Nunamut neriorsuutigisamut tikeraarneq

EQQARSAATIGERIARUK ikinngutip alianaatsumi eqqissisimanartumilu illumik nutaarluinnarmik tunissutitut pitsissimallutit oqarfigigaatit. Qanoq isikkoqarnersoq eqqarsaatigissagunarpat. Qularnanngitsumik illu taanna nammineerlutit takorusussaqaat, initaalu tamaasa misissorusussaqaatit. Angerlarsimaffittaassammiuna!

Ukiumi 1473-mi u.n.s. Jehovap inuiannut itsaq Israelikkunnut angerlarsimaffik nutaaq kingornussassanngortissimavaa — nuna neriorsuutigisaq, agguaqatigiissillugu avannaaniit kujammut 500 kilometeritut isorartutigisoq 55 kilometeritullu atitutigisoq. * Nuna neriorsuutigisaq ’Qaammatip-affaa naggorissoq’-mik taaneqartartumiikkami inuuffigissallugu nuannersuusimavoq, pinngortitap piisigut pigissaarluartoq.

Kisianni sooq „angerlarsimaffik“ qanga inuusimasunut tunniunneqarsimasoq soqutigissavarput? Nuna oqaluttuarisaanermut tunngasoq ilisimalerutsigu Biibilip oqaluttuartai pingaartinnerulissagatsigik. Professoriugaluaq Yohanan Aharoni allassimavoq: „Biibilip nunaani nunap isikkua oqaluttuarisaaneralu imminnut atalluinnarmata iluamik paasissagaanni arlaannaaluunniit pinngitsoorneqarsinnaanngilaq.“ Aammattaaq nuna neriorsuutigisaq peruttulerfimmini Guutip Naalagaaffiata ataani Paratiisissamut inuiannut nunarsuaq tamakkerlugu qanittukkut atuutilersussamut assersuutaavoq minnerusoq. — Jesaja 11:9.

Jesus Kristusip nunami kiffartornermini nunami neriorsuutigisaasumiittut nalinginnaasumik ilisimaneqartut ilinniartitsinermini atortarpai. (Matîuse 13:24-32; 25:31-46; Lúkarse 13:6-9) Uaguttaaq itsaq Palæstinami pissutsit ilaasa qimerloornerisigut ilinniarfigisinnaavavut. „Initaasa“ ilai aqqutigeriartigik, Guutillu inuttaasa ukiuni hundredelikkuutaani inigisimasaasa ilisarnaataasa ilaat misissoriartigik. Soorlu takussagipput nunap neriorsuutigisap misissornera ilinniarfigilluarsinnaavarput.

[Quppernerup ataani ilanngussaq]

[Suminngaanneernera]

Garo Nalbandian