Nutaarsiassat nuannersut!

TAMATTA nutaarsiassanit nuanniitsunit sunnerneqaraangatta ajuusaarutigisarpavut. Akerlianillu — uatsinnut asasatsinnullu — nutaarsiassat nuannersut isumallualersitsisut tusartaraangatsigik nuannaarutigisarpavut. Nuanniitsunilli allat eqqorneqaraangata ilaat alapernaallutik qisuariartarput, ilaasa allaat allat atugarliornerat nuannaarutigisarpaat. Immaqa ilaatigut tamanna pillugu nutaarsiassat nuanniitsut taama soqutigineqartigipput!

Sorsunnersuup aappaata aallartilernerani inuit ilaasa allat ajunaarnerinut soqutigisaqarnerannut ersiutaasumik pisoqarpoq. 1939-mi tyskit sorsuutertik 10.000 tonsiusoq Graf Spee usorsisimaarutigaat. Sapaatit akunnerini arlalinni umiarsuaq sorsuut tamanna Atlantikup kujataani Indiallu kujataani imarmi nunat iligiit umiarsuinut niuffagiutinut navianartorujussuusimavoq. Naggataatigut tuluit sorsuutaasa ilaat pingasut Graf Spee nanivaat saassutilerlugulu, inuppassuillu toqullugit. Tyskit Uruguayimi Montevideop umiarsualivianut umiarsuaq talinniaraluarpaat iluarsarniarlugu. Uruguayimili naalakkersuisut peqqussutigaat sorsuut ingerlaannaq umiarsualivik qimanngippagu tigusarineqassasoq. Taamaattumik sorsuunneq ingasattoq tuluit ajugaaffigissagaat ilimagineqarpoq.

Tamanna tusaramikku USA-mi niuerniartut pisoorsuit timmisartoq attartorpaat inummut ataatsimut 2500 dollarsinik akiliillutik Uruguayiliarniassagamik toqoraanersuaq isiginnaariarlugu. Pakatsisinneqarnerannulli sorsuunneq naammassineqanngilaq. Adolf Hitlerip Graf Spee-p qaartinneqarluni kivisinneqarnissaa peqqussutigaa. Sinerissami isiginnaartut tuusintilikkuutaat imarmi sorsuunneq takuniarlugu utaqqisut, akerlianik qaartoorneq tusarpaat takullugulu Graf Spee innuttaminnit kivisinneqartoq. Umiarsuup naalagaa niaqumigut aallaalluni imminorpoq.

Naak inuit ilaat naakkittaassinnaagaluartut, amerlanersaasa nutaarsiassanit nuanniitsunit nuannersut tusarumanerusarpaat. Illittaaq taamaapputit, ilaa? Taavami sooq oqaluttuarisaanermi nalunaarutit nuanniitsut taama amerlatigippat nuannersullu taama ikitsigalutik? Taamaattuassanerpa?

Nutaarsiassanut nuanniitsunut tamanut pissutaasut

Biibilimi oqaluttuarineqarpoq ilaanni nutaarsiassat tamarmik nuannersut. Nuanniitsunik nalunaaruteqanngivippoq. Jehova Guutip pinngortitani naammassimmagit Nunarsuaq inuit uumasullu nuannaarutigisinnaasaattut piareersaavoq. Mosesimik allakkat siulliit-ni ima allassimavoq: „Guutillu pinngortitani tamaasa isigai, ilumullu ajunngingaarput.“ — 1 Moses 1:31.

Inuulli pinngortinneqarnerata kinguninnguagut nuanniitsumik nutaarsiassaqalerpoq. Adam Evalu suli qitorniortinnagit Guutimut taassumalu silarsuarmi ajunngitsumik aaqqissuussaaneranut pikitsitsisoqarneq pillugu nuanniitsumik nalunaaruteqarpoq. Anersaaq nuimasoq nakkutilliisutut akisussaaffeqartitaagaluartoq killuussisunngorpoq iluatsitsillunilu inuit aappariit siulliit pikitsitsinerminut ilaalersillugit. — 1 Moses 3:1-6.

Nuanniitsorpassuit inuit misilittagaat taamani pilersimapput. Tupinnanngilaq taamaniminngaanniit nutaarsiassat nuanniitsut peqqusersiornernik, sallunernik ilumuunngissutsinillu peqangaartarsimasut. Jesus Kristusip takutilluarsimavaa Satan Diaavulu nutaarsiassanut nuanniitsunut pissutaasoq, taamani upperisarsiornikkut siuttut ima oqarfigigamigit: ’Ataataq nagguigisarsi tassa Diaavulu ataatassilu pilerigisai suliariniarpasi. Taanna pileqqaarnerminit inunnik toqutsisuuvoq, sallusuissullu aalajangiutinngilaa ilumigut sallusuissuteqannginnami. Sallulluni oqalukkaangami  namminerminit oqaluttarpoq, sallutuugami sallunerillu ataatagimmanni.’ — Juánase 8:44.

Inuit amerliartuinnartillugit nutaarsiassat nuanniitsut aamma amerliartuinnarput. Soorunami ima paasisariaqanngilaq nuannaartoqanngitsoq pilluartoqanngitsorlu, tassami inuunermi assigiinngitsorpassuit nuannaarutigineqarsinnaapput. Kisianni ajornartorsiutit aliasunnerlu inuiannut atuuttuarsimapput ulloq manna tikillugu.

