Tarneq toqusuitsuua?

IKINNGUTAASUT ilaqutaasullu nipaqaratik illerfik saneqquavaat. Nukappissap 17-inik ukiullip timaa toqungasoq takusinnaavaat. Atuaqataanut ilisarnanngingajappoq. Kemoterapeertinnermi kingunerisaanik nujaarutingajassimavoq, kræftillu sanigortissimaqaa. Ilumut taannaava, ikinngutaat? Tamanna sapaatit-akunnialuinnannguanik sioqqullugu isumassarsianik, apeqqutinik nukissanillu — aap, inuunermik — ulikkaarsimagaluarpoq. Nukappissap anaanaa qiasunngorpalulluni oqaqattaarpoq: „Tommy massakkut pilluarnerulerpoq. Guutip kissaatigaa Tommyp qilammi najussagaani.“

Ernermi qanoq ililluni pineqarpoq suli inuuneranik eqqarsaat anaanap aliasoqisup neriulissutigikannerlugulu tuppallersaatigikannerpaa. Oqaluffimmi paasitinneqarsimavoq tarneq toqusuitsuusoq, tassaasorlu inuttut pissutsip, eqqarsaatit eqqaamasallu sumiiffiat, aap, tassaasoq „uanga“. Isumaqanngilaq ernermi tarnera toqusimasoq, toquneranilu tarnaata anersaanngorluni timaa qimassimagaa qilaliarlunilu Guuti inngilillu najussallugit.

Ajunaarnermit eqqorneqarnermi inuup uummataa neriuutissaasinnaasunnguamik sumilluunniit tunaartarinninniarsuataartarpoq, taamaattumillu paasissallugu ajornanngilaq sooq takorluugaq tamanna taama orniginartigisoq. Assersuutigalugu, malugiuk teologeq J. Paterson-Smyth atuakkami The Gospel of the Hereafter-imi ima oqartoq: „Toqu tamatuma kingorna takkuttumut — silarsuarmut nuannerluinnartumut toqup kingorna tikitassatsinnut — sanilliullugu suunngilaq.“

Silarsuarmi sumi tamaani, upperisarsiornerit kulturillu ilarpassuini, inuit upperaat inuk toqusuitsumik tarneqartoq, anersaaqarluni uumasumik toqunermi timimit qimaguttussamik. Takorluugaq tamanna kristumiuuneraqatigiit immikkoortortaanni assigiinngitsorpassuarni tamangajanni atuuppoq. Aamma juutiussutsip iluani tamanna ajoqersuutaavoq. Hindusiortut upperaat atman, imaluunniit tarneq, aallaqqaammulli pinngortinneqarsimasoq, inunngornermi timimit tiguneqartartoq toqunermilu timimut allamut nooqattaartuartartoq. Muslimit upperaat tarneq timilu ataatsikkut pinngortartut timillu toqunerata kingorna tarneq uumajuaannartarluni. Upperisarsiortuttaaq allat — Afrikami animistit (pinngortitarsuarmiittut tamarmik tarneqarnerannik upperisaqartut), shintosiortut ilaatigullu Buddhasiortut — assingusumik upperisaqarput.

Apeqqutit akiuminaatsut

Tarnermik toqusuitsumik eqqarsaat inuppassuarnit upperiumaneqaraluartoq taamaattoq apeqqutinik akiuminaatsunik pilersitsivoq. Assersuutigalugu, asasatta toqusimasut maligassaalluarlutik inuusimanngikkunik toqunerminni tarnaat sumut pisarnersut apeqqutigineqarsinnaavoq. Inuunermut nikanarnerusumut ingerlaqqissappat? Imaluunniit qilammut isernissaminnut qinngaqqunnarunnaarniarlutik anniarfimmi innermik eqqiarneqaqqaassappat? Suliluunniit ajornerusumik, asasavut anniarfimmi ikualasumi naassaanngitsumik naalliutsinneqartarpat? Imaluunniit animistit ilarpassuisa ajoqersuutigisaattut, anersaanngortarpat saammarsarneqartariaqartut?

Takorluukkat taama ittut inuusunik nammakkersuisinnaapput. Qanigisatta toqusimasut uagutsinnut akiniaanissaat ersissutigalugu tarnaat saammarsassavavut? Eqqiarfimmit amiilaarnartumit annaanniarsarissavavut, imaluunniit soriarsinnaanata anniarfimmi naalliunnerannik eqqarsaat amiilaassutigerusaaginnassavarput? Imaluunniit uumasut inuit toqusimasut tarnaannik ilumioqartutut pissavavut?

Aammattaaq Guuti pillugu apeqqutit nuanninngeqisut pilerput. Assersuutigalugu, angajoqqaarpassuit anaanatut aallaqqaataani taaneqartutut meeqqamik tarnaannik toqusuitsumik Guutip qilammi najoqqulluni „tigusisimaneranik“ eqqarsaat aallaqqaammut tuppallersaatigisarpaat. Inuppassuilli siusinnerusukkut kingusinnerusukkulluunniit eqqarsaatigilersarpaat Guuti meeqqamik pisuussuteqanngitsumik qilaliartitsiniaannarluni amiilaarnartumik  nappaateqalersitseriarluni angajoqqaavinik alisoqisunik meeraannik asasaannik arsaarisoq Guutitut qanoq ittuusimassasoq. Guuti taama ittoq naapertuilluarlunilu, asannittuullunilu naakkinnittuusimassava? Inuittaaq ilaasa Guutip taama ittup ilisimassuteqarnissaa apeqqusertarpaat. Aperisarput sooq Guutip ilisimassuseqartup tarnit taakku tamaasa nunarsuarmut pisissimassagai, naggataatigut qilammiilernissaat siunertariguniuk. Taamaappat nunarsuarmi pinngortitarsuaq tamaat asuliinnarsuaq pinngortissimassannginnerpaa? — Naleqqiuguk Mosesimik allakkat tallimaat 32:4; Tussiaat 103:8; Jesaja 45:18; Juánasip agdlai sujugdlît 4:8.

Tassa nalunanngilluinnarpoq inuup toqusuitsumik tarneqarneranik ajoqersuut qanorluunniit ittunngorlugu saqqummiunneqaraluaruni apeqqutinik akiuminaatsunik, aap, allaat isummanik akerleriinnik, pilersitsisarpoq. Sooruna? Ajoqersuutip suminngaanneernera ajornartorsiummut aalajangiisuusorujussuuvoq. Qularnanngitsumik ajoqersuutip pilerfia paasissallugu soqutiginartissavat, immaqalu tarneq pillugu Biibilimi allassimasut tupaallaatigissavatit. Toqup kingorna inuunermik neriorsuummik silarsuarmi upperisarsiortut saqqummiuttagaannit pitsaaneroqisumik Biibili imaqarpoq. (wE 1/8 96)