Guuterput nakerisarsiunngitsoq ilaarpiuk?

NAKERISARSIUNNGISSUSEQ ullumikkut qaqutigooqaaq. Nakerisarsiunngilluinnartumilli, paqumisunngilluinnartumik assigiinngisitsinngilluinnartumillu nassaassaqarpoq. Taanna tassaavoq Jehova Guuti, inummik Pinngortitsisoq. Inuilli taamatut oqaatigineqarsinnaagunanngillat. Atuakkiortoq tuluk 1800-kkunni inuusoq Charles Lamb ima allassimavoq: „Iluamik oqaatigilluaannarlugu, paqumisunnermik ulikkaarpunga — iluarisaqarlunga iluarinngisaqarlungalu.“

Inuit akornanni pissutsit eqqarsaatigissagaanni ajoraluartumik nakerisarsiunngissuseq amigaataaqaaq. Ukiut hundredelippassuit matuma siorna Israelimi kunngip ilisimasup Salomonip malugisimavaa ’inuit inoqatiminnut ajoqutaasumik pissaaneqartartut’. (Nalunaajaasup oqaasii 8:9) Allamik nagguilinnik uumissuineq, inuiaat akerleriinneri ilaqutariinnilu assortuunnerit siammaraluttuinnarput. Taamaattumik piviusorsiornerua isumaqassalluni inuit namminneerlutik inuiaqatigiinnik nakerisarsiunngitsunik ineriartortitsisinnaasut?

Pissutsinik isiginnittaaserput aqussinnaalissagutsigu paqumisunnerlu pigiliulluinnarsimasarput katassinnaassagutsigu ilungersorluta iliuuseqarnissarput pisariaqarpoq. (Evfisumiut 4:22-24) Nalugaluarlugu inuttut ilinniagaqarnikkullu avatangiisitsinnit ilusilersorneqarsimasumik aamma ilaqutariittut, nagguikkut inuiattullu tunuliaqutatsinni sorlaqartumik pissutsinik isiginnittaaseqaqqajaasinnaavugut. Tamanna suunngitsutut issinnaagaluartoq inuttut pissutsitsigut pigiliulluinnarsimasarparput, pissutsinillu isiginnittaatsinik uagutsinnik paqumisuttunngortitsisunik siuarsaasinnaavoq. Inatsisileritooq aaqqissuisorlu Skotlandimiu Lord Francis Jeffrey ima oqarsimavoq: „Inuup allanik tamanik paasinninniartarneranik paqumisunnermi annertussusianik sakkortussusianillu paasinninniaasaartarneratut sivisutigisoqanngilaq.“

Nakerisarsioriartarneq akiussagaanni ilungersorluni iliuuseqarnissap pisariaqassusianik nassuerutiginnittut Lena * ilagaat. Taanna oqarpoq paqumisoriartarneq akiussagaanni ’ilungersorluni sulissuteqarnissaq pisariaqartoq, peroriartornermi sunnerneqarsimaneq sakkortoorujussuummat’. Lenap nassuerutigaattaaq allat nakerisarsiorfiginnginnissaannik eqqaasinneqartuarnissaq pisariaqartillugu.

Jehova nakerisarsiortuunngilaq

Jehova nakerisarsiunngissutsikkut maligassaavoq pitsaanerpaaq. Inunnut iliuuseqartarnermini nakerisarsiunngissutsiminik qanoq ililluni takutitsisarnera Biibilimi aallaqqaataaniilli ersersinneqartarpoq. Maligassat pitsaasut eqqaasitsissutillu tamakku assut ilinniarfigisinnaavavut.

Jehovap nakerisarsiunngissutsi takutissimavaa ukiumi 36-mi u.n.k. apustili juutiusoq Peter Korneliusimut juutiunngitsunullu allanut nutaarsiassamik nuannersumik oqaluussissutiginnilersikkamiuk. Taamanikkut Peter ima oqarsimavoq: ’Ilumut paasilerpara inuup kinaassusia Guutip pinngikkaa, kisianni inuiaqatigiinni tamani kinaluunniit mianerinnitsini iluarnermillu sulisoq nuannarigaa.’ — apustilit suliait 10:34, 35.

Inuiannut iliuuseqarnermini tamani Jehovap nakerisarsiunngissutsi takutittuartarsimavaa. Jesus Kristus Ataatani pillugu ima oqarsimavoq: ’Taassuma seqerni ajortunut ajunngitsunullu nueqqusarpaa, sialleqqusisarlunilu iluartunut iluaatsunullu.’ (Matîuse 5:45) Jehova Guutitut  nakerisarsiunngitsutut unnersiutigalugu aamma Peter ima oqarsimavoq: ’Kamajuilluni pivaasi tammarsimasoqaqqusinnginnami, tamaasali allamik isumataaqqullugit.’ — 2 Pîtruse 3:9.

