Atuartartut apeqqutaat

Psykiaterimut psykologimulluunniit, tassa tarnip nakorsaanut tarnillu pissusiinik ilisimatuumut, nakorsiarneq kristumiumut silatusaarnerua?

Nunat ilaannit nalunaarutit naapertussagaanni ’ulluni kingullerni’ makkunani misigissutsikkut sianissutsikkullu nappaatillit amerlisimapput. (2 Timûtiuse 3:1) Kristumiut uppeqatiminnut taamatut nappaateqartunut assut misiginneqataapput, tamannali ilutigalugu misiutiginngilaat inuup nammineq katsorsartissanerluni katsorsartissannginnerluniluunniit aalajangigassarigaa, katsorsartissagunilu katsorsaariaaeq sorleq qinissanerlugu nammineq aalajangigassarigaa. * „Kialuunniimmi akisussaafik nammineq nammagassani nammattussaavaa.“ (Galâsiamiut 6:5, NV) Skizofreneertut, maniodepressiv psykosertut, isumatsarujussuaqqajuartut, obsessiv-kompulsiv neurosertut (eqqarsaatinit pinngitsaalineqartarneq iliuuseqartitaasarnerlu), imminut ajoquserniartartut allatulluunniit alianartunik nappaateqartut katsorsartereernermik kingorna nalinginnaasumik inuusinnaalersimapput.

Sumiiffiit ilaanni psykoterapeertinneq mutiupajaalersimavoq. Taamaaliortittut ilarpassui annertuumik tarnikkut nappaateqanngikkaluarput, inuunermili ajornartorsiutit ilaannik qaangeruminaatsitsiinnarlutik. Ajornartorsiutilli taama ittut Biibilimi unnersuunneqarfissarsiornikkut pitsaanerpaamik aaqqinneqarsinnaapput. (Tussiaat 119:28, 143) Biibili aqqutigalugu Jehovap ilisimassutsimik eqqarsarsinnaassutsimillu, kiisalu ilisarsinermik piviusumik, tunisinnaavaatigut, tamarmik sianissutsikkut misigissutsikkullu nakussatsitsisinnaasunik. (Ussatit 2:1-11; Eprîarit 13:6) Ilukkut annertuumik akiuuttoqarnera pissutigalugu Guutimut kiffat aalajaatsut ilaannikkut silaatsumik oqaaseqarsinnaasarput. (Job 6:2, 3) Jâko 5:13-16-imi kajumissaarutigineqarpoq taamaattoqartillugu ilagiinni utoqqaanertat ikiortissarsiarineqassasut unnersuunneqaqqulluni. Pineqartoq tassaasinnaavoq anersaakkut napparsimasoq, tarnikkut sakkortuumik tatineqartoq, allanngortinneqarsinnaanngitsumik isumakuluuteqartoq naapertuilluanngitsumilluunniit pineqarsimasutut misigisoq. (Nalunaajaasup oqaasii 7:7; Jesaja 32:2; 2 Korintumiut 12:7-10) Utoqqaanertanit ikiorneqarsinnaavoq, taakkualu ’uuliamik tanissinnaavaat’; taamaaliorsinnaapput unnersuussummik tuppallernartumik Guutip oqaasianeersumik atuilluarnermikkut taassuminngalu ’qinnussinermikkut’. Tamanna qanoq kinguneqarsinnaava? ’Uppertup qinnutaagut napparsimasoq annassavoq, Jehovallu [isumatsassimaneranit imaluunniit Guutimit qimagaasimasutut misigineranit] makitissavaa.’

