’Kaasari kaasarip pissaanik tunisiuk’

’Tamaasa ilissinnit pisassaannik tunisigik.’ — RÛMAMIUT 13:7.

1, 2. (a) Jesusip oqaasii malillugit, kristumiut Guutimut kaasarimullu akisussaaffitik qanoq oqimaaqatigiissumik naammassisinnaavaat? (b) Jehovap nalunaajaasuisa suna pingaartumik soqutigaat?

JESUSIP oqaasii malillugit Guuti kaasarilu, imaluunniit naalagaaffik, tamarmik uatsinnit pissaqarput. Jesus ima oqarsimavoq: ’Kaasari tunisiuk kaasarip pissaanik, Guutilu Guutip pissaanik.’ Oqaasimininnguit taakku atorlugit akeqqani oqaasissaarutippai erseqqissumillu takutillugu Guutimut naalakkersuisunullu attaveqarnitsinni oqimaaqatigiissumik isumaqartariaqartugut. Tupinnanngilaq tusarnaartut ’tupigusuutigimmassuk’. — Mákorse 12:17.

² Soorunami Jehovap kiffaasa Guutip pissaanik Guutimut tunisineq pingaartumik soqutigisariaqarpaat. (Tussiaat 116:12-14) Taamaaliortillutilli Jesusip kaasarip aalajangersimasunik pissaanik kaasarimut tunisineq pillugu oqaasii puigussanngilaat. Nalunngeqatiginnissusertik Biibili tunngavigalugu ajoqersorneqarsimasoq pissutigalugu qinunikkut eqqarsaatigeqqissaartariaqarpaat qanoq annertutigisumik kaasari piumasaanik akuerisinnaanerlugu. (Rûmamiut 13:7) Ullumikkut inatsisilerinermik ilisimatuut arlalippassuit akuerisimavaat naalakkersuisut pissaanerat killeqartoq, inuillu naalagaaffiillu sumiikkaluarunilluunniit ’inatsit’ tunngaviusoq pissusissamisoortoq naalattariaqaraat.

3, 4. Pingortitap inatsisaa, inatsisit saqqummersinneqarsimasut aamma inuit inatsisigisaat qanoq soqutiginartumik oqaatigineqarsimappat?

³ Apustili Paulusip inatsit tunngaviusoq tamanna innersuussutigaa silamiut pillugit ima allassimagami: ’Guutimik nalunngissutissaq taakkunani ersimmat, Guutip taakkununnga ersersimmagu; takussaanngissusiami pissaanera ittuinnartoq Guutiussusialu silarsuup pinngortitaaqqaarneranit malunnarmata suliaanit paasinarlutik, taamaattumik patsisissaqanngillat.’ Qisuariarniaraluarunik inatsisip pissusissamisoortup tamatuma allaat uppinngitsut taakkua nalunngeqatiginnissusiat killissinnaavaa. Taamaattumik Paulus nangilluni allappoq: ’Guutimimmi nalusut inatsiseqanngitsut inatsisit peqqusaat isumaminnik naammassisaramikkik, taava inatsiseqanngitsut taakku imminnut inatsisitut ipput, inatsisit suliareqqusaat uummatiminni allassimasut nalunaaramikkik, tarnimik nalunngissusiata nalunaajaaffigimmatik, eqqarsaataallu paarlaattarmata imminnik pasillersarlutik illersortarlutilluunniit.’ — Rûmamiut 1:19, 20; 2:14, 15.

