Kristusip inatsisai

’Kristusimi inatsisiliuvunga.’ — 1 KORINTUMIUT 9:21.

1, 2. (a) Inuiaat kukkusimanerisa ilarpassui qanoq pinngitsoortinneqarsinnaagaluarpat? (b) Kristumiuuneraqatigiit qanoq ilillutik juutit oqaluttuarisaanerat sumik ilinniutigisimanngilaat?

„INUIAAT naalakkersuisullu oqaluttuarisaaneq ilinniutigisimanngisaannarpaat oqaluttuarisaanermillu ilinniarsinnaasat maleruarsimanagit.“ 1800-kkunni filosoffi tyskeq taama allassimavoq. Inuiaat oqaluttuarisaanerat tassaanerarneqarpoq „sianiitsuliornerit nangeqattaarnerat“, kukkunerit ajornartorsiutillu annilaarnartut, amerlasuullu pinngitsoortinneqarsinnaagaluarput kukkusimanerit ilinniutigisimagaluaraanni.

² Inatsisit Guutimeersut pillugit misissuinitsinni matumani aamma pereersunit ilinniarumanngissuseq tamanna takuneqarsinnaavoq. Jehova Guutip Mosesip inatsisai inatsisinik pitsaanerusunik taarsersimavai — tassa Kristusip imaluunniit Messiasip inatsisai. Kristumiuuneraqatigiilli siuttuisa, inatsisinik tamakkuninnga ajoqersuinerartut maleruaanerartullu, farisiiarit sianiitsuliorsimanerat ilinniutigisimanngilaat. Soorlu juutit Mosesip inatsisai mumisissimagaat kristumiuuneraqatigiittaaq Kristusip inatsisai mumisillugit atornerlussimavaat. Sooq taamaaliorpat? Siullermik Kristusip inatsisai misissoriartigik. Kristusip inatsisai suuppat, kikkut  naalattariaqarpaat, aamma qanoq ililluni Mosesip inatsisaanit allaaneruppat? Taava takussavarput kristumiuuneraqatigiit qanoq ilillutik Kristusip inatsisai atornerlussimagaat, ilinniutigisinnaaniassagatsigu.

Angerusissaaq

3. Angeruseq nutaaq eqqarsaatigalugu Jehova qanoq neriorsuisimava?

³ Jehova Guutip saniatigut kia allap inatsisit naammalluinnartut pitsaanerulersissinnaavai? Mosesip inatsisaanik angeruseq naammalluinnartuuvoq. (Tussiaat 19:7) Taamaattoq Jehova ima neriorsuivoq: „Ata! Ullut nalliukkumaarput . . . Israelikkunnik Judakkunnillu nutaamik angerfigeqatiginniffissakka; taama pissanngitsumik soorlu siuaasaat angerfigigakkit.“ Inatsisit qulit — Mosesip inatsisaani pingaarnerpaasut — ujaqqani allanneqarsimapput. Angeruserli nutaaq pillugu Jehova ima oqarpoq: „Inatsisikka iluinut tunniukkumaarpakka, uummataannullu allallugit.“ — Jeremia 31:31-34, NV.

4. (a) Israelikkut qanoq ittut angerusisaamut ilaappat? (b) Israelikkut anersaakkut ittut saniatigut kikkut aamma Kristusip inatsisai maleruartariaqarpaat?

⁴ Kikkut angerutsimi nutaami tamatumani angerfigeqatigineqarpat? Uinikkut ’Israelikkut’ pineqarsinnaanngillat taakkua angerusisaamut akunnermiliuttoq itigartissimavaat. (Eprîarit 9:15) Naamik, ’Israelikkut’ nutaat tassaassapput ’Israel Guutip pigisaa’, inuiaqatigiit Israelikkut anersaakkut ittut. (Galâsiamiut 6:16; Rûmamiut 2:28, 29) Katersannguit kristumiut anersaamik tanitaasut ’amerlangaartunik’ inuiaqatigiinnit tamaneersunik Jehovamik pallorfiginnikkusuttunik kingusinnerusukkut ilagineqalissapput. (sarĸúmersitat 7:9, 10; Sakarja 8:23) Amerlangaartut taakku angerusisaamut tamatumunnga ilaanngillat, kisiannili inatsisit aalajangersimasut maleruartariaqarpaat. (Naleqqiuguk 3 Moses 24:22; 4 Moses 15:15.) ’Savaatitut ataatsitut’ ’paarsisumit ataatsimit’ siulersorneqarlutik tamarmik ’Kristusimi inatsisiliussapput’, soorlu Paulus allassimasoq. (Juánase 10:16; 1 Korintumiut 9:21) Paulusip angerusisaaq tamanna ’angerutsimik ajunnginnerusumik’ taavaa. Sooq? Ilaatigut neriorsuutinik eqquutereersunik tunngavilerneqarmat, piumaartussanik tunngavilerneqarani. — Eprîarit 8:6; 9:11-14.

