Silarsuarmi avissaartuuffiusumi kristumiutut inoroorsaarneq

„Taamaattumik taamaattut inoroorsaartumik ilassisariaqarpavut, sallusuissummut suleqataasinnaaleqqulluta.“ — 3 JUÁNASE 8, (NV).

1. Pinngortitsisup inuit sunik tunisimavai?

„NUANNAARNEQ pitsaanerarpara seqernup ataani inunnut allamik pilluaatissaqanngimmat taamaallaat nerinermik, imernermik nuannaarnermillu. Taamaaliortarsinnaapput inuunerminni sivikitsumi Guutip nunarsuarmi inuuffigititaani suleruloornerminnut ilagitillugu.“ (Nalunaajaasup oqaasii 8:15) Taamatut oqarnermigut ilagiinnik katersortitsisoq hebriiariusoq oqarpoq Jehova Guutip kissaatigiinnanngikkaa pinngortitani nunarsuarmiittut nuannaarlutillu pilluassasut. Aammattaaq tamatuma taakkununnga pisinnaanissaa isumagaa. Inuiaat oqaluttuarisaaneratigut tamatigut takussutissaqarpoq inuit nunarsuarmi sumi tamaaniittut inuunerminnik nuannaarutiginninnissartik nuannisarnissartillu kissaatigisaraat.

2. (a) Inuit qanoq ingasattajaartigilersimappat? (b) Tamanna qanoq kinguneqarsimava?

² Ullumikkut silarsuaq nuannaarniutinik pingaartitsilluinnarfiusoq inuuffigaarput. Biibilimi siulittuutigineqarsimasutut inuit amerlanersaat ’imminnik asasuupput Guutilu  kajumiginagu nuannaarutinut kajumittuullutik’. (2 Timûtiuse 3:1-4) Soorunami taamaattoqalernissaa Jehova Guutip siunertarisimanngilaa. Nuannaarniutinik ujartuineq immini anguniaganngoraangat, imaluunniit imminut iluarusutsinnissaannaq ujartorneqaleraangat, piviusumik nalerisimaarneq anguneqarsinnaajunnaartarpoq, ’suut tamarmik nungujasuinnanngortarput anorillu tiguniarsarineratut suallaataanngitsigalutik’. (Nalunaajaasup oqaasii 1:14; 2:11) Taamaattuminguna silarsuaq inunnik kiserliortunik isumatsassimasunillu ulikkaartoq, tamannalu inuiaqatigiinni ajornartorsiutit ilarpassuinut pissutaavoq. (Ussatit 18:1) Inuit tatigeqatigiikkunnaartarput, ammillu qalipaataa, nagguik, inuttut aningaasatigullu atugarisat tunngavigalugit avissaartuunneqalersarluni.

3. Nuannaarneq nalerisimaarnerlu piviusut qanoq angusinnaavavut?

³ Suut tamarmik allaanerungaassagaluarput inuit Jehovap allanut iliorfiginneriaasia malillugu inussiarnerfigeqatigiillutillu, tukkorfigeqatigiillutillu inoroorsaarfigeqatigiittartuuppata. Jehova oqarsimavoq namminiinnaq kissaatigisat piniarnerisigut pilluarneq piviusoq anguneqarneq ajortoq, najoqqutassialli matuma malinneratigut anguneqartartoq: ’Tunisineq tigusinermit pilluarnarneruvoq.’ (apustilit suliait 20:35) Nuannaarneq nalerisimaarnerlu piviusut angussagutsigik akornutissat avissaartuussutissallu ajoqutaasut peertariaqarpavut. Jehovamut kiffartoqatitsinnut isumassuisuusariaqarpugut. Unnersuussutip matuma, Ny Verden-nutsigaq naapertorlugu ima nipeqartup, maleruarnissaa pingaartorujussuuvoq:  „Taamaattumik taamaattut inoroorsaartumik ilassisariaqarpavut, sallusuissummut suleqataasinnaaleqqulluta.“ (3 Johannes 8) Pisinnaasarput naapertorlugu immikkut pisariaqartitsisunik inoroorsaarfiginninneq marlutsigut ajunngequteqarpoq. Inoroorsaartumut inoroorsaarfigineqartumullu iluaqutaavoq. Kikkut ’inoroorsaartumik ilassineqarnissartik’ pisariaqartissinnaavaat?

