’Illernartuussaasi uanga illernartuugama’

„Illernartuussaasi uanga [Jehova] Guutersi illernartuugama.“ — 3 MOSES 19:2.

1. Silarsuarmi kikkut illernartutut isigineqarpat?

SILARSUARMI upperisarsiornerit annerit amerlanersaat inummik illernartitaqarput. Mother Teresa Indiamiu piitsunik ikiuiniartuarnini pissutigalugu illernartutut isiginiarneqartarpoq. Paavi „Ataataq Illernartoq“-mik taaneqartarpoq. Katuullit peqatigiiffiata Opus Dei-p aallarniisua, José María Escrivá, katuullit ilaannit „illernassutsikkut maligassaq“-tut isigineqarpoq. Hindusiortut swamertaqarput, imaluunniit angutinik illernartitaqarput. Gandhi inuttut illernartutut ataqqiniarneqartarsimavoq. Buddhasiortut angutinik mattuttunik illernartitaqarput, islamillu pruffiitinik illernartitaqarput. Illernartuunerli qanorpiaq paasisariaqarpa?

2, 3. (a) Oqaatsit „illernarpoq“ aamma „illernassuseq“ qanoq isumaqarpat? (b) Apeqqutit suut akineqartariaqarpat?

² Oqaaserooq „illernartoq“ tassaavoq: „1 . . . pissaanermut Guutimeersumut atasoq; 2. Pallorfigineqartussatut ataqqinartitaasussatullu isigineqartoq imaluunniit pallorfigineqarnissamut ataqqinartinneqarnissamulluunniit qinngaqqunnanngitsoq . . .  3. Upperisarsiornikkut anersaakkulluunniit ileqqussatigut aaqqissuussaq sukannersoq qutsissorlu malillugu inuusoq . . . 4. Upperisarsiornikkut siunertamut immikkoortitaq.“ Biibilimut atatillugu illernartoq isumaqarpoq „upperisarsiornikkut minguissuseq“. Ujarlerfissiaq Biibilimut tunngasoq, Insight on the Scriptures, naapertussagaanni „[oqaaseq] hebriiarisooq qoʹdhesh isumaqarsinnaavoq . . . immikkoorneq Guutimullu tunniulluinnarsimaneq, . . . Guutimut kiffartortussatut immikkoortitaaneq.“ *

³ Inuiaat Israelikkut illernartuunissaminnik peqquneqarsimapput. Guutimit ima inanneqarsimapput: „Uangami tassaavunga [Jehova] Guutersi. Illernarsassaasi illernartuullusilu uanga illernartuugama.“ Kina illernassutsip Pilerfigaa? Israelikkut naammalluinnanngitsut qanoq ilillutik illernartunngorsinnaasimappat? Uagullu ullumikkut inuusugut Jehovap illernartuunissamik kajumissaarutaa sumik ilinniarfigisinnaavarput? — 3 Moses 11:44.

Illernassutsip Pilerfianut Israelip attaveqarnera

4. Jehovap illernassusia Israelimi qanoq ililluni erseqqissarneqarsimava?

⁴ Israelikkut Jehova Guutimik pallorfiginninnerannut attuumassuteqartut tamarmik illernartutut isigineqartussaasimapput taamatullu pineqartussaallutik. Sooq? Jehova nammineq illernassutsimut Nagguiullunilu Pilerfiummat. Tupiusaliamik illernartumik atisanillu kusassaatissanillu tassani atugassanik piareersaaneq Mosesip oqaluttuarigamiuk oqaatsini ima naggaserpai: „Aammattaaq kuultimit akuitsumit sanavaat qaarmiussaq, niaqorut ataqqinaat illernartoq, naqitsisip kigartugaasarnera assilillugu kigartugaq ima allannilik: ’Illernartitaq [Jehovamut] pigititaq.’“ Qaarmioq guultimit akuitsumit sanaaq tamanna palasiunerup nasartaataasaanut aalajangerneqartoq takutitsivoq palasiuneq immikkut illernassusilimmik kiffartornermut immikkoortitaasimasoq. Qaarmioq qillertoq qillaallatsinneqartoq takugaangamikku Israelikkut Jehovap illernassusianik eqqaasinneqartarput. — 2 Moses 28:36; 29:6; 39:30.

