’Qanoq iliornissigut tamatigut illernartuugitsi’

’Illernartoq qaaqqusisersi malillugu ilississaaq qanoq iliornissigut tamatigut [illernartuugitsi], allassimammat: „[Illernartuussaasi], uanga illernartuugama.“’ — 1 PÎTRUSE 1:15, 16.

1. Sooq Peterip kristumiut illernartuunissaannik kajumissaarpai?

SOORUNA apustili Peter taamatut unnersuussisoq? Nalunnginnamiuk kristumiut tamarmik eqqarsaatiminnik iliuutsiminnillu eqqumaffiginnittussaasut, Jehovallu illernassusianut naapertuunnerlutik qulakkeerniartussaallugu. Taamatut unnersuussinngitsiarnermini ima oqarpoq: ’Taamaattumik isumassigut qiterusersimagitsi putumatsaaliniarlusilu . . . Qitornatut naalattutut nalusuugallarnissinni pilerissuserigaluasi ileqqoriniaqinasigik.’ — 1 Pîtruse 1:13, 14.

2. Sooq oqartoqarsinnaava sallusuissut nalugallaratsigu kissaativut illernanngitsuusimagaluartut?

² Ilarpassuatta siornatigut kissaatigisimasaralui illernanngitsuupput. Sallusuissummi ilassinngikkallaratsigu silarsuarmi inooriaasiusoq malissimavarput. Peterip tamanna nalunngilaa ima allakkami: ’Naammappormi, siornagut Guutimik nalusut piumasaat naammassisimagassiuk, kanngunartuliornerit illigutsannerillu  nerivallaarnerillu viinnisorpallaarnerillu imerpallaarnerillu Guutipilussiornerillu ileqqussaanngitsut inuuseralugit.’ Soorunami ileqqut illernanngitsut ingammik ullumikkut atugaasut Peterip eqqartunngilai, nalimini ilisimaneqanngimmata. — 1 Pîtruse 4:3, 4.

3, 4. (a) Qanoq ililluta kissaatit kukkusut akiorsinnaavavut? (b) Kristumiut misigissutsiminnik naqisimannittariaqarpat? Nassuiaruk.

³ Malugisariaqarpoq tassani Peterip eqqartormagit kissaatit uinimmut, malugissutinut misigissutsinullu kajungernartut. Kissaatit taama ittut qallinngortikkutsigik eqqarsaativut iliuutsivullu illernartumut akerliuleriaannaapput — illernanngitsunngoriaannaapput. Tamatumuuna erserpoq iliuutsivut silaqassutsimit imaluunniit sianissutsimit aqutsittariaqarivut. Paulusip ima oqaatigaa: ’Taamaattumik oqaaqqissaarpassi, qatanngutikka, Guutip nallittuissusia pillugu timisi tunniuteqqullusigik pilliutitut uumasutut [illernartutut] Guutip iluarisassaatut, tassaassaammat siuneqartutut Guutimut kiffartuutersi.’ — Rûmamiut 12:1, 2.

⁴ Guutimut pilliummik illernartumik sassaassisinnaassagutta misigissutsinit pinnata silaqarsutsitsinnilli aqutsittariaqarpugut. Qassimmitaava misigissutsiminnit aqutsissimanertik pissutigalugu kanngunartuliornermut nakkaannarsimappat! Tamanna isumaqanngilaq misigissutsivut naqisimassagivut; taamaappammi qanoq ililluta Jehovamut kiffartornitsinni nuannaarnerput ersersissinnaassagaluaratsigu? Uinngulli inerititaanik pinnata anersaap inerititaanik inerititaqarnissarput  kissaatigigutsigu ’isumakkut allanngortariaqarpugut’ Kristusitut eqqarsartalerluta. — Galâsiamiut 5:22, 23; Filípimiut 2:5.