’Iliarsuit uillarnerillu takusartarlugit’

4. Ilaqutariittut aaqqissuussaanerup iluani allanngornerit suut Jehovap innuttaasa ilaannik aamma eqquisimappat?

⁴ Ullumikkut ilaqutariit ataqatigiilluartut aappariillu pilluartut qaqutigoorput. Avittut anaanallu kisimiittut amerliartuinnartut pissutigalugit ilaqutariittut aaqqissuussaaneq allanngorluinnarsimavoq. Tamatuma kingunerisaanik ukiuni kingulliunerusuni Jehovamut nalunaajaasunngortartut ilarpassui ilaqutariinnit avissaartuussimasuneersuupput. Immaqa aapparminnit averusersimapput avissimallutilluunniit, imaluunniit ilaqutariinni ataatsimik pilersuisulinneersuullutik. Jesusillu siulittuisimaneratut ajoqersuut taassuma saqqummiussaa ilaqutariit ilarpassuinut avissaartuussutaasimavoq. — Matîuse 10:34-37; Lúkarse 12:51-53.

5. Jesusip oqarneratut suna uppinngitsunik ilaqutallit qiimmaallaatigisinnaavaat?

⁵ Nutaat sallusuissummik aalajangiussilluinnartut takullugit nuannersorujussuuvoq, tuppallersartarpavullu Jesusip neriorsuutaanik qiimmaallannartumik eqqaasillugit: ’Ilumut oqarfigaassi: Inuup kialuunniit  illuni qatanngutiniluunniit angutit qatanngutiniluunniit arnat arniluunniit angunniluunniit qitornaniluunniit nunaatiniluunniit qimakkaluarunigit uanga iivangkiiliulu pilluta, hundredeleriarlugit maanna matumani pisaassavoq illussaminik qatanngutissaminillu arnassaminillu qitornassaminillu nunaatissaminillu, qinugineqaraluartilluni, silallu aappaani inuuneq naassaanngitsoq pissavaa.’ — Mákorse 10:29, 30.

6. ’Iliarsunnut uillarnernullu’ akornatsinniittunut qanoq ililluta ’qatanngutaallutalu anaanaallutalu qitornaasinnaavugut’?

⁶ ’Qatanngutit angutit qatanngutillu arnat anaanallu qitornallu’ taakkua kikkunukua? Imaanngilaq inuppassuit qatanngutinik imminnut taaguuttut naalagaaffilersaartarfimmi takugutsigik ingerlaannaq misigilertartugut uagut taakku qatanngutigalugit, anaanagalugit qitornaralugilluunniit. Manna eqqarsaatigeriassagit: Ajoqersukkap Jakobip eqqaasippaatigut pallorfiginninnerput Jehovap iluarisinnaassappagu ’iliarsuit uillarnerillu naalliunneranni takusartassagivut’. (Jâko 1:27) Tassa aningaasatigut inuttullu atugarissaarnerput pissutigalugu allanit nuimanerusutut imminut isigissanngitsugut misigissutsivullu ilorlerpaat ’iliarsunnut uillarnernullu’ taamaalilluta matussanngikkivut. Akerlianilli siulliulluta inoroorsaarfigisariaqarpavut peqatigisarlugillu.

7. (a) ’Iliarsunnik uillarnernillu’ inoroorsaarfiginninnermi suna siunertaava pingaarneq? (b) Immaqa aamma kikkut inoroorsaarnermik ersersitsisarsinnaappat?

⁷ ’Iliarsunnik uillarnernillu’ inoroorsaarfiginninneq isumaqaannanngilaq timikkut piginngisaannik matussutissiineq. Ilaqutariinni ataasiinnarmik pilersuisulinniittut upperisarsiornikkulluunniit avissaarsimasuniittut tamatigut aningaasassaaleqisuusariaqanngillat. Ilaqutariippalaartumilli peqqinnartumik katerisimaaqataasinnaaneq assigiinngitsunillu utoqqaassusilinnik katerisimaaqateqarsinnaaneq anersaamullu tunngasunik oqaloqateqarsinnaaneq nalilerujussuuvoq. Sassaalliutigineqartut pinnatik asannittumilli ataqatigiinnermik misiginerup pingaarnerunera puiorneqanngippat allaat ’iliarsuit uillarnerillu’ kristumioqatiminnut ilaannikkut inoroorsaartarsinnaassapput. — Naleqqiuguk Kunnginik allakkat siulliit 17:8-16.

