’Illusisitsisarniaritsi’

’Iluartut ajorsaataat isumagisigik. Illusisitsisarniaritsi.’ — RÛMAMIUT 12:13.

1. Inuk sumik tunngaviusumik pisariaqartitaqarpa, tamannalu sukkut ersertarpa?

UNNUKKUT kingusiinnakkut aqqusinikkut inoqanngitsukkoorneq ullutsinni misigisaasinnaavoq nuanniitsoq. Aammali inuppassuit ilisarisimanngisat akornanniinneq taamatulli nuanniitsigisinnaavoq. Uagut inuit allanit soqutigineqarnissarput, asaneqarnissarput ilagerusunneqarnissarpullu sakkortuumik kissaatigisarparput. Arlaannattaluunniit takornartatut pineqarnissani ilaluarineqarnissanilu nuannarinngilluinnarpaa.

2. Peqateqarusussuserput Jehovap qanoq ililluni matussutississimavaa?

² Jehova Guutip, tamanik pinngortitsisup, peqateqarnissamik pisariaqartitsinerput nalunngilluarpaa. Guutip inuk pinngortitarigamiuk aallaqqaammulli nalunngilaa ’iluanngitsoq inuk kisimiimmat’, tamannalu iliuuseqarfigaa. (1 Moses 2:18, 21, 22) Jehovap kiffaasalu allanut ajunngitsuliortarsimaneri pillugit Biibilimi oqaluttuarpassuaqarpoq. Maligassat tamakku qimerloornerisigut ’illusisitsisarnissarput’, tassa inoroorsaarnissarput, ilinniarsinnaavarput, allanut nuannaarutaasumik uagutsinnullu assut nalerisimaarutaasumik. — Rûmamiut 12:13.

Takornartanik asanninneq

3. Oqaaseq griikerisooq inoroorsaarnermik nutserneqartoq nagguimmigut qanoq isumaqarpa?

³ Oqaaseq griikerisooq Biibilimi ’illusisitsineq’-mik nutserneqartoq tassaavoq filoxeniʹa, nagguinnik marlunnik ’asanninneq’-mik ’takornartaq’–millu isumaqartunit katitigaasoq. Taamaattumik ’illusisitsineq’, imaluunniit inoroorsaassuseq, isumaqavippoq „takornartanik asanninneq“. Tamannali qallikkuinnaq pissusiunngilaq inussiarnernermilluunniit ersersitsinerinnaanani. Misigissutsit tunniusimanerlu ilaapput. James Strongip atuakkiaa The Exhaustive Concordance of the Bible naapertussagaanni oqaluut fileʹō isumaqarpoq ’(inummut pimulluunniit nuannarinninneq) ikinngutaaneq, tassa tunniusimaneq (inuttut periartarneq misigissutsinik aalaterneqarnermilluunniit pissuteqartoq)’. Tassa inoroorsaassuseq tassaannaanngilaq asanninneq najoqqutassanik tunngaveqartoq, asanninneq immaqa pisussaaffiinnartut misiginermit pisoq. Inoroorsaassuseq asanninnermut piviusumut ikinngutigiinnermullu ilumoortumut ersiutaavoq.

4. Kikkut inoroorsaarfigisariaqarpat?

⁴ „Takornartaq“ (griikerisut: xeʹnos) tassaavoq asanninnermik tamatuminnga ersersitsivigineqartoq. Kinaasinnaava? Strongip Concordance-liaani oqaaseq xeʹnos tassaanerarneqarpoq ’takornartaq (toqqaannartumik: allamiu, imaluunniit allatut oqaatigalugu: nutaaq); allatut paasillugu pulaaq (tikeraaq) imaluunniit (akerlianik) takornartaq’. Tassa inoroorsaassuseq Biibilimi eqqartorneqartutut ittoq nuannarisatsinnik, imaluunniit takornarluinnakkatsinnik, asanninnermit pilerfeqarsinnaavoq. Jesus ima nassuiaasimavoq: ’Ilissinnimmi asannittut asagussigik, sumik taava akileriaqassavisi? Ilanngaaserisuttaaq taamaattarinnginnerlutik? Qatanngutisilu kisiisa  ilassigussigik, suna pingaartoq taava ileqqoraasiuk? Guutimik nalusuttaaq taamaattarinnginnerlutik?’ (Matîuse 5:46, 47) Piviusumik inoroorsaartartut assiaqutaq assigiinngisitsinerlu paqumisunnermik siooranermillu pissuteqartut aporfigineq ajorpaat.

