Aappaqanngitsut allamut saasarneqarnatik Guuti kiffartuussinnaavaat

’Naalakkamut kiffartortuaqqullusi allamut saasarneqarnasi.’ — 1 KORINTUMIUT 7:35, (NV).

1. Korinthimi kristumiut pillugit eqqissiunnaarnartunik sunik Paulus tusarlerneqarpa?

APUSTILIP Paulusip kristumioqatini Grækenlandimi Korinthimiittut isumakuluutigai. Ukiut tallimat tamatuma siorna illoqarfimmi pigissaarfiusumi kanngunartuliorfiusutut ilisimaneqartumi tassani ilagiinnik pilersitsisimavoq. Ukiup 55-ip u.n.k. missaani Efesusimi Asiaaqqamiittumiitilluni Korinthimit isumakulunnartumik nalunaarfigineqarpoq tamaani ilagiinni avissaartuunneqartoq kanngunartuliornerlu ingasattoq ilaginnaannarneqartoq. Aammattaaq kristumiut Korinthimiittut allaffigaat unnersuuteqqullutik kinguaassiuutitigut atoqatigiinneq, aappaqarnani inuuneq, aappariinneq, avinneq kateqqinnerlu pillugit.

2. Korinthimi inuunerlunneq kristumiunik qanoq sunniisimagunarpa?

² Korinthimi killeqanngitsumik kanngunartuliornersuaq ilagiinnik tamaaniittunik marlutsigut attuisimagunarpoq. Kristumiut ilaasa ileqqorlunneq siammarsimaqisoq ersarissumik ajattunngilaat, kanngunartuliornerli ilaginnaannarlugu. (1 Korintumiut 5:1; 6:15-17) Allalli illoqarfimmi tamalikassuseq akerlerluinnaanik qisuariarfigisimagunarpaat, kikkut tamaasa, aamma aappariit, kinguaassiuutitigut atoqatigiinnaveersaarnissaannik kajumissaarlugit. — 1 Korintumiut 7:5.

3. Korinthimiunut allakkamini siullerni Paulusip suna eqqartorpaa?

³ Apustilip Paulusip Korinthimi ilagiinnut allakkamini takisuuni siullermik ataasiussuseqannginnermik ajornartorsiut eqqartorpaa. (1 Korintumiut, kapitali 1-4) Inunnik malinninnginnissaannik kajumissaarpai, tamanna avissaartuunnermik kinguneqaannartarmat. ’Guutip suleqataatut’ ataasiussuseqartariaqaraluarput. Aamma ilagiit ileqqussatigut minguitsuutittuarnissaata pingaaruteqassusia pillugu immikkut unnersuuppai. (Kapitali 5 aamma 6) Taava allakkaminni eqqartugaat akivai.

Aappaqanngitsuunissaq kajumissaarutigineqarpoq

4. Paulusip suna eqqarsaatigaa oqarami ’angut iluanaassasoq arnaq tutinngikkuniuk’?

⁴ Allagaat akillugit ima aallartippoq: ’Allakkasi pillugit imaappoq: Angut iluanaassavoq  arnaq tutinngikkuniuk.’ (1 Korintumiut 7:1) Oqarami ’arnaq tutinngikkuniuk’ pivaa arnamik atoqatiginiarlugu innaqateqarneq. Paulusip kanngunartuliorneq assuarereersimagamiuk tassani innersuussutigaa aappariittut atoqatigiinneq, taamaalillunilu aappaqanngitsuunissaq kajumissaarutigalugu. (1 Korintumiut 6:9, 16, 18; naleqqiuguk Mosesimik allakkat siulliit 20:6; Ussatit 6:29.) Kingusinnerulaartukkut ima allappoq: ’Aappaqanngitsulli uillarnerillu oqarfigaakka: iluanaassapput taamaaginnarunik soorlu uanga ittunga.’ (1 Korintumiut 7:8) Paulus aappaqanngilaq, immaqalu uillarnerulluni. — 1 Korintumiut 9:5.