Akornatsinni takornartaqarpa?

8. Jehovap Nalunaajaasuisa ilagiivisa ilarpassuini allanngorneq suna pisarpa?

⁸ Ullutsinni inuppassuit nunamut allamut nuuttarput. „Silarsuarmi inuit 100 millioninit amerlanerusut nunani innuttaassuseqarfiginngisaminni inuupput, inuillu 23 millionit namminneq nunamik iluani allatut ajornartumik allamut nuuttariaqalersimapput,“ World Press Review-imi nalunaarutigineqarpoq. Tamatuma kingunerisaanik sumiiffiit ilarpassuini, ingammik illoqarfinni annerusuni, Jehovap nalunaajaasuisa ilagiivisa ilaat siornatigut naggueqatigiinnik inuiannilluunniit ataasiinnarneersunik ilaasortaqarsimagaluartut maanna oqaluussisartunik nunarsuarmit sumit tamaneersunik ilaasortaqalersimapput. Immaqa aamma illit najukkanni taamaappoq. Taamaappat silarsuarmi „allamiut“-nik „takornartat“-nillu taagorneqartut, inuit uagutsinnit allaanerusunik oqaaseqarlutillu ileqqoqarlutillu inooriaaseqartut, qanoq isigisariaqarpavut?

9. ’Allamiut’ aamma ’allanertat’ kristumiut ilagiivinut isertut eqqarsaatigalugit suna nakkarfigisoorsinnaavarput?

⁹ Allamiunik uumissuineq misigilissutiginaveersaassavarput arlaatigut taakkunannga pitsaanerulluta. Imaluunniit sallusuissummik ilisarsinermik immikkut pisinnaatitaaffimmut allamiunit immaqalu kristumiussutsimik tunuliaqutaqanngitsunit qinngaqqunnannginnerusugut. Misigissanngilaguttaaq  nutaat taakkua naalagaaffilersaartarfiup ataatsimeersuartarfiulluunniit atornissaanut uagutsinnit pisinnaatitaaffikinnerusut. Apustilip Paulusip nalimini juutit kristumiut taamatut isumallit eqqaasittariaqarsimavai inummik ataatsimilluunniit annannissamut qinngaqqunnanngitsoqanngikkaluartoq; Guutilliuna ajunngissusia pisassarinngisaraluarput pissutigalugu aatsaat annattoqarsinnaalersimasoq. (Rûmamiut 3:9-12, 23, 24) Nuannaarutigisariaqarparput Guutip ajunngissusia pisassarinngisaraluarput maanna inuppassuarnut immaqa nutaarsiassamik nuannersumik tusarnissaminnut siornatigut periarfissaqarsimanngikkaluartunut anngussimammat. (1 Timûtiuse 2:4) Qanoq ililluta takutissinnaavarput taakkununnga piviusumik asannittuulluta?

10. Qanoq ililluta ’takornartanut’ akornatsinniittunut piviusumik inoroorsaarsinnaavugut?

¹⁰ Paulusip siunnersuutaa malissinnaavarput: ’Taamaattumik ilasseqatigiinniaritsi soorluttaaq Kristusip ilassigaatigut, Guuti naalannarseqqullugu.’ (Rûmamiut 15:7) Paasisariaqarparput inuit nunani allamiut allamillu tunuliaqutaqartut ilaat amerlasuutigut atugarissaarneq ajortut, taamaattumillu sapinngikkaangatta inussiarnernermik isumassuinermillu ersersitsiviginiartariaqarpavut. Akuerisariaqarpavut tamaasalu immikkut ’nunaqqatitsitut’ iliorfigisariaqarpavut ’immitsitullu asallugit’. (3 Moses 19:34) Taamaaliornissaq immaqa oqitsuunngilaq, unnersuussulli manna eqqaamagutsigu tamatumani iluatsissaagut: ’Silallu matuma inui ileqqoqatigeqinasigik, allanngoritsili isumassigut nutaanngorlusi, sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ — Rûmamiut 12:2.