⁴ Ukiuni 1700-kkunni inatsisileritooq tuluk ilisimaneqarluartoq William Blackstone ima allappoq: „Pinngortitap inatsisaa tamanna inuattut pisoqaassuseqarluni Guutimit oqaatigineqartoq soorunami inatsisinit allanit tamanit naalanneqartariaqarneruvoq. Nunarsuaq tamakkerlugu, nunani tamani piffissanullu tamanut: inuit inatsisaat sunaluunniit tamatumunnga akerliuguni naleqanngilaq.“ Blackstonep nangilluni ’inatsisit saqqummersinneqartut’, Biibilimiittut eqqartorpai: „Taakku marluk, pinngortitap inatsisaa inatsisillu saqqummersinneqarsimasut, inuit inatsisaannut tamanut aalajangiisuupput; taamaattumik inuit inatsisaannit ilaat ataaserluunniit taakkununnga akerliusariaqanngilaq.“ Tamanna Jesusip Guuti kaasarilu pillugit oqaasiinut Mákorse 12:17-imi allassimasunut naleqqulluartuuvoq. Ersarippoq Guutip kaasarip kristumiunit piumaffigisinnaasai killeqartissimagai. Juutit eqqartuussisoqatigiivi Sanhedrinimik taaneqartut killeq  tamannarpiaq qaangersimavaat apustilit peqqugamikkik Jesus pillugu ajoqersueqqunagit. Taamaattumik apustilit eqqortumik ima akipput: „Guuti naalakkatsitut inunnit naalattariaqarneruarput.“ — apustilit suliait 5:28, 29, NV.

’Guutip pissai’

5. Guutip naalagaaffia 1914-imi pilersinneqarmat kristumiut suna eqqaamajuartariaqarpaat?

⁵ Ingammik 1914-imiilli Jehova Guuti Kristusip Messiasitut naalagaaffia aqqutigalugu kunngitut naalakkersuilermat, kristumiut qulakkeertariaqarpaat Guutip pissaanik kaasari tuninngitsoorlugu. (sarĸúmersitat 11:15, 17) Aatsaat maanna ima pingaaruteqartigaaq Guutip peqqusineratut ’silamiut kristumiut ilaginngikkaat’. (Juánase 17:16) Guutimut, inuunermik tunisisumut, imminnut tunniulluinnarsimagamik takutilluartariaqarpaat imminnik piginnikkunnaarlutik. (Tussiaat 100:2, 3) Soorlu Paulus allassimasoq, ’Jehovap pigaatigut’. (Rûmamiut 14:8) Saniatigut, kristumiu kuisikkuni Guutimut kiffanngortippoq, Paulusitut oqarsinnaalerluni: ’Guutip . . . kiffartorsinnaanngortippaatigut.’ — 2 Korintumiut 3:5, 6.

6. Kristumiup qanoq ililluni takutittarpaa Guutimut kiffaalluni?

⁶ Apustili Paulus aamma allassimavoq: ’Kiffartuutiga angisuutinniarpara.’ (Rûmamiut 11:13) Uaguttaaq taamaaliortariaqarpugut. Tamakkiisumik kiffartorsinnaanerluta imaluunniit naamik, tamatta nalunngilarput Jehovap nammineq kiffanngortikkaatigut. (2 Korintumiut 2:17) Ilaasa immaqa tamanna qularissammassuk kristumiu tunniulluinnarsimasoq kuisissimasorlu kinaluunniit piareersaasariaqarpoq takutissallugu ilumut nutaarsiassamik nuannersumik oqaluussisuulluni. (1 Pîtruse 3:15) Kiffartornera aamma iliuuserisaanit takuneqarsinnaasariaqarpoq. Guutimut kiffaagami kristumiup kialuunniit ileqqorluuteqannginneq ilaqutariinnilu ataasiussuseq illersorlugit namminerlu inooriaaseqarfigisariaqarpai, peqqusersuittariaqarluni oqartussaassuseqarnermillu ataqqinninneq takutittarlugu. (Rûmamiut 12:17, 18; 1 Tásalûníkamiut 5:15) Kristumiup Guutimut attaveqarnera kiffartorneralu Guutimeersoq tassaasariaqarput inuunerani pingaarnerpaasut. Tamakku kaasarip peqqusineratigut taamaatissinnaanngilai. Ersarippoq, taakku tassaasut ’Guuti pissai’.