Inooriaaseq illernartoq, aki illernartoq

5. Sooq illernartuunissap pisariaqassusia Peterip erseqqissarpaa?

⁵ Sooruna kristumiut illernartuusariaqarnerat Peterip erseqqissaraa? Nalunngilluinnaramiuk inuit utertinniarlugit qanoq illernartigisumik akiliuteqartoqarsimasoq. Allappoq: ’Ilisimallusi ileqqussinnit piunngitsunit siuaasassinnit kingornussassinnit utertitaasusi, aserujasunik siilvimilluunniit guultimilluunniit pinnasi, aammilli akisuumik soorlu savaaqqap assuarnaatsup innarluitsup tassa Kristusip pianik.’ (1 Pîtruse 1:18, 19) Aap, illernassutsip Pilerfiata, Jehova Guutip, ernituani, ’Guutip illernartua’, nunarsuarmut aallartissimavaa utertitsissutissaq inuit Guutimut ajunngitsumik attaveqalernissaannik ajornarunnaarsitsisoq akileriartorlugu. — Juánase 3:16; 6:69; 2 Moses 28:36; Matîuse 20:28.

6. (a) Sooq illernartumik inooriaaseqarniarneq oqitsuunngila? (b) Illernartumik ileqqoqartuarnissatsinnut suna iluaqutigisinnaavarput?

⁶ Satanilli silarsuaani ajortunngorsimasumi illernartumik inuuniarneq oqitsuunngilaq. Satan kristumiunik ilumoortunik, aaqqissuussaanermi pigisamini aniguiniarsarisunik, nakkarfissiuisarpoq. (Evfisumiut 6:12; 1 Timûtiuse 6:9, 10) Illernartuaannassagaanni silarsuarmilu suliffimmi tatineqarneq, atuarfimmi atuaqatinit tatineqarneq asissorneqarnerlu  imaluunniit ilaquttanit akerlilersorneqarneq akiorsinnaassagaanni anersaakkut nukittunissaq pisariaqarpoq. Tamatuma erseqqissarpaa nammineq atuaqqissaartarnissarput kristumiullu ataatsimiinnerinut orniguttuaannarnissarput qanoq pingaartigisut. Paulusip Timoteus ima unnersuussimavaa: ’Oqaatsit peqqissinartut uannit tusakkatit [attattuarniakkit] uppernikkut asanninnikkullu Kristus Jesusimiittukkut.’ (2 Timûtiuse 1:13) Oqaatsit ’peqqissinartut’ taama ittut naalagaaffilersaartarfimmi namminerlu atuaqqissaaraangatta tusartarpavut. Ulluinnarni pissutsini assigiinngitsorpassuarni pilersartuni illernartuarniarnitsinni iluaqutigisinnaavavut.

Ilaqutariinni illernartumik inuuneq

7. Ilaqutariittut inuunerput qanoq ililluta illernartuutittariaqarparput?

⁷ Peterip Mosesimik allakkat pingajui 11:44 issuaramiuk atorpaa griikerit oqaasiat haʹgi·os, isumaqartoq „ajortimit avissaaqqasoq taamaattumillu Guutimut tunniulluinnarsimasoq, illernartoq“. (An Expository Dictionary of New Testament Words, W. E. Vinemit) Tamanna kristumiutut ilaqutariittut inuunitsinnut qanoq sunniuteqartariaqarpa? Ilaqutariittut inuunerput asaqatigiiffiusariaqarpoq, ’Guuti asassutaammat’. (1 Juánase 4:8) Imminut pilliutigeriaannaassuseqarluni asanninneq uuliatut aappariit akornanni aammalu angajoqqaat meeqqallu akornanni attaveqarnermut iluaqutaasutut ittarpoq. — 1 Korintumiut 13:4-8; Evfisumiut 5:28, 29, 33; 6:4; Kulorsamiut 3:18, 21.

8, 9. (a) Kristumiut angerlarsimaffianni pissutsit qanoq ittut atuutilersinnaasarpat? (b) Tamatumunnga atatillugu Biibilimi pitsaasumik sumik unnersuussuteqarpa?