Pissutsinut alianartunut aamma allamik pissutaasoqarpoq. Tassaavoq ajortuliorajussuseq kingornuttagarput. Nutaarsiassanut nuanniitsunut pissutaasoq tamanna pinngitsoortinneqarsinnaanngitsoq Jehovap tikkuarpaa oqarami: ’Inuit inuusunnerminniilli ajortussaq kisiat eqqarsaatigaat.’ — 1 Moses 8:21.

Sooq nutaarsiassat nuanniitsut amerliartuinnarpat?

Aammalu nutaarsiassat nuanniitsut ukiuni makkunani 1900-kkunni amerliartuinnarsimanerannut immikkut pissuteqarpoq. Pissutaasoq Biibilimi ersarissumik nassuiarneqarpoq, siulittuutigineqarmat inuiaat ukiuni 1900-kkunni piffissaq immikkut ittoq, ’ullussanik kingullernik’ imaluunniit ’naggatissamik’ taaneqartoq inuuffigilerumaaraat. (2 Timûtiuse 3:1; Daniel 12:4) Biibilimi siulittuutit aammalu ukiunik naatsorsuisarnerup takutippaat ’ullut kingulliit’ tamakku 1914-imi aallartissimasut. Biibili tunngavigalugu tamatumunnga uppernarsaatit pillugit paasisaqarnerorusukkuit atuakkami Ilisarsineq inuunermut naassaanngitsumut sammisoq-mi (Napasuliaq Alapernaarsuiffiup Peqatigiiffianit naqiterneqartumi) kapitali 11 takuuk.

Ullut kingulliit pisumik nunarsuarmiunut nuanniitsunik nutaarsiassanik kinguneqartumik aallartissimapput. Pisoq suna? Satan Diaavulu inngilipiluilu qilammit igitaapput. sarĸúmersitat 12:9, 12-imi nutaarsiassat nuanniitsut amerliartuinnarnissaannut pinngitsoortinneqarsinnaanngitsumik pissutaasumik allaatiginninneq maluginiarnartoq atuarsinnaavat: ’Igitaavorlu kuukkooriaasarsuaq angisooq, pulateriaarsutoqaq Diaavulumik Satanimillu taaneqartoq, inuit najugaanni nunalinnik tamanik tammartitsiniartoq; nunamut igitaavoq, inngiliilu taassumunnga ilanngullugit igitaapput. . . . „Eqqanaq nuna immarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.“’

Taamaattumik ullut kingulliit makku suli atuutsillugit ilimagisariaqarparput nuanniitsunik nutaarsiassaqartuassasoq amerliartuinnartunik.

Taamaattuaannassanngilarli

Qujanartumilli ullumikkutut nuanniitsunik nutaarsiassaqartuaannassanngilaq. Isumalluarluta oqarsinnaavugut nuanniitsunik nutaarsiassaqarfiusoq manna killissaqartoq. Neriuutissaqarpoq naak immaqa taama ippalunngikkaluartoq. Qanittukkut Guutip piffissarititaa nalliuppat nuanniitsunik nutaarsiassaqarunnaassaaq.

Tamanna qularisariaqanngilarput siulittuutigineqarsimammat ullut kingulliit naggatissaqarumaartut Guutip nutaarsiassanut nuanniitsunut tamanut pissutaasut tamaasa peerniarlugit akuliuffissaanik. Inuit ajortut saqitsaatilersitsisartut eqqunngitsuliornerminnit allamik isumataarumanngitsut tamaasa piiassavai. Guutip ajugaqanngitsup ullussarsuani sorsunnissami, Harmagedonimik taaneqartumi, piumaarpoq. (sarĸúmersitat 16:16) Tamatuma kinngunitsiannguagut Satan Diaavulu inngilipiluilu iliuuseqarunnaartitaassapput. sarĸúmersitat 20:1-3-mi nutaarsiassanik nuanniitsunik tamanik pilersitsisup, Satanip, qilersugaanissaa ima allaatigineqarpoq: ’Inngililu takuara qilammit aqqartoq, taassuma itinersuarmut matuersaataasoq pigigaa, kalunnersuillu tigumiarigai. Kuukkooriaasarsuarlu tiguaa, taanna pulateriaarsutoqaq, tamassalu Diaavulu Satanilu; qilersorpaalu ukiut tuusintillit qilersugaaqqullugu; itinersuarmullu igippaa matullugulu qulaagullu naqissuserlugu, inuiaqatigiit taassumunnga tammartissaaqqullugit.’

Pisussat pissanganartut tamakkua kingorna nunarsuarmut inuinullu nutaarsiassat aatsaat  taama nuannertigisut piumaarput. Taamanikkussaq inuujumaartut ilagissavaat inuit millionilikkuutaat sorsunnermit inaarutaasumit Harmagedonimit aniguisut aammalu allat milliardillit toqusunit makititaasut. Nutaarsiassaq tamanna nuannersoq Biibilip atuagartaasa kingullersaani ima allaatigineqarpoq: ’Takussagissi Guutip ineqarfia inunniittoq, taakkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaannit aallarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ — sarĸúmersitat 21:3, 4.

Siunissaq nuanningaartoq tamanna takorloorsinnaaviuk? Tassaajumaarpoq siunissaq nuanniitsunik nutaarsiassaqarfiunngitsoq. Aap, nutaarsiassat nuanniitsut tamarmik atorunnaassapput. Nutaarsiassat nuannersut kisimik tusarliunneqassapput naassaanngitsussamut. (wE 15/4 96)