’Kaasarip pissai’

7. Akileraartarneq eqqarsaatigalugu Jehovap nalunaajaasuisa suna tusaamasaassutigaat?

⁷ Jehovap nalunaajaasuisa nalunngilaat ’oqartussaasunut qulliunerusunut’, naalakkersuisunut, naalattariaqarlutik. (Rûmamiut 13:1) Taamaattumik  kaasarip imaluunniit naalagaaffiup eqqortumik peqqussutigisaat maleruarsinnaavaat, taamaalillutik nalunngeqatiginnissusertik Biibili tunngavigalugu ajoqersorneqarsimasoq malillugu. Assersuutigalugu, nunarsuarmi tamarmi akileraartarnikkut maligassaalluarnerpaasut kristumiut ilumoortut ilagaat. Tysklandimi aviisimi Münchner Merkur-imi Jehovap nalunaajaasui ima allaatigineqarsimapput: „Tassaapput Tysklandimi akileraartartut piffissamik eqqorluaanerpaasut unneqqarinnerpaasullu.“ Italiami aviisimi La Stampa-mi allassimavoq: „[Jehovap nalunaajaasui] tassaapput innuttat kissaatiginarnerpaasut: akileraarutit pinngitsoortinnianngilaat inatsisillu akornutaasorinaraluartut namminneq iluaqutissaminnut maleruanngitsoornavianngilaat.“ Jehovap kiffai taamaaliortarput ’tarnip nalunngissusia pissutigalugu’. — Rûmamiut 13:5, 6.

8. Kaasarip pissai tassaaginnarpat akileraarutit?

⁸ ’Kaasarip pissai’ tassaaginnarpat akileraarutit? Naamik. Paulusip allattaaq, soorlu mianerinninneq ataqqinninnerlu eqqartorpai. Atuakkami Critical and Exegetical Hand-Book to the Gospel of Matthew-imi ilisimatooq tyskeq Heinrich Meyer allappoq: „[Kaasarip pissai] . . . tassaaginnanngillat akileraarutit, tassaapputtaaq kaasarip naalakkatut atorfini pissutigalugu peqqussutigisinnaasai tamarmik.“ Oqaluttuarisaanermik ilisimatooq E. W. Barnes atuakkiamini The Rise of Christianity-mi allappoq kristumiup akileraarutissani akilertarsimagai aamma ’naalakkersuisunut pisussaaffini allat tamaasa akuerisarsimallugit, Guutip pissai kaasarimut tunniussallugit peqquneqanngikkaanni“.

9, 10. Kaasari pissaanik tunissagaanni kristumiu sunik nangaassuteqarsinnaava, kisianni suut eqqaamasariaqarpai?

⁹ Naalagaaffiup suut piumasarisinnaavaat Guutip pissai piumasarinagit? Ilaat isumaqarput kaasari akileraarutinik tunisinnaallugu allamilli naamik. Iluarinavianngilaat kaasarimut piffissaq teokratiimut tunngasunut atorneqarsinnaagaluaq tunniuttariaqarunikku. Kisianni naak ’Jehova Guuterput uummatikkut iluunngarluta tarnikkullu iluunngarluta isumakkullu iluunngarluta nukivullu tamakkerlugit asasariaqaraluarlugu’ Jehovap nalunngilaa kiffartornitta saniatigut allattaaq isumagisariaqarivut. (Mákorse 12:30; Filípimiut 3:3) Assersuutigalugu, kristumiu katissimasoq aappami iluarisaanut piffissamik atuinissaminut peqquneqarpoq. Taamaaliornera eqqunngitsuliornerunngilaq, apustililli Paulusip takutippaa tassaasut ’silap pii’, tassaanatillu ’Naalakkap pii’. — 1 Korintumiut 7:32-34; naleqqiuguk 1 Timûtiuse 5:8.

