Jehovap anersaakkut naalaffissua

’Taama ittoq palasiuneraarput, . . . illernartuummut tupermullu piviusumut kiffartuuteqartoq; tamanna inuup pinnagu Jehovap nappartitaraa.’ — EPRÎARIT 8:1, 2.

1. Inuiannut ajortilinnut atatillugu Guuti asannittumik sumik aaqqissuussisimava?

JEHOVA GUUTI inunnut asanningaarnini pissutigalugu pilliuteqarsimavoq silamiut ajortaannik peersisinnaasumik. (Juánase 1:29; 3:16) Taamaaliorniarluni ernermi angajulliliami inuunera qilammit nunarsuarmi niviarsiap juutiusup illiaanut nuuttariaqarsimavaa. Arnaq taanna Mariamik atilik Jehovap inngiliata nassuiaateqqissaarsimavaa meeraq ilumiugiligassaa ’illernartumik, Guutip erneranik’ taaneqassasoq. (Lúkarse 1:34, 35) Josef, Mariap aappassiaa, paasitinneqarpoq Jesus tupinnartuliakkut ilumiugineqalerumaartoq, ’innuttanilu annaatissagai ajortaannit’. — Matîuse 1:20, 21.

2. Jesus 30-t missaannik ukioqarluni sua, sooq?

² Jesusip alliartornermini tupinnartuliakkut erniunini ilisimaleriartuaarsimavaa. Paasisimavaa Ataatami qilammiusup annaassissutissamik nunarsuarmi suliaqartinniaraani. Taamaattumik inersimasutut 30-t missaanni ukioqarluni Jesus Guutip pruffiitianut Johannesimukarpoq Jordanillu kuussuani kuisilluni. — Mákorse 1:9; Lúkarse 3:23.

3. (a) Jesusip oqarami ’pilliutit toqutassat pilliutillu neqissat piumanngilatit’ suna pivaa? (b) Jesus imminut ajoqersugaalerusuttunut tamanut qanoq pitsaasumik maligassiuiva?

³ Jesus kuisinnermini qinuvoq. (Lúkarse 3:21) Inuunermi taamaalinerani oqaatsit Tussiaat 40:7-9-miittut eqquutitilerpai, oqaatsillu taakku naapertorlugit kingorna apustili Paulus ima allassimavoq: ’Pilliutit toqutassat pilliutillu neqissat piumanngilatit, timimilli uannut piareersagaqarputit.’ (Eprîarit 10:5) Tassa Jesusip nalunngilaa naalaffimmi Jerusalemimiittumi uumasunik pilliuteqartoqartarnerata ingerlaannaarnissaa Guutip kissaatiginngikkaa. Paasivaalu Guutip inuttut naammalluinnartumik timeqartikkaani pilliutissaminik. Taamaalilluni uumasunik pilliuteqartarnissaq pisariaarutissaaq. Guutip piumasaatut iliornissaminik kissaateqarluinnarnini Jesusip ersersippaa, ima qinugami: ’Tassa aggerpunga, mappersakkani pillunga allassimasoqarpoq, peqqusat, Guutiaa, naammassiartorlugu.’ (Eprîarit 10:7) Sapiilluni namminissarsiornanilu imminut pilliutiginermigut Jesus kingorna ajoqersugarilerumaagassaminut tamanut maligassiuilluarpoq. — Mákorse 8:34.

4. Guutip qanoq ililluni takutippaa Jesusip imminut pilliutiginera iluarigini?

⁴ Guuti paasititsiva Jesusip kuisinnermini qinnutaa tusarsimallugu? Jesusip apustiliisa toqqakkat ilaat tamatumunnga akiteriartigu: ’Jesus kuisikkami erniinnaq imermit qaqivoq; atalu qilak ammartoq qulaagut, Guutillu anersaava takuaa tuisut aqqartoq qulaanullu pisoq. Atalu, nipi qilammit oqaluttoq: „Tassa ernera asanartoq nuannarisara.“’ — Matîuse 3:16, 17; Lúkarse 3:21, 22.