5. Angerusisaaq sumik siunertaqarpa, siunertarlu tamanna qanoq ililluni naammassineqarumaarpa?

⁵ Angeruseq tamanna sumik siunertaqarpa? Inuiaqatigiit kunngiusut palasiusullu inuiaat tamarmik pilluaqquneqaatigisassaat pilersissavai. (2 Moses 19:6; 1 Pîtruse 2:9; sarĸúmersitat 5:10) Mosesip inatsisaanik angerutsip inuiaqatigiit taakku pilersissimanngilai, Israelikkut inuiaqatigiittut isigalugit pikitsitsimmata periarfissatillu annaallugit. (Naleqqiuguk Rûmamiut 11:17-21.) Angerusisaalli siunertani naammassiumaarpaa inatsimmut Mosesip inatsisaanut allaanerulluinnartunut attuumassuteqarami. Qanoq ililluni allaanerua?

Inatsisit kiffaanngissutsip pii

6, 7. Sooq Kristusip inatsisai Mosesip inatsisaanit kiffaanngissuseqartitsineruppat?

⁶ Kristusip inatsisai Biibilimi qasseriarlutik kiffaanngitsutsimut attuumassuteqartinneqarput. (Juánase 8:31, 32) ’Inatsisit naammalluinnartut kiffaanngisutsip pii’-nik taaneqarput. (Jâko 1:25; 2:12) Soorunami inuit killiliinnarmik kiffaanngissuseqarsinnaapput. Taamaattorli inatsisit tamakku Mosesip inatsisaanit kiffaanngissuseqartitsinerusarput. Qanoq ilillutik?

⁷ Inunnguuseralugu Kristusip inatsisaata ataaniittoqanngilaq. Inuup amiata qalipaataa sumiluunniit inunngornera apeqqutaanngillat. Kristumiut ilumoortut namminneq inatsimmut tamatumunnga naalatsigitinnissartik qinertarpaat. Paasivaat tassaasoq ’nammaataq iluaqisoq naammakkiussarlu oqeqisoq’. (Matiuse 11:28-30) Mosesip inatsisaasa inuit aamma ilinniartittussaasimavaat ajortiliusut pilliummillu utertitsissutaasumik pisariaqartitsisut. (Galâsiamiut 3:19) Kristusip  inatsisaata ersersippaat Messias tikiutereersimasoq inuuninilu pilliutigalugu utertitsissut pilersissimagaa, taamaalillunilu ajortip toqullu qunutitsingaarnerannit aniguinissatsinnut periarfissilluta. (Rûmamiut 5:20, 21) Pilliut tamanna iluaqutigissagutsigu upperisariaqarparput. — Juánase 3:16.

8. Kristusip inatsisaanut suna ilaava, aamma sooq maleruarniarlugit malittarisassat hundredelippassuit alanngaartariaqanngilavut?

⁸ Upperneq tamanna Kristusip inatsisaanik tamanik maleruaasoqarneratigut takuneqarsinnaavoq. Imali paasisariaqarpa maleruagassat hundredelippassuit alanngaarlugit ilinniartariaqarivut? Naamik. Mosesip angerusitoqqamut akunnermiliuttup inatsisit allassimavai, Jesusili angerusisaamut akunnermiliuttup inatsimmik ataatsimilluunniit allataqarsimanngilaq. Kristusip inatsisai inooriaasiatigut erserput. Naammalluinnartutut inuunermigut pitsaasumik maligassippaatigut. (1 Pîtruse 2:21) Immaqa tamanna pissutigalugu kristumiut siulliit guutisioriaasiat ’Aqqutigeqqusamik’ taaneqartarsimavoq. (apustilit suliait 9:2; 19:9, 23; 22:4; 24:22) Taakkununnga Kristusip inatsisaa Kristusip inooriasiani erserpoq. Jesus malinniarlugu inatsisit tamakku maleruartariaqarpaat. Taanna asangaarpaat, asanninnerlu tamanna uummataannut ’allanneqarpoq’, soorlu siulittuutigineqarsimasoq. (Jeremia 31:33; 1 Pîtruse 4:8) Asanninnermillu pissuteqarluni naalattoq naqisimaneqartutut misiginngisaannassaaq. Taamaattumik Kristusip inatsisai tassaapput ’inatsisit kiffaanngissutsip pii’.