¹⁰ Kristusip ajoqersukkani peqquai akileraarutinik ’tuniseqqullugit’, taamaaliussagaannilu piffissaq Jehovamut tunniunneqarsimasoq atortariaqarpaa — tassami inuunerput tamaat Jehovamut tunniunneqareerpoq. Assersuutigalugu,  nunami aalajangersimasumi akileraarutissat 33 procentiuppata (nunallu ilaanni amerlanerupput), ima paasisariaqarpoq sulisup ukiumut qaammatini sisamani akissarsiani nunap karsianut akiliutigisarai. Allatut oqaatigalugu sulisup inuunini naallugu agguaqatigiissillugu ukiut 15-it ingerlaneranni akissarsiani ’kaasarip’ piumasarisaanik akileraarutitut akiliutigisarpai. Aamma atuartitaaneq eqqarsaatigeriaruk. Nunat amerlanersaanni inatsisitigut peqqussutigineqarpoq meeqqat ukiuni aalajangersimasuni atuartassasut. Nunani assigiinngitsuni ukiut atuarfiusut qassiussanersut assigiinngillat. Amerlanertigut tassaapput ukiut arlallit. Soorunami atuartarneq amerlanertigut iluaqutaasarpoq, kisianni kaasarip aalajangertarpaa meeqqap inuunerata ilaa qanoq annertutigisoq tamatumunnga atorneqassasoq, angajoqqaallu kristumiut kaasarip aalajangernera akueriinnartariaqarpaat.

Pinngitsoorani sakkutuujuneq

11, 12. (a) Nunat amerlanersaanni kaasarip suna piumasarisarpaa? (b) Kristumiut siulliit sakkutuujuneq qanoq isigisimavaat?

¹¹ Nunat ilaanni kaasarip pinngitsoorani sakkutuujunissaq piumasarisarpaa. Ukiuni hundredelinni makkunani nunat ilarpassuini sorsunneqartillugu tamanna pilersissimavaat, ilaasalu sorsunneqanngitsillugu pilersissimallugu. Frankrigimi pisussaaffik tamanna ukiorpassuarni ’aammik akileraarut’-mik taaneqartarsimavoq, tassami angutit inuusuttut tamarmik naalagaaffik pillugu inuunertik pilliutigissallugu piumassuseqartariaqarput. Jehovamut tunniulluinnarsimasut ilerasuuteqaratik taamaaliorsinnaappat? Kristumiut siulliit taamaaliorneq qanoq isigisimavaat?

¹² Kristumiut siulliit pitsaasumik innuttaanertik noqqaassutigisarsimavaat, kisianni upperisartik pissutigalugu allat toqussinnaanagit namminnerlu inuunertik naalagaaffimmut pilliutigisinnaanngilaat. The Encyclopedia of Religion-imi allassimavoq: „Ilagiinni ajoqersuisuunerit siulliit, ilaatigut Tertullianip Origenesillu, tamarmik uppernarsarpaat kristumiut inuit allat toqussinnaanngikkaat, taamaattumillu Romamiut sakkutuuinut ilaasinnaanatik.“ Atuakkiamini The Early Church and the World-imi professori C. J. Cadoux allappoq: „Marcus Aurelius [ukiuni 161-180-imi kaasariusoq] tikillugu kristumioqarsimanngilaq kuisinnermi kingorna sakkutuunngorsimasumik.“

13. Suna pillugu kristumiuuneraqatigiit ilagiivinut ilaasortat amerlanersaasa sakkutuujuneq kristumiutut siullertut isigineq ajorpaat?

¹³ Suna pillugu kristumiuuneraqatigiit ilagiivinut ilaasortat ullumikkut taama isumaqanngillat? Ukiuni 300-kkunni pissutsit allanngorsimaqimmata. Atuakkami katuuliusumi A History of the Christian Councils-imi ima nassuiarneqarpoq: „Kaasarit Guutimik nalusut nalaanni . . . kristumiut amerlasuut sakkutuujuneq eqqarsaatigalugu upperisartik pissutigalugu nangaassuteqartarsimapput sakkullu atornissaannik akuersiumanatik, imaluunniit sakkutuujunissamit qimaallutik. [Ukiumi 314-imi Arlesimi] ilagiinni isumalioqatigiit allanngornerit Konstantinimit pilersinneqarsimasut eqqarsaatigalugit aalajangerpaat kristumiut sorsunnerni sakkutuujunissaminnut akisussaaffeqartut, . . . ilagiit eqqissillutik inuusarmata naalakkersuisup kristumiunik iluarisaqartup ataani.“ Ilagiit taamaalillutik Jesusip ajoqersuutai tunummatigik, ulloq manna tikillugu kristumiuuneraqatigiit palaseqatigiivisa ilagiit kajumissaartarsimavaat naalagaaffiit sakkutuuinut ilagalugit sakkutuunngoqqullugit, naak inuit ilaasa ataasiakkaarlutik nalunngeqatiginnissusertik pissutigalugu tamanna naaggaarfigisimagaluaraat.