5, 6. (a) Suup ersarissumik takutippaa Paulusip mattuttutut inuunissaq siunnersuutiginngikkaa? (b) Sooq aappaqanngitsuunissaq Paulusip siunnersuutigaa?

⁵ Kristumiut Korinthimiittut qularnanngitsumik griikerit isumaliutersuutaannik ilisimasaqarput, atuarfeqarmat imminut naaggaarnissamik sukannersumik tapersersuisunik. Tamanna pissutaasimasinnaannginnerpa kristumiut kinguaassiuutitigut atoqatigiinnaveersaarluinnassappata ajussannginnersoq Korinthimiut Paulusimut apeqquteqarnerannut? Paulusip akissutaa griikerit isumaliutersuutaannik malunnartoqanngilaq. (Kulorsamiut 2:8) Katuullit upperisarsiornermik ilisimatuuisut iliornani aappaqarnani imminullu naaggaartuulluni mattuttutut inuunissaq kajumissaarutiginngilluinnarpaa, aappaqanngitsullu immikkut illernassuseqarnerannik aammalu qinnutimikkut inooriaatsimikkullu namminneq annannissaminnut suleqataasinnaanerannik ersersitsinani.

⁶ Paulusip aappaqanngitsuunissaq kajumissaarutigaa ’ajornartoq maannakkut ittoq’ eqqarsaatigalugu. (1 Korintumiut 7:26) Immaqa eqqarsaatigai ullut ajornakusoortut kristumiut atugaat, katikkaannilu suli ajornakusoornerulersinnaasut. (1 Korintumiut 7:28) Kristumiut aappaqanngitsut ima siunnersorpai: ’Iluanaassapput taamaaginnarunik soorlu uanga ittunga.’ Nuleernerit ima oqarfigai: ’Nuliaqanngikkuit nuliassarsiniaqinak.’ Kristumiu uillarneq pillugu ima allappoq: ’Pilluarnerussaaq taamaaginnaruni, tassa isumaga. Isumaqarpungali uangattaaq Guutip anersaava pigigiga.’ — 1 Korintumiut 7:8, 27, 40.

Aappaqanngitsuunissaq pinngitsaaliissutaanngilaq

7, 8. Suup takutippaa Paulusip kristumiut aappaqanngitsuunissaannik pinngitsaalinianngikkai?

⁷ Qularutissaanngilluinnartumik Jehovap anersaavata illernartup Paulus taamatut unnersuussinissaanut siulersorsimavaa. Aappaqanngitsuuneq aappariinnerlu pillugit eqqartugai tamarmik isummamik oqimaaqatigiissumik ingasaassinianngitsumillu ersersitsipput. Tamakkununnga tunngasut aalajaannermut aalajaannginnermulluunniit atassusinngilai. Katissanerluni katissannginnerluniluunniit nammineq aalajangigassaavoq, aappaqannginnissarli kajumissaarutigineqarpoq aappaqanngitsutut ileqqussatigut minguitsuujuaannarsinnaagaanni.

⁸ Paulus oqarsimatsiaannarluni ’angut iluanaassasoq arnaq tutinngikuniuk’ ima oqarpoq: ’Kisianni [kanngunartuliornerup siammarsimanera pissutigalugu, NV] angutit tamarmik namminerisaminnik nuliaqarlit, arnallu tamarmik namminerisaminnik ueqarlit.’ (1 Korintumiut 7:1, 2) Aappaqanngitsulli uillarnerillu immisut ittuaannarnissaannik kajumissaareeramigit ingerlaannaq ima oqarpoq: ’Kisianni nununeq ajuliinnarunik aappanillit, aappanilluni pileritsaannarnermit iluarnerummat.’ (1 Korintumiut 7:8, 9) Nuleernernut ima unnersuussivoq: ’Nuliaqanngikkuit nuliassarsiniaqinak. Kisianni aappanikkaluaruit ajortuliunngilatit.’ (1 Korintumiut 7:27, 28) Oqimaaqatigiissumik unnersuussinerup tamatuma takutippaa katinnissaq nammineq aalajangigassaasoq.