5. Naalaffimmi nunarsuarmiittumi pilliivik sumut assersuutaava?

⁵ Jesusip timiminik pilliutissatut sassaassineranik Guutip iluarinninnera isumaqarpoq anersaakkut ittumik pilliiveqalersoq Jerusalemimi naalaffimmiittumit pingaarnerusumik. Pilliivik uumasunik pilliiviusartoq anersaakkut pilliivimmut tamatumunnga siumut assersuutaavoq, anersaakkullu pilliivik tamanna Guutip ’peqqusaatut’, piumasaatut, imaluunniit aaqqissuussaatut,  Jesusip inuttut inuunera pilliutitut ilassisinnaajumallugu pilersissimasaatut, nassuiarneqarsinnaavoq. (Eprîarit 10:10) Tamanna pissutaavoq apustilip Paulusip kristumioqatiminut ima allassinnaasimaneranut: ’Tunisivik [pilliivik] tupermi [imaluunniit naalaffimmi] kiffartortut neriffigisinnaanngisaat pigaarput.’ (Eprîarit 13:10) Allatut oqaatigalugu kristumiut ilumoortut pilliut ajortaaruteqqussut pitsaanerujussuaq, pilliut juutit palasiisa amerlanersaasa ajattugaat, iluaqutigaat.

6. (a) Jesus kuisimmat suna sunniuteqalerpa? (b) Taaguut Messias imaluunniit Kristus qanoq isumaqarpa?

⁶ Jesusip anersaamik illernartumik taninneqarnera isumaqarpoq Guutip anersaakkut naalaffimmik aaqqissuussani tamaat, Jesusip palasiunertut kiffartorfigisassaa, pilersissimagaa. (apustilit suliait 10:38; Eprîarit 5:5) Ajoqersukkap Lukasip isumassarsisitaalluni erseqqissarsimavaa pisoq pingaartoq tamanna ’Tiberiusip naalagaassusiata ukiuisa aqqaneq-tallimaanni’ pisimasoq. (Lúkarse 3:1-3) Tamanna tassaavoq ukioq 29 u.n.k., kunngip Artaxerxesip Jerusalemip qarmarsuisa sanaqqinneqarnissaanik peqqussutiginninneranit sapaatit-akunneri ukiunngortitat 69-it imaluunniit ukiut 483-it qaangiuttut. (Nehemja 2:1, 5-8) Siulittuut naapertussagaanni ’tanitaq naalagaatitaasoq’ ukiumi tamatumani saqqummertussaavoq. (Daniel 9:25) Tamanna juutit ilarpassuisa nalunngilluinnarsimagunarpaat. Tassami Lukas allassimavoq Messiasip, imaluunniit Kristusip (hebriiarisut griikerisullu isumaqartut „tanitaq“) qaqugu saqqummernissaa ’inuit ilimasuutigigaat’. — Lúkarse 3:15.

7. (a) Guutip Illernarnerpaaq qanga tanippaa, tamannalu qanoq isumaqarpa? (b) Jesus kuisikkami aamma sua?

⁷ Jesusip kuisinnerani Guutip qilammi inaa naalaffimmik aaqqissuussami pingaarnermi, anersaakkut ittumi, „Illernarnerpaatut“ taninneqarpoq imaluunniit immikkoortinneqarpoq. (Daniel 9:24) ’Illernartuut tuperlu [imaluunniit naalaffik] piviusoq inuup pinnagu Jehovap nappartitaa’ maanna sunniuteqalerpoq. (Eprîarit 8:2) Imermi anersaamillu illernartumik kuisinnermigut inuk Jesus Kristus Guutip anersaakkut erneratut ernioqqippoq. (Naleqqiuguk Juánase 3:3.) Tamanna isumaqarpoq Guutip ernini qilammi inuulerseqqikkumaaraa, tassani Ataatami talerpiata tungaani kunngitut ’Melkizedekillu ileqquatut’ palasitut kiffartorsinnaaqqullugu. — Eprîarit 6:20; Tussiaat 110:1, 4.