9. Kristusip inatsisaani ilorlerpaaq sunaava, sunalu pillugu oqarsinnaavugut inatsisit tamakku peqqussummik nutaamik imaqartut?

⁹ Mosesip inatsisaani asanninneq pingaaruteqarpat oqarsinnaavugut Kristusip inatsisaani asanninneq ilorlerpaasoq. Kristusip inatsisaani inassummik nutaamik imaqarpoq, tassa kristumiut imminnut tunulliullutik asanninnissaannik inassut. Jesusitut asannittariaqarput, taassumalu ikinngutini pillugit inuunini pilliutigiumavaa. (Juánase 13:34, 35; 15:13) Taamaattumik oqarsinnaavugut Kristusip inatsisaa Mosesip inatsisaanit teokratiimut ersiutaalluarnerusoq. Soorlu siornatigut atuagassiami matumani erseqqissarneqarsimasoq: „Teokratii tassaavoq Guutimik  aqunneqarneq; Guuti asassutaavoq; taamaattumik teokratii asanninnikkut ingerlanneqartariaqarpoq.“

Jesus farisiiarillu

10. Jesusip ajoqersuutaa farisiiarit ajoqersuutaannit sukkut aallaanerua?

¹⁰ Tupinnanngilaq Jesus juutillu upperisarsiornikkut siuttui akerleriissuteqarmata. Allakkanik ilisimasut farisiiarillu eqqarsartaasiat ’inatsimmit kiffaanngissutsip pianit’ ungasittorujussuuvoq. Inuit inatsisiliaat atorlugit inuit allat aqunniartarpaat. Naqisimannittumik, assuarinnittumik nikallornartumillu ajoqersuuteqarput. Tamatumunnga akerliulluinnartumik Jesusip ajoqersuutaa ineriartornarlunilu isumalluarnartuuvoq. Piviusorpalaartumik ajoqersuisarpoq inuillu soqutigisaat soqutigai pisariaqartitaallu isumagalugit. Guutip oqaasia tunngavigalugu paasiuminartumik ajoqersuisarpoq, misiginneqataasarpoq assersuutillu ulluinnarpaluttut atortarlugit. Taamaattumik „ajoqersueriaasia pillugu inuit uissuummilluinnarput.“ (Matiuse 7:28, NV) Aap, Jesusip inuit uummataat killippai.

11.Jesusip qanoq ililluni takutissimavaa Mosesip inatsisai ingasaassinianngitsumik naakkinnittumillu atorneqarsinnaasut?

¹¹ Mosesip inatsisai malittarisassanik amerlanerusunik ilanagit Jesusip takutippaa juutit Inatsisit qanoq atortariaqarsimagaluaraat — ingasaassiniarnatik naakkinnillutillu. Assersuutigalugu eqqarsaatigeriaruk arnamit aanaartuaannartumit orninneqarmat. Mosesip inatsisai malillugit arnap taassuma inuit allat attugai tamarmik minguttuunngussapput. Taamaattumik inuppassuit akornanniittariaqanngikkaluarpoq. (3 Moses 15:25-27) Ajorunnaarusungaarami inuit akornatigut Jesus ornippaa atisaalu attorlugit. Erniinnarluinnaq ajorunnaarpoq. Inatsisit unioqqutimmagit Jesusip avoqqaaraa? Naamik, alianartumik atugaqarnera paasilluarpaa Inatsisinilu pingaarnerpaasoq — asanninneq — maleruarlugu. Misiginneqataalluni ima oqarfigaa: ’Panik-aa, uppernerpit annaappaatit, eqqissillutit aallarit, anniarunnaarlutillu peqqissiit.’ — Mákorse 5:25-34.

Kristusip inatsisai asattuussivallaarpat?