9. Aappariinneq aappaqanngitsuunerlu qanoq ilillutik Jesusip Paulusillu oqarnerattut Guutimit tunissutaappat?

 ⁹ Paulusip takutippaa aappaqanngitsuuneq aappariinnerlu tamarmik Guutimit tunissutaasut. ’Kisianni nungullutik immikkut saammaannermit tunissummik Guutimit pisaqartarput, ilaat allamik, aamma ilaat allamik.’ (1 Korintumiut 7:7) Qularnanngitsumik Jesusip oqaaserisimasai Paulusip tassani eqqarsaatigai. Aappariinnermik aaqqissuussap Guutimeersuunera erseqqissareeramiuk Jesus nassuiaasimavoq Guutip naalagaaffiata soqutigisai tamakkiisumik sammisinnaajumallugit aappaqanngitsuunissamik nammineq kajumissutsimik qinersineq tunissutaasoq immikkut ittoq: ’Oqaaseq tamanna siunersissaavoq tamanut pinnani, siunersissummilli tunineqartuinnarnut. Ilaannimmi angutaassuseeruttoqarpoq arnamik timaata iluanit taamaallutik erniusunik; aamma ilaannik angutaassuseeruttoqarpoq inuit taamaattunngortitaannik; aamma ilaannik angutaassuseeruttoqarpoq imminnik taamaattunngortittunik qilammiup naalagaaffia pillugu. Siunersisaqarsinnaasup siunersiliuk.’ — Matîuse 19:4-6, 11, 12.

Aappaqanngitsuunermik ’siunersisaqarneq’ sumik nassataqarpa?

10. Aappaqanngitsuunissaq qanoq ililluni ’inissaqartinneqarsinnaava’?

¹⁰ Jesusip Paulusillu marluullutik aappaqanngitsuuneq ’tunissutitut’ eqqartorpaat, arlaannaalluunniilli oqanngilaq tamanna tupinnartuliakkut tunissutaasoq inuit ikittuinnaat pigisaat. Jesus oqarpoq tamanna ’siunersissaasoq tamanut pinnani’, pisinnaasullu tamatuminnga ’siunersisaqarnissaannik’, tassa inissaqartitsinissaannik, kajumissaarpai, soorlu Jesus Paulusilu taamaaliortut. Paulus ima allakkaluarpoq: ’Aappanilluni pileritsaannarnermit iluarneruvoq,’ kisianni tassani pivai ’nununeq ajulersut’. (1 Korintumiut 7:9) Siusinnerusukkut allakkamini Paulusip tikkuarsimavaa kristumiut pilerissuseqartuaannarnaveersaarsinnaasut. (Galâsiamiut 5:16, 22-24) Anersaaq najortigalugu saqineq isumaqarpoq alloriarnikkut tamatigut Jehovap anersaavanit siulersortinneq. Tamanna kristumiunut inuusuttunut ajornanngila? Aap, Jehovap oqaasii maleruaqqissaarunikkik. Tussiaasiortoq allassimavoq: „Qanoq ililluni inuusuttup ingerlavini minguitsuutissinnaavaa? Tassa oqaatsisit maleruarunigit.“ — Tussiaat 119:9.

11. ’Anersaaq malillugu saqineq’ qanoq paasisariaqarpa?

¹¹ Tamatuma nassataraa maleruutiinnajassutsimik tv-kkut isiginnaagassiatigut, filmitigut, atuagassiatigut, atuakkatigut erinarsuutillu taallartaasigut malunnartumik timikkullu kissaatigisanik eqeersaasumik mianersorfiginninneq. Kristumiut inuusuttut aapparnatik inoorusuttut ’uinik malinnagu anersaaq malillugu saqisariaqarput, uinimmimmi malinnittut uinngup pii kajungerisaraat, anersaamilli malinnittut anersaap pii kajungerisaraat’. (Rûmamiut 8:4, 5) Anersaap pii naapertuilluartuupput, minguitsuullutik, ileqqorissuullutik asanartuullutillu; tamakku kristumiut tamarmik, inuusuttut utoqqaallu, tamatigut ’eqqarsaatigisassaraat’. — Filípimiut 4:8, 9.

