„Nipangersimaffissaqarpoq oqaluffissaqarlunilu“

IMA oqarsimannginnerpit: „Taama oqarsimassanngikkaluarama“? Immaqalu eqqaamavat ilaannikkut oqaaseqartariaqaraluarninni nipangiinnartarsimanitit, kingornalu immaqa ima eqqarsarputit: ’Arlaanik oqarsimassagaluarama.’

Biibilimi allassimavoq: „Nipangersimaffissaqarpoq oqaluffissaqarlunilu.“ (Nalunaajaasup oqaasii 3:7) Tamanna unamminiarnartuuvoq — aalajangertariaqarpugut qaqugu oqaaseqartariaqarluta qaqugulu nipangersimasariaqarluta. Inuttut naammalluinnanngitsuugatta piffissani tulluanngitsuni oqalukkajuttarpugut. (Rûmamiut 7:19) Oqarput naalakkersoruminaatsoq qanoq ililluta aqussinnaavarput? — Jâko 3:2.

Oqqap aqussinnaaleriartornera

Qaqugu oqaluttariaqarnerput qaqugulu nipangersimasariaqarnerput aalajangerniarlugit periarfissat tamaasa pillugit ilitsersuuteqartariaqanngilagut. Kristumiutulli pissutsinit aalajangersimasunit aqunneqartariaqarpugut. Pissutsit suut?

Jesusip Kristusip nassuiarsimavaa ajoqersukkami pingaarnerpaamik pissuserisariaqagaat tassaasariaqartoq asanninneq. ’Matumannga tamarmik ilisarissavaasi ajoqersugarigissi:  asaqatigiikkussi.’ (Juánase 13:35) Qatanngutigiittut asanninneq taama ittoq ersersinnerujartortillugu oqqatsinnik aqutsisinnaalernerujartussaagut.

Ingammik pissutsit marluk iluaqutigingaassavavut. Ilaat tassaavoq maniguunneq. Maniguukkutta ’ilavut immitsinnit annerutinniassavavut’. (Filípimiut 2:3) Pissuseq alla tassaavoq saamaneq, taamaakkuttami ’ilalaarsinnaavugut’ artorsaateqarnitsinni. (2 Timûtiuse 2:24, 25) Jesus Kristusip maligassaalluarluni takutissimavaa pissutsit tamakku qanoq ersersinneqartariaqartut.

Tatineqarnikkut oqqatta aqunneqarsinnaanera artornarnerusarmat eqqarsaatigeriartigu unnuaq Jesusip toqunera sioqqutitsiarlugu, taamani ’aliasulerluni qussalangaalermat’. (Matîuse 26:37, 38) Jesusip taama misigissuseqarnera tupinnanngilaq, Guutimut ilumoortuarsinnaanera inuiaat tamarmik naassaanngitsumik inuusinnaanissaannut aalajangiisuussammat. — Rûmamiut 5:19-21.

Piffissami tamatumani Jesusip ilumut Ataatani qilammiusoq qinnuigisariaqarsimavaa. Taamaattumik ajoqersukkani pingasut pigaaqqullugit qinujartorpoq. Kingorna uterami sinilersimapput. Peter ima oqarfigaa: ’Tassa sivikitsunnguamilluunniit pigaaqatigisinnaanngilisinga?’ Asannilluni naveeramigit aamma oqaatigaa sanngiissusiat paasisinnaallugu. Ima oqarpoq: ’Anersaaq kajumikkaluarpoq, uinilli sanngiippoq.’ Kingusinnerusukkut Jesusip ajoqersukkani sinittut tikeqqippai. Inussiarnersumik oqaluffigereerlugit ’aamma qinujartorpoq pingajussaanik’. — Matiuse 26:36-44.

Jesusip pingajussaanik ajoqersukkat sinittut tikikkamigit inussiarniinnani oqarfigai: ’Soormi siniinnarpisi qasuerserlusilu; tassa inuup ernerata ajortuliortut assaannut pisitaaffissaa qanillivoq.’ (Matiuse 26:45) Aatsaat uummataa asanninnermik ulikkaarsimammat saamallunilu maniguukkami piffissami taama artornartumi taama oqaaseqarsinnaavoq. — Matîuse 11:29; Juánase 13:1.

Tamatuma kinguninnguatigut Jesus tigusaavoq eqqartuunneqalerlunilu. Tamatumannga ilinniarsinnaavarput ilaannikkut nipangersimaffissaqartoq, allaat kristumiutut kiffartortilluta. Eqqunngitsumik unnerluutissaqareerlutik Jesus eqqartuunneqassasoq palasit aalajangersimapput, taamaattumillu suna ilumoortoq paaserusunagu. Taamaattumik pisut akerliorpasissut akornanniitsilluni Jesus nipangersimaannarpoq. — Naleqqiuguk Matîuse 7:6.

