Pinngortitat ’nalugaluarlugu silatuut’ sumik ilinniarfigisinnaagivut

SILAANNARISSAATIT, qerinaveersaatit, tarajuiaatit sonarilu tassaapput 1900-kkunni nassaat ilisimaneqarlualersimasut. Ukiunili tuusintilikkuutaani atortorissaarutit tamakku uumasut ilaannit atorneqareersimapput. Tassa pinngortitat ’nalugaluarlugu silatuut’ paasisassarsiorfigissallugit inummut iluaqutaavoq. (Ussatit 30:24-28; Job 12:7-9) Nalunanngilaq uumasut ilaat oqaaseqanngikkaluarlutik inunnik ilinniartitsisartut, uumasunillu taama ittunik paasisassarsiorfiginninneq soqutiginartorujussuuvoq.

Uumasut aalajangersimasut pissusiinik qimerluuineq iluaqutigisinnaavarput? Jesus Kristusip ajoqersukkani savanut, pulateriaarsunnut, tuinut pillertanullu assersuussimavai. Assersuusiortarnermini suna erseqqissarniartarpaa? Tamanna sammilaassavarput.

’Savaatima nipiga tusararaat’

Sava 200-nit amerlanerusoriarluni Biibilimi taaneqarpoq, soorlulu Smith’s Bible Dictionary-mi nassuiarneqartoq „sava qanilaarsutsimut, naammagittassutsimut naalatsigitinnermullu assersuutaavoq“. Jesaja, kapitali 53-imi, Jesus savatut siulittuutaasumik eqqartorneqarpoq. Taamaattumik naleqquppoq taassumattaaq ajoqersukkani savanut assersuummagit. Savap pissusii immikkut ittut suut Jesusip eqqarsaatigai?

’Savaatima nipiga tusararaat, uangalu ilisaraakka, taakkualu malittarpaannga,’ Jesus oqarsimavoq. (Juánase 10:27) Oqaatsinik taakkuninnga ajoqersukkami qanilaarsusiat imminullu malinninniarlutik ilungersuussissusiat erseqqissarpaa. Savaviit paarsisimik nipaat tusaasarpaat pinaaseratillugu malittarlugu. Aamma paarsisoq nersutaatiminut qanimut attaveqartarpoq.

Savaatit narsaammi ivigartoraangamik siammarsinnaasarput, savalli ataasiakkaat immikkoorniartanngillat. Taamaalillutik toqqissisimajunnaaraangamik ersileraangamilluunniit ataatsimoorniapallassinnaasarput. Savat navianartumit aniguiumagunik ataatsimoorlutik qimaasarput, qimaanerminnilu arlaleriarlutik unittarput naalarniniarlutik. Savat pillugit atuakkami ima allassimasoqarpoq: „Unikkallartarluni qimaaneq savat sanngiinnerusut savaaqqallu malinnaasinnaanissaannut iluaqutaasarpoq. Taakku allaat ingerlaaqatigiinnit sernissorneqartarput.“ (Alles fur Schaf Annette Arnoldip René Reibetanzillu atuakkiaat) Tamanna qanoq ilinniarfigisinnaavarput?

Kristumiut ilumoortut kristumiuuneraqatigiit immikkoortortarpassuinut siammarsimanngillat. ’Savaatinili’ ataatsini katersorsimapput. Kristumiut tamarmik immikkut inuttut Guutip savaataanut atasutut misigipput, tamannalu Jehovap Nalunaajaasuisa peqatigiiffianni ataasiussutsimut allisaataavoq. Ajornartorsiutinik pilersoqaraangat, nappaat perulunnartoq, sorsunneq ajunaarnersuarluunniit pineqaraluarpat, sumut unnersuunneqarfissarsiorlutillu sernissorneqarfissarsiortarpat? Jehovap peqatigiissortaanut, anersaakkut sernissuisunut.

Unnersuussutit Biibilimeersut qanoq ililluni pineqarsinnaappat? Atuagassiat Napasuliaq Alapernaarsuiffik aamma Iteritsi! aqqutigalugit.  Kristumiut ataatsimiittarnerisa saniatigut atuagassiat taakkua savaatini savatut sanngiinnerusutut savaaqqatullu ittunut, immikkut isumassorneqarnissaminnik pisariaqartitsisunut, iluaqutaasarput. Assersuutigalugu, ilanngutassianik angajoqqaanut kisimiittunut imaluunniit isumamikkut nanertisimasunut immikkut saaffiginnittunik saqqummiussisoqartarpoq. Taamaattumik pitsaasuuvoq atuagassiat tamaviisa atuartarnissaat, tamatigut ataatsimiigiartarnissaq ilikkakkallu malillugit inuunissaq! Taamaalilluta maniguunnerput Guutillu savaataanut qanimut attaveqartutut misiginerput takutissavarput. — 1 Pîtruse 5:2.