Jehova, pulaartitsisoq naammalluinnartoq

5, 6. (a) Jesusip suna pivaa oqarami: ’Ataatarsi qilammiusoq iluarluinnarpoq.’ (b) Jehovap tukkussusia sukkut erserpa?

⁵ Eqqaaneqareersutut asanninnerup inuit imminnut ersersittagaata amigaatai taagoreerlugit Jesusip oqaatsini ima ilavai: ’Taamaattumik iluarluinnaritsi, soorlu Ataatarsi qilammiusoq iluarluinnartoq.’ (Matîuse 5:48) Jehova soorunami sutigut tamatigut iluarluinnartuullunilu naammalluinnartuuvoq. (5 Moses 32:4) Jehovalli naammalluinnassusiata ilaa aalajangersimasoq Jesusip erseqqissarpaa taamatut oqarnermi siunitsianngua ima oqarami: ’[Guutip] seqerni ajortunut ajunngitsunullu nueqqusarpaa, sialleqqusisarlunilu iluartunut iluaatsunullu.’ (Matîuse 5:45) Aap, Jehovap asanninnera nakerisarsiornertaqanngisaannarpoq.

⁶ Pinngortitsisutut Jehovap suut tamaasa pigai. „Uanga pig[aakka] orpippassuarni uumasut tamaasa, nersutit tuusintillit qaqqani ittut. Nalunngilakka timmissat tamaasa qaqqaniittut, narsap uumasui pigaakka,“ Jehova oqarpoq. (Tussiaat 50:10, 11) Suulli tamaasa namminissarsiorluni katersorneq ajorpai. Tukkoqaluni pinngortitani tamaasa tuniorartarpai. Tussiaasiortup Jehova ima oqaatigisimavaa: „Assatit ammartarpatit pinngortitallu tamaasa ajunngitsuutinnik qaarsillartittarlugit.“ — Salme 145:16.

7. Jehovap takornartanik inunnillu annikilliortunik iliorfiginneriaasiatigut suna ilinniarsinnaavarput?

⁷ Jehovap inuit pisariaqartitaannik tunisarpai, allaat imminik ilisarisimanninngitsut imminullu takornartaasut tunisarpai. Paulusip Barnabasillu illoqarfimmi Lystrami guutipilussiortut eqqaasissimavaat Jehova ’imminik nalunaajaatiginngitsuunngikkaluartoq, ajunngitsumik pisarami qilammit tunisarlugit sialunnik ukiunillu naggoriffiusunik uummataallu qaarsillartittarlugit tipaatsuttittarlugillu’. (apustilit  suliait 14:17) Ingammik annikilliortunut Jehova ajunngitsuullunilu tukkortuuvoq. (5 Moses 10:17, 18) Inussiarnissuseq tukkussuserlu, aap, allanut inoroorsaartuuneq eqqarsaatigalugu Jehova assut ilinniarfigisinnaavarput.