14, 15. (a) Nunat ilaanni suna tunngavigalugu kristumiut sakkutuujuneq pinngitsoorsinnaavaat? (b) Sakkutuujuneq pinngitsoorneqarsinnaanngippat najoqqutassiat Biibilimeersut suut ikiortigalugit kristumiu tamatumani eqqortumik aalajangersinnaava?

¹⁴ Ullumikkut kristumiut inuit amerlanersaat tamatumani malinniartariaqarpaat? Naamik. Kristumiu tunniulluinnarsimasoq nuna upperisarsiorneq pissutigalugu sakkutuunermit pinngitsoortitaaffiusoq inuuffigiguniuk periarfissaq tamanna iluaqutigisinnaavaa, upperisarsiornikkut kiffartuuteqarami. (2 Timûtiuse 4:5) Nunat ilaat, soorlu USA Australialu, allaat sorsunneqartillugu, taama periarfissiipput. Sorsunneqartinnagulu nunani amerlasuuni sakkutuujuneqarfiugaluartuni,  akuerisimavaat Jehovap nalunaajaasui upperisarsiornertik pissutigalugu pinngitsoortitaasut. Taamaattumik nalunaajaasut kiffartornertik ingerlateqqissinnaavaat inuit allat iluaqutissaannut.

¹⁵ Taava kristumiu nuna upperisarsiorneq pissutigalugu sakkutuujunermit pinngitsoortitaasoqarfiunngitsoq inuuffigippagu? Taava nammineq nalunngeqatiginnissutsini Biibilimit ajoqersorneqarsimasoq tunngavigalugu aalajangertariaqarpoq. (Galâsiamiut 6:5) Kaasarip oqartussaanera eqqarsaatigitillugu eqqarsaatigeqqissaassavaa suut Jehovamut tunniuttariaqarlugit. (Tussiaat 36:9; 116:12-14; apustilit suliait 17:28) Kristumiup nalunngilaa kristumiunut ilumoortunut ilisarnaat tassaasoq uppeqatinut asanninneq, aamma nunani allani inuusunut naggueqatiginngisanullu asanninneq. (Juánase 13:34, 35; 1 Pîtruse 2:17) Aamma najoqqutassiat Biibilimiittut soorlu makku puigussanngilai: Jesaja 2:2-4; Matîuse 26:52; Rûmamiut 12:18; 14:19; 2 Korintumiut 10:4; kiisalu Eprîarit 12:14.

Kiffartorneq sakkutuujunermut taarsiissutissaq

16. Nunat ilaanni kiffartorneq sakkutuujunerunngitsoq suna kaasarip sakkutuujumanngitsunit piumasarisarpaa?

¹⁶ Nunat ilaanni naalakkersuisut, upperisarsiorneq pissutigalugu sakkutuujunermit pinngitsoortitaanissaq akuerinngikkaluarlugu, nalunngilaat inuit ilaat sakkutuunngorumanngitsut. Nunani tamakkunani inuit nalunngeqatiginnissusertik pissutigalugu sakkutuunngorumanngitsut allamik periarfissinneqartarput. Ilaanni suliassat innuttaaqatigiinnut iluaqutaasinnaasut kiffartornertut sakkutuujunermut taarsiissutissatut isigineqartarput. Kristumiup tunniulluinnarsimasup kiffartorneq taama ittoq akuerisinnaavaa? Kristumiu tunniulluinnartoq kuisissimasorlu nalunngeqatiginnissutsini Biibilimit ajoqersorneqarsimasoq tunngavigalugu nammineq aalajangertariaqarpoq.