’Silassorigitsi pulateriaarsuttut peqqusersuillusilu tuisut’

„Kangiani tamarmi pulateriaarsuk tunngavimmut ajortumut, naalasseriissutsip anersaavanut assersuutitut atorneqartarsimavoq,“ Smith’s Bible Dictionary-mi allassimavoq. Oqariaaseq „tuiutiga“ atorneqaraangami tunniusimaneq ersersinniarneqartarpoq. (Taalliat asanninnilersaarutit 5:2) Jesusilli ajoqersukkani ’pulateriaarsuttut silassorinnissaannik tuisullu peqqusersuinnissaannik’ kajumissaaramigit suna eqqarsaatigaa? — Matîuse 10:16.

Ajoqersukkami qanoq oqaluussinissaannik ilinniartitsinissaannillu ilitsersuunneranni Jesus taamatut oqarsimavoq. Assigiinngitsuninngooq qisuariarfigineqarnissartik ilimagissavaat. Inuinngooq ilaat nutaarsiassamut nuannersumut soqutiginninnermik ersersitsissapput, ilaalli tusaajumassanatik allaallu Guutip kiffaanik qinuginnissallutik. (Matîuse 10:17-23) Ajoqersukkat qinugineqalerunik qanoq qisuariassappat?

Atuakkiami Das Evangelium des Matthäus-imi (Mattæusip iivangkiiliua) Fritz Rienecker Matîuse 10:16-imut atatillugu ima allappoq: „Silatussuseq . . . assuarnaassutsimik, peqqusersuissutsimik unneqqarissutsimillu peqateqartittariaqarpoq, akeqqat unnerluussinissaminnut pissutissaqalinnginniassammata. Jesusip aallartitai akerlilersuisut naakkittaallutillu soqutigittaatsut, qanorluunniit annikitsigisumik periarfissaqaleraangamik naakkinnissuseqaratik apustilinik saassussisartut, akornanniittariaqartassapput. Taamaattumik pisariaqarpoq pulateriaarsuttut illutik akerlilersortiminnik mianersorfiginneqqissaarnissaat malugissutitillu tamaasa atorlugit naalarneqqissaartarnissaat; peqqusersiornerit peqquserlunnerillu atunngikkaluarlugit pissutsit nakkaannarfiginaveersaaqqissaartariaqarpaat, oqaatsikkulli peqqusersuillutillu ilumoorlutik, taamaalillutillu tuisut pissuseqarlutik.“

Jesusip oqaasii Matîuse 10:16-imi allassimasut nalitsinni Guutip kiffaasa sumik ilinniarfigisinnaavaat? Ullumikkut inuit nutaarsiassamut nuannersumut qisuariartarneri ukiuni hundredelinni siullerni inuit qisuariartarnerinut assingusorujussuupput. Kristumiut ilumoortut akerlilersorneqaleraangamik pulateriaarsuup silatussusia tuip minguissusianik akullugu atortariaqarpaat. Kristumiut Guutip naalagaaffia pillugu tusarliussamik oqaluussissutiginnikkaangamik kimilluunniit uukapaasiarinninnianngisaannassapput salloqittaanianngisaannassallutilluunniit, kisianni ileqqorissuussapput, peqqusersuitsuullutik unneqqarissuullutillu.

Assersuuteqariarta: Suleqatit, atuaqatit qanigisalluunniit Jehovap Nalunaajaasuisa upperisaat mitallerpaluttumik tusangiasaarutigisinnaavaat. Immaqa akillugit upperisaat sakkortuumik isornartorsiorusunnassagaluarpoq. Taamaalioruttali peqqusersuitsumik pissuseqassaagut? Naamik. Isornartorsiuisut takutissinnaagutsigik oqaasii ajunngitsumik pissusilersornitsinnut sunniuteqartinngikkivut, immaqa kamassaariniartarnertik unitsissavaat. Taamaalilluta silatullutalu assuarnaateqassanngilagut  — ’pulateriaarsuttut silassoritsigalutalu tuisut peqqusersuitsigissaagut’.

