Angajoqqaat, meeqqasi nuannaarutigisigik

„Ataatannut anaanannullu nuannaarutaaniarit.“ — USSATIT 23:25.

1. Angajoqqaat qanoq iliorunik meeqqatik nuannaarutigilersinnaavaat?

NAASOQ naajartortoq naggataatigullu naasorujussuanngorluni kusassaataalersoq isigalugu alutornartaqaaq — ingammik nammineq ikkullugulu paaqqutarisimagaanni! Taamatuttaaq angajoqqaat meeqqaminnik peroriartortunik naggataatigullu inersimasunngorlutik Guutimut kiffanngortunik isumassuisimasut nuannaartaqaat, soorlumi Biibilimi ima allassimasoq: „Iluartup ataataa ilumut qiimmattaatissaqarpoq, silatuumik ernilik ilumut nuannaarutissaqarpoq. Ataatannut anaanannullu nuannaarutaaniarit, ilinnik erniarinnittoq qiimmattaatissiguk.“ — Ussatit 23:24, 25.

2, 3. (a) Angajoqqaat aliasuutissaqalernissartik qanoq ilillutik pinngitsoorsinnaavaat? (b) Meeqqat naasut naarlaat assigalugit nuannaarutaasinnaalissappata suna pisariaqarpa?

² Meerarli isumaminik ’iluartunngorlunilu silatuunngorneq’ ajorpoq. Meeqqat ’aliasuutaalissanngippata’  aamma ’isumakuluutaalissanngippata’ ilungersorluni sulisariaqarpoq, soorlu naasoq kusanartorsuanngortissagaanni taamaaliornissaq pisariaqartoq. (Ussatit 17:21, 25) Assersuutigalugu, naasoq alliartortoq nappaarissunngoqqullugu nukittuunngoqqullugulu qisunnik amitsukujuunik uppinnaveeqquserneqartarpoq. Akuttunngitsumik imerterneqartariaqarpoq; uumasuaqqanut ajoqutaasunut sernissorneqartariaqarpoq, pilutaanillu avalequtaanillu killuillattaaneq kusanartungornissaanut ilasaataasarpoq.

³ Guutip oqaasiani ersersinneqarpoq meeqqat eqqortumik ajoqersorneqartariaqartut, Biibili pillugu ilisimasassanik ’imerterneqartariaqartut’, ileqqut pitsaanngitsut ’killortarnerisigut’ asannittumik perorsaatissinneqartariaqartut ileqqussatigullu ajortunngorsimanermut sernissorneqartariaqarlutik. Taamaattumik ingammik ataataasut kajumissaarneqarput meeqqaminnik ’Jehovamit perorsaallutillu inerterisaqqullugit’. (Evfisumiut 6:4) Tamanna sumik ilaqarpa?

Jehovap oqaasii pingaartikkit

4. Angajoqqaat meeqqatik sumik akiitsoqarfigaat, taamaaliussagaannilu suna pisariaqarpa?

⁴ ’Jehovami inerterillunilu perorsaaneq’ isumaqarpoq Jehovap piumasaa naapertorlugu eqqarsartaaseqalersitsiniaaneq. Tassa angajoqqaat meeqqaminnut Jehovap isumaa pigiliutitinniartariaqarpaat. Aammattaaq perorsaatissiisarnerminni Guutip maligassiaa malittariaqarpaat, tassa ilinniartitsiitigalutik paasinnittumik naveersisarlutik. (Tussiaat 103:10, 11; Ussatit 3:11, 12) Angajoqqaalli taamaaliorsinnaassagunik namminneq Jehovap oqaasia pigiliuteqqaartariaqarpaat, soorlu Guutip pruffiitiata Mosesip Israelikkut ima kajumissaarsimagai: „Oqaatsit taakku peqqussutillu ullumi ilinnut tunniussakka uummammiugiuassavatit.“ — 5 Moses 6:6.