⁸ Immaqa isumaqarpugut soorunami ilaqutariinni kristumiuni tamani taamatut asaqatigiittoqartoq. Ajoraluartumilli ilaqutariit kristumiut ilaanni asanninneq atuuttariaqaraluarnermisut annertutigisumik atuutinngilaq. Immaqa naalagaaffilersaartarfimmi ajorpasinngikkaluarpoq, angerlarsimaffimmili illernarpallaanngitsumik pissusilersortooqqajaasoqarsinnaavoq. Uiusup puiortooqqajaasinnaavaa nuliani naalagaaffilersaartarfimmisulli kristumiutut qatanngutigalugu, nuliaasullu puiortooqqajaasinnaavaa uini suli tassaasoq qatanngut angut (immaqa ilagiinni kiffartortoq utoqqaanertarluunniit) naalagaaffilersaartarfimmi ataqqerpasittakkani. Immaqa ilaannikkut imminnut ima uumitsaatsigisinnaasarput allaat oqqaterujussualertarlutik. Arriitsunnguamik marloqiusamik inuuneqalertoortoqarsinnaavoq. Aappariit attavigiinnerat tassaajunnaarsinnaavoq uiusup kristumiup nuliaasullu kristumiup akornanni attavigiinneq, kisianni inuit marluk akerleriit akornanni attavigiinneq. Angerlarsimaffimmi pissutsit illernartut atuuttariaqaraluarnerat puiorneqartarpoq. Immaqa silamiutut oqaluttalerput, qanorlu iliallallutik oqaatsinik nuanniitsunik ajuallannartunillu anitsisalerlutik. — Ussatit 12:18; naleqqiuguk apustilit suliáinik agdlagkat 15:37-39.

⁹ Paulusili ima unnersuussivoq: ’Oqaatsinik mikiaasunik [griikerisut: loʹgos sa·prosʹ, „oqaatsit mingunnartut“, tassa oqaatsit illernanngitsut] qanissinnit anisitseqinasi, kisianni ineriartornissamut pisariaqartumut ajunngitsut oqaaserisigik tusartut saammaannermik pineqaqqullugit.’ Aammattaaq angerlarsimaffimmi tusartunut, ilaatigut meeqqanut, taamaattariaqarpoq. — Evfisumiut 4:29; Jâko 3:8-10.

10. Illernartuunissamik unnersuussut meeqqat qanoq iliorlutik malissinnaavaat?

¹⁰ Najoqqutassat illernassutsimut tunngasut tamakkua ilaqutariinni kristumiuni meeqqanuttaaq atuupput. Meeqqat atuareerlutik angerlaraangamik oqariaatsit pikitsitsiniarpaluttut ataqqinnippalunngitsullu atuaqatimik atortagaat atoriartarsinnaasarpaat. Nukappiaqqat perorsarsimanngitsut itsaq Jehovap pruffiitianik asissuisut pissusaat meeqqat inuusuttullu ilaarnaveersaartariaqarpaat.  Ullumikkuttaaq meeraqarpoq kannguttaatsumik Guutimillu mitallerpaluttumik oqaluttartunik. (2 Kunngit 2:23, 24) Inuit kusanartunik oqalunnissaminnut eqiasuppallaartut soqutigittaappallaartullu pissuserissaarnissamillu sianigisaqanngitsut oqaasipalaavi ilaarnaveersigik. Kristumiutut oqaatsivut illernartuusariaqarput, ilorraallannartuullutik, ineriartornartuullutik, inussiarnerpaluttuullutik ’tarajorsimallutillu’. Tusarneqarsinnaasariaqarpoq allanit allaanerusugut. — Kulorsamiut 3:8-10; 4:6.

Ilaquttanut uppinngitsunut attaveqarnermi illernassuseq

11. Sooq illernartuuneq tassaanngila imminut iluartuutinneq?

¹¹ Nalunngeqatiginnissuserput malilluarlugu illernartuuniarsaraagut, tamannali allanit pitsaanerusutut misigilissutigisariaqanngilarput imaluunniit imminut iluartuutissutigilertariaqarnagu, ingammik ilaquttatsinnut uppinngitsunut attaveqarnitsinni. Kristumiutut inussiarnersumik pissuseqarnitsigut takusinnaasariaqarpaat ajunngitsuinnarmik allanit allaanerusugut Jesusillu assersuusiaani Samariamiu assigalugu asanninnermik misiginneqataanermillu qanoq ililluni ersersitsinissaq nalunngikkipput. — Lúkarse 10:30-37.