17. Kiffartornermut sakkutuujunerunngitsumut assingusumik kiffartorneq Biibilimi eqqaaneqarpa?

¹⁷ Biibilip nalaani pinngitsaalisaalluni kiffartorneq atorneqartarunarpoq. Atuakkami oqaluttuarisaanermik ilinniummi ima allassimavoq: „Judæamiut akileraarnissaasa pisussaaffiisalu saniatigut pinngitsaalisaalluni sulisitaanerat [oqartussaasut akiliinatik sulisitsinerat] aamma piumasarineqartarpoq. Nunani kangillerni tassaavoq aaqqissuussaaneq pisoqaq, griikerit Romamiullu ingerlateqqissimasaannik. . . . Testamentitaamittaaq Judæami pinngitsaalisaalluni sulisitaaneq eqqartorneqarpoq, taamaammat paasinarsivoq tamanna qanoq atugaangaartigisoq. Ileqqoq tamanna malillugu sakkutuut Simon Kyrenemeersoq pinngitsaalivaat Jesusip sanningassulissaa [nappagaa naalliutsitaaffik] ersoqqullugu (Matîuse 5:41; 27:32; Mákorse 15:21; Lúkarse 23:26).“

18. Kiffartornerit sakkutuujunerunngitsut eqqunngitsumillu upperisarsiornermut attuumassuteqanngitsut suut Jehovap nalunaajaasuisa akulikitsumik peqataaffigisarpaat?

¹⁸ Tamatumunnga assingusumik, ullumikkut nunat ilaanni oqartussaasut piumasarisarpaat innuttaasut innuttaaqatigiinni suliassat assigiinngitsut suliarissagaat. Ilaannikkut tassaasinnaavoq suliassaq aalajangersimasoq, soorlu puilasussanik assaaneq imaluunniit aqqusinniorneq; ilaannikkut tassaasinnaavoq aalajangersimasumik  sulisarneq, soorlu sapaatit akunneri tamaasa aqqusinerni saliineq, imaluunniit atuarfinni napparsimmavinnilu asaasarneq. Suliassat tamakku innuttaaqatigiinnut iluaqutaappata eqqunngitsumillu upperisarsiornermut attuumassuteqanngippata allatigullu Jehovap nalunaajaasuisa nalunngeqatiginnissusiannut akerliunngippata, nalunaajaasut peqataaffigisinnaasarpaat. (1 Pîtruse 2:13-15) Amerlanertigut tamatumani ajunngitsumik nalunaajaateqarsimavoq ilaannikkullu nalunaajaasunik eqqunngitsumik naalakkersuisunut akerliuneraasut nipangersinneqarsimapput. — Naleqqiuguk Matîuse 10:18.

19. Kiffartorneq sakkutuujunerunngitsoq piffissami aalajangersimasumi piumasarineqarpat kristumiup qanoq ililluni taamaaliorsinnaanerluni misissortariaqarpaa?

¹⁹ Taavami naalakkersuisut piumasarippassuk kristumiu piffissami aalajangersimasumi naalagaaffiup ataani innuttaaqatigiit iluaqutissaannut suliassamik kiffartussasoq? Kristumiu nammineq aalajangertariaqarpoq nalunngeqatiginnissutsini ajoqersorneqarsimasoq tunngavigalugu. ’Tamatta Guutip issiavianut eqqartuussivianut sassartitaassaagut.’ (Rûmamiut 14:10) Kristumiut kaasarimit sumik piumaffigineqarunik qinunikkut pineqartoq misissoqqissaartariaqarpaat eqqarsaatigeqqissaarlugulu. * Aamma ilagiinni kristumiut inersimalluartut tamatuminnga oqaloqatigiinnissaat silatusaarnerussaaq. Taamaalioreeruni nammineq aalajangertariaqarpoq. — Ussatit 2:1-5; Filípimiut 4:5.

20. Kiffartorneq sakkutuujunerunngitsoq misissortillugu apeqqutissat najoqqutassiallu Biibilimeersut suut iluaqutigisinnaavai?