5. Angajoqqaat Israelikkuusut qaqugukkut qanorlu meeqqatik ilinniartittussaasimavaat, qanorlu paasisariaqarpa ’nangeqqiiuarneq’?

⁵ Biibilimik atuaqqissaartarneq, isumaliutiginneqqissaartarneq qinusarnerlu angajoqqaat Mosesip nangilluni inassutaanik malinninnissaminnut iluaqutigissavaat: „[Jehovap oqaasii] qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ Oqaaseq hebriiarisooq „nangeqqittuartassavatit“-mik nutserneqartoq aamma isumaqarsinnaavoq „uterpaa“, „oqaatigeqqittuarpaa“, „pigiliutiteqqissaarpaa“. Malugiuk Jehovap oqaasiisa pingaartittariaqassusiat Mosesip erseqqissaqqikkaa ima oqarluni: „Assannut qilerutissavatit ilisarnaatitut qaannilu inissisimallugit eqqaasitsissutissatut. Allakkit illunni matserfinnut illoqarfiullu isertarfiinut.“ Nalunanngitsumik Jehovap piumasaraa angajoqqaat meeqqaminnik asannittumik soqutiginnittuarnissaat! — 5 Moses 6:7-9.

6. Suut angajoqqaat meeqqaminnut nangeqqittuartartussaasimavaat, tamannalu qanoq iluaqutaasumik sunniuteqarpa?

⁶ Jehovap ’oqaasii taakku’ suunuku angajoqqaat meeqqaminnut pigiliutitinniagassarigaat? Mosesip inatsisinik qulinik taaneqartartut, inuannginnissamik, allasiunnginnissamik, tillinnginnissamik, sallulluni nalunaajaannginnissamik allallu pigisaannik pileritsaassinnginnissamik inassutinik ilaqartut, uteqqammerpai. Ingammik ileqqussatigut piumasarisat tamakku, aammalu ’uummatikkut iluunngarluni tarnikkullu iluunngarluni nukiillu tamakkerlugit Jehova Guutimik asanninnissamik’ peqqussut, angajoqqaat Israelikkuusut meeqqaminnut pigiuliutitinniartussaavaat. (5 Moses 5:6-21; 6:1-5) Ullumikkuttaaq meeqqat assingusumik ilinniartinneqarnissartik pisariaqartinnginnerpaat?

7. (a) Meeqqat Biibilimi sumut assersuunneqarpat? (b) Suna massakkut sammissavarput?

⁷ Ataatat Israelikkuusut ima oqarfigineqarput: „Nuliat viinnequtitut inerittoqarluartartutut issaaq illunni. Ernitit orpittut olivenilittut naallualersutut issapput nerriviit kaajallassimallugu.“ (Tussiaat 128:3) Angajoqqaalli meeqqatik imminnut aliasuutaalissanngippata  nuannaarutaalissappatalu ullut tamaasa soqutiginninnermik ersersitsivigisariaqarpaat. (Ussatit 10:1; 13:24; 29:15, 17) Misissulaariartigu angajoqqaat qanoq ilillutik meeqqatik imminnut nuannaarutaalersumik ajoqersorlugillu, anersaakkut imerterlugillu, sernissorlugillu asannittumik perorsarsinnaaneraat.

Naalungiarsuunerannit ajoqersorsigik

8. (a) Kikkut Timoteusimut ’uppinnaveeqqutaasimappat’? (b) Timoteus qanga ilinniartinneqalersimava, qanorlu kingunilimmik?