Illernartut aveqatigisigik

11, 12. Jehovap kiffaasa ilaat qanoq immikkut isumassorneqartarpat (a) Israelitoqqami, aamma (b) ukiuni hundredelinni siullerni?

¹¹ Isumassuinermik inoroorsaarnermillu ersersitsivigineqartariaqartut allat tassaapput kristumiut inersimalluartut anersaakkut ikiorniarluta ilungersorlutik suliniartut. Itsaq Israelikkunni Jehova palasinut Levikkunnullu immikkut ileqqoreqqusaliorsimavoq. (4 Moses 18:25-29) Aamma ukiuni hundredelinni siullerni kristumiut kajumissaarneqarsimapput immikkut kiffartuuteqartunik isumassuisaqqullugit. Juánasip agdlagaisa pingajue 5-8 atuarutsigu asanninnerup nimia aalajaatsoq kristumiut siulliit attaveqatigiilluassutigisaat malugissavarput.

¹² Gajusip qatanngutinik angutinik ilagiinnut tikeraaqattaartunik inussiarnisaarfiginnillunilu inoroorsaarfiginissimanera apustilip Johannesip utoqqalisup pingaartittorujussuusimavaa. Qatanngutit taakku, ilaatigut Demetrius, qularnanngitsumik Johannesip allagaanik allakkisartuusoq, siornatigut imminnut ilisarisimanngillat. Angalasulli inoroorsaartumik ilassilluarneqarput ’Guutip aqqa pissutigalugu  aallarsimagamik’. Taamaattumik Johannes ima oqarpoq: „Taamaattumik taamaattut inoroorsaartumik ilassisariaqarpavut, sallusuissummut suleqataasinnaaleqqulluta.“ — 3 Juánase 1, 7, 8, (NV).

13. Ullumikkut kikkut ’inoroorsaartumik ilassineqartariaqartuuppat’?

¹³ Ullumikkut Jehovap peqatigiissortaasa iluanni inuppassuit qatanngutigiinnut tamanut iluaqutissaasumik annertuumik suliaqarput. Soorlu nakkutilliisut angalasartut, sapaatit-akunnerpassuini ilagiinnik qiimmassaajartoqattaarlutik piffissaminnik nukimminnillu atuisartut; ajoqersuiartortitat, nunani allani oqaluussiniarlutik ilaquttaminnik ikinngutiminnillu qimatsisimasut; Betelini immikkoortortaqarfinnilu kiffartortut nunarsuaq tamakkerlugu oqaluussinermik suliaq siuarsarniarlugu namminneq kajumissutsiminnik sulisut; pioneerillu piffissaminnik nukimminnillu annerpaanik oqaluussinermut atuisut. Tamakkua tamarmik ilungersorlutik suliniarput, imaanngitsoq ataqqineqalerumallutik imminuinnarluunniit iluanaarutissinniarlutik, qatanngutigiinnulli kristumiunut Jehovamullu asanninnertik pissutigalugu. Uummammik tamakkiisumik kiffartorneratigut maliinnarnagit aamma ’inoroorsaartumik ilassisariaqarpavut’, tamannami pisassarimmassuk.

14. (a) Qanoq paasisariaqarpa Jehovamut kiffat aalajaatsut inoroorsaartumik ilassigaangatsigik ’sallusuissummut suleqataasartugut’? (b) Sooq Jesus oqarpa Mariap ’ajunnginneq’ qineraa?

¹⁴ ’Taamaattut inoroorsaartumik ilassigutsigik’ Johannesip erseqqissaaneratut ’sallusuissummut suleqataassaagut’. Aamma kristumiuulluarnerulissaagut, kristumiuunerummi nassataraa uppeqatinut ajunngitsuliorneq. (Ussatit 3:27, 28; 1 Juánase 3:18) Allakkuttaaq tamanna imminut akilersinnaavoq. Mariap Martallu Jesus pulaartorigamikku Martap pulaartitsisuulluarumalluni Jesus ’amerlasuunik’ piareersaatilersimavaa. Mariap inoroorsaassutsi allatut ittumik ersersippaa. ’Taanna Jesusip isigaasa saannut ingippoq oqaasiilu tusarnaarlugit,’ ’ajunnginnermillu qinersinera’ pillugu Jesusip nersualaarpaa. (Lúkarse 10:38-42) Sallusuissummi ukiorpassuarni misilittagalinnik unnussioqateqaraangatta oqaluuserisavut katerisimaarnitsinnik nuannersuutitsisarput. — Rûmamiut 1:11, 12.

