Jehovamut naleqqiullugu qanoq inissisimaffeqarpat? (b) Sooq oqarsinnaavugut oqartussaasunut naalatsigitinneq tassaanngitsoq Satanimut, silarsuup matuma guutianut, naalatsigitinneq?
3 Tamatumunnga assingusumik oqartoqarsinnaavoq naalagaaffik pissaaneqartoq aatsaat Guutip, kisimi oqartussaasup, akuersineratigut. (Juánase 19:11) Taamaattumik allassimavoq ’oqartussaasut piusut atorfimminnut annerusumik minnerusumilluunniit oqartussaassuseqarfiusut Guutimit ivertitaasut’. Jehovap kisimi oqartussaassusianut naleqqiutissagaanni nunarsuarmi oqartussaasut minnerungaartumik oqartussaassuseqarput. Taamaakkaluartorli ’Guutip kiffarai’, kiffartuussinernik pisariaqartunik naammassinnittaramik, inatsisinik aaqqissugaanermillu atortitsillutik pinerluttuliortullu pillaatissittarlugit. (Rûmamiut 13:1, 4, 6, NV) Kristumiut paasisariaqarpaat naak Satan silarsuarmut imaluunniit aaqqissuussaanermut matumunnga takussaanngitsumik naalagaagaluartoq, naalagaaffimmut naalatsigitittariaqarnertik akuerigaangamikku ima paasisariaqanngimmat Satanimut naalatsigitillutik. Guuti naalappaat. Ukioq manna 1996 tikillugu naalakkersuisut suli ’Guutip aaqqissuussaanut’ ilaagallarput, tassa aaqqissuussaaneq utaqqiisaasoq Guutip akuerigallagaa, Jehovallu nunarsuarmi kiffaasa aaqqissuussaaneq tamanna akuerisariaqarpaat. — Rûmamiut 13:1.
Jehovap itsaq kiffai naalagaaffillu
4. Sooq Jehovap Josefip Egyptenimi nuimasumik atorfeqalernera akueraa?
4 Kristus sioqqullugu Jehovap akuerisimavaa kiffami ilaat naalagaaffimmi nuimasumik atorfeqarnissaat. Assersuutigalugu, 1700-kkunni u.n.s. Josef Egyptenimut tamarmut naalaganngortinneqarpoq, taamaallaat Faraomit qulangersimaneqarluni. (1 Moses 41:39-43) Pisimasut ersersilluarpaat Jehovap tamanna isumagisimagaa, Josef taamaalilluni ’Abrahamip kinguaassaasa’ illersorneqarnerannut atorneqarsinnaaqqullugu, Jehovallu siunertaa naammassineqarsinnaaqqullugu. Soorunami eqqaamasariaqarparput Josef Egyptenimut inussiatut tunineqarsimasoq, taamanilu Mosesip inatsisai ’Kristusillu inatsisai’ suli atuutilersinneqarsimanngitsut. — 1 Moses 15:5-7; 50:19-21; Galâsiamiut 6:2.
5. Suna pillugu juutit aallarunneqarsimasut kajumissaarneqarpat Babylonip ’eqqissinissaa noqqaassutigeqqullugu’?
5 Ukiut hundredelikkuutaat tamatuma kingorna pruffiitip aalajaatsup Jeremiasip Jehovamit isumassarsisitaalluni juutit Babylonimut aallarunneqartut peqquai naalakkersuisunut Babylonimiittunut naalatsigiteqqullugit allaallu illoqarfiup tamatuma eqqissinissaa qinnutigeqqullugu. Jeremiasip ima allaffigai: „Katersaarsuit Jehovaat Israelikkut Guutiat Jerusalaamit Babylonimut aallarussaatitaminut tamanut ima oqarpoq: . . . ’Nunap ilissinnut aallarussivimma inuisa pilluaatissaat isumagisiuk Jehovamullu qinnussigit, nunap taassuma inui pilluarpata ilississaaq pilluarlusi inuussagassi.’“ (Jeremia 29:4, 7) Jehovap innuttai tamatigut pissutissaqarluartarsimapput ’eqqissinissaq noqqaassutiginissaanut’, imminnut naalagaaffimmullu naalatsigisaminnut atatillugu, Jehovamik pallorfiginninnissamut kiffaanngissuseqarsinnaaqqullutik. — 1 Pîtruse 3:11.