12. (a) Sooq isumaqartariaqanngilagut Kristusip inatsisai asattuussivallaartut? (b) Sukkut paasinarsiva inatsisit amerlavallaaraangata inuit amerlasuunik avaqquffissarsiortartut?

¹² ’Inatsisit kiffaanngissutsip pii’-nik taaneqarmata isumaqassaagut Kristusip inatsisai asattuussivallaartut, farisiiarillu malittarisassarpassuit atorlugit inuit killilersimaartikkaat? Naamik. Ullumikkut inatsisit amerlasoorpassuit atorneqarneranni takuneqarsinnaagajuppoq inatsisit amerlagaangata avaqquffissat amerlasartuttaaq. * Jesusip nalaani farisiiarit malittarisassaat pissutigalugit inuit avaqquffissiortarput. Asanninnermit siulersorneqarsimanatik allanut iluarisaajumaannarput, ileqqorlunnitillu toqqorlugit imminnut iluartuutinniarput. — Matîuse 23:23, 24.

13. Sooq Kristusip inatsisai inatsisinut allassimasunut naleqqiullugit ileqqorissaarnerulernermik kinguneqartarpat?

¹³ Kristusip inatsisaasa taamatut isumaqarnerit siuarsarneq ajorpai. Akerlianik inatsimmik Jehovamut asanninnermik tunngaveqartumik naalanneq, Jesusillu imminut tunulliunneranik malinninneq inatsisit allanneqarsimasut maleruaannarnissaannit ileqqorissaarnerulernermik kinguneqassaaq. Asannikkaanni inatsisini avaqquffissarsiussanngilaq; eqqunngitsuliussanngilaq naak immaqa inatsisitigut ersarissumik inerteqqutaanngikkaluartoq.  (Takuuk Matîuse 5:27, 28.) Kristusip inatsisaanit siulersorneqarluta allat ajunngitsuliorfigissavavut, tukkorfigalugit, inoroorsaarfigalugit asannittuliorfigalugillu; inatsisit allanneqarsimasut taamaaliortissinnaanngilaatigut. — apustilit suliait 20:35; 2 Korintumiut 9:7; Eprîarit 13:16.

14. Ukiuni hundredelinni siullerni kristumiut Kristusip inatsisai maleruaraangatigik ilagiinnut qanoq sunniuteqartarpa?

¹⁴ Kristumiut siulliit Kristusip inatsisai maleruaraangamikkik ilagiinni asanningaassuseq iluunngarlunilu misigineq, juutit naalagiartarfiinisut sukkannerneq, avoqqaarinninneq ilumoortuusaarniarnerlu pinnagit, nuannaarutigisinnaasarpaat. Kristumiut siulliit taakkua malugilluarsinnaasimassavaat ’inatsisit kiffaanngissutsip pii’ maleruaritik.

15. Satanip qanoq ililluni aallaqqaataaniilli ilagiit kristumiut ajortunngortinniartarsimavai?

¹⁵ Satanip kristumiut ilagiissaat iluanit ajortunngortinniartarpaa, soorlu inuiaqatigiit Israelikkut taamaaliorfigisimagai. Paulus mianersoqqusilluni allassimavoq angutit amaqqutut sualuttutut ittut saqqummerumaartut ’mumingasunik oqaluttut’ taamaalillutillu Guutip savaatai naqisimalerlugit. (apustilit suliait 20:29, 30) Juutiussutsimik pingaartitsivallaartut oqaloqatigisariaqarpai, taakkua Kristusip inatsisaata ataani kiffaangissuseq Mosesip inatsisaasa ataanni inussiaataassutsimik taarserniarmassuk, naak Kristusip Mosesip inatsisai naammassillugit atorunnaarsissimagaluarai. (Matîuse 5:17; apustilit suliait 15:1; Rûmamiut 10:4) Apustilit kingulliit toqummata tunussineq tamanna pinngitsoortinneqarsinnaajunnaarpoq. Ajortunngorsimaneq siaruaakkiartorpoq. — 2 Tásalûníkamiut 2:6, 7.

Kristumiuuneraqatigiit Kristusip inatsisai mumisippaat

16, 17. (a) Kristumiuuneraqatigiit akornanni ajortunngorsimanerit suut takkussimappat? (b) Ilagiit katuuliusut inatsisai qanoq ilillutik atoqatigiinnermut mumingasumik isumaqartoqarnermik kinguneqarsimava?