Noap nalaani ’nunami inuit ajussusiat annertusiartuinnarmat, piumasaallu pilersaarutaallu ajortuinnaallutik’ Jehovap silarsuarmiunik nungutitsinissani nalunaarutigaa. (1 Moses 6:5-7, 11, 12) Guutip peqqusineratigut kikkut tamarmik takkuanni Noa umiarsualiorpoq. Erninilu umiarsualiuutigalutik aamma Noa ’iluarnermik oqaluussisarpoq’. (2 Pîtruse 2:5) Naak kinguaariit taamanikkut inuusut uummatimikkut ajussusiat ilisimagaluarlugu Jehovap nakerisarsiorani ersarissumik mianersoqqussutaasumik tusarlertippai. Noap umiarsualiortillugulu oqaluussitinneratigut inuit isumaatigut uummataatigullu kajumissaarniarpai. Qisuariarnissaminnut periarfissaqarluaraluarlutik ’paasisaqanngillat, aatsaalli ulersuaq nalliummat tamaasa nungutillugit’. — Matîuse 24:39.

Tamanna Jehovap nakerisarsiunngissusianut assersuutissaavoq asseqanngitsoq! Ullussani kingullerni makkunani Guutip kiffai taassuma nakerisarsiunngissusianit killinneqarlutik Guutip naalagaaffianik nutaarsiassamik nuannersumik nakerisarsioratik oqaluussissutiginnipput. Ullullu Jehovap akiniaaffissaata tusarliunnissaa tunuarsimaarfiginngilaat. Jehovap tusarliuteqqusaa nakerisarsioratik kikkunnut tamanut tusarliuttarpaat. — Jesaja 61:1, 2.

Jehovap ataataanerpaanut Abrahamimut, Isakimut Jakobimullu neriorsuutai takussutissaapput taanna Guutiusoq nakerisarsiunngitsoq. Tanitaq, ’nunarsuarmi inuiaqatigiit tamarmik pilluaqqunarsiffissaat’, taakkua kinguaavisigut takkutissaaq. (1 Moses 22:18; 26:4; 28:14) Kingorna paasinarsivoq tanitaq taanna tassaasoq Jesus Kristus. Jesusip toquneratigut makititaaneratigullu Jehovap inuit naalattut annassutissiorpai. Aap, Kristusip pilliutaata utertitsissutaasup iluaqutissartai nakerisarsiornertaqanngitsumik kikkunnut tamanut ammapput.

Mosesip nalaani Selofhadip paniinut atatillugu pisimasukkut Jehovap nakerisarsiunngissusia soqutiginarluinnartumik erserpoq. Arnat sisamat taakkua nunami neriorsuutigisami ataatamik kingornussassarititai pillugit nalornissuteqalersimapput. Taamani Israelimi ileqquuvoq angutip ernerata nunamik kingornussisarnera. Selofhadili kingornussisussamik erneqarani toquvoq. Taamaattumik Selofhadip panii nakerisarsiunngitsumik aalajangiineqaqqullugu Mosesimut saaffiginnipput, imalu oqarlutik: „Ataatatta aqqa eqqarleriissortanit peerneqassanerpa erneqannginnera pissutigalugu? Pissarsiassatsinnik tunisigut ataatatta qatanngutaanut naligitilluta.“ Piumasaqaataat Jehovap tusarpaa Mosesilu ima ilitsersuullugu: „Selofhadip panii  eqqortumik oqarput. Ataataata qatanngutaanut naligitillugit nunamik pigisassaannik tunikkit, ataatamillu kingornussarisimasaa taakkua pigisarilerlissuk.“ — 4 Moses 27:1-11.

Tamanna asannittumik nakerisarsiunngitsumillu najoqqutassiuussivoq. Eqqarleriit kingornussassaata eqqarleriinnit allanit tiguneqannginnissaa qulakkeerniarlugu panii piumaffigineqarput ’siuaasamikkut naggueqatigiissortaqatiminnik aappanissasut’. — 4 Moses 36:5-12.