6. Naak naalagaaffimmi nuimasumik atorfeqartitaagaluarlutik Daniel ikinngutaalu pingasut qanoq ilillutik Jehovap inatsisaanut akerliusumik iliuuseqarumanngillat?
6 Babylonimut tigusatut aallarussaaqqanerup nalaani Danielip juutillu allat aalajaatsut pingasut naalagaaffimmit ilinniartitaanissartik akuerisimavaat kingornalu Babylonimi nuimasumik atorfeqalerlutik. (Daniel 1:3-7; 2:48, 49) Ilinniartitaanermik inatsisip Guutimik, Jehovap, Moses aqqutigalugu tunniussimasaata nerisassanut atatillugu unioqqutittoornissaanut aarlerinartoqalermat aalajaatsumik isummereerput. Taamaalioramik pilluaqquneqangaarput. (Daniel 1:8-17) Kunngi Nebukadnezarip inuusaliaq Babylonimiut naalagaaffissuannut assersuutaasoq nappartimmagu Danielip ikinngutai hebriiariusut pingasut qularnanngitsumik naalagaaffimmi atorfileqatitik ilagalugit pinngitsooratik najuuttussaatitaapput. Kisianni ’seeqqummerlutik inuusaliaq pallorfigiumanngilaat’. Assuarnaassusiat pillugu Jehovap pilluaqqoqqippai. (Daniel 3:1-6, 13-28) Ullumikkuttaaq Jehovap nalunaajaasuisa nunap inuuffigisamik erfalasua ataqqivaat, kisianni pallorfigiumaneq ajorpaat. — 2 Moses 20:4, 5; 1 Juánase 5:21.
7. (a) Naak Babylonimi naalagaaffimmi nuimasumik atorfeqaraluarluni Daniel qanoq ililluni maligassaalluarpa? (b) Kristumiut nalaanni pissutsit qanoq allanngorsimappat?
7 Kunngeqarfik Babylon uppitinneqareermat Daniel naalagaaffiup kingoraasup Medo-Persiap, ataani nuimasumik atorfeqalerpoq. (Daniel 5:30, 31; 6:1-3) Nuimasumilli atorfeqaraluarluni assuarnaassutsini unioqqutikkumanngilaa. Inatsisitigut peqquneqarami Jehova pinnagu kunngi Darius pallorfigeqqullugu piumanngilaq. Taamaattumik liivit inaannut iginneqarpoq, Jehovalli aniguisippaa. (Daniel 6:4-24) Tamakku tamarmik Kristus sioqqullugu pisimapput. Kristumiut ilagiissaat pilersinneqareermata Guutip kiffai ’Kristusip inatsisaata’ ataanniilerput. Assigiinngitsorpassuit juutit aaqqissuussaanerata nalaani akuerineqarsimasut maanna allaanerulluinnartumik isigineqalerput, Jehovap maannakkut innuttaminik iliorfiginninnera naapertorlugu. — 1 Korintumiut 9:21; Matîuse 5:31, 32; 19:3-9.
Jesus taassumalu naalagaaffimmut isumaqarfiginninnera
8. Pisimasup suup takutippaa Jesus naalakkersuinermut akuliukkumanngivissoq?
8 Jesus Kristus nunamiikkallarami ajoqersukkani qutsinnerusunik najoqqutassiuuppai, naalakkersuinermullu sakkutooqarnermullu akuliunnissaq akuerinngivillugu. Jesusip timiusamininnguit aalisagannguillu marluk kisiisa atorlugit inuit arlalinnik tuusintillit tupinnartuliornikkut nerisassereermagit juutit kunnginngortikkumallugu tiguniaraluarpaat. Qimallugilli Jesus qaqqanut nigorasuarpoq. (Juánase 6:5-15) Pisimasoq tamanna pillugu The New International Commentary on the New Testament-imi ima allassimavoq: „Juutit taamanikkut inuiaassutsikkut sakkortuumik kipisagisaqarput, qularnanngitsumillu tupinnartuliamik takunnittut ilarpassui isumaqarput taanna tassaasoq siulersuisoq Guutimit aallartitaasoq Romamiunut sorsunnissamut siulersuisussaq. Taamaattumik kunnginngortikkumavaat.“ Nangilluni allassimavoq Jesusip naalakkersuinikkut siulersuisunngoqqusaanini „aalajangersimalluinnartumik itigartikkaa“. Jesusip juutit Romamiunut pikitsitsiniaraluarnerat tapersersorsimanngivippaa. Siulittuutigaali toqunissami kingorna pikitsitsinissaq qanoq kinguneqarumaartoq — Jerusalemimiut aatsaat taama ajortigisumik annikilliorumaartut illoqarfillu suujunnaarsinneqarumaartoq. — Lúkarse 21:20-24.