Illernarnerpaaq qilammiittoq

8. Suut nutaat maanna Guutip qilammi issiavissaarsuanut atassuteqalerpat?

⁸ Ullormi Jesusip kuisiffiani Guutip qilammi issiavissaarsua nutaanik immikkoortoqalerpoq. Inummik naammalluinnartumik silamiut ajortaannik saammaassissutaasinnaasumik Guutip toqqagaqarneratigut Guutip illernassusia inuit ajortiliussusiannut naleqqiullugu erseqqissarneqarpoq. Aamma Guutip naakkinnissusia erseqqissarneqarpoq, ersersippaami saammaassinissaminut, imaluunniit saammartinneqarnissaminut, piumassuseqarluni. Taamaattumik Guutip qilammi issiavissaarsua naalaffimmi initut ilorlerpaatut, palasiunerup assersuutikkut ajortit saammaanneqarsinnaaqqullugit uumasup aavanik nassarluni ukiumut ataasiarluni iserfigisartagaatut, ilivoq.

9. (a) Illernartup Illernarnerpaallu akornanni saagorsuaq sumut assersuutaava? (b) Jesus qanoq ililluni Guutip anersaakkut naalaffiani saagorsuakkut iserpa?

⁹ ’Umissuaq’, imaluunniit saagorsuaq, Illernartup Illernarnerpaallu avissaarutigisaat Jesusip inuttut timaanut assersuutaavoq. (Eprîarit 10:19, 20) Tamannaavoq Jesusip nunarsuarmi inuttut inuugallarami Ataatami eqqaanut pinissaminut akornutigisaa. (1 Korintumiut 15:50) Jesus toqummat ’naalaffiup umissua marlunngorluni siissimavoq quliminit atiminut’. (Matîuse 27:51) Tamanna Jesusip qilammut isernissaanut akornutaasup peerneqarneranut uppernarsaataavoq uissuumminartoq. Ullut pingasut qaangiummata Jehova Guuti angeqisumik tupinnartuliorpoq. Jesus toqusunit makitippaa, inuttut uinilittut toqujasutut pinnagu, pinngortitatulli anersaatut naalannassusilittut ’naassaanngitsumik atasussatut’. (Eprîarit 7:24) Ullut 40-t qaangiummata Jesus  qilaliarpoq „Illernarnerpaamullu“ piviusumut iserluni, ’Guutip kiinaata saanut, pilluta sassartarumalluni’. — Eprîarit 9:24.

10. (a) Jesus pilliutimi nalinganik Ataataminut qilammiusumut sassaassereermat qanoq pisoqarpa? (b) Jesusip ajoqersugaasa anersaamik illernartumik taninneqarnerat taakkununnga qanoq isumaqarpa?

¹⁰ Jesusip aavata kuisimasup nalingata silamiut ajortaannut saammaassissutissatut ilassinissaanut Guuti piumassuseqarpa? Ilaanarujussuaq. Tamanna uppernarsarpaa Piinsip ulluani, Jesusip makinneranit ullut 50-erluinnaat qaangiunneranni, taassuma ajoqersugai 120-nit amerlanerusut Jerusalemimi katersuussimasut anersaamik illernartumik kuigamigit. (apustilit suliait 2:1, 4, 33) Taamaalillutik palasiunertik, Jesus Kristus, assigalugu taninneqarput Guutip anersaakkut naalaffissuarmik aaqqissuussaata ataani ’palaseqatigiittut iluartutut, pilliutinik anersaap piinik aatsisartussatut’ kiffartussallutik. (1 Pîtruse 2:5) Tanitat taakkua tassaapputtaaq inuiaat nutaat, ’inuiaat iluartut’ Guutip pii, anersaakkut israelikkut. Ajunngitsorpassuit Israelip misigisassai pillugit siulittuutit, ilaatigut ’angerfigeqatiginninnermik nutaamik’ neriorsuutip Jeremia 31:31-mi eqqaaneqartup piviusunngornissaa, maanna ilagiinnut kristumiunut tanitanut, ’Israelimut Guutip pigisaanut’ piviusumut, atuuttussanngorput. — 1 Pîtruse 2:9; Galâsiamiut 6:16.

