Eqiasuillutit atuartuartarit

’Tikiutserlunga atuaasartuinnarit oqaassisarlutillu ajoqersuisarlutillu.’ — 1 TIMÛTIUSE 4:13.

1. Biibilimik atuartarneq qanoq iluaqutigissavarput?

JEHOVA GUUTIP inuit atuarnermut allannermullu ilinniarsinnaanissaannut tupinnartumik piginnaassuseqartissimavai. Aamma oqaatsiminik tunisimavaatigut ajoqersorneqarluarsinnaaqqulluta. (Jesaja 30:20, 21) Tassami, Biibili atuarlugu upperluartut Guutimik mianerinnittut itsarsuaq inuusimasut, soorlu Abraham, Isak Jakobilu, ’ingerlaqatigisinnaavavut’. Arnat Guutimut tunniusimasut, soorlu Sara, Rebekka Moabitikkuusorlu aalajaatsoq Rut, ’takusinnaavavullusooq’. Jesus Kristus qaqqami oqaluussisoq ’tusarsinnaavarput’. Nuannaarnissatsinnut Biibili tunngavigalugu pitsaasunik ajoqersorneqarsinnaavugut atuffarikkutta.

2. Qanoq ililluta nalunngilarput Jesus apustiliilu atuarumatuusimasut?

² Jesus Kristus inuttut naammalluinnartuusoq qularnanngitsumik atuffarissuusimavoq, Allakkallu Hebriiarisuut nalunngilluarlugit. Diaavulumit usserniarneqarami arlaleriarluni Allakkat innersuussutigisimavai oqarluni: ’Allassimavoq.’ (Matîuse 4:4, 7, 10) Ilaanni Nazaretimi naalagiartarfimmi najuuttut tamaasa atuffappai Esajasillu siulittuutaasa ilaat imminut attuumassuteqartillugit. (Lúkarse 4:16-21) Jesusip apustiliisattaaq allakkaminni Allakkat Hebriiarisuut akulikitsumik innersuussutigisarsimavaat. Juutit upperisarsiornikkut siuttuisa Peter Johannesilu inuinnartut ilinniartitaanngitsutut isigaat juutit atuarfianni qutsinnerusuni atuarsimanngimmata, allagaasali Guutimit isumassarsiarititaasut takutilluarpaat atuffarillutillu allallaqqittuusut. (apustilit suliait 4:13) Atuarsinnaanerli ilumut pingaaruteqarpa?

’Pilluarpoq . . . atuaasoq’

3. Biibilimik Biibililersaarutinillu atuartarneq sooq pingaaruteqarluinnarpa?

³ Biibili tunngavigalugu eqqorluartumik ilisarsigaanni ilisarsinerlu tamanna atoraanni inuunissamik naassaanngitsumik kinguneqarsinnaavoq. (Juánase 17:3) Taamaattumik Jehovap nalunaajaasuisa akueraat Allakkanik Illernartunik aammalu Biibililersaarutinik Guutip ’inussiaq aalajaallunilu silatooq’, kristumiut tanitaasut, aqqutigalugit pilersitaanik atuaqqissaartarneq  inuunermut pingaaruteqarluinnartuusoq. (Matîuse 24:45-47) Inuit tuusintilikkuutaat naqitikkat immikkut ittut Napasuliaq Alapernaarsuiffiup Peqatigiiffianeersut atorlugit atuarneq ilikkarsimavaat taamaalillutik Guutip oqaasianit ilisarsineq inuunermut sammisoq pigiliussimallugu.

4. (a) Guutip oqaasianik atuaqqissaarneq maleruaanerlu sooq pilluarnissamik kinguneqartarpat? (b) Atuarneq pillugu Paulusip Timoteus qanoq allaffigisimavaa?