12. Kristumiut uppinngitsumik aappallit qanoq ilillutik sallusuissut aapparminnut orniginarnerulersissinnaavaat?

¹² Ilaquttatsinnut uppinngitsunut eqqortumik pissuseqarnissatta pingaaruteqassusia Peterip erseqqissarpaa kristumiunut nuliaasunut ima allakkami: ’Taamattaaq nuliaasusi uissinnut naalattuugitsi, oqaatsimut naalasseriitsoqarpat taakku oqaaseqanngitsukkut nuliamik saqineratigut ilataarineqaqqullugit, mianerinnillusi piitaajuitsumik saqinersi isigisaraangamikku.’ Kristumiup nuliaasup (imaluunniit uiusup) sallusuissut aapparminut orniginarnerulersissinnaavaa minguitsumik ileqqoqarnermigut, isumassuisuunermigut ataqqinnittuunermigullu. Tamanna isumaqarpoq teokratiimut tunngasutigut sammisassani eqaatsumik aaqqissuuttariaqarai aappani uppinngitsoq sumiginnaqqunagu. * — 1 Pîtruse 3:1, 2.

13. Uiusup uppinngitsup sallusuissummut ilasseraarnerulernissaanut utoqqaanertat ilagiinnilu kiffartortut qanoq ilillutik ikiuisinnaasarpat?

¹³ Utoqqaanertat ilagiinnilu kiffartortut ilaannikkut ikiuisinnaasarput uiusumik uppinngitsumik ikinngutiginnilernermikkut. Taamaalilluni immaqa uiusup uppinngitsup paasilissavaa Jehovap nalunaajaasui inuinnaasut peqqissaartut assigiinngitsunik soqutigisallit, Biibiliinnaanngitsumillu soqutigisaqartut. Ilaanni uiusup soqutigisaanut, tassa aalisarnermut, soqutiginninnermik utoqqaanertaq ersersitsisimavoq. Tamannaannaq uiusup ilasseraarnerulernissaanut naammappoq. Kingorna angut kuisippoq qatanngutinngorluni. Uiusoq uppinngitsoq alla kanariap timmiaanik nuannarisalerujussuuvoq. Utoqqaanertat qanoq iliorsinnaanertik isumaliutigaat. Utoqqaanertat ilaat tamakkununnga tunngasunik atuarpoq tulliani naapikkuniuk soqutigisaa pillugu oqaloqatiginiassagamiuk. Tassa illernartuuneq tassaanngilaq allanit ajunnginneruniarpallaarneq imaluunniit ataasiinnaavallaartumik pissuseqarneq. — 1 Korintumiut 9:20-23.

Qanoq ililluta ilagiinni illernartuusinnaavugut?

14. (a) Satan ilaatigut qanoq periaaseqarluni ilagiinnik malunnanngitsumik ajortisaariniartarpa? (b) Satanip nakkarfissiai qanoq ililluta ingalassimaniarsinnaavavut?

¹⁴ Satan Diaavulu mamarliisuuvoq, griikerimmi oqaasiat diaavulumik nutserneqartoq, di·aʹbo·los, isumaqarpoq „unnerluussisoq“ imaluunniit „mamarliisoq“. Immikkut piginnaaneqarfigisaasa ilagaat mamarliineq,  tamannalu aamma ilagiinnut eqqunniartarpaa. Periaasinnaava tassa oqaatissuaaneq. Ileqqumik illernanngitsumik taama ittumik siuarsaaniarnerani atorneqarumassaagut? Tamanna qanoq ililluni pisinnaava? Oqaatissuaasalernitsigut, tusakkatta ingerlateqqittarneratigut, imaluunniit oqaatissuaanermut tusarnaarnitsigut. Silatuumik ima ussateqarpoq: „Aserorsaarisoq saqitsaannermik pilersitsisarpoq, mamarliisup ikinngutigiit avissaartittarpai.“ (Ussatit 16:28) Suna oqaatissuaanermik mamarliinermillu pinaveersimatitsisinnaava? Oqaatsitta ineriartornartuujuarnissaat asanninnermillu aallaaveqarnissaat qulakkeertariaqarparput. Qatanngutitta kukkussutaasa isiginiarnerunissaannut taarsiullugu ajunngitsortaat isiginiarnerugutsigik oqaatsivut ilorraallannartuullutillu anersaamut tunngasuujuassapput. Eqqaamajuk isornartorsiuinissaq ajornanngitsuararsuummat, ilinnullu allat pillugit oqaatissuaasoq aamma illit pillutit oqaatissuaasarmat! — 1 Timûtiuse 5:13; Títuse 2:3.