Guutip anersaakkut naalaffiata pisatai allat

11, 12. (a) Palasinut silarliliaq Jesusimut atatillugu sumut assersuutaava, ajoqersugaanullu tanitanut atatillugu sumut assersuutaava? (b) Puugutaasarsuaq imermik imalik sumut assersuutaava, sumullu atorneqartarpa?

¹¹ Illernarnerpaaq assersuutaavoq ’qilammut’, Guutip issiavissaarsuaqarfigisaanut, Guutilli anersaakkut naalaffiata pisatai allat nunarsuarmi maani pissutsinut attuumassuteqarput. (Eprîarit 9:24) Naalaffimmi Jerusalemimiittumi silarliliaqarpoq ilorlermik, palasinut silarliliamik, tassaniippullu ikikkagassanik pilliivik asaffillu palasit illernartumik kiffartuuteqalinnginnerminni minguiarfigisartagaat. Silarliliaq tamanna Guutip anersaakkut naalaffimmik aaqqissuussaani sumut assersuutaava?

¹² Jesus Kristus eqqarsaatigalugu, palasinut silarliliaq ilorleq Guutip erneratut naammalluinnartutut nunarsuarmiittutut ajorteqanngissusianut assersuutaavoq. Kristusip ajoqersugai tanitat Jesusip pilliutaanut uppernermikkut naapertuilluartutut isigineqalerput. Tamatumuuna Guutip eqqortumik iliorluni ajorteqanngitsutut isigisinnaavai. (Rûmamiut 5:1; 8:1, 33) Taamaattumik aamma silarliliaq tamanna assersuutaavoq palaseqatigiinnut illernartunut ilaasut nunarsuarmiittut Guutimut attaveqarnerminni naapertuilluartumik inissisimaffiannut. Taamaakkaluartorli kristumiut tanitat suli naammalluinnanngitsuupput ajortillu ataaniillutik. Puugutaasarsuaq imermik imalik silarliliamiittoq assersuutaavoq Guutip oqaasianut, palasiunerup palaseqatigiinnik illernartunik minguerukkiartuaartitsissutissaanut. Taamatut minguiartinnermikkut qinngaqqunnanngitsumik pissuseqalersimapput Guutimut ataqqinaataasumik allallu Guutip pallorfiginninnermik minguitsumik aaqqissuussaanut kajungernissaannut killiisumik. — Evfisumiut 5:25, 26; naleqqiuguk Malakia 3:1-3.

Illernartoq

13, 14. (a) Jesusimut ajoqersugaanullu tanitanut atatillugu naalaffimmi Illernartoq sumut assersuutaava? (b) Qullilerfik guultiusoq sumut assersuutaava?

¹³ Naalaffimmi ini siulleq silarliliakkut assersuutigineqartumit pitsaanerusumut assersuutaavoq. Inuk naammalluinnartoq Jesus Kristus eqqarsaatigalugu, Illernartoq taassuma Guutip anersaakkut erneratut qilammi inuunermut utertussanngortitaasimasutut ernioqqinneranut assersuutaavoq. Jesusip aavanut kuisimasumut uppernertik tunngavigalugu naapertuilluartutut nalunaarutigineqareeramik ajoqersugaasa tanitaasut Guutip anersaavata sunniutaa immikkut ittoq aamma taamatut misigaat. (Rûmamiut 8:14-17) ’Imeq [tassa kuissutertik] anersaarlu’ aqqutigalugit Guutip anersaakkut ernerisut ’ernioqqipput’. Toqu tikillugu aalajaattuaannarunik Guutip anersaakkut ernerisut qilammi inuunermut makititaanissaminnik  neriugisaqarput. — Juánase 3:5, 7; sarĸúmersitat 2:10.