8. Anersaakkut pisariaqartitatta matussutissinnerannut atatillugu Jehovap tukkussutsi qanoq takutissimavaa?

⁸ Jehovap pinngortitani timikkut pisariaqartitaannaanniunngitsoq isumassortarpai, aamma anersaakkut pisariaqartitaannik isumassortarpai. Anersaakkut ajornartorsiornerput arlaannattaluunniit suli paasinngikkaa uagutsinnut anersaakkut ajunngitsussaq pillugu Jehova misinnarnerpaamik periaaseqarluni akuliussimavoq. Rûmamiunut agdlagkat 5:8, 10-mi ima allassimavoq: ’Guutilli asannissutsi uatsinnut nalunarunnaarsippaa, suli ajortuliortilluta Kristusip toqussutigimmatigut. . . . Qinngarisaatillutami ernerata toquagut Guutimut saammaannartitaagatta, annerungaartumik taava taassuma inuuneragut saammaannartitaalluta annaanneqassaagut.’ Aaqqissuussaq tamanna iluaqutigalugu inuit ajortillit Ataataminnut qilammiusumut taassuma qitornaasut qanimut attaveqarsinnaalerput. (Rûmamiut 8:20, 21) Aammattaaq Jehovap eqqortumik siulersorneqartippaatigut, ajortiliullutalu naammalluinnanngitsuugaluarluta ajunngitsumik inuusinnaaqqulluta. — Tussiaat 119:105; 2 Timoteus 3:16.

9, 10. (a) Sooq oqartoqarsinnaava Jehova tassaasoq pulaartitsisoq naammalluinnartoq? (b) Tassuunakkut kristumiut ilumoortut qanoq ilillutik Jehova ilaartariaqarpaat?

⁹ Tamanna eqqarsaatigalugu oqarsinnaavugut Jehova arlalippassuartigut tassaasoq pulaartitsisoq naammalluinnartoq. Immikkut pisariaqartitallit, pissakitsut nikanartullu arajutsineq ajorpai. Takornartat allaallu imminut akeqqersimaartut soqutiginninnermik ilumoortumik ersersitsivigisarpai, tamannalu nammineq sukkut iluanaarutigisinnaanerlugu eqqarsaatigineq ajorpaa. Taamaattumik pulaartitsisutut naammalluinnartutut maligassaalluarnerpaavoq.

¹⁰ Taamatut ilumoorluni tunniusimanermik tukkussusermillu nammineq ersersitsereerami Jehovap kissaatigaa imminik pallorfiginnittut tamatumani malissagaanni. Pissutsimik asannittumik taama ittumik pigisaqartunik Biibilimi assersuutissarpassuaqarpoq. Oqaatsinik qinerlerfissiami Encyclopaedia Judaica-mi oqaluttuarineqartutut „Israelitoqqami inoroorsaarnermik ersersitsineq tassaannaanngilaq pissuserissaarneq. Inoroorsaarneq ileqqussatigut aaqqissuussaavoq . . . Angalasumut qasusumut takornartamullu inoroorsaarnermik ileqqoq Biibilimi eqqartorneqartoq inoroorsaassutsip assigiinngitsorpassuarnik immikkoortullip juutit ileqqutoqaanni ileqqorissutsimut erligisaasumut ineriartuaarsimasup tunngavigaa.“ Inoroorsaassuseq inuiaqatigiit naggueqatigiillu aalajangersimasuinnaat ilisarnaatiginngilaat; aamma Jehovamik pallorfiginnittut ilumoortut tamarmik ilisarnaatigaat.

Inngilit inoroorsaarfigineqartut

11. Suup takutippaa inoroorsaarneq ilimaginngisamik pilluaqqusaanermik kinguneqarsinnaasoq? (Takukkittaaq Mosesimik allakkat siulliit 19:1-3; Eqqartuussisunik allakkat 13:11-16.)

