Illit paqumisuffigineqartarsimavit?

INUIANNIK allanik pinerlunneq, naggueqatiginngisanik qinngarsuineq, immikkoortitsineq, ammip qalipaataa tunngavigalugu immikkoortitsineq inuiannillu toqoraaneq imminnut qanoq attuumassuteqarpat? Tamakku tamarmik aallaavigaat inuppasuit sanngiiffigisartagaat — paqumisunneq!

Paqumisunneq suua? Ujarlerfissiap ima nassuiarpaa: „Naapertuilluartumik eqqartuinissaq soqutiginagu piffissaqarfiginaguluunniit isummersimaneq.“ Inuttut naammalluinnanngitsutut paqumisuffigisaqarajuttarsinnaavugut. Immaqa pisimasumik eqqaasaqarsinnaavutit pissutsit tamaasa paaseqqaarnagit eqqartuisimaninnik. Biibilimi taamatut paqumisuffigisaqaqqajaaneq Jehova Guutip eqqartuisarneranut allaanerulluinnarpoq. Allassimavoq: „Inuimmi isiminnut saqqumisuinnaat isigisarpaat, [Jehovalli] inuup uummataa isigisarpaa.“ — 1 Samuel 16:7.

Paqumisunneq ajoqusiisinnaavoq

Qularnanngitsumik kikkulluunniit tamarmik arlaatigut eqqartornerlunneqarsimapput. (Naleqqiuguk Nalunaajaasup oqaasii 7:21, 22.) Ataatsimut isigalugu tamatta paqumiffigineqartarpugut. Paqumisunnerli qaangiutiaarpat annikitsuinnarmik annersitsissaaq annersitsinaniluunniit. Eqqarsaatinilli taamaattunik allisaaneq ajoqutaasinnaavoq. Tamatuma salluliuummik isumaqalersissinnaavaatigut. Assersuutigalugu paqumisunnermik sunnerneqarlutik inuit ilaat isumaqarsinnaapput inuk piumatuujusoq, eqiasuttuusoq, sianiitsuusoq makitasuujusorluunniit upperisarsiornera, allamik qalipaateqarnera inuiannulluunniit allanut ilaanera pissutigiinnarlugu.

Paatsoornerit taamaattut amerlasuuni allanut naapertuilluanngitsuliornernik, sorraatsuliornernik allaallu pinerluffiginninnernik kinguneqartarput. Millionilippassuit inuiannik toqoraanerni, ammip qalipaataa pissutigalugu toqoraanerni, paqumisuffigisaqarnernilu allani sualuttuni, inuunertik annaasimavaat.

 Silarsuarmi tamarmi naalakkersuisut paqumisunneq akiorniartarsimavaat kiffaanngissuseqarnermik, isumannaassusermik assigiissitsinermillu inatsisitigut qulakkeerinikkut. Nunavit inatsisai atuarukkit immikkoortunik innuttaasut tamarmik pisinnaatitaaffiinik ammip qalipaataa, angutaanera arnaaneraluunniit upperisaalluunniit apeqqutaatinnagit illersuisunik qularnanngitsumik nassaassaatit. Taamaakkaluartoq silarsuarmi paqumisunneq sualutsikkiartuinnarpoq.

Illit paqumisuffigineqarsimavit? Amerpit qalipaataa, ukiutit, angutaanerit arnaanerilluunniit, inuiannut upperisarsiortunulluunniit allanut ilaanerit pissutigiinnarlugu piumatuutut, eqiasuttutut, sianiitsutut makitasuutulluunniit pissuseqarnerarneqarsimavit? Tulluartumik ilinniagaqarnissamik, suliffeqarnissamik, inissamik innuttaasut ikiuutissaannilluunniit periarfissamik itigartitaasimavit paqumisuffigineqarneq pissutigalugu? Taamaappat qanoq ilillutit akiorsinnaavigit?

[Qupp. 3-mi assiliartaq]

Paqumisuffigisaqarnermik allisaaneq naggueqatiginngisanik qinngarsuinermik pilersitsisarpoq

[Suminngaanneernera]

Nina Berman/Sipa Press