⁴ Guutip oqaasia atuaqqissaaraanni atortarlugulu pilluarnermik kinguneqartarpoq. Taamaaliornikkut Guuti ataqqineqarpoq nuannaartinneqarlunilu. Taamaattumik pilluaqqusarpaatigut nuannaartillutalu. Jehovap kiffami pilluarnissaat kissaatigaa. Taamaattumik Israelitoqqami palasit peqquneqarsimapput inuiaat inatsisinik atuffattaqqullugit. (5 Moses 31:9-12) Allakkanik ilisimatuup Ezrap allallu inuit tamaasa Jerusalemimi katersuussimasut inatsisinik atuffammatigik, atuarneqarsimasut aamma nassuiarneqarput, inuit ’nuannaarnerannik’ kinguneqartumik. (Nehemja 8:6-8, 12) Kingusinnerusukkut apustili Paulusip suleqatini Timoteus ima allaffigaa: ’Tikiutserlunga atuaasartuinnarit oqaassisarlutillu ajoqersuisarlutillu.’ (1 Timûtiuse 4:13) Versi tamanna aamma ima nutserneqarsimavoq: ’Eqiasuillutit atuffattassavatit.’ — Seidelin.

5. sarĸúmersitat 1:3 naapertorlugu pilluarneq qanoq ililluni atuartarnermut attuumassuteqarpa?

⁵ sarĸúmersitat 1:3-mi erseqqissarneqarpoq Guutip oqaasianik atuartarnerput maleruaasarnerpullu pilluarnissatsinnut aalajangiisuusoq: ’Pilluarput takorluukkersaarutit makkua oqaasiinik atuaasorlu tusaasullu, taakkunanilu allassimasunik toqquisut, piffissaq qaneqimmat.’ Aap, Guutip oqaasiata siulittuutaasup sarĸúmersitat-niittup Allakkallu sinneranniittup atuartarnissaa tusartarnissaalu pisariaqartipparput. „Pilluarpoq . . . Jehovap inatsisaanik nuannarisaqartoq inatsisaalu eqqarsaatigalugit ullukkullu unnuakkullu“. Qanoq kinguneqassava? „Qanoq iliornermini tamani iluatsitsisaraaq.“ (Tussiaat 1:1-3) Taamaattumik Jehovap peqatigiissortaasa pissutissaqarluarlutik kajumissaartarpaatigut kisimiilluta, ilaqutariittut aamma ikinngutivut ilagalugit Guutip oqaasianik atuartarnissatsinnik.

Atuarsimasatit eqqarsaatigeqqissaartakkit

6. Josuap suna atuassagaa peqquneqarpa, taamaaliorneralu sooq iluaqutaava?

⁶ Guutip oqaasia naqitikkallu Biibililersaarutit atuartillugit qanoq ilillutit sapinngisannik pissarsiffigisinnaavigit? Immaqa Josuatut, Israelitoqqami siulersuisutut Guutimik mianerinnittutut, iliortariaqarputit. Ima siunnersorneqarpoq: „Inatsisit allassimaffiat . . . atuffassissutigiuartarniaruk. Ullukkut unnuakkullu eqqarsaatigiuaannaruk tassanilu allassimasut tamaasa maleruaqqissaarlugit; taava iluatsitsilluassaatit.“ (Josva 1:8) ’Atuffassineq’ isumaqarpoq oqaatsit nipituumik taasarlugit atuarneq. Taamaaliorneq eqqaamasinnaassutsimut iluaqutaaqaaq, taamaalillunimi atuarneqartut isummamut isertinneqartarput. Josuap Guutip inatsisai „ullukkut unnuakkullu“, aalajangersimasumik, atuartariaqartarsimavai, taamaalioruni iluatsitsilluassagami silatuumillu iliuuseqarsinnaassalluni akisussaaffini Guutimeersut suliaritillugit. Illit tamatumunnga assingusumik Guutip oqaasia aalajangersimasumik atuartarlugu iluaqutigingaassavat.

7. Biibili atuaqqissaartillugu suna pillugu quppernerit amerlasuut atuassallugit pingaarnerpaanngila?

⁷ Guutip oqaasia atuaraangakku quppernerit aalajangersimasut atuaannassanngilatit. Piffissaq aalajangersimasoq Biibilimik Biibililersaarummilluunniit atuaanermut atorniarukku tuaviortariaqanngilatit. Tamanna ingammik pingaaruteqarpoq aalajangersimasoq atuaqqissaarniarukku pingaarnerusullu eqqaamaniarlugit. Atuartillutit  aamma atuakkatit eqqarsaatigeqqissaakkit. Biibilimik allattup oqaasii misissukkit. Imminut apereriarit: ’Qanoq isumaqarpa? Paasissutissat tamakku sumut atorsinnaavakka?’

