Issunngorneq qanoq ililluni?

„ISSUMIMMI pivutit, issunngussaatillu.“ Inuup siulliup, Adamip, oqaatsit taakkua tusaramigit, qanoq pisoqassasoq nalunngilaa. Issumit nunameersumit pinngortitaavoq, issunngoqqissaarlu. Pinngortitsisiminut, Jehova Guutimut, naalannginnami toqusussaavoq. — 1 Moses 2:7, 15-17; 3:17-19.

 Biibilip takutippaa inuk issumit pinngortitaasoq. Allassimavortaaq: „Tarneq ajortuliortoq toqussaaq.“ (Hesekiel 18:4, NV; Tussiaat 103:14) Toqup inuit millionillit aliasutsissimavai, toqusullu timaa qanoq pineqassanersoq aalajangigassat ilagiuarsimavaat.

Qanga maannakkullu ileqqut

Itsaq Guutip innuttaasa toqusut timaat qanoq iliortarsimavaat? Biibilip aallaqqaataata tungaani toqusut qanoq pineqartarsimaneri assigiinngitsut eqqaaneqarput, soorlu nunamut assaallugu ilisineq. (1 Moses 35:8) Ataataanerpaaq Abraham, nulia Sara ernerilu Isak aamma Jakob Makpelap qaarusuani iliverneqarput. (1 Moses 23:2, 19; 25:9; 49:30, 31; 50:13) Israelikkut eqqartuussisui Gideon Samsonilu ’ataatami iliviutaanni’ iliverneqarput. (Eqqartuussisut 8:32; 16:31) Itsaq Guutip innuttaasa ilaqutariit iliveqarfii piumanerusimagunarpaat. Ukiuni hundredelinni siullerni Jesus Kristus toqummat, timaa qaarusummut nutaamut ilivissamut ilineqarpoq. (Matîuse 27:57-60) Nalinginnaasumik oqarsinnaavugut toqusut timaat nunamut allamulluunniit iliverneqartartut. Nunarsuarmi sumiiffiit amerlanersaanni ilisinerit taamaattut suli nalingiinnaapput.

Nunarsuulli ilaani nunamik amigaateqartoqarpoq, tamatumalu kingunerisaanik nunap akisunerata pitsaasunik iliveqarfeqarniarneq ajornakusoortippaa. Taamaattumik ilaasa toqugunik timimik allatut peerneqarnissaat eqqarsaatigisarpaat.

Toqungasup ikuallagaasarnera tamatumalu kingorna arsaanik siaruarterineq nalinginnaagaluttuinnarpoq. Assersuutigalugu Tuluit Nunaanni toqusut 40 procentii taamaaliorneqartarput. Sverigimi, illoqarfinni toqusut 80 procentiinik ikuallaaffiusartumi, orpippassuit ilaat arsanik siaruarteriffittut immikkoortinneqarsimapput. Shanghaimi, Kinamilu illoqarfiit sineriammiittut ilaanni, ukiumut arlaleriarluni ataatsikkut arsanik immamut siaruarterineq pisortanit aningaasaliiffigineqartarpoq.

Arsat sumi siaruarterneqarsinnaappat? Sumi tamaaniunngitsoq. Ilaasa immaqa avatangiisinut ajoqutaanissaat annilaangassutigaat, toqungasumilli ikuallaanerup nappaalanerup tunilaassuussinnaanera tamaat peertarpaa. Tuluit Nunaanni iliveqarfiit USA-milu eqqaassutissatut illoqannginnersat ilaat ivigaqarnersat naatsiiviillu arsanut siaruarteriffissatut immikkoortinneqarsimapput. Toqungasunik ikuallaaneq arsanillu siaruarterineq pillugu Biibilip isumaa soorunami kristumiut immikkut soqutigaat.

Biibili qanoq oqarpa?

’Babylonip kunngianut’ pruffiiti Jesaja ima oqarsimavoq: „Illit iliverneqarnak maangaannaq igitaavutit.“ (Jesaja 14:4, 19) Arsanik siaruarterineq nikanarsagaanermut naligitinneqassava? Naagga, allassimaffiup tamatuma toqungasunik ikuallaaneq arsanillu toqqorsineq siaruarterinerluunniit pinngilaa.

Jesus Kristusip toqusut nunami makititaanissaat, ukiuni tuusintini naalakkersuinermini pissussaq, ima oqaatigaa: ’Iliverniittut tamarmik [Jesusip] nipaa tusarumaarpaat anillutillu.’ (Juánase 5:28, 29) Iliveqarnerup makititaanissamut aalajangiisuunnginnera Biibilimi siulittuutip allap takutippaa. sarĸúmersitat 20:13-imi ima allassimasoqarpoq:  ’Immallu toqusut imminiittut tunniuppai, toqullu toqusullu inaata toqusut imminiittut tunniuppaat.’ Tassa inuk sumi qanorlu ililluni issunngornersoq aalajangiisuunngilaq, kisianni toqusumik Guutip eqqaamanninnera makititaallunilu. (Job 14:13-15; Lúkarse 23:42, 43) Jehovap inuit eqqaamassagunigit ilerrit kusanartorsuit pisariaqartinngilai. Toqungasup ikuallanneqarnera inuup makititaanissaanut akornutaanngilaq. Arsat siaruarterniaraanni, naleqquttumik pissuteqarluni eqqunngitsumillu upperisarsiornermik ileqqulersuutinut attuumassuteqanngippat, Biibilip ajoqersuutaanut akerliunngilaq.

Arsanik siaruarteriniartut, nunagisaminni inatsisai eqqumaffigisariaqarpaat. * Qimagaasut allallu misigissusaat qajassuunnissaat aamma naleqqutissaaq. Jehovap kiffaasa eqqumaffigeqqissaartariaqarpaat tamatumani kristumiutut kiffaanngissutsiminnik atuinermikkut kristumiunik tusaamasaalluartunik tusaamanerlugaalersitsinaveersaarnissartik, ingammik nunani arsanik siaruarterinissamik inerteqqutaaffiunngitsuni, inuiaqatigiinnilu tamatuma akuerisaalluarfiginngisaani. Ileqqulersuutit tarnip toqusuitsuuneranik ajoqersuutinik tunngavillit kristumiut soorunami peqataaffigisinnaanngilaat.

Iliveqarfeeruppat!

Arsanik siaruarterisarnermik tapersersuisut iliveqarfippassuaqannginnissaa pingaartutut taasarpaat. Biibilip neriorsuutaa piviusumik tupaallersaatissaraarput: ’Qinngarsuisut suujunnaarsitassat nunngutissaat tassa toqu.’ — 1 Korintumiut 15:24-28.

Tamanna isumaqarpoq ilerrit iliveqarfiillu, aamma toqungasunik ikuallaanerit arsanillu siaruarterinerit, atorunnaassasut. Aap, toqu peqarunnaassaaq. (sarĸúmersitat 21:3, 4) Adamip ajortuliaa pissutigalugu toqusarneq Guutip naalagaaffiata ataani peeruppat tamanna pissaaq. Taamanikkussamut inuit naalattut issumut utertariaarutissapput. (wE 15/9 96)

[Quppernerup ataani ilanngussaq]

[Qupp. 22-mi assiliartat]

Toqungasut timaasa peerneqartarneranni periaatsit ilaat

[Qupp. 24-mi assiliartaq]

Japanimi Sagami Bayimi arsanik siaruarterineq

[Suminngaanneernera]

Koueisha, Tokyo