⁸ Timoteusimi ilinniutissaalluartumik maligassaqarpugut. Taanna uppinnaveeqqutinillusooq aalajaatsunit — anaanaminit aanaminillu — napparissarneqarluarlunilusooq peroriartortinneqarsimavoq. Timoteusip ataataa griikeriuvoq qularnanngitsumillu uppinngitsuulluni, taamaattumik anaanaata juutiusup, Eunikep, aanaatalu, Loisip, ’naalungiarsuuneranilli allakkanik illernartunik’ ajoqersorsimavaat. (2 Timûtiuse 1:5; 3:15, NV; apustilit suliait 16:1) ’Jehovap pissaanera tupinnartuliaalu’ pillugit Timoteusimik naalungiarsuuneranilli eqiasuillutik ajoqersuisimanerat annertuumik pilluaqqusaavoq. (Tussiaat 78:1, 3, 4) Timoteus immaqa suli inuusuttuaraatilluni nunanut ungasissunut ajoqersuiartortitaasalersimavoq ilagiillu kristumiut siulliit nukittorsarneranni pingaaruteqarluarsimalluni. — apustilit suliait 16:2-5; 1 Korintumiut 4:17; Filípimiut 2:19-23.

9. Meeqqat inuusuttullu qanoq ilillutik pigisanik pingaartitsivallaarnermut napitinnaveersaarnissartik ilikkarsinnaavaat?

⁹ Ilissi angajoqqaat, ’uppinnaveeqqutitut’ qanoq ittuuisi? Assersuutigalugu, meeqqassi pigisanik oqimaaqatigiissumik isiginnilernissaat kissaatigaasiuk? Taamaappat maligassiuilluartariaqarpusi suut nutaaliaasinnaasunnguit tamaasa allallu pisariaqartinngisasi piniartarnagit. Pigissaarutinik pingaartitsisuuguit tupaallaatigissanngilat meeqqavit tamatumuuna malippatsit. (Matîuse 6:24; 1 Timûtiuse 6:9, 10) Naasut uppinnaveeqqutitik napparissuunngippata taava qanoq ilillutik napparissunngorsinnaassappat?

10. Angajoqqaat kimit siulersorneqarnissartik ujartortuartariaqarpaat, qanorlu pissuseqarlutik?

¹⁰ Angajoqqaat meeqqaminnik asannittut taakkuninnga ajoqersuiniarnerminni Guutimut siulersortinnissartik ujartortuartarpaat, meeqqaminnut anersaap tungaatigut ajunngitsussaq eqqarsaatigiuarlugu. Anaanaq sisamanik meeralik ima oqaluttuarpoq: „Meeqqavut allaat suli inunngunngitsut Jehovamut qinusarpugut ikioqqulluta angajoqqaajulluarnissatsinnik, Oqaasianit siulersortinnissatsinnik inuunitsinnilu tamakkua atornissaannik.“ Ima nangippoq: „Jehova oqaasiinnakkuunngitsoq inooriaatsitsinnili tamatigut salliutipparput.“ — Eqqartuussisut 13:8.

„Imerteriuarit“

11. Naasut naarlaat naalluarsinnaassappata, tamatumunngalu assingusumik meeqqat inuusuttullu ineriartorluarsinnaassappata, suna pisariaqarpa?

¹¹ Naasut imerterneqartuartarnissartik pisariaqartittarpaat, soorlumi nalunngikkipput naasut kuup sinaaniittut naggorissorujussuusartut. (Naleqqiuguk sarĸúmersitat 22:1, 2.) Meeqqat sallusuissummik Biibilimeersumik aalajangersimasumik akuttussusilimmik ’imerterneqartuartarunik’ anersaakkut ineriartorluassapput. Meeraaqqattaaq aalajangersimasumik akuttussusilimmik imermik assersuutaasumik Biibilimeersumik ’imerterneqartarunik’ anersaakkut ineriartorluassapput. Meeqqalli tamarmik immikkut eqqarsaqqissaarsinnaassusiat eqqarsaatigisariaqarpoq. Immaqa naatsunnguakkuutaarlugit akulikitsumilli ilinniartinneqartarnissaat pitsaanerussaaq takisuumik akuttusuumillu ilinniartinneqartarnissaannit. Annikitsunnguakkuutaamik pitsaasumilli tunisisarnerup naleqassusia suusupaginaveersiuk. Angajoqqaat meeqqallu ataatsimooqatigiittarunik ataqatigiinnerulissapput. Tamanna Biibilimi arlaleriarluni siunnersuutigineqarpoq. — 5 Moses 6:6-9; 11:18-21; Ussatit 22:6.