8. Biibilimi atuarsimasatta eqqarsaatigeqqissaartarnissaat sooq iluaqutaava?

⁸ Biibilimi atuakkatit eqqarsaatigeqqissaarnissaannut piffissaqartarit. Taamaalioruit Biibilimi oqaluttuat eqqaamalluassavatit najoqqutassiallu maleruarsinnaallugit. Guutip oqaasia eqqarsaatigeqqissaartarukku tassanilu aalajangersimasut isummanniitilerlugit uummatinnit pisumit oqalussinnaassaatit apeqqutissallit eqqortumik akisinnaallugit kingornalu akissutitit peqqissimissutigisariaqarnagit. Biibilimi Guutimit isumassarsiarititaasumik ussateqarpoq: „Iluartoq oqalulersinnani eqqarsaqqaartarpoq.“ — Ussatit 15:28.

Atuakkatit nalunngeriikkannut atassuteqartikkit

9, 10. Qanoq ililluta Biibilimik atuartarneq iluaqutiginerusinnaavarput atuakkavut nutaat nalunngeriikkatsinnut attuumassuteqartikkutsigik?

⁹ Kristumiut amerlanersaasa miserratigisinnaanngilaat ilaanni Guuti, oqaasia siunertaalu pillugit ilisimasaqarpallaarnatik. Ullumikkulli oqaluussisartut taakkua nassuiarsinnaavaat sooq Kristusip inuunini pilliutigisariaqarsimagaa, pinngortitsineq ajortilinngornerlu aallarnerfigalugit. Nassuiarsinnaavat qanoq pissutsinik aaqqissuussaaneq manna ajortoq peerneqarumaartoq inuillu naalattut qanoq ilillutik nunarsuarmi paratiisiusumi naassaanngitsumik inuunissaq angusinnaagaat. Jehovap kiffaasa tamakku nassuiarsinnaavaat ’Guuti ilisarilersimagamikku’ Biibilip Biibililersaarutillu atuaqqissaartarnerisigut. (Ussatit 2:1-5) Ilikkakkatik nutaat nalunngeriikkaminnut atassuteqartikkiartuaartittarpaat.

¹⁰ Eqqarsaatit nutaat Biibilimeersut nalunngeriikkanut atassuteqartikkaanni iluaqutaasorujussuuvoq. (Jesaja 48:17) Biibilimi inatsisit, najoqqutassiat eqqarsaatillu timitaqanngitsut pillugit atuaraangakkit nalunngeriikkannut atassuteqartittariaqarpatit. Paasiniaruk paasissutissat qanoq ’oqaatsit peqqissinartut’ tamarmiussusiannut attuumassuteqartut. (2 Timûtiuse 1:13) Maluginiakkit paasissutissat Guutimut attaveqarninnut nakussatsinnartuusinnaasut, kristumiutut kinaassutsinnik pitsaanerulersitsisinnaasut imaluunniit allat tusarliussamik Biibilimeersumik oqaluussisarninni atorsinnaaneritit.

11. Iliuuseq aalajangersimasoq Biibilimi qanoq oqaatigineqarnersoq atuarutsigu qanoq iliortariaqarpugut? Tamatumunnga assersuummik taasaqarit.

¹¹ Iliuuseq aalajangersimasoq Biibilimi qanoq oqaatigineqartoq atuaraangakku paasiniaruk najoqqutassiat suut tunngaviunersut. Eqqarsaatigeriaruk aalajangerlugulu illit nammineq tamatumani qanoq iliussanerlutit. Jakobip ernerata Josefip Potifarip nulia kanngunartuliorfigiumanngivippaa ima oqarluni: „Qanoq taama kanngunartigisumik iliussaanga Guutimut ajortuliorlunga?“ (1 Moses 39:7-9) Oqaluttuap killinnartup tamatuma takutippaatigut kinguaassiuutitigut kanngunartuliorneq tassaasoq Guutimut ajortuliorneq. Eqqarsaatitsinni najoqqutassiaq tamanna Guutip oqaasiani allassimasunut allanut atassuteqartissinnaavarput, namminerlu ajortuliornissatsinnut usserniarneqaraangatta najoqqutassiaq tamanna eqqaamajuminassaaq. — 1 Korintumiut 6:9-11.