12. Aappaqanngitsuussagaanni suna apeqqutaaginnarpa?

¹² Aappaqanngitsuunermik inissaqartitsissagaanni annerusutigut apeqqutaaginnarpoq uummatikkut aalajangernissaq taavalu Jehova qinnuigalugu aalajangikkamik naammassinninnissamut ikioqqulluni. (Filípimiut 4:6, 7) Paulus allappoq: „Inulli uummammigut aalajangerluinnaruni pisariaqavissutut isiginngikkaluarlugu kisianni nammineq piumasani naalakkersorsinnaaguniuk uummammigullu aalajangersimaguni niviarsiaassutsi attatiinnarumallugu, taanna ajunngitsumik iliorpoq. Tassa, aamma niviarsiaassutsiminik aappariinnermut tunniussisoq ajunngitsumik iliorpoq, niviarsiaassutsiminilli  aappariinnermut tunniussinngitsoq ajunnginnerusumik iliorpoq.“ — 1 Korintumiut 7:37, 38, NV.

Siunertaqarluni aappaqanngitsuuneq

13, 14. (a) Apustilip Paulusip kristumiut aappaqanngitsut aappallillu qanoq imminnut sanilliuppai? (b) Kristumiut aappaqanngitsut aappalinnit sukkut ’ajunnginnerusumik’ iliorpat?

¹³ Aappaqanngitsuuneq immini nersornartuunngilaq. Sunali eqqarsaatigalugu oqartoqarsinnaavaa aappaqanngitsuujuaannartoq ’ajunnginnerusumik iliortoq’? Kiffaanngissutsip aappaqanngitsuunikkut anguneqartup qanoq atornera tamatumunnga aalajangiisuulluinnarpoq. Paulus allappoq: ’Isumakuloqqunngikkaluarpassi. Aappaqanngitsup Naalakkap pii isumakuluutigisarpai qanoq ililluni Naalakkamut iluaritissanerluni; aappaqartulli silap pii isumakuluutigisarpai qanoq ililluni nuliaminut iluaritissanerluni. Aamma uilik niviarsiarlu immikkut inuuseqarput: ueqanngitsup Naalakkap pii isumakuluutigisarpai timimigullu anersaamigullu iluarumalluni; ueqartulli silap pii isumakuluutigisarpai qanoq ililluni uiminut iluaritissanerluni. [Taamatulli oqaluffigaassi ilissinnut ajunngitsussaq pillugu, napititaanissarsi pinnagu, assuarnaatsumik ilioqqullusi Naalakkamullu kiffartortuaqqullusi allamut saasarneqarnasi. NV] — 1 Korintumiut 7:32-35.

¹⁴ Aappaqanngitsut namminissarsiorlutik piffissaminnik atuisut kristumiunit aappalinnit ’ajunnginnerusumik iliunngillat’. Aappaqanngitsuupput ’qilammiup naalagaaffia pinnagu’, kisianni imminnut tunngasut pillugit. (Matîuse 19:12) Angutip arnalluunniit aappaqanngitsup ’Naalakkap pii isumakuluutigisariaqaraluarpai’, ’Naalakkamut iluaritinnissani’ ilungersuutigalugu ’Naalakkamullu kiffartortuartariaqaraluarluni allamut saasarneqarani’. Tassa Jehovamut Jesus Kristusimullu kiffartornermut tunniusimalluinnartariaqarpoq. Aatsaanuna kristumiut angutit arnallu aappaqanngitsut taamaalioraangamik kristumiunit aappalinnit ’ajunnginnerusumik iliortartut’.

Allamut saasarneqarnani kiffartorneq

15. Tunngavilersuut suna Paulusip Korinthimiunut allagaani siullerni, kapitali 7-imi, qitiua?

¹⁵ Kapitalimi tassani Paulusip tunngavilersuutaa imaalillugu ataatsimut eqikkarneqarsinnaavoq: Naak katinnissaq ajorisassartaqanngilluinnaraluartoq, aap, ilaannikkut allaat inassutiginarsinnaasaraluartoq, miserratigineqarsinnaanngilaq aappaqanngitsuuneq kristumiunut angutinut arnanullu allamut saasarneqanngingajallutik Jehovamut kiffartorusuttunut iluaqutaasoq. Aappalik marlunngorluni aveqqasutut ippoq, aappaqanngitsulli allamut saasarneqanngivilluni ’Naalakkap pii’ aallussinnaavai.