12. Sooq meeqqat qinoqatigisariaqarpat?

 ¹² Meeqqat ullup naanerani aamma sammineqarsinnaapput. Inuusuttoq ima eqqaamasaqarpoq: „Angajoqqaavut unnuit tamaasa siniffitta eqqaannut pisarput namminerlu qinnutivut tusarnaartarlugit.“ Taamaaliortarnerup naleqassusia pillugu alla ima oqarpoq: „Tamanna pissutigalugu unnuit tamaasa sininnialinnginninni Jehovamut qinuneq ileqquliussimavara.“ Meeqqat ullut tamaasa tusartarunikkik angajoqqaatik Jehovamik eqqartuisut taassumunngalu qinusut, Jehova kinaassusilivittut isigilissavaat. Angut inuusuttoq ima oqarpoq: „Sequnngerlunga Jehovamut qinuninni takorloortarpara kinaassusilivik aataatut pissusilik. Angajoqqaama ikiorpaannga paasitillugu Jehovap iliuutsivut oqaatsivullu tamaasa malinnaaffigigai.“

13. Suut aalajangersimasumik ilinniartitsinermut aamma ilaasinnaappat?

¹³ Meeraaqqat sallusuissummik Biibilimiittumik pigiliussigasuarsinnaanerussapput angajoqqaat taakkuninnga aalajangersimasumik ajoqersuinertik atoriaannaasunik imaqartittarpassuk. Angajoqqaat marlunnik suli inuusuttuaranngunngitsunik meerallit ima oqarput: „Meeqqatsinnik ilinniartitsinitsinnut aallarniutitut naalungiarsuunerannilli naalagaaffilersaartarfimmi nipiliornatik issianissaannik ilinniartilersimavavut.“ Ataataasup ilaquttanilu qanoq iliortarsimanertik ima oqaluttuaraa: „Biibilimi atuakkat aqqi tamaasa pappialanut kipparissunnguanngorlugit qiortakkanut allattoriarlugit tulleriiaarlugit iliorarnissaat tulleriiaarluta ilinniartarparput. Taamaaliornissarput meeqqat qilanaariuaannarpaat.“ Ilaqutariit ilarpassui nerinissaq sioqqullugu nerereernermiluunniit ilinniartitsisarput. Ataataq alla ima oqarpoq: „Ullormut allassimaffik unnukkorsiorluta nerinitsinni oqaloqatigiissutigilluartarparput.“

14. (a) Anersaakkut suliassat pissarsinartut suut aamma meeqqat peqataaffigisinnaavaat? (b) Meeqqat ilikkagaqarsinnaassusiat qanoq annertutigaa?

¹⁴ Aammattaaq meeraaqqat Biibilimi oqaluttuaatikka-mi oqaluttuat takorlooruminartut tusarnaassallugit nuannarisaqaat. * Aappariit ima oqaluttuarput: „Meeqqavut minnerugallarmata ’Biibilimik oqaluttuaatikka’-mit oqaluttuat ilaannik atuareeraangatta meeqqat atisalersoriarlutik isiginnaartitsisarput. Taamaaliortarnertik nuannareqaat, atuaqqissaarnitsinnilu tamani oqaluttuamik ataasiinnaanngitsumik sammisaqarusuttarput.“ Meeqqassi ilikkagaqarsinnaassusiat suusupaginngisaannarsiuk! Meeqqat sisamanik ukiullit ilaasa ’Biibilimit oqaluttuaatikka’-mit oqaluttuat naallugit alanngaarsinnaalersimavaat allaallu Biibilimi atuarnissartik ilikkarsimallugu. Niviarsiannguaq oqaluttuarpoq pingasunik affarmillu ukioqarluni Biibilimi oqaaseq aalajangersimasoq kukkullugu taajuartarsimallugu, ataatamili kajumissaartuartarsimagaani eqqortumik taasinnaalernissaa sungiusartuaqqullugu.