Pisuni immikkut ittuni

15. Pisut immikkut ittut suut Jehovap innuttaasa nuannaarsaqatigiiffigigajuppaat?

¹⁵ Ileqqut silarsuarmi nalinginnaasut kristumiunit malinneqanngillat, nalliuttorsuillu nalliuttorsiutigineq ajorpaat. Allatigulli katerisimaartarput nuannaarsaqatigiinniarlutik. Assersuutigalugu, Jesus Kanami katittorsiornermut najuussimavoq siullermeerlunilu tupinnartuliornermigut tamaani nuannisarnermut ilasaalluni. (Juánase 2:1-11) Ullumikkuttaaq Jehovap innuttai nuannaarsaqatigiinniarlutik pisuni immikkut ittuni katerisimaartarput, naleqquttumillu qiimmassarneq katerisimaarnernik taama ittunik nuannersuutitsisarpoq. Suna ’naleqquttuugami’?

16. Nuannaarsarluni katerisimaarnerni ileqqorissaarnissatsinnut sunik pitsaasunik najoqqutassaqarpugut?

¹⁶ Biibilimi atuaqqissaarnitsinni paasisimavarput ileqqoq suna kristumiunut naleqquttuusoq, ileqqorlu tamanna sutigut tamatigut atortarparput. (Rûmamiut 13:12-14; Galâsiamiut 5:19-21; Evfisumiut 5:3-5) Katerisimaarnerit, katittorsiornerugaluarunik allamilluunniit pissuteqaraluarunik, kristumiutut maleruagassatsinnik illikartitsinissamut arlaannilluunniit ulluinnarni iliuuseriumanavianngisatsinnik iliuuseqarnissamut kiffaanngissusilinngilaatigut; ileqqullu nunatsinni nalinginnaasut malinnissaat pinngitsoorata pisussaaffiginngilarput. Ileqqut tamakkua ilarpassui eqqunngitsumik upperisarsiornermut upperisapalaanulluunniit  atassuteqarput, ilaallu kristumiunut akuerineqarsinnaanngilluinnartunik ileqqulersornertaqarput. — 1 Pîtruse 4:3, 4.

17. (a) Sukkut erserpa Kanami katittorsiorneq eqqortumik nakkutigineqarsimasoq, aaqqissuulluagaasorlu? (b) Sukkut erserpa katittorsiornermi pisut Jesusip akuerigai?

¹⁷ Juánase 2:1-11-mi erseqqippoq katerisimaarneq angisooq qaaqqusarpassuit najuuffigisaat pineqartoq. Jesusili ajoqersugaalu ’neriartoqqusaasimapput’, tassa namminneerlutik aggiinnanngillat naak ilatik qaaqqusisumut qanigisaagaluartut. Aammattaaq saqisoqarpoq nerliiassalerisoqarlunilu sassaalliutigineqartunik susoqarneranillu nakkutilliisuusumik. Tassuuna erserpoq katerisimaarneq eqqortumik nakkutigineqartoq, aaqqissuulluagaasorlu. Naggataatigullu oqaluttuarineqarpoq Jesusip tupinnartuliornermigut ’naalannassutsi nittaraa’. Pisumi tamatumani ingasattajaartoqarsimasuuppat Jesusip siullerpaamik tupinnartuliani tamaani naammassiumassagaluarnerpaa? Naamerluinnaq!