¹⁴ Palasit Illernartumi nunarsuarmi naalaffimmiittumi kiffartortut pallarfiginnittunit silataaniittunit takuneqarsinnaasarsimanngillat. Taamatuttaaq Guutimik pallorfiginnittut amerlanersaasa, nunarsuarmi paratiisiusumi naassaanngitsumik inuunissamik neriugisaqartut, tamakkiisumik paasisinnaanngisaannik kristumiut tanitat anersaakkut atugaqarput. Tupiusaliap qullilerfii guultiusut kristumiut tanitat qaammarsagaanerannut assersuutaapput. Uuliatut qullerniittutut Guutip anersaava Biibilimik qaammarsaasarpoq. Tassuunakkut paasisatik kristumiut nipangiusimaannarneq ajorpaat, Jesusilli oqaasii uku naalallugit iliuuseqartarlutik: ’Silarsuup qaamasoraasi. . . . Qaamasorsi qaamali inunnut, ajunngitsuliasi taakkununnga takoqqullugit Ataatarsilu qilammiusoq unnersiutigeqqullugu.’ — Matîuse 5:14, 16.

15. Nerrivimmi isigiinnagassianik iffiartalimmi iffiat sumut assersuutaappat?

¹⁵ Taamatut qaammarsagaanertik attatiinnassagunikku kristumiut tanitat nerrivikkut isigiinnagassianik iffiartalikkut assersuutigisaasumit aalajangersimasumik nerisaqartariaqarput. Pingaarnerpaamik Guutip oqaasiani, ullut tamaasa atuarniartakkaminni eqqarsaatigeqqissaarniartakkaminnilu, anersaakkut inuussutissanik pissarsisarput. Aamma Jesusip neriorsorsimavai „inussiaq aalajallunilu silatooq“ aqqutigalugu ’piffissaq eqqorlugu nerisassanik’ tunisassallugit. (Matîuse 24:45, NV) „Inussiaq“ taanna tassa kristumiut tanitat piffissami aalajangersimasumi nunarsuarmiittut tamarmik ataatsimut. Tanitat taakku Kristusip atorsimavai Biibilimi siulittuutit eqquunneri pillugit paasissutissanik naqiterinermut, nalitsinnilu qanoq ililluni Biibilimi najoqqutassiat ulluinnarni atorneqarsinnaannerat pillugu piffissaq eqqorlugu unnersuussisarnermut. Anersaakkut aaqqissuussat tamakku tamaasa kristumiut tanitat pingaartillugillu atorluartarpaat. Anersaakkulli uumajuaannassagunik isumartik uummatertillu Guuti pillugu ilisimasassanik immiinnarnagu aamma Jesusitut iliortariaqarput, taanna ima oqarsimagami: ’Neqissara tassa aallartitsisima [piumasaa] malillugu suliareqqusaalu naammassillugu.’ (Juánase 4:34) Aammattaaq kristumiut tanitat ullut tamaasa Guutip piumasaanik saqqummersinneqarsimasumik  eqiasuillutik naammassinnittarnermikkut nalerisimaarneq misigisarpaat.

