Guutip naalagaaffianik tusarliussinermit nutaarsiassat

Guutip oqaasia inunnik allanngortitsinissamut pissaaneqarpoq

NAMMINEQ oqarnera naapertorlugu Guutimik ’mitallersorsuullunilu qinuginnittartuullunilu angutaasersorsuusimagaluarpoq’. (1 Timûtiuse 1:13) Allanngorsimavorli. Apustili Paulus ima allanngorsimatigaaq kingorna ima oqarsinnaasimalluni: ’Malinniarsinga soorlu uangattaaq Kristus malinniariga.’ — 1 Korintumiut 11:1.

Ullumikkut kristumiorpassuit peqqusersuitsut nunarsuarmi sumi tamaaniittut tamatumunnga assingusumik inuunerminni allannguisimapput. Tamanna qanoq ililluni ajornarsimanngila? Ilisarsineq Guutip oqaasianeersoq pigilersimavaat, inuunerminnilu atulersimallugu. Guutip oqaasiata pissaaneqassusia kinguliani oqaluttuarineqartup uppernarsarpaa.

Sloveniami aappariit utoqqaat illoqarfeeqqap avataani kisimiivillutik najugaqarput. Uia, Jože, 60-it missaanni ukiulik assut imigassamik ajornartorsiuteqarpoq. Taamaakkaluartorli nuliani napparsimasoq Ljudmila pilersorsinnaavaa. Ullut ilaanni Jože oqaluussisartunit marlunnit pulaarneqarpoq. Iseqquai, nuliaminullu ilisaritillugit. Ljudmila Guutip naalagaaffianik tusarliussaq tusaramiuk qullililerpoq. Aamma Jožep tusakkani nuannarai assullu apersorluni. Oqaluussisartut atuagassianik Biibililersaarutinik tunivaat anillutillu.

Oqaluussisartut qaammat ataaseq qaangiuttoq aggeqqikkamik takuaat atuagaq pâratîsime nuname nâgssáungitsumik inûsínauvutit nerriviup qaavaniittoq. Jože aperaat sumit pisimaneraa, taassumalu ima akivai: „Atuagassiat tunniussassi ilaata tunuani annonce takoriarakku Zagrebimi allaffissinnut allakkama atuagaq qinnutigalugu.“ Soqutiginninneq ersersitaa pissutigalugu Kristusip toquneranik eqqaaniaanissamut, naalagaaffilersaartarfimmi pingajalersumut, oqaluussisartut Jože qaaqquaat. Oqaluussisartut nuannaarutigeqisaannik Jože takkuppoq.

Biibilimik atuaqqissaaqatigiinneq aallartinneqarpoq, Joželu siumukarluarpoq. Assersuutigalugu, Biibilimi allassimasoq „ilinnut guutiliussanngilatit qiperukkanik assilissanilluunniit . . . tamakku pallorfigissanngilatit guutisiorfiginagillu“, atuaramiuk ingerlaannaq assiliaatitik upperisarsiorpalaartut illuminniittut tamaasa, ilaatigut qiperukkat, katersorpai igillugillu. — 2 Moses 20:4, 5.

Jože anersaakkut sallusuissummut qilalernermigut naammatseqqaarpoq. Sulili ajoraluartumik qilalernermigut allatut ittukkut suli naammatsinngilaq. Ukiuni 18-it missaanniittuni ullormut 10 literinik viinnisortarsimavoq. Imigassamik ajornartorsiuteqarnini tamanna pissutigalugu isikkuni soqutigivallaarsimanngilaa. Imigassamik atornerluineq pillugu Guutip isumaa paasigamiuk aalajangerpoq allannguiniarluni.

Atornerluinini tamanna qaangeriartuaarpaa ullut tamaasa imikkami annertussusia allattortaleramiuk. Sivitsunngitsoq imigassamut inussiaajunnaarpoq. Biibilimik atuaqqissaarnermini aamma paasivaa kristumiut ilumoortut inuttut eqqiluisaartuusariaqartut. Taamaattumik oqaluussisartut aningaasanik tunivai oqarfigalugillu: „Atisanik pisariaqartitannik pisiniunniarsinga, kristumiut ataatsimiinnerini oqaluussinermilu takujuminarsiniassaanga.“ Iluatigut atisanik, alersinik, kamippannik, ilullernik, jakkinik, qarlinnik, qilernerusanik pooqattamillu pisiniutereeramikku oqaluussisartut uterput.

Jože Ljudmilalu ukioq ataaseq Biibilimik atuaqqissaareerlutik oqaluussinermut peqataalernissaminnut piareerput. Qaammatit pingasut qaangiuttut Guutimut tunniulluinnarsimanertik takutillugu Jehovap Nalunaajaasuisa ataatsimeersuarnerisa ilaanni imermi kuisipput. Utoqqaagaluarluni peqqiillioraluarlunilu Jože nutaarsiassamik nuannersumik oqaluussissutiginninnermut peqataajuarpoq, kingornalu ilagiinni kiffartortutut aalajaalluni sulilluni, 1995-imi maajimi toqussi tikillugu. Angutip maniguuttup taassuma nuliatalu inuunerminni allannguineri pitsaasut Guutip oqaasiata inunnik allanngortitsinissamut pissaaneqarneranut nalunaajaataapput. (wE 1/5 96)