5. Israelikkut naammalluinnanngitsut qanoq ilillutik illernartutut isigineqarsinnaasimappat?

⁵ Qanorli ilillutik Israelikkut illernartunngorsinnaasimappat? Aatsaat Jehovamut qanimut attaveqarnermikkut taassuminngalu pallorfiginninnermikkut minguitsukkut illernartuusinnaapput. „Illernarnerpaaq“ pillugu eqqorluartumik ilisimasaqarnissartik pisariaqartippaat timikkut anersaakkullu minguillutik pallorfigisinnaajumallugu. (Ussatit 2:1-6; 9:10) Taamaattumik Israelikkut minguitsumik pissuteqarlutik minguitsumillu uummateqarlutik Guuti pallorfigisariaqarpaat. Ilumoortuusaarluni pallorfiginninneq sunaluunniit Jehovamut maajunnarpoq. — Ussatit 21:27.

Sooq Jehovap Israel assuarigaa

6. Malakiasip nalaani juutit Jehovap nerrivia qanoq pisarsimavaat?

⁶ Tamanna ersarilluarpoq Israelikkut pilliutissaminnik pitsaanerpaajunngitsunik, innarluutilinnik naalaffimmut aatsisalermata. Pilliutaat pitsaanngitsut pruffiitini Malakias aqqutigalugu Jehovap assuarai oqarluni: „Nuannarisarinngilassi, pilliutisilu piumanngilakka. . . . Atera nalinginnaatittarparsi pilliiviutiga mingussimasutut isigigassiuk, tassanilu nerisassat suusupagisasi pilliutigisarassigit. Aamma ima oqartarpusi: ’Ila pisariussusia!’ Pilliutillu suusupagaasi, oqarpoq katersaarsuit [Jehovaat]. Nersutaatit tillitat tusiattullu nappaateqartullu pilliutigisassatut sassaattarpasi. Isumaqarpisi taamaattut sassaakkussigit iluaralugit assassinnit tigussagikka, oqarpoq [Jehova].“ — Malaki 1:10, 12, 13.

7. Ukiunik naatsorsuisalerfitta siorna ukiut hundredellit tallimassaanni juutit illernanngitsumik qanoq iliortarsimappat?

 ⁷ Malakias aqqutigalugu Guutip juutit iliuusii peqquserluttut assuarai, qularnanngitsumik ukiunik naatsorsuisalerfitta siorna ukiut hundredellit tallimassaanni. Taamani palasit ajortumik maligassiuipput, inooriaasiallu illernanngilluinnarluni. Tamatuma kingunerisaanik inuit ileqqussatigut najoqqutassatik qasukkartiterpaat, allaat nuliatik avittarlugit, qularnanngitsumik inuusunnerusunik juutiunngitsunik nuliarniarlutik. Malakias ima allassimavoq: „Tassa [Jehova] ilisimannittuu[voq] illit inuusuttuuninnillu nuliarisavit angerfigeqatigiinnissinnik. . . . Mianersussaasili inuutillusi, inuusuttuunerminillu nuliarisaminut ilumuunngitsuliortoqassanngilaq. * [’Avinneq uumigimmagu,’ Jehova Israelikkut Guutiat oqarpoq. NV]“ — Malaki 2:14-16.

8. Ilagiinni kristumiuniittut ilaat qanoq ilillutik ullumikkut avinnermut isumaasumit sunnerneqarsimappat?

⁸ Nunani ajornanngitsumik avissinnaatitaaffiusuni avittut ukiuni kingulliunerusuni amerleriapiloorsimapput. Allaat ilagiit kristumiut tamatumannga attorneqarsimapput. Ajornartorsiutit anigorniarlugit utoqqaanertanut ikiortissarsiornissamut aappariinnerullu iluarsisinniarnissaanut taarsiullugu ilaat avinniapallaannartarsimapput. Amerlasuutigut meeqqat misigissutsikkut atugarliortariaqartarput. — Matîuse 19:8, 9.

9, 10. Jehovamik pallorfiginninnitsinnut atatillugu suut isumaliutigisinnaavavut?

⁹ Soorlu qulaani eqqartorneqareersutigut ersertoq Malakiasip nalaani anersaakkut ajortunngorsimaneq pissutigalugu Jehovap Judap qaaginnarsiortumik pallorfiginninnera paatsooruminaatsunik oqaaseqarluni avoqqaarisimavaa takutillugulu pallorfiginninneq minguitsoq kisiat akuerigini. Tamatumannga killinneqarluta Jehova Guutimik, qilammi nunamilu kisimi Naalagaasumik, illernassutsip ilumoortup Pilerfianik, pallorfiginninnitta pitsaassusia eqqarsaatigiumassannginnerparput? Ilumut Guuti illernartumik kiffartuupparput? Immitsinnut anersaakkut minguitsuutippugut?

