Jehovap piumasaatut iliorput

Daniel uteriarumanngissuseqarluni Guutimut kiffartorsimavoq

OQALUTTUARISAANERMI pissutsit ullormiit ullormut allanngoriataartarnerat qaqutigoorpoq. Ukiumili 539-mi u.n.s. taamatut pisoqarsimavoq Babylonimiut naalagaaffissuat nalunaaquttap-akunnialuinnannguisa ingerlaneranni Mediamiunit Persiamiunillu uppitinneqarmat. Taamanimiilli Jehovap pruffiitia Daniel ukiuni 80-ingajanni Babylonimi qimaasutut nunaqalerpoq. Qularnanngitsumik 90-it qaangerlugit ukioqarluni Daniel Guutimut assuarnaassutsimigut aatsaat taama ingasatsigisumik misilinneqarpoq.

Babylonip uppititaanerata kingorna aallaqqaataani pissutsit Danielimut ajorpasinngillat. Kunngi nutaaq, Darius Mediamiu, Danielimik iluarinnittuuvoq. Dariusip kunngitut iliuusiisa siulliit ilagaat sinniisuutitaminik 120-nik naalagaaffiup immikkoortuinut naalanngortitsinera angutinillu pingasunik taakkununnga qullersanngortitsinera. * Angutit pingasut immikkut pisaasut taakkua ilagaat Daniel. Dariusip paasigamiuk Daniel pikkorilluinnartuusoq naalagaaffimmut tamarmut naalagaaninngortinnialersaalerpaa. Taavali kunngip pilersaarutaanik allanngortitsilluinnartumik pisoqariataarpoq.

Perlulioqatigiinneq

Danielip naalagaaneqatai, sinniisuutitanik arlalissuarnik ilaqarlutik, pilersaarutipiloqarlutik kunngimut sassarput. Darius qinnuigaat peqqusissasoq „kinaluunniit ullut 30-t ingerlaneranni kimut guutiusumut inuinnaasumulluunniit [kunngimuunngitsoq] qinusoq itersaliamut løvet inaannut iginneqassasoq“. (Daniel 6:8) Immaqa Darius isumaqarpoq angutit taakkua imminut ilumoornertik taamaalillutik erseqqissarniaraat. Immaqa aamma isumaqarpoq peqqussut tamanna iluaqutigalugu naalagaaffimmi tiguarsimasamini takornartatut naalagaassutsi nukittorsarneqassasoq.

Kunngilli naalagaassusiata nukittorsarnissaa siunertarinagu naalagaanerit sinniisuutitallu taamatut peqqussusiornissamik siunnersuuteqarput. Siunertaraat Danielip atorfimminik ingerlatsinerani taassumunnga pasilliutissarsiornissartik, „pasilliutaasumilli isornartumilluunniit nassaarfigineq saperpaat, tatigisassaalluartuummat eqqunngitsuliornermik peqquserluttuliornermilluunniit nassaarfigisassaanani“. Taamaattumik angutit peqquserluttut taakkua ima oqarput: „Danielip guutisiornera eqqaanngikkutsigu pasillerneqaatigisinnaasaanik allamik nassaarfigisinnaanngilarput.“ (Daniel 6:5, 6) Nalunnginnamikku Daniel ullut tamaasa Jehovamut qinusartoq, tamanna pillugu pillagaanissaa anguniarnialerpaat.

Naalagaanertat sinniisuutitallu Danielimik uumissuipput immaqa ’anersaamik naleqanngitsumik ilumioqarluni pikkorissutsimigut akimorsimammatik, taamaattumillu kunngip isumaliutigilermagu naalagaaffimmut tamarmut naalagaaninngortissallugu’. (Daniel 6:4) Danielip unneqqarissusia peqquserluttuliornissamut akornutitut annertuutut isikkoqarsimasinnaavoq. Kisianni tassa angutit taakkua kunngi peqqussummik atsiortippaat, peqqussullu ’Mediamiut Persiamiullu inatsisaannut allanngortitassaanngitsunut’ ilaalersillugu. — Daniel 6:8, 9.