Biibilimi oqaluttuat takorloortakkit

12. Sooq iluaqutaassava Biibilimi oqaluttuat atuartillugit takorloortarutsigik?

¹² Atuartillutit pisimasut takorloortarukkit oqaluttuani annikitsualuit eqqaamajuminarnerussapput. Nunap isikkua, illut inuillu takorloortakkit. Nipaat ’tusartakkit’. Timiusaq iffiorfimmiittoq naaniaruk. Najuullutit misigigit. Taamaaliortaruit atuakkavit  sunnissavaatit, illoqarfitoqaq takussavallusooq, imaluunniit qaqqaq majuassavallusooq, pinngortitarsuaq tupigusuutigalugu immaqaluunniit upperluartut ilagalugit.

13. Eqqartuussisut 7:19-22-mi oqaluttuarineqartoq qanoq oqaatigisinnaaviuk?

¹³ Assersuutigalugu Eqqartuussisut 7:19-22 atuarsinnaavat. Pisimasoq takorlooriaruk. Eqqartuussisoq Gideon Israelikkullu tatituut Midjanikkut tammaarfiata killingani utaqqipput. Unnuppoq, nalunaaqutaq qulinngulerpoq, ’unnuakkut pigaarfik aallartittoq’. Midjanikkut pigaartut aatsaat inissinneqarput, taartumilu tammaarfimmi Israelikkut akeraat sinipput. Takoriaruk! Gideon angutitaalu tamarmik sulluartaateqarput. Saamimminnik nanerussat qummuattani toqqorsimasut tigumiarpaat. Tassanngaannaq angutit pingasunngorlutik avissaarsimasut hundredet sulluartaatinik qarlortarput qummuattallu sequmisillugit, nanerussat kivippaat imalu suaarlutik: ’Jehovap panaa Gideonillu!’ Tammaarfik qimerloorpat. Midjanikkut qimaanialerput nipituumillu nilliallutik! Israelikkut 300-iusut sulluartaatinik qarlortartuartillugit Guutip Midjanikkut imminnut panaatitilerpai. Midjanikkut qimaapput taamaalillunilu Jehovap Israelikkut ajugaatippai.

Atuartaruk ilinniarlutillu

14. Eqqartuussisut kapitali 9 atorlugu qanoq ililluni meeraq maniguunnerup pingaaruteqassusianik ilinniartinneqarsinnaava?

¹⁴ Guutip oqaasia atuaraanni ilikkarnartorujussuuvoq. Immaqa meeqqatit maniguunnerup pingaaruteqassusianik ilinniartikkusuppatit. Gideonip ernerata Jotamip siulittuutaa qularnanngitsumik takorlooruminassaaq ilikkarnassallunilu. Aallaqqaatigalugu Eqqartuussisut 9:8 atuaruk. Jotam oqarpoq: „Ilaannigooq orpiit tanitaqarnialerput kunngissaminnik.“ Orpiit olivenilik, figenilik viinnequtilillu tamarmik naalakkersuiumanngillat. Orpilli kapinartulik pitsaanngitsoq kunnginngorumavoq. Oqaluttuaq  meeqqannut atuffassissutigereerukku nassuiarsinnaavat orpiit naleqartut tassaasut angutit pitsaasut, qatanngutiminnut Israelikkunnut kunnginngorumanngitsut. Orpilli kapinartulik qisussaannartut iluaqutaasoq tassaavoq Abimelekip pingaarniartup, naalagaaniarpallaartup inuarsimasullu kunngiussusia. Jotamilli siulittuutigisimasaatut toquvoq. (Eqqartuussisut kapitali 9) Meeraq kina alliartoruni orpittut kapinartulittut ittunngorusussava?