15. Kristumiutut pissutsit suut ilagiinniittut tamarmik illernartuaannarnissaannut iluaqutaasinnaappat?

¹⁵ Ilagiit illernartuutittuassagutsigik tamatta Kristusip isumaa pigisariaqarparput, nalunngilarpullu taassuma pissusia ersarinnerpaaq tassaasoq asanninneq. Taamaattumik Paulusip Kolossamiut kajumissaarsimavai Jesus ilaarlugu misiginneqataaqqullugit: ’Taava Guutip qinigaasut [illernartutut] asanartutut atiniarsigik imaattut: nallittuingaarneq avaaginninnerlu nikanartinnerlu qanilaarnerlu kamajuinnerlu; immissinnut unnerluutissaqaraluarussi kamageqatigiillusilu isumakkeerfigeqatigiigitsi; . . . Tamakkuli tamarmik qaasigut atiniarsiuk asanninneq; tamanna iluarluinnassutsip nimeraa.’ Taava oqaatsini ima ilavai: ’Eqqissinerlu Kristusip pia uummatissinni ilitsersuigili.’ Taamatut isumakkeerfiginneriaannaagutta ilagiinni ataasiussuseq illernassuserlu atatiinnarsinnaassavavut. — Kulorsamiut 3:12-15.

Illernassuserput sanilitta takusinnaavaat?

16. Sooq pallorfiginninnerput illernartoq nuannaarnermik malunnaateqartariaqarpa?

¹⁶ Sanilitta qanoq ittutut malugisarpaatigut? Takuneqarsinnaava sallusuissut nuannarigipput, imaluunniit nammakkatut isigigipput? Soorlu Jehova illernartoq aamma uagut illernartuugutta tamanna oqaatsitsigut inooriaatsitsigullu ersarilluinnartariaqarpoq. Ersarittariaqarpoq pallorfiginninnerput illernartoq nuannaarluta aallukkipput. Sooq? Guuterput, Jehova, Guutiummat pilluartoq kiffami nuannaarnissaannik kissaateqartoq. Taamaattumik tussiaasiortoq itsaq Jehovap innuttai pillugit ima oqarsinnaasimavoq: „Pilluarput inuiaat [Jehovamik] Guuteqartut!“ Uagut taamatut pilluarpasippugut? Aamma meeqqatta naalagaaffilersaartarfimmi ataatsimeersuarnernilu Jehovap innuttaanik peqateqartarnertik nuannaarutigisarpaat? — Tussiaat 89:16, 17; 144:15b.

17. Pallorfiginninnerput oqimaaqatigiissuutinniarlugu qanoq iliuuseqarsinnaavugut?

¹⁷ Aammattaaq takutissinnaavarput pallorfiginninnerput illernartoq oqimaaqatigiissumik aallukkipput sanilitsinnut suleqataajumassuseqarlutalu  inussiarnernitsigut. Ilaannikkut pisariaqartarpoq sanileriit eqqaminnik saleeqatigiinnissaat, imaluunniit, soorlu nunat ilaanni pisartoq, eqqaminni aqqusinernik iluarsaasseqatigiinnissaat. Aamma naatsiivitsinnik, quitsinnik allanilluunniit pigisatsinnik paaqqinninnitsigut tamanna takuneqarsinnaassaaq. Eqqakkavut silatitsinniitiinnartarutsigik imaluunniit silaterput sukujussuarnik ulikkaarpat, immaqalu biilikorsuarput kikkut tamarmik takusinnaasaanniiginnarpat, taava oqarsinnaassanerpugut sanilivut ataqqinnittumik pigivut? — sarĸúmersitat 11:18.

Suliffimmi atuarfimmilu illernartuuneq

18. (a) Ullumikkut kristumiut qanoq tamaviaarnartorsiorpat? (b) Qanoq ililluta takutissinnaavarput silamiunit allaanerulluta?