Kisianni Jesus nipangersimaannanngilaq palasiuneq ima peqqusimmat: ’Guuti uumasoq naqqissigalugu uppernarsaaqquakkit oqarfigeqqulluta illit taannaanersutit Kristus Guutip ernera.’ (Matîuse 26:63) Jesus uppernarsaaqquneqarami oqaluttuartariaqarpoq. Taamaattumik ima akivoq: ’Soorlu oqartutit. Oqarfigaassili: matuma kingornagut Inuup ernera takujumaarparsi pissaanerup talerpiata tungaani issiasoq qilaallu nuiaasigut aggersoq.’ — Matiuse 26:64.

Ullormi pingaaruteqartumi tamatumani Jesusip oqqani aqulluarsimavaa. Asanninneq, saamaneq maniguunnerlu pissuserilluarpai. Uagut qanoq ililluta pissutsit taamaattut atorluarsinnaavavut tatineqarnikkut oqarput aqussinnaajumallugu?

Kamatsilluni oqqap aqussinnaanera

Kamakkaangatta oqarput naalakkersunngitsoorajuttarpugut. Assersuutigalugu Paulus Barnabasilu ilaanni isumaqatigiinngissuteqarput. ’Barnabasili oqarmat Johannes Markusimik taasaq ilasereqqullugu,  Paulus taava isumaqarpoq taanna ilaserissanngikkitsik Pamfyliami qimammatik suliartoqatiginngimmatillu. Assortuutingaaleramillu avissaarput.’ — apustilit suliait 15:37-39.

Michael, * ukiualunni sanaartornermik suliaqartoq ima oqaluttuarpoq: „Sanaartornermi sulisut ilaat ilisarisimalluarlugu ataqqisarivara. Sulinerali isornartorsiortuaannarpaa. Ajuusaarutigalugu ajuallappunga, misigissutsikkali toqqortarpakka. Taava ullut ilaanni suliara aatsaat naammassisara isornartorsiulermagu naammagilerpara.

Misigissutsikka mattunneqartut tamaasa aniatilerpakka. Kamangaarama eqqarsaatiginngilara allat najuuttut qanoq isumaqarfigissaneraat. Ullup tamatuma sinnerani oqaluffigerusunngilara takorusunnaguluunniit. Maanna paasisimavara ajornartorsiut eqqortumik iliuuseqarfigisimanagu. Pitsaanerusimassagaluarpoq nipangersimaannarsimaguma aatsaallu eqqissineruleruma oqarfigalugu.“

Qujanartumik kristumiutut asanninneq iluaqutigalugu angutit taakku marluk isumaqatigiinngissutertik aaqqissimavaat. Michael nassuiaavoq: „Ammasumik oqaloqatigeereeratta paaseqatigiinnerulerpugut maannalu ikinngutigiittorujussuuvugut.“

Soorlu Michaelip paasilersimagaa, kamakkaangami ilaannikkut nipangersimagallarnissaq silatusaarneruvoq. „Imminut naalakkersinnaasoq angutaavoq silassorissoq,“ Ussatit 17:27-mi allassimavoq. Siuneqassuseq qatanngutitullu asanninneq pigigutsigik ajuallannartumik oqaaseqarnaveersaassaagut. Allamit ajuallatsinneqarutta taava taanna kisimiitsillugu saamalluta maniguullutalu oqaloqatiginiartigu eqqisseqatigeeqqinniarluta. Taamaalilluni asanninnerup pingaarniarnerigaluaq piiassavaa eqqissisitsillunilu. Taamaattoqartillugu oqalunnissamut piffissanngortarpoq, utoqqatserfissaqarluni peqqissimiffissaqarlunilu ilumoorlunilu oqaloqatigiinnikkut ajuallattoqarunnaarsitsiniarfissaqarluni. — Matîuse 5:23, 24.