¹⁶ Juutit akornannisulli kristumiuuneraqatigiit akornanni ajortunngorsimanerit assigiinngitsuupput. Taakkuattaaq ajoqersuutit eqqunngitsut ileqqorlunnerlu atortalerpaat. Ilagiit ajortumik sunnerneqarnissamut illersorniaraluarlugit pallorfiginninneq minguitsoq aserortarpaat. Malittarisassat amerlasuut sukannersut Biibilimillu tunngaveqanngitsut pilersinneqarput.

¹⁷ Ingammik ilagiit katuuliusut ilagiinnut amerlasuunik inatsisiliorsimapput. Pingaartumik atoqatigiinneq pillugu eqqumiitsunik inatsiseqarpoq. Atuagaq Sexuality and Catholicism (Atoqatigiinnermut tunngasut katuuliussuserlu) naapertorlugu oqaluffeqarfiup griikerit filosofiiat Stoikeriussusermik taaneqartoq atulerpaat. Stoikerit inuulluutit tamaasa ajornerarsimavaat. Oqaluffeqarfiup ajoqersuutigilerpaat atoqatigiinnikkut nuannaarneq, aamma aappariit iluanni, ajortuliornerusoq. (Akerliatut takuuk Ussatit 5:18, 19.) Imaanneraasoqarpoq atoqatigiinnerup kinguaassinissaannaq siunertarigaa. Taamaattumik naartunaveersaatit tamaasa ajortuliatut sualuttutut assuarineqangaarput, ilaannikkut ukiuni arlalinni pillarneqassutigineqartarpoq. Aammalu palasit katinnissaat inerteqqutaalerpoq, tamannalu kanngunartuliornernik amerlasuunik, ilaatigut meeqqanik atornerluisarnernik, kinguneqartarsimavoq. — 1 Timûtiuse 4:1-3.

18. Ilagiit pillugit inatsisit amerlasuut sumik kinguneqarsimappat?

¹⁸ Ilagiit pillugit inatsisit amerliartuinnarmata atuakkanut katersorneqartalerput. Atuakkat taakkua Biibili ersernerlussisippaat inangerlugulu. (Naleqqiuguk Matîuse 15:3, 9.) Juutit assigalugit katuullit silamiut atuagaataat iluarinngilaat tamakkualu ilarpassui navianartutut isigalugit. Sivitsunngitsoq taama isumaqarnerisa Biibilip tamakkununnga silatuumik mianersoqqussutai qaangerlugit iliuuseqartippaat. (Nalunaajaasup oqaasii 12:12; Kulorsamiut 2:8) Hieronymus, ilagiinni atuakkiortoq ukiuni 300-kkunni inuusoq, ima oqarsimavoq: „Naalagaq, atuakkat silamiuusut pigeqqilissagaluarukkit  atuaqqikkaluarukkilluunniit ilinnik miserratiginnissaanga.“ Kingusinnerusukkut oqaluffeqarfiup atuakkat — allaat atuakkat ilagiinnut tunnganngitsut — nakkutigisalerpai. 1600-kkunni ulloriarsiortoq Galilei allassimagami Nunarsuup Seqineq kaavikkaa oqaluffeqarfimmit assuarineqarpoq. Oqaluffeqarfik sunut tamanut — allaat ulloriarsiornermut tunngasunut — kisimi oqartussaaneraammat, tamanna Biibilimik upperisaqarnermut aserorsaataasimavoq.

19. Mattuffiit najoqqutassanik sukannersunik naalagaaniarpallaartunillu qanoq siuarsaappat?

¹⁹ Ingammik mattuffinni mattuttut allanit immikkoorlutik imminnut tunulliullutik inuuffigisaanni oqaluffeqarfik amerlasoorpassuarnik malittarisassaliorpoq. Katuullit mattuffiisa amerlanersaanni „Benediktinerit malittarisassaat“ maleruarneqarpoq. Mattuttut siulersortaat abbedimik taaneqartoq (aramæerit ’ataata’-mut oqaasiannit tigusaavoq) kisimi oqartussaavoq. (Naleqqiuguk Matîuse 23:9.) Mattuttut ilaat angajoqqaaminit tunisippat abbedip aalajangersinnaavaa taassuma imaluunniit allap tunissut pissaneraa. Kanngutsiallannartut assuarineqangaartarput, aammalu oqalorusaarneq quiasaarutillu inerteqqutaapput; ima oqartoqarpoq: „Ajoqersukkat taamaaliortussaanngillat.“

20. Sukkut takuneqarsinnaava naaggaartut ilagiissaattaaq Biibilimut akerliusumik naalagaaniarpallaartumillu iliuuseqartarsimasut?