¹⁸ Kristumiut illoqarfimmi illernanngitsumi Korinthimiittut apustilip Paulusip ima allaffigisimavai: ’Allakkakkut allaffigaassi uersaasut ilagisaqqunagit. Uku pinngilakka silap matuma uersaasui piumatuuiluunniit arsaarisuiluunniit guutipilussiortuiluunniit; taamaappat silarsuaq qimaannagassareqqajaqaarsi.’ (1 Korintumiut 5:9, 10) Ulluinnarni inuit kanngunartuliortartut ileqqorissaarnissamillu sianigisaqanngitsut akornanniittarneq kristumiunut tamaviaarnartorujussuuvoq. Assuarnaassutsitsinnut misilinneqaataavoq annertooq, ingammik inuiaqatigiinni tiinganikkut malersuinermik, peqquserlunnermik unneqqaserlunnermillu isiginninngitsuusaarfiusuni taamaaliornissamilluunniit toqqaannartumik kajumissaariffiusuni. Avatangiisini taama ittuni inunnut naleqqussarniaannarluta najoqqutassiat maleruakkavut qasukkartitersinnaanngilavut. Kristumiutut inussiarnersumik, allaanerusumilli, pissusilersornerput anersaakkut pisariaqartitsinerminnik miserratiginninngitsunut ajunnginnerusumillu ujartuisunut ersarissumik immikkoorutigisariaqarparput. — Matîuse 5:3; 1 Pîtruse 3:16, 17.

19. (a) Meeqqat atuarfimmi qanoq misilinneqartarpat? (b) Angajoqqaat meeqqatik illernartumik ileqqoqartuaannarnissaannik tapersersorniarlugit qanoq iliorsinnaappat?

¹⁹ Meeqqavuttaaq atuarfimmi misilinneqartaqaat. Ilissi angajoqqaat, meeqqassi atuarfianut pulaarnikuuisi? Atuarfimmi pissutsit qanoq ittuusut nalunngilisiuk? Ilinniartitsisui oqaloqatigisarpigisik? Sooq tamakkua tamarmik taama pingaartigaat? Illoqarfiit ilarpassuini atuarfiit nakuuserfiullutillu, ikiaroorfiullutillu kinguaassiuutitigut kanngunartuliorfiusarmata. Qanoq ilillutik meeqqat assuarnaassutsiminnik illernassutsiminnillu attassiinnarsinnaassappat misigigunik angajoqqaamik tamakkiisumik paasillutillu tapersersunngikkaatik? Paulusip angajoqqaanut unnersuussutaa pissusissamisoorluinnarpoq: ’Angajoqqaat ukorsii, qitornasi uumitsatseqinasigik anusinngoqqunagit.’ (Kulorsamiut 3:21) Meeqqat uumitsatsittoorneqarsinnaasarput ajornartorsiutit misilinneqaatillu ulluinnarni naapittagaat paasisimanngikkaanni. Kristumiut angerlarsimaffianni pissutsit anersaakkut pingaartitserpalaartut atuutsinnerisigut meeqqat atuarfimmi ussernartorsiulernissaannut piareersimatinneqartarput. — 5 Moses 6:6-9; Ussatit 22:6.

20. Sooq tamatta illernartuunissarput taama pingaartigaa?

²⁰ Sooq tamatta illernartuaannarnissarput taama pingaartigaa? Satanip silarsuaanit saassunneqartarnitsinnut eqqarsartaatsimullu taassuma siuarsagaanut illersuutigissagatsigu. Aammalu ullumikkut siunissamilu pilluaqqusaassutigissavarput. Silarsuassami nutaami naapertuilluassuseqarfiusumi piviusumik inuulernissatsinnik qulakkeereqataassaaq. Ingasattajaarniatut akeqqersimaartutut pissuseqalernaveersaartissavaatigut, kristumiutullu oqimaaqatiigiissumik pissuseqarnissatsinnut ilakkuminartuunissatsinnullu ikiussalluta, inunnut allanut oqaloqatikkuminartut. Naatsumik oqaatigalugu, Kristusip ilaarnissaanut ikiussavaatigut. — 1 Timûtiuse 6:19. (wE 1/8 96)

[Quppernerup ataani ilanngussaq]

Eqqaamaviuk?

□ Sooq Peter misigisimava kristumiut illernartuunissamik unnersuuttariaqarlugit?

□ Sooq illernartumik inuuniarneq oqitsuunngila?

□ Ilaqutariinni illernassuseq siuarsarniarlugu qanoq iliorsinnaavugut?

□ Ilagiit illernartuaannassappata ileqqoq illernanngitsoq suna ingalattariaqarparput?

□ Suliffimmi atuarfimmilu qanoq ililluta illernartuaannarniarsinnaavugut?

[Atuaqqissaarnermi apeqqutit]

[Qupp. 16, 17-mi assiliartaq]

Jehovap nalunaajaasuisut Guutimut kiffartornitsinni allanillu suliaqarnitsinni nuannaartuusariaqarpugut