16. Tipigissaatilliivimmi kiffartorneq sumut assersuutaava?

¹⁶ Ullaakkut unnukkullu palasi tipigissaatilliivimmi Illernartumiittumi Guutimut tipigissaatilliisarpoq. Tamanna ilutigalugu pallorfiginnittut palasiunngitsut naalaffiup silarliliartaani silarlerniittut Guutimut qinusarput. (Lúkarse 1:8-10) Biibilimi nassuiarneqarpoq pujoortillugit ’tipigissaatit tassaasut iluartut qinnutaat’. (sarĸúmersitat 5:8) „Qinnutiga ilinnut anngulli pilliutip [tipigissaatilliissutip] pujuatut,“ tussiaasiortoq David taama qinusimavoq. (Tussiaat 141:2; aamma takuuk nutsigaq pisoqaq.) Aamma Jesus Kristus aqqutigalugu qinunikkut Jehovamut palligussinnaanertik immikkut pisinnaatitaaffiusoq kristumiut tanitat pingaartippaat. Ilungersorluni qinnutit uummammit pisut tipigissaatitut pujoortittakkatut tipigeqisutut ipput. Kristumiut tanitat allatiguttaaq Guuti unnersiutigisarpaat, tassa qarlutik allanik ilinniartitsinermut atorlugit. Annikilliornerminni nikallujuissusiat misilinneqarnerminnilu assuarnaassusiat Guutimut immikkut ittumik nuannaarutaasarpoq. — 1 Pîtruse 2:20, 21.

17. Palasiunerup ullormi saammaannartitsivimmi Illernarnerpaamut isernera siulleq sumut assersuutaavoq?

¹⁷ Ullormi saammaannartitsivimmi Israelimi palasiuneq Illernarnerpaamut isertarpoq tipigissaasivimmilu guultiusumi aamarsuarnik aamaartunik imalimmi tipissaatilliisarluni. Taamaaliortarpoq pilliutit ajortaaruteqqussutit aavat nassarlugu taqqamunnannginnermini. Assersuutip siulittuutaasup tamatuma eqquunneratut inuup Jesusip Jehova Guutimut assuarnaassutsi attattuaannarsimavaa, ajortillu pillugit naassaanngitsumik atortussatut inuunermi pilliutigineratigut nunarsuarmiinnini naggasersimallugu. Taamaalilluni takutippaa inuk naammalluinnartoq Satanimit qanorluunniit tatineqaraluarluni Guutimut attaveqarnermini assuarnaassutsiminik attassiinnarsinnaasoq. (Ussatit 27:11) Jesus misilinneqarami ’nillingaarluni qullilillunilu qinnutinik kutsiuutinillu aatsisimavoq’ Guutimillu mianerinninnini pillugu tusarneqarluni. (Eprîarit 5:7) Taamaalilluni Jehova kisimi oqartussaasuittut naapertuilluartutut naalannarsisippaa. Guutip Jesus akissarsisippaa toqusunit makitinneratigut qilammilu inuunermik toqujuitsumik tunineratigut. Taamatut qutsissisitamik inissisimalluni Jesusip ajortuliortut peqqissimisut Guutimut saammaanneqartittarpai, tamannalu nunarsuarmut pineranut pissutaasut ilagaat. — Eprîarit 4:14-16.