²⁰ Tamanna misissoqqissaartillugu kristumiut najoqqutassiat Biibilimeersut arlallit eqqarsaatigisariaqarpaat. Paulus allassimavoq ’naalagaanernut naalakkersuisunullu naalattooqqulluta, . . . ajunngitsuliassanullu tamanut kajumeqqulluta, . . . piuaaqqulluta inuillu tamaasa qanilaartumik pisartuaqqullugit’. (Títuse 3:1, 2) Kristumiut aamma innuttaaqatigiinni suliassaq pineqartoq misissortariaqarpaat. Akuerigunikku suli kristumiutut akuliukkumannginnertik attattuaannarsinnaavaat? (Mika 4:3, 5; Juánase 17:16) Eqqunngitsumik upperisarsiornermut akuliussinnaappat? (sarĸúmersitat 18:4, 20, 21) Suliarigunikku kristumiutut akisussaaffimmik naammassineqarnissaannut akornutaassava? (Matîuse 24:14; Eprîarit 10:24, 25) Imaluunniit suliaritillugu suli anersaakkut siumukariartorsinnaassappat, immaqa allaat tamakkiisumik kiffartornermut peqataassallutik? — Eprîarit 6:11, 12.

21. Kiffartorneq sakkutuujunerunngitsoq pillugu qanorluunniit aalajangeraluarluni qatanngut ilagiinnit qanoq isigineqartariaqarpa?

²¹ Taava kristumiu apeqqutissat tamakku eqqarsaatigeqqissaarsimallugit isummerpat inuiaqatigiit iluaqutissaannut suliarititaq tamanna tassaasoq ’ajunngitsuliaq’ oqartussaasut naalallugit suliarisinnaasassani? Jehovap saani nammineq tamanna aalajangertariaqarpaa. Ilagiinni utoqqaanertat allallu qatanngutip taassuma nalunngeqatiginnissusia ataqqisariaqarpaat kristumiutut maligassaalluartutut isigiuarlugu. Akerlianillu, kristumiu isumaqarpat suliarititaq naammassisinnaanagu taassuma aalajangernera aamma ataqqineqartariaqarpoq. Taannattaaq eqqortuliorsimavoq asannittumillu tapersersorneqartariaqarluni. — 1 Korintumiut 10:29; 2 Korintumiut 1:24; 1 Pet 3:16.

22. Sunilluunniit atugaqaraluarluta qanoq iliortuaannarumavugut?

²² Kristumiutut ’ataqqinninnermik pisussaq ataqqinninnermik’ tunissavarput. (Rûmamiut 13:7) Innuttaaqatigiit iluanni aaqqissuussaalluarneq ataqqillugu innuttaasutut eqqissilluta inatsisit naalattariaqarpavut. (Tussiaat 34:14) Allaat ’kunngit akimarnillu tamaasa’ qinnussinnaavavut taakku aalajangigassaqaraangata kristumiutut inuunitsinnut suliassatsinnullu attuumassutilinnik. Taamaalilluta kaasari kaasarip pissaanik tunigatsigu neriuppugut ’ersiornaatsumik eqqissisimaarnartumillu inuusinnaalluta Guuti mianeriuarlugu titsiilluta’. (1 Timûtiuse 2:1, 2) Tamanillu pingaarnerpaamik Naalagaaffik pillugu nutaarsiassaq nuannersoq inuiannut neriuutissatuatut oqaluussissutigiuassavarput, taamaalilluta peqqissaartumik Guuti Guutip pissaanik tunillugu. (wE 1/5 96)

[Quppernerup ataani ilanngussaq]

Nassuiarsinnaavigit?

□ Kaasarimut Jehovamullu attaveqarnini oqimaaqatigiissinniarlugu kristumiup suna salliutinnerussavaa?

□ Jehovap pissaa suna kaasarimut tunniussinnaanngilarput?

□ Ilaatigut suut eqqortumik kaasarimut tunniuttariaqarpavut?

□ Allassimaffiit suut ikiortigalugit pinngitsoorani sakkutuujuneq pillugu eqqortumik aalajangersinnaavugut?

□ Kiffartornermik sakkutuujunerunngitsumik piumaffigineqarutta suut eqqaamasariaqarpavut?

□ Jehova kaasarilu eqqarsaatigalugit qanoq iliortuaannarumavugut?

[Atuaqqissaarnermi apeqqutit]

[Qupp. 16, 17-mi assiliartaq]

Apustilit juutit eqqartuussisoqatigiivi ima oqarfigaat: „Guuti naalakkatsitut inunnit naalattariaqarneruarput.“