Eqqartuussisoqarnerup pruffiitillu Samuelip nalaannissaaq Jehovap nakerisarsiunngissusia suli annerusumik paasinarsivoq. Jehovap Samuel peqquaa kinguaariinni Judakkunni Isajip Betlehemimiup ernerisa ilaannik kunngissamik tanitseqqullugu. Isajilli erneri arfineq-pingasuupput. Sorleq kunngitut tanissavaa? Ernerisa ilaata Eliabimik atillip timikkut pillagunassusia Samuelip maluginiartorujussuuaa. Jehovalli qallikkut pissutsit aalajangiisuutinneq ajorpai, Samuelilu ima oqarfigaa: „Isikkua angissusialuunniit aalajangiisuutissanngilatit . . . inuit pingaartitaat uanga pingaartitarinngilakka. Inuimmi isiminnut saqqumisuinnaat isigisarpaat, [Jehovalli] inuup uummataa isigisarpaa.“ David, Isajip ernerisa nukarlersaat, qinerneqarpoq. — 1 Samuel 16:1, 6-13.

Jehovap nakerisarsiunngissusia ilinniarfigiuk

Kristumiut utoqqaanertat uppeqatimik anersaakkut piginnaasaannik isiginninniartarnermikkut Jehova ilaassagunikku ajunngitsumik iliussapput. Ajornanngitsuararsuuvoq nammineq nalileeriaaseq malillugu inunnik allanik naliliinissaq, siuneqassuserput misigissutsitsinnik taalutsertillugu. Utoqqaanertat ilaat ima oqarpoq: „Jehovap iluarisaanik allat iliuuseqarfiginiartarpakka, nammineq siumut taamaassorinninnikka tunngaviginagit.“ Jehovap kiffaasa taassuma oqaasia najoqqutassamissut atoraangamikku iluaqutigisaqaat.

Biibilimi maligassat eqqartoriikkavut iluaqutigalugit ammip qalipaataa inuiaassuserlu tunngavigalugit paqumisunnerit akiorsinnaavavut. Jehovap nakerisarsiunngissusianik ilaarsinitsigut ilagiit kristumiut paqumisunnermut, assigiinngisitsinermut nakerisarsiornermullu illersussavavut.

Apustilip Peterip paasisimavaa ’inuup kinaassusia Guutip pinngikkaa’. (apustilit suliait 10:34) Iluarisaannarnut ajunngitsuliorneq nakerisarsiunngissutsimut akeraavoq aammalu asanninnermut ataasiussutsimullu najoqqutassianik aseruisarpoq. Jesus piitsunut, sanngiitsunut nikanartunullu saaffiginnittarsimavoq nammagaannillu oqilisaasarsimalluni. (Matîuse 11:28-30) Jesus juutit upperisarsiornikkut siuttuinit allaanerulluinnarsimavoq, taakkuami inunnik naqisimannittuupput, maleruagassiaminnillu inunnik artukkersuisarlutik. (Lúkarse 11:45, 46) Taamaaliorneq aammalu pisuunik inunnillu nuimasunik nakerisarsiorfiginninneq Kristusip ajoqersuutaanut naapertuutinngilluinnarpoq. — Jâko 2:1-4, 9.

Ullumikkut kristumiut utoqqaanertat Kristusip siulersuineranut naalatsigitipput Jehovallu innuttaanut tunniulluinnarsimasunut tamanut nakerisarsiunngissutsimik ersersitsisarlutik. ’Guutip savaataanik imminnut paareqqusaanik’ isumaginninnerminni aningaasatigut atukkat, inuttut assigiinngissutit imaluunniit ilaqutariittut nimit tunngavigalugit nakerisarsiornaveersaartarput. (1 Pîtruse 5:2) Guutip nakerisarsiunngitsup ilaarneratigut iliuutsinullu nakerisarsiorpalaartunut mianersoqqusinerata malinneratigut kristumiut utoqqaanertat ilagiinni anersaaq nakerisarsiunngitsoq siuarsartarpaat.

Jehovap Nalunaajaasuisa ilagiivi kristumiuusut tassaapput nunarsuaq tamakkerlugu qatanngutigiissuit. Tamanna uppernarsaatissaalluarpoq Jesus Kristusip siulersuineratigut inooqatigiittoqarsinnaasoq paqumisunnertaqarnanilu nakerisarsiornertaqanngitsumik. Qatanngutigiissuarnut taakkununnga ilaasut ’inuttaaq Guuti assilillugu pinngortitaq atisimavaat iluartillugu illernartillugulu ilumoornikkut’. (Evfisumiut 4:24) Aap, Guutip nakerisarsiunngitsup, Jehovap, maligassiaa naammalluinnartoq ilinniarfigaat silarsuarmilu nutaami nakerisarsiorfiunngitsumi naassaanngitsumik inuulernissartik qilanaarisinnaallugu. — 2 Pîtruse 3: 13. (wE 15/11 96)

[Quppernerup ataani ilanngussaq]

[Qupp. 27-mi assiliartaq]

Apustilip Peterip paasisimavaa Guuti nakerisarsiortuunngitsoq