¹¹ Inoroorsaarnermik Biibilimi oqaluttuat ilisimaneqarnerpaat ilagaat Abraham Saralu taakkualu Mamremi Hebronip eqqaaniittumi orpissuit akornanni tupermi najugaqarneranni pisimasoq pillugit oqaluttuaq. (1 Moses 18:1-10; 23:19) Qularnanngitsumik apustilip Paulusip tamanna eqqarsaatigaa ima kajumissaarigami: ’Puioqinasi illusisitsisassagassi, taamaalillutik ilaasa inngilit sianiginagit illusisittarmatigik.’ (Eprîarit 13:2) Oqaluttuaq tamanna misissornerugutsigu paasissavarput qanoq  perorsarneqarsimanerinnaq imaluunniit ileqqutoqaasuinnaat inoroorsaartuunermut aalajangiisuunngitsut. Inoroorsaarneq pissusiuvoq Guutimeersoq pilluaqqusaanernik annertuunik nassataqartartoq.

12. Abrahamip takornartanik asanninnini qanoq ersersippaa?

¹² Mosesimik allakkat siulliit 18:1, 2 naapertussagaanni paasinarpoq pulaartut ilimagineqarsimanngikkaluartut Abrahamillu ilisarisimanngikkai. Aqqusaaginnartuusorineqarsimagunarput. Nassuiaasut ilaat oqartarput kangiani ileqquusimasoq nunami allami angalasup tikitamini ilisarisimasaqanngikkaluarluni inoroorsaarfigineqarnissaminik naatsorsuutiginnissinnaanera. Abrahamilli takornartat namminneq saaffiginninnissaat utaqqiinnanngilaa; aap, siulliulluni nammineq iliuuseqarpoq. Takornartat taakkua suli ungasiartillugit parsiarpai, aali allassimasutut ’kiatseruttornerugaluartoq’ 99-inillu ukioqaraluarluni! Tamatuma takutippaa sooq Paulusip Abraham maligassatut malittariaqartutut eqqaasimagaa. Inoroorsaassutsip qiterisaa tassaniippoq: Takornartanik asanninneq pisariaqartitaannillu eqqumaffiginninneq. Tamanna pissusiuvoq pitsaasorujussuaq.

13. Sooq pulaartuni ’Abrahamip pallorfigai’?

¹³ Aamma allassimavoq takornartat tikikkamigit Abraham ’nunamut pallortoq’. Ilumut ilisarisimanngilluinnakkami saavanni pallorsimava? Aap, tassa taamatut tikeraartit ataqqisaanerusut ilassineqartarsimapput. Pallorfiginninnerunngilaq, Guutimi kisimi pallorfigineqartussaavoq. (Naleqqiuguk apustilit suliait 10:25, 26; sarĸúmersitat 19:10.) ’Nunamut pallornermigut’ Abrahamip takornartat paasitippai tikeraatut pingaarutilittut isigigini. Nammineq ilaqutariissuarnut pigissaartunut ittuuvoq, taamaakkaluartorli takornartat taakku imminit ataqqineqarnerusariaqartutut isigalugit. Takornartat tatiginninngitsumik tunuarsimaartumillu pineqartarnerannit tamanna allaaneroqaaq. Abrahamip pissusilersornermigut oqaatsit ukua qanoq isumaqarnerat takutippaa: ’Ataqqeqatigiigitsi ingiaqattaallusi.’ — Rûmamiut 12:10.

14. Abraham takornartanik inoroorsaarfiginninnermini sunik pilliuteqarlunilu suliniuteqarpa?

¹⁴ Oqaluttuap sinnera atuarutsigu paasisinnaavarput Abrahamip misigissusii piviusuusut. Sassaalliutaannaaluunniit nerisassat immikkut ittuupput. Allaat illumi aqutsinermi annertuumi uumasuuterpassualimmi ’nersuteeqqat pitsaasut illinnartut’ ulluinnarsiutaaneq ajorput. Tamaani nalinginnaasumik ileqquusut pillugit John Kittos atuakkiamini Daily Bible Illustrations-imi ima allassimavoq: „Immikkut ittumik pisoqartinnagu, imaluunniit takornartamik pulaartoqartinnani, piisaartoqarneq ajorpoq; amerlasuunillu savaateqarlunilu nersutaateqaraluarluniluunniit pisuni tamakkunaniinnaq neqitortoqartarpoq.“ Silaannaap kissarnera pissutigalugu nerisassat asiujasut toqqorneqarsinnaasarsimanngillat; taamaattumik tamakkuninnga sassaalliuteqassagaanni ingerlaannaq sananeqartariaqarput. Tupinnanngilaq oqaluttuami naatsumi tassani tuaviorluni iliuuseqarnerit pingasut eqqaaneqarmata, allaallu Abraham nerisassiorniarluni „arpaannaq“ iliuuseqartoq! — 1 Moses 18:6-8.