18. Katerisimaarnernut tamanut atatillugu suna assut eqqumaffigisariaqarparput?

¹⁸ Qaaqqusigaangatta suna eqqarsaatigisariaqarparput? Eqqaamasariaqarparput allanut inoroorsaarnerup siunertarigaa ’sallusuissummut suleqataasinnaalernissarput’. Katerisimaarneq ’nalunaajaasut festernerannik’ taaginnassallugu naammanngilaq. Imminut ima aperisoqarsinnaavoq: Katerisimaarnerput ilumut tassaava nuannanneq kikkuunitsinnik sumillu upperisaqarnitsinnik ersersitsisoq? Katerisimaarnerit taama ittut silamiunik ilaarsinissaq aamma ’uinimmut pilerinartut isinullu pilerinartut usorsitsaarutillu inuunerup matuma pii’ eqqarsaatigalugit qanoq ’sinerpartertigisinnaanitsinnik’ misileraavissatut isiginngisaannartariaqarpavut. (1 Juánase 2:15, 16) Katerisimaartarnitsigut takuneqarsinnaasariaqarpoq Jehovap nalunaajaasorigaatigut, qulakkeertariaqarparpullu iliuutsitta Jehovamut ataqqinaataanissaat. — Matîuse 5:16; 1 Korintumiut 10:31-33.

’Illusisitsisaqatigiigitsi oqalorujunnasi’

19. Sooq orulunata inoroorsaarfigeqatigiittariaqarpugut?

¹⁹ Silarsuarmi pissutsit ajorsiartuinnavitsillugit inuillu avissaartuukkaluttuinnartillugit nimit kristumiunik ilumoortunik ataqatigiisitsisut sapinngisarput tamaat nukittorsartariaqarpavut. (Kulorsamiut 3:14) Taamaattumik ’ilungersorluni asaqatigiinnissamik’ Peterip unnersuussutaa malittariaqarparput. Taava sunarpiaq pinerini ima ersersippaa: ’Illusisitsisaqatigiigitsi oqalorujunnasi.’ (1 Pîtruse 4:7-9) Qatanngutitsinnut inoroorsaarluta siulliulluta iliuuseqarnissatsinnut inussiarnersumillu ikiuiumatuumillu immikkut iliuuseqarnissatsinnut piumassuseqarpugut? Imaluunniit taamaaliornissamut periarfissaqaleraangatta ’oqalorujuttarpugut’, tassa orulusarpugut? Taamaappat ajunngitsuliornerup nuannaarnartua misiginngitsoortarsimassavarput. — Ussatit 3:27; apustilit suliait 20:35.

20. Ullutsinni silarsuarmi avissaartuuffiusumi inoroorsaarnermik ersersitsisarutta qanoq pilluaqqusaassaagut?

²⁰ Kristumioqatitsinnik suleqateqarnerput inussiarnerfigeqatigiillutalu inoroorsaarfigeqatigiittarnerput pilluaqqusaanerpassuarnik nassataqartarpoq. (Matîuse 10:40-42) Taamaaliortut Jehovap neriorsorsimavai ’tuperfigiumaarlugit kingornalu kaalissanatillu imerusulissanngitsut’. Jehovap toqqata iluaniinneq tassa taassumannga sernissorneqarneq taassumanngalu inoroorsaarfigineqarneq. (sarĸúmersitat 7:15, 16; Jesaja 25:6) Qanittukkut Jehovap inoroorsaassusia naassaanngitsumik nuannaarutigisinnaalissavarput. — Tussiaat 27:4; 61:4, 5.

Apeqqutit uteqqiissutissat

□ Pilluarneq nalerisimaarnerlu piviusut angorusukkutsigik suna puiussanngilarput?

□ Kikkut tassaasinnaappat ’iliarsuit uillarnerillu’, qanorlu iliorluta taakku ’takusartarsinnaavavut’?

□ ’Allamiut’ aamma ’takornartat’ akornatsinniittut qanoq isigisariaqarpavut?

□ Ullumikkut kikkut inoroorsaarfigineqartariaqartuuppat?

□ Nuannaarsaqatigiilluni katerisimaarnerni qanoq ililluni takuneqarsinnaava piviusumik inoroorsaarneqartoq?

[Atuaqqissaarnermi apeqqutit]

[Qupp. 16, 17-mi assiliartat]

Takornartanut, iliarsunnut, pioneerinut nuannaarsaqatigiillunilu katerisimaarnernut qaaqqusatsinnut inoroorsaartarsinnaavugut