’Pillertat hestisut sorsunnermut piginnaanngorsagaasutut’ ittut

1784-imi Afrika Kujalleq „oqaluttuarisaanermi nalunaarsorneqarsimasut annerpaartaannik pillertarpassuarnit perlussiortinneqarpoq,“ atuagassiaq GEO paasissutissiivoq. Nuna 5200 kvadratkilometerisut annertussuseqartoq pillertanit perlussiortinneqarpoq. Pillertat „nunatami perlussiortitaminni naasoqassutsimut assut ajoqutaasarput,“ Smith’s Bible Dictionary-mi allassimavoq.

’Naalakkap ulluani’ susoqarnissaa Jesusip Guutip pissaaneragut saqqummersikkamiuk pillertat perlussiortitsinerannik takorruuisitsivoq, ima oqaatigineqartumik: ’Pillertaasallu qimuttuarsuit [hestit] sorsunnermut piginnaanngorsagaasut assigaat.’ (sarĸúmersitat 1:1, 10; 9:3-7) Takorruugaq assersuutaasoq tamanna qanoq isumaqarpa?

Jehovap nalunaajaasuisa qangalili paasisimavaat pillertat sarĸúmersitat, kapitali 9-mi, eqqartorneqartut Guutip kiffaanut tanitanut ukiuni hundredelinni makkunani inuusunut assersuutaasut. * Kristumiut taakku immikkut ittumik suliassinneqarsimapput, tassa Guutip naalagaaffia pillugu tusarliussamik nunarsuaq tamakkerlugu oqaluussinissamik ajoqersuganngortitsiortornissamillu. (Matîuse 24:14; 28:19, 20) Tamatumani akornutissat anigorniartariaqartassavaat suliaminnilu nikallujuittariaqarlutik. Pillertaq anusinngujuitsoq tamatumunnga assersuutissaalluarpoq.

Pillertaq 5 centimeterinit annerulaaginnarpoq, taamaakkaluartorli ullormut 100-200 kilometerisut isorartutigisoq ingerlavigisinnaavaa. Inoqajuitsup pillertaata allaat ullormut 1000 kilometerit angullugit isorartutigisoq ingerlavigisinnaavaa. GEO-p nassuiaanera naapertussagaanni „[inoqajuitsup pillertaata] suluni ullormut nalunaaquttap-akunnerini 17-ini sekundimut 18-eriartarluni aalatissinnaavai, sullernillu allat tamanna saperpaat“. Ilumut pinngortitaq taama mikitigaluni pisinnaasaqaq!

Jehovap nalunaajaasuisa ataatsitut isigalugit uteriarumanatik Guutip naalagaaffianik nutaarsiassaq nuannersoq siaruarterpaat. Ullumikkut nunani 230-nit amerlanerusuni oqaluussipput. Guutip kiffaasa taakkua suliami tamatumani peqataasinnaajumallutik ajornakusoortorpassuit anigorniartarpaat. Ajornartorsiutit suut akiugassarisariaqartarpaat? Paqumisunneq, inatsisitigut killilersorneqarneq, nappaatit, nikallunganeq qanigisanillu akerlilersorneqarneq, ilaannaat taassagaanni. Siumukarneralli sumilluunniit unitsinneqarsinnaasimanngilaq. Guutip suliareqqusaa nikallujuillutik suliaraat.

Kristumiutut pissutsinik ersersitsiuarit

Jesusip ajoqersukkani savanut, pulateriaarsunnut, tuinut pillertanullu assersuussimavai. Assersuussinerit tamakkua ingammik ullumikkut naleqqupput. Sooq? Pissutsit aaqqissuussaanerata matuma naggatissaa qanittuararsuummat, ajornartorsiutillu aatsaat taama amerlatigilersimammata.

Kristumiut ilumoortut Jesusip assersuusiai eqqaamavaat; Guutip savaataanut qanimut attaveqarput Jehovallu peqatigiissortaanit unnersuussutit maniguullutik ilassisarlugit. Sutigut tamatigut assuarnaattuarniaatigalutik qanoq pisoqarnissaanut piareersimasarput pissutsillu kristumiutut suliaminnut akornutaasinnaasut eqqumaffigisarlugit. Naak akornutissaqartaraluarlutik nikallujuillutik Guutip piumasaatut iliortuarput. Pinngortitanillu ’nalugaluarlugu silatuunik’ ilinniarfiginnittuarput. (wE 15/7 96)

[Quppernerup ataani ilanngussaq]