¹⁰ Tamanna isumaqanngilaq naammalluinnartuussasugut, tamannami ajornaqaaq, imaluunniit imminut allanut naleqqiutissasugut. Isumaqarporli kristumiutut tamatta immikkut Guutimik pallorfiginninnermi sapinngisatsinnik iliuuseqassasugut, periarfissavut naapertorlugit. Tamanna pallorfiginninnitta pitsaassusianut tunngavoq. Illernartumik kiffartorneq isumaqarpoq sapinngisaq naapertorlugu iliuuseqarneq. Tamatuma suut nassatarai? — Lúkarse 16:10; Galâsiamiut 6:3, 4.

Minguitsumik uummateqarneq minguitsumik pallorfiginninnermik kinguneqarpoq

11, 12. Iliuuseq illernanngitsoq sumit pilerfeqarpa?

¹¹ Jesus oqarsimavoq inuup uummammigut pissusia oqaasiisigut iliuusiisigullu ersertartoq. Farisiiarit imminnut iluartuutittut, illernanngilluinnartulli, Jesusip ima oqarfigisimavai: ’Taatuuku pulateriaarsuit piaraat, ajortuugassi qanoq ilillusi ajunngitsumik oqalussavisi? Uummatimmi ulikkaarutaanit qaneq oqaluttaraaq.’ Kingusinnerusukkullu ersersippaa aamma iliuutsit ajortut uummammi eqqarsaatinit, inuup ilorpiaanit, aallaaveqartut. Ima oqarpoq: ’Qanikkulli anisut uummammit pisaraat, tamakkualu inuk mingutsittaraat, uummammit pisarmata isumapiluit, toqutsinerlu arnaaneqarnerlu uersaanerlu tillinnerlu nalunaajaatillu sallusut mitalliinerillu. Tamakkua inuk mingutsittaraat.’ — Matîuse 12:34; 15:18-20.

¹² Tassani eqqaasinneqarpugut iliuutsit illernanngitsut  isumaminnik, imaluunniit isumaliutigineqaqqaaratik, tassanngaannaq pineq ajortut. Eqqarsaatit minguttuut uummatikkut uteqqiaffigineqarsimagaangata, immaqa isertortumik perusussuseqarnikkut imaluunniit isertortumik takorluuerujoortarnikkut, iliuutsit ajortut pisarput. Taamaattuminguna Jesus ima oqarsinnaasimasoq: ’Tusarpusi siulliit ima oqarfigineqarmata: „Arnaaneqassanngilatit.“ Uangali oqarfigaassi: Pileritsaallugu arnamut isigisup uummammigut arnaanerereerpaa.’ Allatut oqaatigalugu, kanngunartuliorneq allasiornerlu iliuuserineqartinnatik uummammi sorlanitsinneqareersimasarput. Taava periarfissaqalerpat eqqarsaatit taamaattut — illernartumut akerliunertik pissutigalugu illernanngitsunik taaneqarsinnaasut — iliuusinngortarput illernanngitsut. Tamatuma kingunerisinnaavai kanngunartuliorneq, allasiorneq, anguteqatinoorneq arnaqatinoornerlu, tillinneq, Guutimik mitaatiginninneq tunussinerlu. — Matîuse 5:27, 28; Galâsiamiut 5:19-21.

13. Eqqarsaatit illernanngitsut iliuutsimik illernanngitsumik kinguneqarsinnaanerannut assersuuteqarit.

¹³ Tamatumunnga assersuutissaqarpoq. Nunat ilaanni aningaasanoortarfiit kasinot amerliartortorujussuupput, inuillu taamaalillutik aningaasanoornissaminnut periarfissaqarnerulerput. Immaqa inuit ilaasa aningaasatigut ajornartorsiornertik qaangerusukkaluarlugu aaqqiissutissatut isikkulik tamanna ornigisarpaat. Tunngavilersuutit napitinnartut qatanngutip Biibilimi najoqqutassianik sumiginnaassutigisoorsinnaavai. * Aamma tiinganeq, tv-kkut, videokkut, qarasaasiakkut atuakkatigulluunniit saqqummiuneqartoq, kristumiup illernanngitsumik iliuuseqassutigisinnaavaa. Anersaakkut sakkutuussutini sumiginnalaaginnarunigit kanngunartuliornermut nakkariaannaavoq. Ajortuliornissalli tungaanut ’sisujartorneq’ tamanna amerlanertigut isumami aallartittarpoq. Jakobip oqaasii uku pissutsini taama ittuni eqquuttarput: ’Kinaluunniilli usserneqararaaq, nammineq piummatsiminit qiisagaangami uerillunilu, taavalu piummasia pilereeraangat ajorti pingoraraaq.’ — Jâko 1:14, 15; Evfisumiut 6:11-18.

