Atuartartut apeqqutaat

Ilaatigut qatanngutit angutit tusartarpavut Guutip naalagaaffia nunarsuarmut pinissaa eqqartoraat imaluunniit qinnutigigaat. Tamanna eqqortumik iliornerua?

Iluamik oqaatigalugu, Guutip naalagaaffiata qanoq tikiunnissaanik eqqartuineq Biibili malillugu eqqortuliornerunngilaq. Guutip naalagaaffia qilammiippoq. Taamaattumik apustili Paulus ima allassimavoq: ’Naalakkap ajortulianit tamanit aniguisikkumaarpaanga annatsillungalu naalagaaffimminut qilammiittumut; taanna naalannarsili naassaanngilluinnartumik. Amen.’ (2 Timûtiuse 4:18; Matîuse 13:44; 1 Korintumiut 15:50)

Guutip naalagaaffia qilammi 1914-mi pilersinneqarpoq, imaanngilarli nunarsuaq salinneqareerluni paratiisinngorpat nunarsuarmut allamulluunniit nuunneqassasoq. Jesus Kristus Naalagaaffimmi kunngiuvoq taamaasillunilu inngilit kunngitut oqartussaaffigalugit. Taamaattumik qilammi Guutip talerpiata tungaani issialluni naalakkersueqataanera pissusissamisoorpoq. Kristumiuttaaq tanitat Jesus qilammi kunngitut palasitullu ilagissavaat. — Evfisumiut 1:19-21; sarĸúmersitat 5:9, 10; 20:6.

Tamanna ima isumaqarpa maanna uagut Guutimut qinusinnaajunnaartugut qinnummik Naalakkap qinnutaanik ima allassimasutut: ’Naalagaaffiit tikiulli; peqqusat qilammisut nunamissaaq pili’? (Matîuse 6:10) Naamik, akerlianilli qinnut tamanna ilumoortuuvoq sulilu isumaqartorujussuulluni.

Guutip naalagaaffiata suli nunarsuarmut sunniuteqartumik iliuuseqarumaarpoq, tamannalu qinunitsinni isumatsinniitittuartariaqarparput oqariaatsit Naalakkap qinnutaanut assingusut atorlugit. Assersuutigalugu, Daniel 2:44-mi siulittuutigineqarpoq Guutip naalagaaffiata nunarsuarmi naalagaaffiit tamaasa sequmisissagai nunarsuarlu naalakkersuiffigilissallugu. sarĸúmersitat 21:2-mi eqqartorneqarpoq Jerusalem nutaaq qilammit aqqartoq. Jerusalem nutaaq kristumiunit tanitanit 144.000-iusunit aaqqissorneqarsimavoq Kristus peqatigalugu. Aamma Jesus peqatigalugu Naalagaaffimmik kingornussisuussapput. Taamaattumik sarĸúmersitat 21:2-mi allaaserineqarpoq nunarsuarmut saassasut inuiannut aalajaatsunut pilluarneq angisooq piviusunngortikkiartorlugu. — sarĸúmersitat 21:3, 4)

Siulittuutit tamakkua allallu nuannersut piviusunngornissaasa tungaannut Jehova Guutimut qinujuartarnissaq pitsaassaaq soorlu Jesusip oqarneratut, ’Naalagaaffiit tikiullu.’ Kisianni isumatsinniitsittuartariaqarparput Guutip naalagaaffia nunarsuarmiilinngisaannarnissaa. Guutip naalagaaffia qilammi inissisimaffeqarpoq nunarsuarmiinnani. (wE 1/6 96)

[Qupp. 31-mi suminngaanneernerat]

Earth: Based on NASA photo