9. (a) Jesusip naalagaaffimmi silarsuullu matuma naalagaaffiisa akornanni attaveqarneq qanoq oqaatigaa? (b) Jesusip malitsini oqartussaasunut attaveqarnissaannut sumik najoqqutassaqartippai?
9 Toqunissi sioqqutsitsiarlugu Jesusip Romamiut kaasariannut Judæami sinniisuusoq ima oqarfigaa: ’Naalagaaffiga silamit matumannga pinngilaq. Naalagaaffiga silamit matumannga pisimappat kiffama illersoqqajarpaannga juutinut pisitaaqqunanga; maannali naalagaaffiga tassannga pinngilaq.’ (Juánase 18:36) Kristusip naalagaaffiata silarsuup matuma naalagaaffiinik soraarsitsinissaa tikillugu Kristusip ajoqersugaasa taassuma maligassiaa malinniassavaat. Oqartussaassusillit naalattarpaat, kisianni naalakkersuinikkut suliniutaannut akuliukkumanatik. (Daniel 2:44; Matîuse 4:8-10) Jesusip ajoqersukkani najoqqutassiuuppai ima oqarami: ’Taamaattumik kaasari tunisiuk kaasarip pissaanik, Guutilu Guutip pissaanik.’ (Matiuse 22:21) Tamatuma siorna qaqqami oqaluutsimini Jesus ima oqarsimavoq: ’Erloqquppatillu miilitut ataatsitut ungasitsigisumut aappariumallutit, marluttut ungasitsigisumut aapparuuk.’ (Matiuse 5:41) Oqaasiisa ataqatigisaannit paasinarsivoq Jesusip erseqqissaraa allat piumasaqaataannut eqqortunut naalatsigitinnissamut piumassuseqartariaqartugut, inuit ataasiakkaat akornanni pissutsit imaluunniit naalagaaffiup piumasaqaatai Guutip inatsisaanut akerliunngitsut pineqaraluarpata. — Lúkarse 6:27-31; Juánase 17:14, 15.
Kristumiut kaasarilu
10. Oqaluttuarisaanermik ilisimatooq naapertorlugu kristumiut siulliit kaasarimut attaveqarnerminni qanoq isummersimappat?
10 Oqaatsit naatsut tamakku tassaapput kristumiut naalagaaffimmut attaveqarnerannut najoqqutassat. Atuakkiamini The Rise of Christianity-mi oqaluttuarisaanermik ilisimatooq E. W. Barnes allappoq: „Ukiuni hundredelinni tulliuttuni kristumiu naalagaaffimmut akisussaaffimminik nalornissuteqaleraangami, Kristusip oqartussaassusilittut ajoqersuutai saaffigisarpai. Akileraartarpoq: akileraarutit artornarsinnaagaluarput — Romamiut kitaani naalagaaffiata naggatissaata nalaani ingasalluinnarsimapput — kristumiulli naammagittarluni atorsimavai. Aammalu naalagaaffiup piumasaqaatai allat tamaasa akuerisarpai, Guutip pissaanik kaasari tuneqqullugu qinnugineqanngikkaangami.“
11. Paulusip kristumiut qanoq unnersuussimavai kristumiut naalakkersuisunut silamiuusunut atatillugu?
11 Tamatumunnga naleqqulluartumik ukiut 20-t missaat Kristusip toqunerata kingorna Paulusip kristumiut Romamiittut ima allaffigai: „Tarnit tamarmik oqartussaasunut qulliunerusunut naalatsigitillik.“ (Rûmamiut 13:1, NV) Ukiut qulit tamatuma kingorna Romami parnaarussaaqqinnissani toqutaanissanilu sioqqutitsiarlugit Paulusip Titus ima allaffigaa: ’Eqqaasinniakkit naalagaanernut naalakkersuisunullu naalattooqqullugit, peqqussutaallu maleqqullugit, ajunngitsuliassanullu tamanut kajumeqqullugit, kimilluunniit mitalleqqunagit saqitsaagajoqqunagillu, piuaaqqullugilli inuillu tamaasa qanilaartumik pisartuaqqullugit.’ — Títuse 3:1, 2.