Daniel aalajaattuarpoq

Peqqussut tusaramiuk Daniel Jehovamut qinusarunnaarpa? Naamerluinnaq! „Siornatigut ileqqoriuakkamisut“ illumini inimi qullermi seeqqummerpoq ullormullu pingasoriarluni Guutimut qinulluni. (Daniel 6:11) Akeraasa siumorpaat „Guutiminut ilungersorluni qinusoq“. (Daniel 6:12) Darius tamatuminnga tusarlerneqarami assut aliatsappoq paasileramiuk peqqussutip atsiorsimasami Daniel eqqoraa, „seqernullu tarrinnissaa tikillugu ikiorniarlugu periusissarsioraluarpoq“. Allaalli kunngip peqqussut atortuulersissimasani atorunnaarsissinnaanngilaa.  Taamaattumik Daniel itersaliamut liivit inaannukaanneqarpoq. „Qanortoq Guutivit guutisiorfigiuakkavit annaakkilisit!“ kunngip Daniel oqarfigaa. — Daniel 6:13-17.

Unnuaq naallugu sininngereerluni iisinnginniareerlunilu Darius itersaliamukarasuarpoq. Daniel uumavoq ajoquserneqarsimananilu! Darius iliuuseqarasuarpoq. Akiniaalluni Danielip akerai taakkualu ilaqutaat liivit inaannut igitaatippai. Aammattaaq naalagaaffimmini nalunaarutigaa ’naalagaaffimmi immikkoortortaani tamani Danielip Guutia mianerineqassasoq uullutigineqarlunilu’. — Daniel 6:18-28.

Uatsinnut ilinniutissaavoq

Daniel aalajaassutsikkut maligassaalluarpoq. Allaat kunngip Jehovamik pallorfiginninngitsup malugisimavaa Danielip Guutini ’guutisiorfigiuaraa’. (Daniel 6:17, 21) Aramiiarit oqaasiat ’-uarpaa’-mik nutserneqartoq aamma isumaqarsinnaavoq ’kaavippoq’. Tassa kipisuissuseq, imaluunniit uteriarumanngissuseq, pineqarpoq. Oqaaseq tamanna Danielip Jehovamut assuarnaassusianut atussallugu tulluarluinnarpoq.

Daniel liivit inaannut iginneqarnini sioqqulluguli uteriarumanngissutsimik ileqqoqareerpoq. Inuusukkallarami Babylonimi tigusaaqqanermini Mosesip inatsisaani inerteqqutigineqartunik imaluunniit Guutimik nalusut ileqqulersuutaannit mingutsinneqarsimasunik imerumananilu neriumasimanngilaq. (Daniel 1:8) Kingorna sapiilluni Guutip tusarliussaa Babylonip kunngianut Nebukadnezarimut tusarliussimavaa. (Daniel 4:19-25) Babylonip uppititaanissaa nalunaaquttap-akunnialunnik sioqqullugu Danielip qunusuilluni kunngimut Belsazzarimut Guutip eqqartuussutaa nalunaarutigisimavaa. (Daniel 5:22-28) Taamaattumik Danielip liivit inaannut igitaagaluaramiluunniit aalajaassuseq ineriartortissimasani attatiinnarpaa.

Illittaaq uteriarumanngissuseqarlutit Jehova kiffartuussinnaavat. Inuusuttuuguit silamiut ileqqorluttut taakkualu inooriaasiata peqquserluttup ajattornerisigut uteriarumanngissutsimik ineriartortitsisinnaavutit. Qangalili Guutimut kiffartortuuguit aalajaallutit nikallujuissuseq attattuarniaruk. Nakkaannarnaveerit, misilinneqarnivummi tamarmik uteriarumanngissuseqarluta Jehovamut kiffartornissatsinnik aalajangiusimanninnitsinnik taassumunnga takutitsinissatsinnut periarfissiipput. — Filípimiut 4:11-13. (wE 15/11 96)

[Quppernerup ataani ilanngussaq]