14. Ilaat illernanngitsumik iliuuseqareernermik kingorna qanoq ilillutik ajunngitsumik ingerlaleqqissinnaasimappat?

¹⁴ Qujanartumilli kristumiut sanngiilliornerup kingunerisaanik ajortuliortut ilarpassui allamik isumataartarput, utoqqaanertanillu anersaakkut ingerlallualeqqinnissaminnik ikiorneqarsinnaasarlutik. Allaat peqqissiminnginnertik pissutigalugu anisitaasimagaluartut piffissap ingerlanerani ’silattortarput’ ilagiinnullu ilaasortanngorteqqinneqartarlutik. Paasisarpaat eqqarsaatit illernanngitsut uummatiminni sorlaninnissaat akuerigamikku Satanip pisariuminartissimaqigaatik. — Galâsiamiut 6:1; 2 Timûtiuse 2:24-26; 1 Pîtruse 5:8, 9.

Sanngiissutit nassuerutiginissaat — unamminiarnartoq

15. (a) Sooq sanngiissutivut nassuerutigisariaqarpavut? (b) Sanngiissutitta nassuerutiginissaannut suup ikiorsinnaavaatigut?

¹⁵ Uummaterput misissoraangatsigu piviusorsiorniartariaqarpugut. Sanngiissutitta nassuerutiginissaannut ajugaaffiginiarnissaannullu piumassuseqarpugut? Ikinngummik sukkut siuariaateqarsinnaanitsinnik ilumoorluni tikkuussisinnaasumik aperisaqarnissatsinnut piumassuseqarpugut, siunnersuutaanullu tusarnaarluta? Illernartuujuaannarsinnaassagutta naammalluinnanngissutivut sulissutigisariaqarpavut. Sooq? Satanip nalunngimmatigut sanngiissutivullu marserlugit. Peqqusersuumik iliorluni ajortuliortinniarsarissavaatigut illernanngitsumillu iliortinniarsaraluta. Peqqusersiorluni  Guutip asanninneranit avissaartinniarsaraatigut illernarunnaaqqulluta Jehovamullu kiffartornermi atorsinnaajunnaarsinniarluta. — Jeremia 17:9; Evfisumiut 6:11; Jâko 1:19.

16. Paulus qanoq artornartorsiorsimava?

¹⁶ Aamma apustili Paulus misiligarneqartarsimavoq, tamannalu Romamiunut allakkamini ima eqqaavaa: ’Ilugami, tassa uiniga, ajunngitsoqanngitsoq ilisimavara; piumanissaq pigigaluarpara, kisianni ajunngitsoq suliarissallugu sapersarpunga. Piumasarami ajunngitsoq suliarisarinngilara, kisianni piumanngisara ajortoq suliarisarpara. . . . Guutimmi inatsisai inuutsikkut ilorlikkut nuannarigaluarpakka; kisianni inatsisit allat avatinniittut misigisaraakka eqqarsaatima inatsisaanut akerartortuusut, tigusatullu taakkua kiffartortippaannga ajortip inatsisaanut avatinniittunut.’ — Rûmamiut 7:18-23.

17. Paulusip sanngiissutini qanoq isigisimavai?

¹⁷ Malugisassarput tassaavoq Paulusip sanngiissutiminik nassuerutiginninnera. Sanngiissuteqaraluarluni ima oqarsinnaasimavoq: ’Guutimmi inatsisai [anersaakkut] inuutsikkut ilorlikkut nuannarigaluarpakka.’ Paulusip ajunngitsoq nuannaraa ajortorlu uumigalugu. Taamaakkaluartorli akiugassaqarpoq, uaguttaaq akiugassatsinnik, tassa Satanimik, silarsuarmik uinimmillu. Akiuunnitsinni qanoq ililluta ajugaasinnaavugut illernartuaannarluta, silarsuarmit matumannga eqqarsartaasianillu avissaarsimalluta? — 2 Korintumiut 4:4; Evfisumiut 6:12.

Qanoq ililluta illernartuaannarsinnaavugut?