16, 17. Kristumiut aappaqanngitsut qanoq ilillutik ’Naalakkap piinik’ aallussinerusinnaappat?

¹⁶ Naalakkap pii suut kristumiup aappaqanngitsup aappalimmit aallunnerusinnaavai? Allami Jesusip eqqartorsimavai ’Guutip pissai’, kristumiup kaasarimut tunniussinnaanngisai. (Matîuse 22:21) Ingammik kristumiup inuuneranut, pallorfiginninneranut  kiffartorneranullu tunngasut pineqarput. — Matîuse 4:10; Rûmamiut 14:8; 2 Korintumiut 2:17; 3:5, 6; 4:1.

¹⁷ Aappaqanngitsut piffissamik Jehovamut kiffartornermut atuinissamut kiffaanngissuseqarnerupput, tamannalu anersaakkut iluaqutigisinnaavaat, kiffartornerannilu qanoq iliuuseqarsinnaatiginerannut sunniuteqarluni. Aamma nammineq atuaqqissaarnissamut isumaliutiginneqqissaarnissamullu piffissaqarnerupput. Kristumiut aappaqanngitsut aappalinnit ajornannginnerusumik Biibilimik atuartarneq pilersaarutiminni inissarsisinnaavaat. Immaqa ataatsimiinnernut oqaluussinermullu piareersarluarnerusinnaapput. Tamakkua tamarmik ’taakkununnga iluaqutissaapput’. — 1 Korintumiut 7:35.

18. Qatanngutit aappaqanngitsut ilarpassuisa qanoq ilillutik takutissinnaavaat ’allamut saasarneqarnatik’ Jehovamut kiffartorusullutik?

¹⁸ Qatanngutit angutit aappaqanngitsut ilagiinni kiffartortut Jehovamut ima oqarnissamut periarfissaqarput: „Piareersimavunga, aallartinnga!“ (Jesaja 6:8) Kiffartortut Toqqakkat Atuarfiannut qinnuteqarsinnaapput, ilagiinni kiffartortut utoqqaanertallu aappaqanngitsut atorfissaqartitsiffiusumi kiffartornissaminnut kiffaanngissuseqartut kisimik tassani atuarsinnaammata. Aamma qatanngutit angutit ilagiinnit ilaaffigisaminnit aallarnissamut periarfissaqanngitsut ilagiinni kiffartortutut utoqqaanertatullu qatanngutiminnik kiffartuussisinnaapput. — Filípimiut 2:20-23.

19. Qanngutit arnat aappaqanngitsut ilarpassui qanoq pilluaqqusaasarpat, ilaatigullu qanoq iliorlutik ilagiinni iluaqutaalluarsinnaappat?

¹⁹ Qatanngutit arnat aappaqanngitsut siunersiorsinnaasaminnik uummammiuminnillu aniatitsiffigisinnaasaminnik ’niaqoqannginnamik’ amerlasuutigut ’nanertuutigisatik Jehovamut tunniuttarpaat’. (Tussiaat 55:23; 1 Korintumiut 11:3) Tamanna ingammik qatanngutinut arnanut Jehovamik asanninnertik pissutigalugu aappaqanngitsuunissaminnik qinersisimasunut pingaartorujussuuvoq. Katissagunik ’Naalakkami’ taamaallaat, tassa Jehovamut kiffartortumik tunniulluinnarsimasumik, katikkumassapput. (1 Korintumiut 7:39) Utoqqaanertat qatanngutinik arnanik aappaqanngitsunik ilagiinniittoqarnera qujamasuutigisarpaat, napparsimasunik utoqqarnillu ikiuillutillu taakkununnga pulaartarmata, tamanut nuannaarutaasumik. — apustilit suliait 20:35.

