Jehovap piumasaatut iliorput

Filipip Etiopiamiu naalagaaffimmi atorfilik kuigaa

ETIOPIAMIU ingerlatilluni piffissamik atorluaavoq. Nipituumik atuarpoq, ukiuni hundredelinni siullerni inuit angalatillutik pisarnerattut. Biibilimi allassimavoq taanna ’Etiopiap kunngiata arnap Kandakep pissaaneqartitarigaa’. * ’Aningaasaataanik tamanik paarsisuugami’, aningaasaqarnermut naalakkersuisuusimassaaq. Naalagaaffimmi atorfilik taanna ilisimasaqalerusukkami Guutip oqaasiani atuarpoq. — apustilit suliait 8:27, 28.

Livangkiiliumik oqaluussisartoq Filip inngilimit siulersorneqarluni Etiopiamiup eqqaanukartinneqarpoq. Inngilip oqarfigaa: ’Ingerlagit qamutit uku najorniarlugit.’ (apustilit suliait 8:26, 29) Takorloorneqarsinnaavoq Filip ima eqqarsartoq: ’Angut taanna kinaana? Sunaana atuaraa? Sooruna tassunnartinneqartunga?’

Filip arpalluni qamutit saniannukarpoq Etiopiamiullu oqaatsit uku atuarai tusaallugit: ’Savatut toqutsivimmut pisitaavoq, soorlulu savaaraq kissaasiminut nillinngitsoq, taamaalluni qarni ammanngilaa. Nikanarnerani eqqartuunneqarnera peersitaavoq kialu kinguleriissui oqaluttuarisinnaavai? Inuunera nunamit peersitaammat.’ — apustilit suliait 8:32, 33.

Atuagaa Esajasip Allagai-neersoq Filipip ingerlaannaq ilisaraa. (Jesaja 53:7, 8) Etiopiamiup atuakkani assut eqqarsaatigai, Filipillu oqaloqatigiinneq aallartippaa ima aperaluni: ’Atuakkatit paasivigit?’ Etiopiamiup akivaa: ’Ajoqersorneqanngikkuma qanoq ilillunga paasissavakka?’ Taava ilungersorluni Filip qinnuigaa qamutiminut qaqeqqullugu. — apustilit suliait 8:30, 31.

’Kuisissallunga sumik akornuteqarnerpunga?’

’Nalunaarfiginnga-aat,’ Etiopiamiu Filipimut oqarpoq, ’kina pillugu pruffiiti taama oqarpa, imminilluunniit pilluni allaluunniit pillugu?’ (apustilit suliait 8:34) Etiopiamiup paatsuunganera paasinarpoq, Esajasimmi siulittuutaani ’sava’ aamma ’kiffaq’ kikkuunersut sivisuumik isertugaasimapput. (Jesaja 53:11) Filipip ’Jesusimik iivangkiiliup’ oqaluutigineratigut apeqqut akivaa. Sivitsulaartoq Etiopiamiu oqarpoq: ’Takuat aana imeq; kuisissallunga sumik akornuteqarnerpunga?’ Ingerlaannaq Filipip kuivaa. — apustilit suliait 8:35-38.

Tamanna piaarpallaarpa? Naamerluinnaq. Etiopiamiu juutinut ilasiaavoq. * Jehova pallorfigaa Allakkallu ilisimallugit, ilaatigut Messias  pillugu siulittuutit. Ilisimasaali amigarput. Maanna Etiopiamiup Jesus Kristusip inissisimaneranik paasissutissat pingaartut paasigamigit, paasivaa Guutip sumik piumaffigigaani, tamatumalu eqqortinnissaanut piareersimalluni. Taamaattumik kuisinnera pissusissamisoorluinnarpoq. — Matîuse 28:18-20; 1 Pîtruse 3:21.

Taava ’[Jehovap] anersaavata Filip aallaruppaa’. Suliassamullu allamut saappoq, Etiopiamiullu ’ingerlavini tipaatsulluni ingerlavigaa’. — apustilit suliait 8:39, 40.

Oqaluttuaq sumik ilinniarfigisinnaagipput

Ullumikkut Jehovap kiffaasut inuit peqqusersuitsut sallusuissummik Guutip oqaasianeersumik ilinniartinnissaannik pisussaaffeqarpugut. Amerlasuut angalatillutik periarfissaniluunniit allani nutaarsiassamik nuannersumik oqaluussinerminni angusaqarluarsimapput. Guutip naalagaaffianik oqaluussissutiginninneq ukiut tamaasa hundredtusindillit tunniulluinnarnerminnut assersuutaasumik kuisinnerannik kinguneqartarpoq.

Soorunami nutaat kuisinnissartik tuaviupiluutigisariaqanngilaat. Jehova Guuti erneralu, Jesus Kristus, pillugit eqqorluartumik ilisarseqqaartariaqarput. (Juánase 17:3) Guutip maleruaqqusai maleruarsinnaajumallugit allamik isumataartariaqarput, kukkusumik iliuuseqarunnaartariaqarlutik allamullu saallutik. (apustilit suliait 3:19) Piffissaq sivisungaatsiartoq atortariaqarpoq, ingammik kukkusumik eqqarsartarneq ileqqoqarnerlu inuttut pissutsinut ilanngutivissimappata. Nutaat Kristusimut ajoqersuganngornermut tunngatillugu pilliutigisariaqakkatik naatsorsortariaqarpaat, aammattaarli Jehova Guutimut tunniulluinnarsimanikkut pilluaqqussutinik angisuunik pinissartik ilimagisinnaavaat. (Naleqqiuguk Lúkarse 9:23; 14:25-33.) Jehovamut nalunaajaasooreersut nuannaarlutik nutaat peqatigiiffimmut, Guutip siunertaminik piviusunngortitsiniarnermini atugaanut, siulersorpaat. (Matîuse 24:45-47) Etiopiamiutut nutaat taakkua qanoq ilillutik inuunerminnik Guutip piumasaanut naapertuuttunngorsaanissaminnik ilinniartinneqarnertik nuannaarutigisinaavaat. (wE 15/7 96)

[Quppernerup ataani ilanngussat]

[Qupp. 30-mi ungalusaq]

Sooq angutaassutaajagaasutut taaneqarpa?

Oqaluttuami apustilit suliáinik agdlagkat, kapitali 8-miittumi, Biibilimik nutsikkani allani Etiopiamiu ’angutaassutaajagaq’-mik taaneqarpoq. Angutaassutaajagaasulli Mosesip inatsisai naapertorlugit Israelikkut ilagiissaannut ilaasortanngorsinnaanngimmata, angut taanna timikkut angutaassutaajagaasimagunanngilaq. (5 Moses 23:1) Griikerit oqaasiat ’angutaassutaajagaasoq’-mik nutserneqartoq aamma inummut atorfikkaamut atorneqartarpoq. Tassa Etiopiamiu Etiopiamiut dronningianni naalagaaffimmi atorfiliuvoq.