Taavami anersaakkut paarsisunit ikiorneqareeraluarluni sianissutsikkut ajornartorsiutaa qaangiutinngippat? Taamatut ajornartorsiuteqartut ilaat nakorsamut sukumiisumik misissortissimapput. (Naleqqiuguk Ussatit 14:30; 16:24; Korintumiunut agdlagkat sujugdlît 12:26.) Misigissutsikkut sianissutsikkullu ajuutit timikkut nappaammik pissuteqarsinnaapput. Isumakkut naalliuutillit ilaat timikkut nappaatimikkut katsorsartereeraangamik pitsanngornerusarput. * Isumakkut ajuuteqarneq timikkut nappaammik pissuteqarsorinanngippat immaqa nakorsap, napparsimasup napparsimasulluunniit qanisigisaata piumasaqarneragut, tarnip nakorsaanut imaluunniit tarnip pissusiinik ilisimatuumut innersuussinnaavaa. Oqaatigineqareersutut periarfissamik tamatuminnga qinersinissaq inuup nammineq aalajangigassaraa. Tamanna qinerpagu allat isornartorsiuisussaanngillat assuarinnittussaanatilluunniit. — Rûmamiut 14:4.

Tamatumanili pingaartorujussuuvoq ilisimassutsimit atoriaannaasumit siulersortinnissaq Biibilimilu najoqqutassiat puiunnginnissaat. (Ussatit 3:21; Nalunaajaasup oqaasii 12:13) Timikkut nappaat pineqarpat katsorsaariaatsinik assigiinngitsorpassuarnik qinigassaqarpoq, nalinginnaasut imaluunniit immikkut ittut, soorlu naasut atorlugit katsorsaaneq, akupunkturi (meqqutit atorlugit katsorsaaneq) homøopatiilu (nakorsaatit annikitsunnguamik atorlugit katsorsaaneq). Tarnikkut nappaatinik katsorsaasartuttaaq assigiinngeqisunik periaaseqarput. Tarnip pissusiinik nassuiaasartoqarpoq allanillu inoqarluni inuup siornatigut inuunerisimasaanut ’assaanermikkut’ pissusiinut pissusissamisuunngitsunut misigissusiinullu anniaataasunut pissutaasunik paasiniaasartunik. Inuup pissusilersuutaasigut katsorsaasartut  immaqa napparsimasut allatut pissuseqalernissaannik ikiorsinnaavaat. Allallu isumaqarput sianissutsikkut nappaatit nakorsaatinik imaluunniit aalajangersimasunik nerisaqarnikkut kiisalu vitaminitortarnikkut katsorsarneqarsinnaasut. *

Napparsimasut ilaqutaallu katsorsaariaatsinik qinersiniarnerminni mianersortariaqarput. (Ussatit 14:15) Soqutiginartumik professori Paul McHugh, John Hopkins-universitetip nakorsaatitigut ilisimatusarfiani tarnikkut nappaatinik inuullu ileqquinik ilisimatusarnermut immikkoortortami pisortaasoq, oqarsimavoq tarnikkut nakorsaaniarneq tassaasoq „nakorsaanermut tunngasoq immikkut ittoq ineriartorluarsimanngitsoq. Tarnikkut nakorsaanerup iluani nappaatinik suussusersiinermut katsorsarneqarnissaannullu siunnersuutinut uppernarsaatissanik nassaarnissaq ajornakusoorpoq inuup pissusiisa paasiuminaannerpaartaat pineqarmata — isumarput pissuserpullu.“ Pissutsit tamakkua immikkorluinnaq ittumik iliuuseqarnissamut ilisimasaqaranilu katsorsaaniarnissamut kiisalu ajunngitsumik siunertaqaraluarluni katsorsaaniarnissamut tunngavissiiginnartarput, iluaqutaarpianngitsumik.

Malugisariaqarportaaq tarnip nakorsaat tarnillu pisussiinik ilisimatuutut soraarummeersimasut saniatigut aamma inuppassuaqarmat ilinniarsimanngitsunik nakkutigineqarnatik siunnersuisartutut katsorsaaniartartutullu sulisunik. Napparsimasut ilaasa katsorsaaniartartunut ilinniarsimanngitsunut taama ittunut katsorsartinniaraluarnerminni aningaasarpassuit atorsimavaat.