20. Kristumiut ilarpassuisa qanoq ilillutik takutittarpaat ’Naalakkamut kiffartortuarumallutik allamut saasarneqarnatik’?

²⁰ Kristumiut inuusuttut ilarpassuisa pissutsit atukkatik aaqqissuussimavaat ’Naalakkamut kiffartortuarsinnaaqqullutik allamut saasarneqarnatik’. (1 Korintumiut 7:35) Pioneeritut, ajoqersuiartortitatut imaluunniit Napasuliaq Alapernaarsuiffiup Peqatigiiffiata immikkoortortaqarfiisa ilaanni Jehovamut kiffartorput. Taakkua inuupput nuannaarlutik, ’kanernertullu’ inuummarissinartutut Jehovamit Jesusimillu isigineqarlutik. Inuusuttut taamaattut akornatsinniittut iluaqutaaqaat! — Tussiaat 110:3.

 Aappaqanngitsuunissamik neriorsueqqusisoqanngilaq

21. (a) Sukkut nalunanngila Paulusip aappaqanngitsuunissamik neriorsuuteqarnissaq kajumissaarutiginngikkaa? (b) Paulusip ’niviarsiatoqaalerneq’ eqqaagamiuk suna eqqarsaatigaa?

²¹ Paulusip unnersuussutaani pingaarnersaq tassaavoq kristumiut aappaqanngitsuunissamik qinersisut ’ajunngitsumik iliortut’. (1 Korintumiut 7:1, 8, 26, 37) Kajumissaaqqajanngilaali aappaqanngittuaannarnissaminnik neriorsuuteqarnissaannik. Imali allappoq: ’Kinaluunniit isumaqaruni niviarsiartani ittoorutissaqalissasoralugu niviarsiatoqaaleraluarpat, taamalu pisariaqarpat taava piumasaminik iliorli, ajortuliunngilaq; taamaattut aappanillit.’ (1 Korintumiut 7:36) Oqaaseq griikerisooq (hy·peʹra·kmos) tassani ’niviarsiatoqaalerpoq’-mik nutserneqartoq isumaqarpoq „qutsinnerpaaq qaangerlugu“, tassa kinguaassiuutit sakkortunerpaaffissaannik qaangiisimaneq pineqarluni. Ukiuni arlalinni aappaqanngitsuusimasut katerusulerunik uppeqatiminnik katissinnaapput. — 2 Korintumiut 6:14.

22. Sooq inuusuppallaarluni katinnginnissaq kristumiumut iluaqutaassava?

²² Ukiut kristumiup inuusuttup allamut saasarneqarnani Jehovamut kiffartornermut atugai atorluagaapput. Atoriaannaasumik ilisimassuteqalernissamut, misilittagaqalernissamut paasisimasaqalernissamullu piffissaqartitsipput. (Ussatit 1:3, 4) Guutip naalagaaffia pillugu aappaqanngitsuusimasoq katissagaluaruni meeqqanillu perorsaalissagaluarni akisussaaffimmik nammalluarsinnaanerujussuussaaq. Kristumiut ilaat ukiorpaalunni aappaqaratik piffissartik tamaat Jehovamut kiffartorsimasut peqqissaartumik aappassaminnik qinersisarput qanorluunniit ittumik piffissaq tamaat kiffartornissartik siunertaralugu. Taakku nersortarialerujussuupput.

Apeqqutit uteqqiissutissat

□ Sooq apustili Paulus Korinthimi ilagiinnut allappa?

□ Qanoq ililluta nalunngilarput Paulusip mattuttuunissaq kajumissaarutiginngikkaa?

□ Ilaasa qanoq ilillutik aappaqanngitsuunissaq ’inissaqartissinnaavaat’?

□ Qatanngutit arnat aappaqanngitsut aappaqanngitsuunertik qanoq atorsinnaavaat?

□ Qatanngutit angutit aappaqanngitsut kiffaanngissusertik qanoq ilillutik ’allamut saasarneqarnatik’ Jehovamut kiffartornermut atorsinnaavaat?

[Atuaqqissaarnermi apeqqutit]