15. Abrahamip inoroorsaarnermini timip piinik eqqortumik isiginninnini qanoq ililluni ersersippaa?

¹⁵ Soorunami imaanngilaq allanit nersualaarneqarniaannarluta nerersuartitsissasugut. Naak Abrahamip Sarallu nerisassiornertik ulapputigigaluarlugu Abrahamip tamatuminnga qanoq eqqartuinera malugisariaqartuuvoq: „Imermik aallersitsissaanga isikkasi asanniassagassigit, orpiullu ataani qasuersaarniaritsi. Nerisassassinnik aalliutissavassi ingerlaqqitsinnasi tumannguersarniassagassi; kiffarsi asuli aqqusaassanngilarsi.“  (1 Moses 18:4, 5) „Nerisassassinnik“-mut taarsiullugu nutsikkami pisoqqami atorneqarpoq ’timiusamininnguamik’; ’timiusamininnguamik’ taasai sunaaffa tassa nersuteeraq puallarsagaq, punneq, immuk kaagillu ammalortut — nerisassat mamarluinnartut. Tamanna sumik ilinniarfigisinnaavarput? Inoroorsaaraangatta ingasattajaarluta nerisassiisariaqanngitsugut imigassiisariaqanngitsugullu imaluunniit aliikkusersuerujussuartariaqanngitsugut. Inoroorsaassagaanni pisuujusariaqanngilaq. Inoroorsaartoq ilumoorluni allanik isumassuisuuvoq periarfissanilu naapertorlugit taakkununnga ajunngitsuliorusulluni. „Asanninnermik pigisaqarluni naatitanit nerisassiat pitsaanerupput uumissuinermik pigisaqarluni ussigup neqaanik siatamik nerisaqarnermit,“ Biibilimi taamatut ussateqarpoq inoroorsaarnerup piviusup isumavianik ersersitsilluartumik. — Ussatit 15:17.

16. Abrahamip inoroorsaarneratigut qanoq ililluni ersersippaa anersaamut tunngasut pingaartittorujussuugai?

¹⁶ Anersaamulli tunngasut malugisariaqartuupput. Abrahamip arlaatigut malugisimavaa takornartat taakkua Jehovap aallartitarigai, imami oqarfigai: „[Jehova], isinnut saammaannarsiguma uanga kiffat qaangiinnaqinanga.“ * (1 Moses 18:3; naleqqiuguk Mosesimik allakkat aappaat 33:20.) Abrahamip ilisimariinngilaa imminut oqariartuuteqarnersut imaluunniit aqqusaaginnarnersut. Qanorluunniit ikkaluarpat, paasivaa Jehovap siunertaata naammassineqarnissaanut attuumassuteqartut, Jehovallu aallartitarigai. Suliassaminnik naammassinninniarneranni arlaatigut ikiuussinnaassaguni nuannaarluni taamaalioriaannaavoq. Misigaaq Jehovap kiffai ajunnginnerpaamik pineqartariaqartut pitsaanerpaamillu sapinngisaminik tunisariaqarlugit. Tamanna anersaakkut pilluaqqusaanermik kinguneqassaaq, taassumunnga imaluunniit allamut. Abraham Saralu piviusumik inoroorsaarnertik pillugu pilluaqqusaangaarput. — 1 Moses 18:9-15; 21:1, 2.

