Aserukkat akornanni ikiuiniarneq

AJUNAARNERSUAQAREERNERANI eqqorneqartunik ikiuiniartut nersorneqartariaalluinnarput. Ikiuiniarnerni illut sanaqqinneqartarput, ilaqutariit ataatsimuulerseqqinneqartarput, minnerunngitsumillu, inuit annaanneqartarput.

Ajunaarnersuaqaraangat Jehovap nalunaajaasuisa qujamasullutik silamiut ikiuiniutaat atorluartarpaat. Tamannalu ilutigalugu Biibilimik tunngaveqartumik pisussaaffigaat ’ajunngitsuliornissartik, pingaartumilli uppeqatiminnut’. (Galâsiamiut 6:10) Aap, Jehovap nalunaajaasui qanigisariittut imminnut isigipput; ilaqutariissuartut ippugut. Taamaattuminguna aamma immitsinnut qatanngutinik taaguuttartugut. — Naleqqiuguk Mákorse 3:31-35; Fîlimût 1, 2.

Taamaattumik ajunaarnersuaqartillugu Jehovap nalunaajaasuisa iluini utoqqaanertat immikkut iliuuseqartarput ilagiinnut ilaasortaasut pissarsiariniarlugit pisariaqartitaallu nalilerniarlugit,  taavalu pisariaqartumik ikiorsiisarlutik. Accrami Ghanamiittumi, San Angelomi USA-miittumi Kobemilu Japanimiittumi taamatut pisoqarsimanera sammeriartigu.

Accra — „Noap nalaanisut ulersuaararnera“

Unnukkut aqqarnup missaani siallilerpoq, nalunaaquttallu akunnerpassuini kipisuitsumik siallerpoq. „Sialussuaq sakkortungaarmat ilaqquttakka tamarmik sininngillat,“ John Twumasi, Accrami Jehovap nalunaajaasuisa ilaat, oqaluttuarpoq. Sialussuarnera tamanna Daily Graphic-imi taaneqarpoq „Noap nalaanisut ulersuaararnera“-tut. „Pigisavut qalianut nutsernialeraluarpavut,“ John nangippoq, „qalianulli matu mapperippullu imeq kuuttorsuanngorpoq.“

Oqartussaasut inunnik qimarngussinissamik kalerrisaaripput, inuilli ilarpassui aallarusuppallaanngillat, angerlarsimaffitsik inueruppat imermik ulikkaaraluaruniluunniit tillinniarfigineqaqinammat. Ilaat piumagaluarlutik saperput. „Anaanagalu matu mapperneq ajuleratsigu,“ niviarsiaraq Paulinamik atilik oqarpoq. „Imeq qaffaraluttuinnarmat nappartanut qisummik sanaanut qaqilluta qaliap quassuttuui najummatserfigaavut. Kiisami ullaassakkut tallimanut sanilivut takkupput annaallutalu.“

Jehovap Nalunaajaasui piaarnerpaamik sulinialerput. Kristumiu qatanngut arnaq Beatricemik atilik ima oqaluttuarpoq: „Ilagiinni utoqqaanertat ujarsimalluta kristumioqatitta illuani qimarngoqqasugut nanivaatigut. Qarsutsinersuaqareerneranit ullut pingasuinnaat qaangiuttut ilagiinnut ilaasortanik inuusunnerusunik ilaqarlutik takkupput illullu iluani silataanilu marullummik piiaaqatigilerluta. Napasuliaq Alapernaarsuiffiup Peqatigiiffiata eqqiaanermut atortunik, qalipaatinik, madrassinik, tippinik, annoraaminernik meeqqallu atisaannik tunivaatigut. Qatanngutitta nerisassanik ullunut arlalinnut naammattunik pajuppaatigut. Tamanna killitsissutigeqaara.“

John Twumasi, siusinnerusukkut issuarneqartoq, ima oqarpoq: „Ineqarfitsinni najugaqartut allat oqaluttuuppakka Napasuliaq Alapernaarsuiffiup Peqatigiiffia eqqiaanermut atortunik ineqarfitta tamarmi eqqiarneqarnissaanut naammattunik nassiussisimasoq. Ineqartut ilaat 40-t missaanniittut eqqiaaqataapput. Eqqiaanermut atortut ilaat sanilinnut, ilaatigut palasimut, tunniuppakka. Suleqatikka isumaqarsimagaluarput Jehovap nalunaajaasui uppeqatiminnuinnaq asannittuliortartut.“