²⁰ Naaggaartut, katuullit Biibilimut akerliusumik ileqqorlunnerannik iluarsaaniartut, aamma Kristusip inatsisaanut tunngaveqanngitsumik malittarisassaliullaqqipput. Assersuutigalugu iluarsaaniartut ilaat niumanerusoq Johannes Calvin taaneqartarpoq „oqaluffiup nutaanngortitap inatsisiliortua“. Taassuma malittarisassanik sukannersunik amerlasuunik illoqarfik Genève naalakkersorpaa, malinneqarnersut „utoqqaanertanik“ Calvin naapertorlugu „kikkulluunniit inooriaasiannik nakkutilliisussanik“ nakkutigineqarput. (Tamatumunnga akerliusoq takuuk Korintumiunut agdlagkat áipait 1:24.) Oqaluffeqarfiup akunnittarfiit nakkutigai aalajangerlugulu tassani suut oqaloqatigiissutigineqarsinnaanersut. Qiimasaartumik erinarsortoqarpat qitittoqarpalluunniit sukannersumik pillarneqassapput. *

Kristumiuuneraqatigiit kukkunerannit ilinniut

21. Kristumiuuneraqatigiit ’allassimasut qimmullugit isumaliorsimanerat’ qanoq kinguneqarsimava?

²¹ Malittarisassat inatsisillu tamakku tamarmik kristumiuuneraqatigiit ajortunngorsimanermut illersorsimanerpaat? Naamerluinnaq! Ullumikkut kristumiuuneraqatigiit immikkoorniaqatigiinnut hundredelikkuutaannut avissimapput, ilaat sukannertorujussuusut, ilaat asattuussivallaartut. Tamarmik assigiinngitsutigut ’allassimasut qimmullugit isumaliorsimapput’, ilagiillu inuit eqqarsaataat naapertorlugit, Guutip inatsisai naapertornagit, siulersorneqartarput. — 1 Korintumiut 4:6.

22. Sooq kristumiuuneraqatigiit tunussisimanerat ima paasisaqariaqanngila Kristusip inatsisai iluatsinngitsoortut?

²² Tamannali isumaqanngilaq Kristusip  inatsisaa iluatsinngitsoortoq. Jehova Guutip akuerinngisaannassavaa inatsisini inunnit suujunnaarsinneqarnissaat. Kristusip inatsisaa kristumiut ilumoortut akornanni ullumikkut sunniuteqarluartarpoq, maleruarsinnaaneralu immikkut pisinnaatitaaffigaat. Maannali juutit kristumiuuneraqatigiillu Guutip inatsisai qanoq pisimaneraat misissoreeratsigu immaqa ima aperisinnaavugut: ’Qanoq ililluta Kristusip inatsisai maleruarsinnaavavut Guutillu oqaasia inuit eqqarsaataannik imaluunniit malittarisassanik Guutip inatsisaanut akerliusunik mingutsinnagu? Ullumikkut Kristusip inatsisaanik maleruaaneq qanoq oqimaaqatigiissumik isumaqarnermik kinguneqartariaqarpa?’ Ilanngutassiami tulliuttumi apeqqutit tamakku misissussavavut. (wE 1/9 96)

[Quppernerup ataani ilanngussat]

Uteqqiinissamut apeqqutissat

□ Kristusip inatsisaani ilorlerpaaq sunaava?

□ Jesusip ajoqersuutaa farisiiarit ajoqersuutaannit sukkut aallaanerua?

□ Satanip qanoq ililluni inuit amerlasuunik sukannersunillu malittarisassaliorajussusiat atorlugu kristumiuuneraqatigiit ajortunngortissinnaasimavai?

□ Kristusip inatsisai maleruaraanni qanoq iluaqutaappat?

[Atuaqqissaarnermi apeqqutit]

[Qupp. 17-mi assiliartaq]

Jesusip Mosesip inatsisai silatuumik naakkinnittumillu atortarsimavai