Inuiaat inoroorsaartut

17. Jehovap inatsinera naapertorlugu Israelikkut takornartanik immikkullu pisariaqartitsisunik qanoq iliorfiginnittussaappat?

¹⁷ Inuiaat Abrahamip kinguaarisaasa taassuma maligassiaa puiorsimanngilaat. Jehovap Israelikkunnut inatsisaani allassimavoq takornartat inoroorsaarfigisassagaat. „[Nunasisoq] nunaqqatissitut iliorfigissavarsi ilissitullu asassallugu. Ilissimi nammineq Egyptenimi nunasisuusimavusi. Uanga tassaavunga [Jehova] Guutersi.“ (3 Moses 19:34) Israelikkut timip piisigut ikiorneqartariaqartunik immikkut isumassuisussaasimapput, imaaliinnarlu taakkuninnga ajattuisussaanatik. Jehovap inerittunik katersugassarissaarnermik pilluaqqugaangatik, nalliuttorsiorfimminni nuannaaraangamik, ukiuni sabbatini sulinngiffeqaraangamik pisunilu allani, pigisakinnerusut — uillarnerit, iliarsuit nunasisullu najugaqavissut — puiortussaanngilaat. — 5 Moses 16:9-14; 24:19-21; 26:12, 13.

18. Sooq Jehovamit iluarisaassagaanni pilluaqqusaassagaannilu inoroorsaartuunissaq pingaartuua?

 ¹⁸ Allat, ingammik annikilliortut, inussiarnisaarfiginissaata, tukkorfiginissaata inoroorsaarfiginissaatalu pingaaruteqassusia takuneqarsinnaavoq Israelikkut tamatuminnga sumiginnaagaangaata Jehovap qisuariartarneratigut. Jehovap erseqqissaavigisarpai imminit pilluaqqusaajuassagunik takornartanut inunnullu annikilliortunut inussiarnisaartuullutillu tukkortuusariaqartut. (Tussiaat 82:2, 3; Jesaja 1:17; Jeremia 7:5-7; Hesekiel 22:7; Sakarja 7:9-11) Maleruaqqusat tamakku allallu maleruaqqissaaraangamikkik Israelikkut ingerlalluartarput, timikkullu anersaakkullu atugarissaartarlutik. Namminneq namminissarsiorlutik noqqaaniangaaleramik annikilliortunullu asannittumik iliortarunnaaramik Jehovap perloqqusinera malugisalerpaat naggataatigullu iluarisaanngitsutut eqqartuussaallutik. — 5 Moses 27:19; 28:15, 45.

19. Suna misissornerussavarput?

¹⁹ Taamaattumik imminut misissortarnissarput pingaartorujussuuvoq paasiniarlugu Jehovap tamatumani uagutsinnik ilimasuffiginninnera naapertorlugu iliornerluta. Tamanna ingammik ullumikkut pingaartorujussuuvoq silarsuarmi anersaaq namminissarsiortoq avissaartuunnartorlu eqqarsaatigalugu. Silarsuarmi avissaartuuffiusumi qanoq ililluta kristumiutut inoroorsaartuusinnaavugut? Tamanna ilanngutassiami tulliuttumi sammissavarput. (wE 1/10 96)

[Quppernerup ataani ilanngussaq]

Apeqqutit uteqqiissutissat

□ Oqaaseq Biibilimi atorneqartoq ’inoroorsaarnermik’ nutserneqartoq qanorpiaq isumaqarpa?

□ Inoroorsaarneq eqqarsaatigalugu Jehova qanoq ililluni maligassaava naammalluinnartoq?

□ Abraham qanoq inoroorsaartigaa?

□ Sooq pallorfiginnittut ilumoortut tamarmik inoroorsaartuusariaqarpat?

[Atuaqqissaarnermi apeqqutit]