Tarnip nakorsaanut misilittagaqarluartumut tarnilluunniit pissusiinik ilisimatuumut piginnaassuseqarluartumut katsortissagaluaraanniluunnit eqqarsaatigeqqaagassaqarpoq. Nakorsamut pilattaasartumulluunniit suliaritissagaangatta Biibili tunngavigalugu isummiussimasatsinnik ataqqinninnissaa qulakkeeqqaartarparput. Taamatuttaaq silatusaarnerussanngilaq tarnip nakorsaa tarnilluunniit pissusiinik ilisimatooq upperisarsiornikkut ileqqussatigulluunniit isummiussimasatsinnik ataqqinninngitsoq nakorsiarfigissallugu. Kristumiut ilarpassuisa tarnikkut misigissutsikkullu ajornartorsiuteqaraluartik ’Kristus Jesusitut isumaqarnissartik’ ilungersuutigisarpaat. (Rûmamiut 15:5) Kimut nakorsiarnissartik aammalu eqqarsartaatsimikkut ileqqumikkullu kimit sunnertinnissartik eqqortumik iliorlutik mianersuutigisarpaat. Biibilip inuup pissusilersoriaasianut killilersuutai katsorsaasartut ilaasa pisariaqanngitsutut inuillu sianissutsikkut peqqissusiannut ajoqutaasinnaasutut isigaat. Iliuutsit Biibilip avoqqaarisai, soorlu anguteqatinoortarnissaq allasiornissarlu, akueraat, allaallu siunnersuutigisarlugit.

Isummat taama ittut kukkusumik ’ilisarsinermik’ taagorneqartunut imminnut assortuuttunut ilaapput. (1 Timûtiuse 6:20) Tamakkua Kristus pillugu sallusuissummut akerliupput silarsuup ’ilisimaqqissaarniutaanut salloqittaataanullu’ ilaallutik. (Kulorsamiut 2:8) Biibilip misiligutaa ersarippoq: „Ilisimassut siuneqarnerlu pilersaarutillu iluatsissinnaanngillat [Jehovap] piumasaanut akerliugunik.“ (Ussatit 21:30) Tarnip nakorsai tarnillu pissusiinik ilisimatuut „ajortumik ajunnginneraasut ajunngitsumillu ajorneraasut“ tassaapput ’ikinngutit ajortut’. Inuit sianissutsikkut ajuutaannik ajorunnaarnissaannik ikiornagit ’ileqqut ajunngitsut aserortarpaat’. — Jesaja 5:20; 1 Korintumiut 15:33.

Taamaattumik kristumiup tarnip nakorsaanut tarnilluunniit pissusiinik ilisimatuumut saaffiginnittariaqalersorisup katsorsaasussap piginnaaneri, isumaa tusaamaneqarneralu, kiisalu katsorsaassutiginiagaasa sunniutigisinnaasai misissorluaqqaartariaqarpai. Napparsimasoq nammineq taamaaliorsinnaanngippat immaqa ikinngutaasoq imaluunniit qanigisaasoq inersimalluartoq taamaaliorsinnaavoq. Katsorsaariaatsip aalajangersimasup qinernissaa nalornissutigigaanni ilagiinni utoqqaanertanut oqaloqatigiissutigineqarsinnaavoq — inaarutaasumilli aalajangernissaq inuup nammineq (imaluunniit angajoqqaat imaluunniit uiusup nuliaasullu peqatigiillutik) aalajangigassaraa. *

Ullumikkut ilisimatuussuseq ajuutinik atoruminarsaanissamut qangarnit piginnaasaqarnerujussuuvoq. Sulili timikkut sianissutsikkullu nappaaterpassuaqarpoq ullumikkut katsorsarneqarsinnaanngitsunik pissutsillu aaqqissuussaaneranni matumani allatut ajornartumik naammagalugit atorneqartariaqartunik. (Jâko 5:11) Ullumikkut „inussiaq aalajaallunilu silatooq“, utoqqaanertat ilagiinniittullu tamarmik napparsimasunik annertoqqusersuinissaminnut misiginneqataanissaminnullu piareersimajuartuupput. Aammattaaq nappaataarulluinnarnissaata tungaanut Jehovap napparsimasut nikallujuinnissaannut nakussatsittarpai. — Matîuse 24:45, (NV); Tussiaat 41:2-4; Jesaja 33:24. (wE 1/9 96)

[Quppernerup ataani ilanngussat]