15. Ilaqutariit atuaqqissaarnerminni aamma suut sammisinnaavaat, suullu takutippaa tamanna iluaqutaasoq?

¹⁵ Meeqqannik peqateqartarnitit sallusuissummik allanut aveqateqarnissaannik ilinniartitsinermut atorsinnaavatittaaq, soorlu ataatsimiinnerni akisarnissaannik ilinniartillugit. (Eprîarit 10:24, 25) „Sungiusarnitsinni nammineq oqaatsinnik akeqquneqartarpunga,“ inuusuttup eqqaamavaa, „paasinngivillugu atuaannarlunga akeqqusaanngilanga.“ Imaqarluartumittaaq oqaluussinermut peqataanissaannik meeqqat ilinniartinneqarsinnaapput. Arnaq angajoqqaanit Guutimit mianerinnittunit perorsarneqarsimasoq ima nassuiaavoq: „Angajoqqaatta oqaluussinerminni kalitakuluinnaaqqunata peqataatittarpaatigut. Nalusanngilarput peqataasussaalluta, matukkut kasuttornerinnaagaluarpalluunniit imaluunniit naqitaaqqamik tunniussinerinnaagaluarpalluunniit. Sapaatip-akunnerata naaneri tamaasa oqaluussinissamut piareersarnitsinni oqaasissavut sungiusartarpavut.  Arfininngornermi iteraangatta aperisariaqarneq ajorpugut oqaluussiartussanerluta, naluneq ajorparput oqaluussiartortussaalluta.“

16. Sooq meeqqat ilagalugit ilaqutariittut atuaqqissaaqatigiinneq aalajangersimasuusariaqarpa?

¹⁶ Meeqqat aalajangersimasumik ilinniartittarnissaata Biibilimilu sallusuissutip ernganik ’imertertuartarnissaata’ pisariaqassusiat ingasaallugu erseqqissarneqarsinnaanngilaq. Sapaatip-akunneranut aalajangersimasumik ilaqutariittut atuaqqissaaqatigiittarneq pingaarluinnaqqissaartuuvoq. Ataatap marlunnik meerallip qularinngilluinnarpaa ’aalajangersimaqqissaartuunnginneq meeqqanut narrutsannartuulluinnartoq’. (Evfisumiut 6:4) Taanna ima oqaluttuarpoq: „Nuliaralu sapaatip-akunnerani ullormi aalajangersimasumi piffissamik aalajangiisimavugut, isumaqatigiissutaareersorlu eqqortillugu tamatigut ilaqutariittut atuaqqissaaqatigiissitsisarpugut. Sivitsunngitsoq meeqqat piffissaq aalajangigarput atuaqqissaarfissatsitut aalajangersimasutut isigilerpaat.“ Meeqqanik naalungiarsuuneranniilli tamakkuninnga tamanik ilinniartitsineq pingaartorujussuuvoq, soorlu ussateqartoq ’orpik naarlaajutilluni napparissarneqartariaqartoq’.

17. Meeqqat Biibilimik ilinniartinneqarnerattulli suna pingaartigaa?

¹⁷ Meeqqat Biibilimik ilinniartinnissaat pisariaqarpoq, taamatulli pingaartigaaq angajoqqaat maligassiuinissaat. Meeqqavit takusarpaatsit illit atuaqqissaartutit, ataatsimiigiartuaannartutit oqaluussiartortartutillu? Kajumillutillu Jehovap piumasaatut iliortutit upperissallugu pissutissaqarpat? (Tussiaat 40:9) Maligassuinerit aalajangiisuusorujussuuvoq. Arnap anaanani, uiminit akerlilersorneqaraluarluni meeqqaminik Jehovamut aalajaallutik nalunaajaasunngornissaannik perorsaasimasoq, ilisarnaqisumik ima oqaatigaa: „Maluginiarnerpaasimasara tassaavoq anaanama nammineq maligassiuinera — tamanna oqaatsinit kimeqarneruvoq.“

Meeqqanik sernissuineq

18. (a) Angajoqqaat qanoq iliorlutik meeqqat pisariaqartumik sernissorsinnaavaat? (b) Israelimi meeqqat qanoq ilillutik kinguaassiornermuttaaq tunngasunik ilinniartinneqartarsimappat?