„Oqartussaasunik qulliunerusunik“ paasisaqarnerujartorneq
12. (a) Charles Taze Russellip kristumiup nunarsuarmi oqartussaasunut eqqortumik attaveqarnerat qanoq allaatigaa? (b) Sakkutuutut kiffartorneq eqqarsaatigalugu sorsunnersuup siulliup nalaani kristumiut tanitaasut qanoq assigiinngitsumik isumaqarpat?
12 1886-imi Charles Taze Russell atuakkami The Plan of the Ages-imi ima allappoq: „Jesusip apustililluunniit naalakkersuisunut nunamiusunut akerliunianngisaannarsimapput. . . . Ilagiit ajoqersortarpaat inatsisinut naalattooqqullugit, oqartussaassusilinnut atorfiat pissutigalugu ataqqinneqqullugit, . . . akileraartaqqullugit, Guutillu inatsisaanut akerliusoqanngikkaangat (apustilit suliait 4:19; 5:29) silamiut inatsisaannut assortueqqunagit. (Rûmamiut 13:1-7; Matîuse 22:21) Jesus, apustilit ilagiillu siulliit tamarmik inatsisinik maleruaaniartarput, naak silarsuup matuma naalakkersuineranit immikkoorlutik tamakkununngalu peqataajumanatik.“ Atuakkami tamatumani ’naalakkersuisut akimanerit’ imaluunniit „oqartussaasut qulliunerusut“ (NV) Paulusip eqqartugai eqqortumik tassaanerarneqarput inuit naalakkersuisui. (Rûmamiut 13:1) 1904-mi atuakkami Den Nye Skabning-imi allassimavoq kristumiut ilumoortut ’ullumikkut tassaasariaqartut inatsisinik maleruaaniarnerpaasut ilaat — aalassassaarisuunatik, naalatseriinnatik naammagittaalliornatillu.“ Ilaat isumaqarput naalakkersuisunut naalatsigitilluinnartariaqarlutik, allaat sorsunnersuup siulliup nalaani sakkutuutut kiffartorneq akueralugu. Allat isumaqarput taamaaliorneq Jesusip oqaatigisimasaanut matumunnga akerliusoq: ’Pannamik tigusisut nungullutik pannamik toqunneqassapput.’ (Matiuse 26:52) Ersarippoq kristumiut oqartussaasunut qulliunerusunut naalatsigitinnerannik paasisaqarnerunissaq pisariaqarsimavoq.
13. 1929-mi oqartussaasut qulliunerusut pillugit paasisaq nutaaq suna saqqummersinneqarpa?
13 1929-mi nunani assigiinngitsuni naalakkersuisut Guutip peqqussutigisaasa ilaat inerteqqutigilermassuk aammalu Guutip inerteqqutigisaanik peqqussuteqalerlutik, ilaat isumaqarput ’oqartussaasut qulliunerusut’ tassaasariaqartut Jehova Guuti taavalu Jesus Kristus. * Ukiuni artornartuni sorsunnersuup aappaata siornani nalaanilu aamma sorsunnerup nillertup nalaani sakkutooqarnikkut oqimaaqatigiissaarinermi Jehovap kiffai taama isumaqartuarsimapput. Maannakkut kingumut qiviaraangatta oqarsinnaavugut taama isumaqarnerup, Jehovap Kristusillu oqartussaanerannik erseqqissaanermik nassataqartup, Guutip innuttai ukiuni artornartuni akuliunnaveersaarnissamut assuarnaalluinnarnissamullu ikiorsimagai.
Killilimmik naalatsigitinneq
14. 1962-imi Rûmamiunut agdlagkat 13:1, 2 allassimaffiillu allat tamakkununnga assingusut qanoq annertunerusumik paasineqalerpat?