Nipangersimaffissaanngippat

Kamakkutta arrajallutaluunniit immaqa inuk kamaffigisarput oqaluffigerusuttanngilarput. Taamaaliornerli ajuusaarnaqaaq. „Katikkatta ukioq siulleq ilaannikkut ullut arlalissuit uiga oqaluffigerusunneq ajuvippara,“ María * nassuerpoq. „Amerlanertigut annertuumik ajornartorsiuteqanngikkaluarpoq, arrannartunnguilli ataatsimut katillugit taama sunniuteqartarput. Arrannartut tamakku tamaasa isumakuluutigisarpakka naggataatigut akornutitut qaqqarsuartut ittutut isigilersarlugit. Naggataatigut arrassimaartillunga uiga oqaluffigiumanngittarnera atorsinnaajunnaarpara.“

María ima nangippoq: „Allassimaffiup aalajangersimasup eqqortumik eqqarsarsinnaanissannut ikiorpaanga: ’Seqineq tarrisinaveersiuk narrutsassimanissinni.’ Uigalu tamatta attaveqatigiinnerput pitsaanerulersinniarlugu ilungersorsimavugut ajornartorsiutit alliartorteqqeqqunagit.  Piuminarsimanngilaq, maannali ukiut qulit aappariittut inuusimagatta nuannaarlunga oqarsinnaavunga nipangersimaffiit nuanniitsut tamakku akuttuuneroqisut. Nassuerutigisariaqarparali suli taamatut iliorajussutsima nununissaa sulissutigisariaqarakku.“ — Evfisumiut 4:26.

Soorlu Maríap paasisimagaa, inuit marluk isumaqatigiinngissuteqalerunik attaveqatigiikkunnaartarnerat aaqqiissutissaanngilaq. Taamaalioraluarunik narrassimaarneq alliartuinnassaaq attaveqatigiinnerallu aserorsinnaalluni. Jesus oqarsimavoq ’saqitsaasisigisavut ikinngutinnerfiginasuassagivut’. (Matîuse 5:25) ’Oqaatsit oqaaserineqarfissamikkut oqaaserisat’ atorlugit ’eqqissinissaq noqqaassutigisinnaavarput’. — Ussatit 25:11; 1 Pîtruse 3:11.

Ikiorneqarnissaq pisariaqartikkaangatsigu aamma oqaaseqartariaqarpugut. Anersaakkut ittumik ajornartorsiuteqarutta immaqa allat tamakkuninnga nanertuuteqartissallugit nangaassuteqarpugut. Kisianni oqaaseqanngikkutta imaassinnaavoq ajornartorsiut annertuneruleraluttuinnassasoq. Kristumiut utoqqaanertat toqqakkat soqutigaatsigut periarfissaqartinneqarunillu qularnanngitsumik ikiorumassalluta. Oqaluffissaqarportaaq. — Jâko 5:13-16.

Pingaartumik Jehova aalajangersimasumik ammasumik qinnuigisariaqarparput Jesusip iliortarneratut. Aap, Ataatatsinnut qilammiusumut ’uummammiugisavut tamaasa saqqummiuttariaqarpavut’. — Tussiaat 62:9; Eprîarit 5:7.

Guutip naalagaaffia pillugu „oqaluffissaqarpoq“

Kristumiut kiffartuussinerat Guutimit peqqussutigineqarpoq naggatissarlu nalliutsinnagu naammassineqassalluni. Taamaattumik maannakkut Jehovap kiffaasa Guutip naalagaaffia pillugu nutaarsiassamik nuannersumik oqaluussisarnerat aatsaat taama pingaaruteqartigaaq. (Mákorse 13:10) Apustilit assigalugit kristumiut ilumoortut ’takusatik tusakkatillu oqaatiginnginneq saperpaat’. — apustilit suliait 4:20.

Soorunami kikkut tamarmik nutaarsiassaq nuannersoq tusarusunngilaat. Ajoqersukkani oqaluussiartoqqullugit aallartikkamigit Jesusip kajumissaarpai inuit ’qinngaqqunnanngitsut’ ujaqqullugit. Jehovap inuit imminut pallorfiginnittunngornissaannut pinngitsaalineq ajormagit, uaguttaaq Guutip naalagaaffianik tusarliussamik tusarumanngitsut oqaluussiffigiuaannassanngilavut. (Matîuse 10:11-14) Kisianni nuannaarutigaarput inuit ’inuunermik naassaanngitsumik pissaqaqqusaasut’ Jehovap naalagaaffianik oqaluussiffigineqarsinnaammata. — apustilit suliait 13:48.

Asanninneq, saamaneq maniguunnerlu pissuseralugit inuttut naammalluinnanngitsutut isumaatsoortumik oqalukkajussuseq imaluunniit inussiarniitsumik nipangersimaannarajussuseq nunusinnaavavut. Pissutsit taamaattut ineriartortuartillugit pasinerujartussavarput qaqugu oqaluffissaqartoq qaqugulu nipangersimaffissaqartoq. (wE 15/5 96)

[Quppernerup ataani ilanngussat]

[Qupp. 25-mi assiliartaq]

Attaveqatigiilluarnikkut ajornartorsiutit aaqqinneqarsinnaapput