Guutip anersaakkut naalaffiata naalannassusia anneq

18. Jehovap anersaakkut naalaffini qanoq ililluni annertuumik naalannassuseqalersissimavaa?

¹⁸ „Naalaffik manna naalaffitoqqamit suli alutornanerulissaaq [naalannassuseqarnerulissaaq],“ Jehova siulittuisimavoq. (Haggaj 2:9) Jehovap Jesusimik makititsinermigut taassuminngalu kunnginngortitsinermigut palasinngortitsinermigullu toqujuitsoq, anersaakkut naalaffini annertuumik naalannassuseqalersippaa. Jesus maanna ’naalatsiminut tamanut naassaanngitsumik annaassisinnaalerfigisaminik’ atorfeqalerpoq. (Eprîarit 5:9) Naalannermik taama ittumik ersersitsisut siulliit tassaapput ajoqersukat 120-t ukiumi 33-mi piinsip ulluani anersaamik illernartumik pisut. sarĸúmersitat-ni siulittuutigineqarpoq Israelip anersaakkut erneri taakkua naggataatigut 144.000-inngorumaartut. (sarĸúmersitat 7:4) Taakkua ilarpassui toqunerminni inuiaat ataatsimut iliveqarfianniissimapput  ilisimanatik, Jesusip kunngitut pissaaneqarluni najuinissaata tungaanut utaqqillutik. Ukiunik naatsorsueriaaseq siulittuutaasoq Daniel 4:10-17, 20-27-miittoq tikkuussivoq Jesus akeqqami akornanni naalakkersuilersimasoq 1914-imi. (Tussiaat 110:2) Ukioq tamanna ukiorpassuarnik sioqqullugu kristumiut tanitaasut assut qilanaarisimavaat. Sorsunnersuaq siulleq taamanimiillu inuit annikilliuutigisaat takutitseqataapput ilumut 1914-imi Jesus kunngortinneqarsimasoq. (Matîuse 24:3, 7, 8) 1914-ip kinguninngua ’eqqartuussinissap Guutip inoqutaanit aallartinnissaanut’ piffissanngorpoq, Jesusillu ajoqersukkaminut toqusimasunut neriorsuunni manna eqquutitippaa: ’Kingumut tikiukkumaarpunga, uannullu pisikkumaarpassi.’ — 1 Pîtruse 4:17; Juánase 14:3.

19. 144.000-it sinneri qanoq ilillutik Illernarnerpaamut isersinnaalissappat?

¹⁹ Palaseqatigiit illernartut 144.000-iusut ilaat suli inaarutaasumik naqissuserneqanngillat sulilu qilammi angerlarsimaffissaminnut pinatik. Suli nunarsuarmiittoqarpoq sinneruttunik pissutsinik anersaakkut ittunik Illernartukkut assersuutigineqartunik atugaqartunik, uinikkullu timaat ’saagorsuartut’ Guutip qanissusianit illernartumit assiaquttatut ippoq. Taakkua aalajaallutik toqugunik ingerlaannaq inuunermut toqujuitsumut anersaatut makititaassapput 144.000-it ilaat qilammeereersut peqatigilerlugit. — 1 Korintumiut 15:51-53.

20. Palaseqatigiit illernartut sinneri ullumikkut sumik pingaartumik suliaqarpat, qanorlu kingunilimmik?

²⁰ Qilammi palasiunersuarmik kiffartoqateqartunik taama amerlatigisunik palaseqarluni Guutip anersaakkut naalaffia naalannassuseqarnerulersimavoq. Ullumikkut palaseqatigiit illernartut ilaat nunarsuarmi naleqaqisumik suliaqarallarput. Taakkua oqaluussinerata kingunerisaanik Guutip tusarliussaminik eqqartuussutaasunik ’inuiaat aalaterpai’, soorlu Haggaj 2:7-imi siulittuutigineqarsimasoq. Tamanna ilutigalugu pallorfiginnittut millionilikkuutaat, ’inuiaat erlinnartuutaannik tamanik’ taaneqartut, Jehovap naalaffiata nunarsuarmi silarliliaanut ussagarput. Taakkua Guutip pallorfiginninnermik aaqqissuussaani sumi inissisimaffeqarpat, anersaakkullu naalaffissuanut atatillugu siunissami naalannassuseq suna ilimagisinnaavarput? Apeqqutit tamakku ilanngutassiami tulliuttumi akineqassapput.

Apeqqutit uteqqiissutissat

□ Jesus ukiumi 29-mi qanoq maligassiuilluarpa?

□ Aaqqissuussaq suna ukiumi 29-mi atuutilerpa?

□ Illernartoq aamma Illernarnerpaaq sumut assersuutaappat?

□ Anersaakkut naalaffik qanoq ililluni naalannassuseqarnerulersimava?

[Atuaqqissaarnermi apeqqutit]

[Qupp. 17-imi assiliartaq]

Guutip anersaakkut naalaffia ukiumi 29-mi, Jesus anersaamik illernartumik taninneqarmat, atuutilerpoq