14 1961-imi Biibilimik nutsigaq New World Translation of the Holy Scriptures saqqummersinneqarpoq. Tamanna nutserniarlugu oqaatsit Allakkani atorneqaqqaarsimasut peqqissaartumik misissorneqartariaqarsimapput. Rûmamiunut agdlagkat kapitali 13-imi, Títuse 3:1, 2-mi aamma 1 Pîtruse 2:13, 17-imi allassimasut nutseqqissaassagaanni paasinarsivoq ’oqartussaasut qulliunerusut’ (NV) tassaanngitsut Oqartussaasoq qutsinnerpaaq Jehova Guuti taassumalu ernera Jesus, tassaasulli inuit naalakkersuisui oqartussaasut. 1962-imi Watchtower-imi (qallunaatut Vagttårnet-imi 1. aamma 15. marsi aamma 1. apriili 1963-imoortumi) Rûmamiunut agdlagkat-ni kapitali 13 eqqortumik nassuiarneqarpoq, paasisallu C. T. Russellip nalaani paasisanit erseqqinnerusut saqqummiunneqarlutik. Ilanngutassiani tamakkunani takutinneqarpoq kristumiup naalakkersuisunut naalatsigitinnera tamakkiisinnaanngitsoq. Killeqartariaqarpoq, Guutimmi kiffaasa Guutip inatsisai unioqqutissinnaanngilaat. Pingaartoq tamanna kingusinnerusukkut Vagttårnet-imi nassuiarneqaqqissimavoq. *
15, 16. (a) Rûmamiunut agdlagkat kapitali 13-imik paasisaq nutaaq qanoq isumaqarnermik oqimaaqatigiinnerusumik kinguneqarsimava? (b) Apeqqutit suut suli akineqartariaqarpat?
15 Rûmamiunut agdlagkat kapitali 13 eqqortumik paasisimallugu Jehovap innuttaasa naalakkersuisut naleqqulluartumik ataqqisinnaavaat taamaattorli najoqqutassiat tunngaviusut Biibilimeersut aalajangiulluinnarsinnaallugit. (Tussiaat 97:11; Jeremia 3:15) Taamaalillutik Guutimut naalagaaffimmullu attaveqarnertik eqqortumik isigisinnaavaat. Kaasari pissaanik tunisarpaat, Guutillu pissaanik tunisarpaat.
16 Kisianni kaasarip pissai suuppat? Naalagaaffiup kristumiu sunik eqqortumik piumaffigisinnaavaa? Ilanngutassiami tulliuttumi tamakku misissussavavut. (wE 1/5 96)
[Quppernerup ataani ilanngussat]
^ imm. 1 Ny Verden-nutsikkami qinerlerfissialimmi Tussiaat 103:22-mut quppernerup ataani ilanngussami ima allassimavoq: „Sumiluunniit naalagaaffigisaani (kisimi oqartussaaffigisani) tamani.“
^ imm. 13 Vagttårnet, 1929, 1. aamma 15. juulimoortoq.
^ imm. 14 Soqutiginartumik Rûmamiunut agdlagkat kapitali 13 nassuiarlugu professori F. F. Bruce allassimavoq: „Allassimaffiit ataqatigisaanit aamma apustilit allassimasaannit allanit erseqqippoq naalagaaffiup naalannissaq peqqussutigisinnaagaa taamaallaat Guutimit oqartussaassuseqartitaanermik siunertaa naapertorlugu — taamaattumik naalakkersuisut naaggaarfigineqarsinnaapput, aamma naaggaarfigineqartariaqarput, ilumoorfiginninneq Guutip kisimi pisassaa piumasarigunikku.“
Nassuiarsinnaavigit?
□ Sooq oqartussaasunut qulliunerusunut naalatsigitinneq tassaanngila Satanimut naalatsigitinneq?
□ Jesusip nalimini naalakkersuineq qanoq isigaa?
□ Kaasarimut iliorneq eqqarsaatigalugu Jesusip malitsini sumik siunnersorpai?
□ Paulusip kristumiut naalakkersuisunut iliornissamut sumut kajumissaarpai?
□ Ukiut ingerlaneranni oqartussaasut qulliunerusut kikkuunerannik qanoq paasisaqarnerujartorsimavugut?
[Atuaqqissaarnermi apeqqutit]
[Qupp. 10-imi assiliartaq]
Naalakkersuinikkut pissaanermik Satanip neqeroorfigigaluarmani Jesusip itigartippaa?
[Qupp. 13-imi assiliartaq]
Russell allassimavoq kristumiut ’tassaasariaqartut ullumikkut inatsisinik maleruaaniarnerpaat ilaat’