Qatanngutit angutit arnallu ikiorneqarnertik qujamasuutigeqaat. Qatanngut Twumasi naggataatigut ima oqarpoq: „Naak qarsutsinersuaqarnerani annaasama aningaasatigut nalingi ikiuutit nalinginit annerugaluartut, Peqatigiiffik asannittuliorallartillugu ilaquttakkalu misigivugut annaasatsinnit annerungaartumik tunineqarsimalluta.“

San Angelo — „Soorlumi tassa silarsuaq aseroraluttualersoq“

Anorersuit kaavittuliortut maajip 28-ani 1995-imi San Angelomi perlussiortitsillarmata orpiit sorlatik ilanngullugit uppikaapput, innaallagissamullu aqqutit nappaqqutitik nallormata aqqusiniinnarmiilerput. Nalunaaquttap-akunneranut kilometerit 160-it angullugit anorersuarmat pisortat illuutaat aseruatiterneqarput. Angerlarsimaffiit 20.000-it missaanniittut innaallagiaarupput. Taava nataqqornaleqaaq. Silasiortunit nalunaarutigineqarput „nataqqornat golfertut arsaaraattut atsigisut“ kingornalu „nataqqornat softballertut arsaaraattut atsigisut“ (10 centimeterip missaani diameterillit) kiisalu piffissap  ilaani „nataqqornat naatitatut grapetut atsigisut“. Ittussuaq qoqianngunaannarpoq. Soorlu najugaqartut ilaat oqartoq: „Soorlumi tassa silarsuaq aseroraluttualersoq.“

Silarlussuaq nipaannermik aarleritsannaannartumik malitseqarpoq. Inuit angerlarsimaffimminnit aseruatitersimasunit arriitsumik anialerput aserukkat misissorniarlugit. Orpiit amiakkuusut pilutaarussimapput. Illut napasutuaalersut allaanngillat qalipaajakkat. Nunap ilaa nataqqornat apusininnguullutik ulissimavaat meteri ataaseq tikillugu issussuseqarlutik. Illut biilillu igalaavi tuusintilippassuit anorersuup aseruatitersimavai, taamaammat igalaat aseqqui nataqqornallu sumi tamaaniittut qillaaluttuinnaapput. Arnaq oqaluttuarpoq: „Angerlamut apuukkama biilinni issiaannarpunga qissaserlungalu. Aseruatitersimasut annertungaarmata susinnaajunnaarluinnartutut misigaanga.“

Napparsimmaviit ikiuiniaqatigiiffiillu sananermut atortussanik aningaasanillu pilersuillutillu nakorsiartitsillutillu siunnersuisarput. Anorersuarmit eqqugaasut ilarpassuisa sapinngisaminnik ikiuiniaqataanerat nersornaqaaq.

Aammattaaq Jehovap Nalunaajaasui ulappupput. Aubrey Conner, San Angelomi utoqqaanertat ilaat, ima oqaluttuarpoq: „Anorersuaq qaangiunniariartoq tusarniaalluta allanut sianeqattaarpugut. Ikioqatigiilluta sanilivullu ikiorlugit igalaat assersorpavut, qaliat plasticimik qallersorlugit angerlarsimaffiillu silap pissusianut sapinngisamik ajunnginnerpaamik isumannaallisarlugit. Taava ilagiinnut ilaasortat aseruatitersimasunik angerlarsimaffillit aqqi allattorpavut. Illut hundredit missaanniittut iluarsaanneqartariaqarput, atortussallu pissarsiarisimasavut naammanngillat. Taamaattumik atortussanik amerlanerusunik pisivugut sulinerlu aaqqissuullugu. Oqaluussisartut 1000-it missingi ikiuunniarlutik nalunaarput, sapaatit-akunnerisa naanerini tamani 250-it missingi. Ilaat 740 kilometerit atorlugit maannarsimapput. Tamarmik qasusuillutik sulipput, ilaatigut 40-nik kiassuup ataani. Allaat qatanngut arnaq 70-inik ukiulik suleqataavoq, aamma sapaatip-akunnerata naanerani nammineq illumi iluarsaanneqarnerani. Allaat illumi qaavanut qaqilluni iluarsaasseqataavoq!