15. Rutimik allakkat-ni ilumoornerup pingaaruteqarnera qanoq erseqqissarneqarpa?

¹⁵ Biibilimi Rutimik allakkat ilumoornerup pingaaruteqassusia erseqqissarpaat. Immaqa ilaqutariittut sinnerseraallusi oqaluttuaq atuffassissutigisinnaavarsi allassimasullu pigiliullugit. Takuat Rut Moabikkuusoq sakini uillarnerusoq No’omi ilagalugu Betlehemiliartoq, tusarlugulu Rut oqartoq: „Inuiaqatitit uangattaaq inuiaqatigissavakka, illillu Guutit uangattaaq Guutigissavara.“ (Rut 1:16) Rut eqiasuilluni Boazip narsaataani katersuisut kingornanni nakkaanikunik katersuisarpoq. Tusarpat Boazip Rut ima nersoraa: ’Maanimiut tamarmik nalunngilaat arnaasutit pitsaasoq.’ (Rut 3:11) Kingunitsiannguagut boazip Rut aappartaaraa. Sakiatsiariit aappariilertarnissaat pillugit inatsit naapertorlugu Boazimik ernertaarpoq, taannalu No’omip erneratut eqqartorneqarpoq. Rut Davidimut kingusinnerusukkullu Jesus Kristusimut siuaasaalersimavoq taamaalillunilu Jehovamit ’akissarsitinneqarluni’. Biibilimi oqaluttuaq tamanna atuaraanni pingaaruteqartumik ilinniarfigineqarsinnaavoq, tassami Jehovamut ilumooraanni pilluaqquneqangaarnermik kinguneqartarpoq. — Rut 2:12; 4:17-22; Matîuse 1:1, 5, 6; Ussatit 10:22.

16. Sjadrak, Mesjak Abed-Negolu qanoq misilinneqarsimappat, uagullu oqaluttuaq tamanna qanoq ilinniutigisinnaavarput?

¹⁶ Hebriiarit Sjadrak, Mesjak Abed-Negolu pillugit oqaluttuap nakussatsissinnaavaatigut misilinneqarnikkut Guutimut ilumoortuaqqulluta. Danielimik allakkat kapitali 3 atuffassissutigineqartillugu pisimasut takorlooriakkit. Inuusaliarsuaq kuultiusoq Durap narsaani napatinneqarpoq, tassanilu Babylonimiut atorfillit katersuutitinneqarput. Nipilersuutit tusaalerlugit tamarmik seeqqummerput inuusaliaq kunngip Nebukadnezarip nappartitaa pallorfigalugu. Tamarmik, Sjadrak, Mesjak Abed-Negolu kisiisa pinnagit, taamaaliorput. Ataqqinnillutik aalajaallutilli kunngi nalunaarfigaat guutii guutisiorfigiumanagit inuusaliarlu kuultiusoq pallorfigiumanagu. Taava hebriiarit inuusuttut taakku taava aatsitsivimmut kissatsinneqangaarsimasumut iginneqarput. Qanorli pisoqarpa? Aatsitsivimmut isigaluni kunngip takuai angutit sisamat innarlerneqanngitsut, „sisamaallu inngilisut isikkoqarpoq“. (Daniel 3:25) Hebriiarit pingasut aatsitsivimmit aniguisinneqarput, Nebukadnezarillu Guutiat unnersiutigilerpaa. Iluaqutaaqaaq oqaluttuaq tamanna takorloorlugu. Misilinneqarnikkut Jehovamut ilumoorneq pillugu ilinniutaavoq pitsaasoq!

Ilaqutariittut Biibili atuffassissutigisarsiuk

17. Ilaquttatillu qanoq ilillusi Biibili atuffassissutigalugu iluaqutigisinnaavisiuk?

¹⁷ Ilaqutariittut akuttunngitsumik Biibili atuaqatigiissutigisarussiuk iluaqutigingaassavarsi. Mosesimik allakkat siulliit aallarnerfigalugu pinngortitsineq inuiaallu aallaqqaataani angerlarsimaffiat paratiisi takorloorsinnaavatit. Ataataanerpaat aalajaatsut ilaqutaallu misigisimasaat Israelikkullu Immap Aappalaartup naqqagut panertukkut aniguisitaanerat malinnaaffigisinnaavatit. Savanik paarsisup inuusuttup Davidip filisteri Goliat ajugaaffigigaa takusinnaavat. Ilaqutariillusi Jerusalemimi Jehovap naalaffiata sananeqarnera malinnaaffigisinnaavarsi kingusinnerusukkullu Babylonimiut sakkutuuinit  aserorneqarnera aammalu nunamut naalagaatitaata Zerubbabelip siulersuinerata ataani sananeqaqqinnera takusinnaallugit. Savanik paarsisut maniguuttut Betlehemip eqqaaniittut ilagalugit tusarsinnaavarsi inngilit Jesusip inunngorneranik nalunaarutiginnittut. Kuisinnera kiffartuussineralu pillugit annikitsualuit paasisinnaavasi, takullugulu inuunerminik utertitsissutitut pilliuteqartoq makinneratalu kingunerisaanik nuannaarneq misigalugu. Kingusinnerusukkut Paulus angalaqatigisinnaavarsi takullugulu kristumiussutsip siaruarnera ilagiillu pilersinneqarnerat. sarĸúmersitat atuartillugit ilaquttavillu nuannaarutigisinnaavasi apustilip Johannesip siunissamik takorluugai alutornangaartut, ilaatigut Kristusip ukiuni tuusintini naalakkersuinera.