¹⁸ Soorlu naasut naarlaat uumasuaqqanut ajoqutaasunut sernissorneqartariaqartut, meeqqattaaq aaqqissuussaanermi ajortunngornartumi matumani ’inunnut ajortunut’ sernissorneqarnissartik pisariaqartippaat. (2 Timûtiuse 3:1-5, 13) Angajoqqaat qanoq ilillutik meeqqatik sernissorsinnaavaat? Taamaaliorsinnaapput ilisimassummik Guutimeersumik pigisaqalersinniarnerisigut. (Nalunaajaasup oqaasii 7:12) Jehovap Israelikkut, aamma „meeqqat“, peqqusimavai Inatsisit atuffassissutigineqaraangata tusarnaartassasut. Taamaalillutik aamma meeqqat kinguaassiuutinut tunngasut iluini eqqortut eqqunngitsullu pillugit tusagaqartarput. (5 Moses 31:12; 3 Moses 18:6-24) Kinguaassiuutit, ilaatigut ’issuit’ aamma ’angutaassutit’, eqqaaneqartuartarput. (3 Moses 15:1-3, 16; 21:20; 22:24; 4 Moses 25:8; 5 Moses 23:10) Ullumikkut silarsuarmi sumi tamaani ajortunngorsimaneq pissutigalugu pisariaqarpoq meeqqat paasitissallugit kinguaassiuutit sumut atorneqartussaasut sumullu atorneqartussaanngitsut, aammalu kinguaassiuutit pinngortitanut Guutip ’ajunngingaartunut’ taasaanut ilaasut. — 1 Moses 1:31; 1 Korintumiut 12:21-24.

19. Kinguaassiuutitik pillugit suut meeqqat ilisimasariaqarpaat?

¹⁹ Ajunnginnerussaaq angajoqqaat, angajoqqaarsialluunniit, peqatigiillutik meeraq paasitissappassuk kinguaassiuutaasa suunerannik allallu tamakkuninnga attuisussaannginnerannik. Meeqqanik atornerluiniartartut paasiniaqqaartarpaat pinngitsuusaarlutik kinguaassiuutitigut qaninngoornerminnut meeraq qanoq qisuariassanersoq. Taamaattumik meeqqap aalajangersimalluinnartumik naaggaarnissani qaninngoortullu angajoqqaaminut oqaatiginissaanik paasitinnissaa ilinniartariaqarpai. Nuanniitsumik attuuanninniartut tamaasa, qanorluunniit sioorasaarigaluarpata,  oqaatigisarnissaannik meeqqat eqqaasittuartariaqarput.

Asannittumik perorsaatissiineq

20. (a) Perorsaatissiineq naasullu kanaartaannik pilutaannillu killuineq sukkut assigiissuteqarpat? (b) Perorsaatissiineq aallaqqaammut qanoq misiginarpa, qanorli kinguneqartarpa?

²⁰ Meeqqat asannittumik perorsaatissinneqartarnertik iluaqutigisarpaat, soorlu naasup killorneqartarnini iluaqutigisaraa. (Ussatit 1:8, 9; 4:13; 13:1) Avalequtit kusanaallisimasut piiarneqaraangata naggorissortaat uummaarinnerulersarput. Pigisanik pingaartitseriartarnerit ajortunillu ikinngusersorniartarnerit imaluunniit aserornartunik aliikkusersorniartarnerit avalequtitut kipineqartariaqartutut ipput. Tamakku peerneqareerpata aatsaat anersaakkut ineriartortoqalersinnaavoq. Perorsaatissinneqarneq nuannersuunngilaq, soorlu killuineq naasumik qisuariartitsisinnaasoq. Perorsaatissiinerulli iluaqutissartaa tassaavoq meeqqavit illit kissaatigisattut nutaamik ineriartoqqilernera. — Eprîarit 12:5-11.