Isiginnittut ilaat ima oqartut tusartarpavut: ’Ilaa qanoq nuannertigissagaluarpa upperisarsioqatigiit allat uppeqatiminnut aamma taamaaliortuuppata?’ Sanilivut tupigusoqaat tallimanngornermi ullaannguaq 10-12-it (aamma qatanngutit arnat) takkummata oqaluussisartoqatimik illuanik iluarsaassinermut allaallu qalianik sanaqqiinermut kajumissutsiminnit akissarsiaqaratillu ikiuukkiartorlutik. Amerlanertigut sapaatip-akunnerata naanerinnaani suliassat naammassineqartarput. Ilaanni sanasut silamiut eqqatsinni aallartilluareersimasut sulisussavut tikiuttarput. Sulili illup qalia iluarsaassartik inerianngikkaat uagut qaliaq pisoqaq piiareerlugulu, nutaamik ikkussereerlutalu naatsiivik torersareersimasarparput. Ilaannikkooriarlutik unillutik sulersuataartugut isiginnaaleraraatigut.“

Qatanngut Conner ima naggasiivoq: „Ataatsimoorluta misigisimasavut maqaasissaqaavut. Sammivimmit nutaarluinnarmit immitsinnut ilisarisimalerpugut. Aatsaat taama sakkortutigisumik qatanngutigiittut asaqatigiinnermik ersersitsivugut, taamatullu qatanngutitut asanninnermik ersersitsivigineqarluta. Tamanna Guutip silarsuassaani nutaami, qatanngutit angutit arnallu nuannaarlutik ikioqatigiiffigisassaanni, pissutsinut atuuttussanut qilanaartuutissaannaminiinnannguuvoq. — 2 Pîtruse 3:13.

 Kobe — „Sumi tamaani illukut timillu toqungasut“

Kobemiut piareersimasorinarsinnaagaluarput, ukiummi tamaasa septembarip aallaqqaataa ajunaarnersuaqariataarsinnaaneranut piareersarfiusarpoq. Atuartut nunap sajoriataarnissaanut sungiusartarput, sakkutuullu qulimiguulimmik annaassiniarnissamut sungiusartarput. Ullormi tamatumani qatserisartut nunamik sajutsitsisuusaarutitik atortarpaat, tassa maskiinat piumasut karserujussuup iluani aniguiniarsinnaassutsiminnik misileraassutigisinnaasaat. Karsi, ineeqqatut atsigisoq, nunap sajunneranisut aalallunilu sajuppiluttarpoq. Januaarilli 17-iani 1995-imi nuna sajuimmat sungiusartarsimanerit iluaqutaasorinanngillat. Illut qaliaat tituusintilikkuutaat nakkakaapput — nunamik sajuttuusaartitsinermi pinngisaannartut. Qimuttuitsut aqqutiminnit uppikaapput; aqqusernit aseruapput; gasip erngullu aqqutaat qaararput illullu pappialarsuarnit sanaatut illutik uppikaapput. Atuagassiami Time-mi allassimavoq ’illukut timillu toqungasut sumi tamaaniittut’.

Taava ikuallattoqalerpoq. Qatserisartut nukillalaaqqaqisut angallattorpassuit akornanni nikissinnaajunnaaqqatillugit illut nunguillutik ikuallattarput. Ikuallattunut apuuttortaat imeqarfimmit ajoquserneqarsimasumit imermik pissarsisinnaanngillat. „Ulloq siulleq uivernersuaqarpoq,“ naalagaaffimmi atorfilik oqarpoq. „Inuulillaramali aatsaat taama saperluinnalersutut misigitigaanga, nalunnginnakkumi inuppassuit illunit ikuallattunit anisinnaajunnaaqqasut uangalu qanoq ilioriarsinnaanngilluinnarlunga.“

Inuit 5000-it missaanniittut ajunaarput, illullu 50.000-it missaanniittut uppikaapput. Nerisassat pisariaqartinneqartut aggornerisa pingasut ilaat ataasiinnaat Kobemi pigineqarput. Ilaat erngup aqqutaasa putunikut ataanni masarsummi ipertuumi imissarsiortarput. Angerlarsimaffeqanngitsut ilarpassui ikiuiniarfeqarfinnut unnuiartortarput, tamakkuali ilaanni nerisassat ima killilersorneqartigipput ullormut inummut ataatsimut qaqorteqqasunik boorluliaq ataasiinnaq tunniunneqartarluni. Naammagittaalliortut amerliartupallapput. „Oqartussaasut qanoq iliuuseqanngilluinnarput,“ angut unnerluavoq. „Taakku isumalluutigiuaraluarutsigik perlerluta toqussaagut.“