18, 19. Ilaqutariittut Biibili atuffassissutigigaanni siunnersuutit suut iluaqutaassappat?

¹⁸ Ilaqutariittut Biibili atuffassissutigigaangassiuk ersarissumik qiimasullusilu atuartarsiuk. Biibilimi allassimasut ilaat eqqarsaatigalugit immaqa ataataasup oqaluttuarpiaq atuffassissutigisinnaavaa, ilaquttallu allat oqaluttuap innuttaasa oqaaserisaat atuffassissutigisinnaavaat misigissutsitik atorluarlugit.

¹⁹ Taamaalilluni ilaqutariittut Biibili atuartarussiuk qularnanngitsumik atuffarinnerulissaatit. Guuti pillugu ilisimasaqarnerulissaatit qaninnerusumillu attaveqarfigissallugu. Tussiaasiortoq Asaf ima allassimavoq: „Kisianni Guuti qanillugu inuuneq tassa pilluarnartora. Qimarravigaara Jehova suliai tamaasa oqaluttuarisinnaaniassagakkit.“ (Tussiaat 73:28) Ilaqutariittut Mosesitut ilerumaarpusi, taassuma ’takussaanngitsoq isigalugulusooq iperarnaveersaarmagu’. — Eprîarit 11:27.

Atuarneq kristumiutullu kiffartorneq

20, 21. Oqaluussiartoqqussut qanoq atuarsinnaanermut attuumassuteqarpa?

²⁰ ’Takussaanngitsoq’ pallorfigerusukkatsigu atuffarinnerulernissarput sulissutigisariaqarparput. Taamaaliorutta Guutip oqaasianik nalunaajaanissatsinnut iluaqutigissavarput. Taamaalilluta oqaluussineq Jesusip ajoqersukkaminut peqqussutigisimasaa naammassisinnaanerussavarput: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit, ajoqersorsigillu ilissinnut peqqusakka tamaasa maleruaqqullugit.“ (Matiuse 28:19, 20, NV; apustilit suliait 1:8) Oqaluussineq tassaavoq Jehovap innuttaasa suliassaasa pingaarnerpaartaat, atuarsinnaanerullu suliassaq tamanna naammassissallugu ikiussavaatigut.

²¹ Guutip oqaasianik atuarnermut ilinniartitsisinnaanermullu pikkorinniaraanni iliuuseqartariaqarpoq. (Evfisumiut 6:17) Taamaattumik ’ilungersorniarit misiligaalluartutut sulisartutullu pakatsisussaanngitsutut oqaatsimik sallusuissutip pianik tunioraalluartutut Guutimut sassarteqqullutit’. (2 Timûtiuse 2:15) Eqiasuillutit atuartaruit sallusuissut Biibilimeersoq pillugu paasisaqarnerujartussaatit Jehovamullu nalunaajaasutut pikkorinnerujartussallutit. (wE 15/5 96)

Qanoq akissavigit?

□ Guutip oqaasianik atuartarneq qanoq ililluni pilluarnissamut attuumassuteqarpa?

□ Biibilimi atuarsimasat eqqarsaatigeqqissaarnissaat sooq iluaqutaava?

□ Sooq iluaqutaava atuakkat takorluuisarnissaat nalunngeriikkanullu attuumassuteqartittarlugit?

□ Biibilimik atuartarnikkut ilaatigut suna ilinniarneqarsinnaava?

□ Sooq ilaqutariittut Biibilip atuffassissutigineqartarnera iluaqutaava, taamaaliornerlu qanoq kristumiut oqaluussisarnerannut attuumassuteqarpa?

[Atuaqqissaarnermi apeqqutit]

[Qupp. 13-imi assiliartaq]

Ilaqutariittut Biibili atuffassissutigigaangatsigu oqaluttuarineqartut takorloortariaqarpavut pingaaruteqarnerallu eqqarsaatigalugu