21, 22. (a) Suup takutippaa perorsaatissiineq perorsaatissiisumut perorsatissinneqartumullu nuanniitsuusoq? (b) Sooq angajoqqaat meeqqaminnik perorsaatissiinissartik tunuarsimaarfigisariaqanngilaat?

²¹ Aap, perorsaatissiineq perorsaatissiisumut perorsaatissinneqartumullu aallaqqaataani nuannerneq ajorpoq. „Ernerma angut inuusuttoq alla, ilagisartagapalaajunera pissutigalugu utoqqaanertat uannut mianersoqqussutigisimasaat, ilagisartorujussuunikuuaa,“ ataataasoq oqaluttuarpoq. „Siusinnerusukkut iliuuseqarsimasariaqaraluarpunga. Ernera toqqaannartumik eqqunngitsulioqataanngikkaluarpoq, sivisuumilli ’silattorniaasaarpoq’.“ Ernera ima oqarpoq: „Ikinngutiginerpaasara ilageqqusaajunnaarmat aliasuttorujussuuvunga,“ imali nangilluni: „Taamatulli aalajangerneq silatusaarneruvoq, kingunitsiannguami taanna anisitaavoq.“

²² „[Perorsaatissinneqarneq] anusinngorsagaanerlu inuunermut aqqutaapput,“ Guutip oqaasiani allassimavoq. Perorsaatissiinissaq qanorluunniit ajornakusoortigigaluarpat taamaaliornissaq nangaaffigisariaqanngilaq. (Ussatit 6:23, NV; 23:13; 29:17) Meeqqat perorsaatissinneqartarsimanertik kingorna qujamasuutigilissavaat. „Eqqaamavara angajoqqaama perorsaatissikkaangannga kamattarlunga,“ niviarsiannguaq oqaluttuarpoq. „Massakkulli kamannerujussuussagaluarpunga perorsaatissinnaveersaartarsimasuuppannga.“

Iliuuseqarneq imminut akilersinnaavoq

23. Meeqqanik asannittumik soqutiginnissimaneq qanoq ajunngitsumik kinguneqartarpa?

²³ Manna qularnanngilluinnarpoq: Meeqqat angajoqqaaminnut allanullu nuannaarutaasut ullut tamaasa asannittumik soqutiginnissimanerup inernerai. Suliamili tamatumani ilungersuutigisimasat imminnut akilerluarsinnaapput, timikkut anersaakkulluunniit qitornat pineqaraluarpata. Apustili utoqqalisoq Johannes taamatut misigisimavoq imatut allakkami: ’Matumannga annerusumik tipaatsuutigisaqanngilanga: qitornakka tusaraangakkit sallusuissut eqqorlugu saqisut.’ — 3 Juánase 4. (wE 1/12 96)

[Quppernerup ataani ilanngussaq]

Eqqaamaviuk?

□ Naasut naarlaat meeqqallu inerilluassagunik suna pisariaqartippaat?

□ Angajoqqaat qanoq ilillutik assersuutaasumik uppinnaveeqqutitut issinnaappat?

□ Ilaqutariittut atuaqqissaaqatigiinneq sunik ilaqartinneqarsinnaava, meeqqallu sumut naaggaarnissartik ilinniartariaqarpaat?

□ Meeqqat perorsaatissinneqartarnertik qanoq iluaqutigisarpaat, soorlu naasut killorneqartarnertik iluaqutigisaraat?

[Atuaqqissaarnermi apeqqutit]

[Qupp. 9-mi suminngaanneernerat]

Green Chimney’s Farmip akuersineratigut