Jehovap Nalunaajaasuisa Kobemi ilagiivi ikiuiniarnermik aaqqissuussigasuarput. Qulimiguulimmik ingerlatitsisoq nammineq tamatuminnga takunnittoq ima oqarpoq: „Ullormit nunap sajuffianit sapaatip-akunnera ajunaarnersuaqarfimmiippunga. Ikiuiniarfeqarfimmut apuukkama sumi tamaani uivernersuaqarpoq. Sunnguamilluunniit ikiuiniartoqanngilaq. Jehovap nalunaajaasui kisimik ajunaarfimmukapallassimapput aaqqissuussaasumillu sulinialerlutik.“

Suliassarpassuaqarpoq. Naalagaaffilersaartarfiit qulit atorsinnaajunnaarput, oqaluussisartut 430-nit amerlanerusut angerlarsimaffeerupput. Illut najugarineqartut 1206-it iluarsaanneqartariaqarput. Oqaluussisartullu 15-it nunap sajunnerani ajunaarsimasut ilaqutaat tuppallersarneqartariaqarlutillu inuttut ikiorneqartarialerujussuupput.

Oqaluussisartut nunap ilaanit allaneersut 1000-it missaanniittut iluarsaassinermut kajumissutsiminnit ikiuukkiartorput. Qatanngut angut ima oqaluttuarpoq: „Biibilimik atuaqqissaaqatigisartakkatta, sulili kuisissimanngitsut, illui iluarsaakkaangatsigik ima aperineqartuaannarpugut: ’Tamakkununnga tamanut qanoq akilissavatsigit?’ Suliap ilagiinnit tapersersorneqarneranik oqaluttuukkaangatsigik qujamasuttaqaat oqarlutillu: ’Ilinniarsimasavut maanna timitalerneqartut takuavut.’“

Oqaluussisartut ajunaarnersuarmut qisuariapallannerat suliniarnerallu annertooq inuppassuarnit tupigusuutigineqarpoq. „Tamanna maluginiartorujussuuara,“ timmisartortartoq issuarneqareersoq oqarpoq. „Immissinnut ’qatanngutinik’ taaguuppusi. Qanoq ikioqatigiinnersi takoreerpara; ilumut ilaqutariissuuvusi.“

Oqaluussisartut aamma namminneq nunap sajunnerani ilikkagaqarput. Qatanngut arnaq ima nassuerpoq: „Isumaqartuaannarsimagaluarpunga peqatigiiffik annerujartortillugu inuttut isumassuinermik ersersitsinissaa ajornakusoornerujartussasoq.“ Inussiarnersumilli ikiorneqarnini nutaamik isumaqalissutigaa. „Maanna paasivara Jehovap peqatigiiffittut isumassuinnanngikkaatigut, aammali inuttut ataasiakkaatut isumassoraatigut.“ Ajunaarnersuilli kingunerinut aaqqiissutissaq ataavartoq aatsaat siunissami pissaaq.

 Aaqqiissutissaq ataavartoq

Jehovap nalunaajaasuisa inuit inuunerata inuunerullumi ajunaarnersuarnit eqqorneqartarunnaarfissaat qilanaaraat. Guutip silarsuassaani nutaami inuit pinngortitap pissusiinik suleqatigiillutik nakkutiginninnissartik ilinniassavaat. Namminissarsiussuseq pissuseriunnaarutsigu pinngortitap pissusiinit ullumikkutut eqqortiatigiunnaassaagut.

Jehova Guutip, pinngortitap nukiinik Pinngortitsisup, allaat isumagissavaa inuit nunarsuarmilu uumassusillit pinngortitap nukiinit ulorianartorsiortinneqartarunnaarluinnarnissaat. Nunarsuaq paratiisivinngussaaq. (Jesaja 65:17, 21, 23; Lúkarse 23:43) Siulittuut sarĸúmersitat 21:4-mi allassimasoq misinnangaartumik eqquutissaaq: ’Qulliit tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ (wE 1/12 96)

[Qupp. 5-mi assiliartaq]

Beatrice Jonesip (saamerliup) takutippaa qanoq ilillutik qarsutsinersuaqarnerani ikaarniarsarisimallutik

[Qupp. 6-mi assiliartaq]

Anorersuup kaavittuliortup kingorna ikiuiniarneq