18. Qanoq ililluta illernartuaannarsinnaavugut?

¹⁸ Ajornannginnersiuinnarluni imaluunniit imminut nukatsiinnarluni illernartunngortoqarsinnaanngilaq. Taamaaliortut iliuutsitik patsisissarsiuunniartarpaat allanillu pisuutitsiniaasarlutik. Immaqa iliuutsitsinnut imminut akisussaatittarnissarput ilinniartariaqarparput, ilaqutariittut tunuliaqutaminnik imaluunniit kingornuttakkatigut sananeqaatsiminnik innersuussutiginnillutik inuunerminnik siumut aalajangereerneqarsimaneraasut assiginagit. Aalajangiisuunerpaaq tassaavoq inuit ataasiakkaat uummatimikkut pissusiat. Inuup naapertuilluassuseq nuannaraa? Illernartuunissani Guutimillu pilluaqqusaanissani qamannga kissaatigaa? Illernartuunissamik piumasaqaat tussiaasiortup ima erseqqissarsimavaa: „Ajortoq nigorsimajuk, ajunngitsuliorillu. Eqqissinissaq ujaruk tumaalu atuarlugit!“ Apustililu Paulus ima allassimavoq: ’Asanninneq pisuusaarnerunngikkili. Ajortoq uumigisiuk, ajunngitsoq aalajangerfigisiuk.’ — Tussiaat 34:15; 97:10; Rûmamiut 12:9.

19, 20. (a) Qanoq iliorluta isumatsigut nakussatsissinnaavugut? (b) Nammineq atuaqqissaarneq pitsaasoq sumik ilaqarpa?

¹⁹ ’Ajunngitsoq aalajangerfigisinnaavarput’ pissutsit Jehovap isiginnittaasianit isiginiarsarinerisigut Kristusitullu isumaqarniarsarinitsigut. (1 Korintumiut 2:16) Qanoq iliorluta? Guutip oqaasiani aalajangersimasumik atuaqqissaartarlutalu isumaliutiginneqqissaartarnitsigut. Taamaaliornissatsinnik akuttunngitsumik unnersuunneqartarpugut. Pimoorulluguli maleruartarparput? Assersuutigalugu, ataatsimiigiarnissat sioqqullugu atuagassiaq manna atuaqqissaartarpiuk allassimaffiillu quppertarlugit? Atuaqqissaarneq  isumaqanngilaq immikkoortuni tamani oqaaseqatigiinnik ataatigut titarsiinnarneq. Ilanngutassiaq atuaqqissaassutissaq minuttini 15-iinnarni sammineqapallassinnaavoq titartarneqarsinnaallunilu. Tamannali ilanngutassiamik atuaqqissaarnerua? Ilanngutassiani tamani anersaakkut inuussutissanik atuaqqissaarneq ’nerinerlu’ nalunaaquttap-akunneranik ataatsimik marlunnilluunniit sivisussuseqarsinnaavoq.

²⁰ Immaqa imminut perorsaatissittariaqarpugut sapaatit-akunneri tamaasa inuttut illernassuserput eqqarsaatigilluarsinnaajumallugu nalunaaquttap-akunnialunni tv qamikkallartarlugu. Aalajangersimasumik atuaqqissaartarnitsigut anersaakkut ineriartortinneqartarpugut eqqortumillu aalajangiinissatsinnut, aalajangiinernut illernartumik ileqqoqarnermik kinguneqartunut, isumarput sunnerneqartarluni. — 2 Pîtruse 3:11; Evfisumiut 4:23; 5:15, 16.

21. Apeqqutit suut ilanngutassiap tulliani akineqassappat?

²¹ Maanna manna apeqqutaalerpoq: Sutigut allatigut kristumiutut illernartuusinnaavugut, soorlu Jehova illernartuusoq? Ilanngutassiaq tulliuttoq eqqarsaatinik isumaliutigisariaqakkatsinnik imaqarpoq. (wE 1/8 96)

[Quppernerup ataani ilanngussat]

Eqqaamaviuk?

□ Illernassutsimut kia Pilerfiuneranik Israelikkut qanoq eqqaasinneqarpat?

□ Malakiasip nalaani Israelikkut pallorfiginninnerat suup illernanngitsunngortippaa?

□ Iliuuseq illernanngitsoq sumit aallaaveqarpa?

□ Illernartuussagutta suut nassuerutigisariaqarpavut?

□ Qanoq ililluta illernartuaannarsinnaavugut?

[Atuaqqissaarnermi apeqqutit]