Inuusuttut Pinngortitsisiminnik eqqaamannittut

’Pinngortitsisit eqqaaniaruk inuusutsillutit.’ — AKUGDLÎSSUP OKAUSÊ 12:1.

1. Aqqanilinnik ukiullip qanoq ililluni ersersippaa Pinngortitsisoq piviusutut isigigini?

NUANNERTAQAAQ takullugit inuusuttut Jehova Guutimik kinaassusilivittut nuannaartikkusutamissut isiginninnerminnik ersersitsisumik oqaluttarlutillu iliortartut. Nukappiaraq aqqanilinnik ukiulik ima oqarsimavoq: „Kisimiileraangama igalaakkut itsuannisaartarpunga Jehovallu pinngortitarsui kusanangaartut isiginnaarlugit. Taava takorluulersarpara siunissami Paratiisissaq qanoq nuannertigissasoq, qanorlu nuannertigissasoq uumasunik attuuasinnaalerukkit.“ (Jesaja 11:6-9) Oqaatsini ima ilavai: „Kisimiileraangama Jehovamut qinusarpunga. Nalunngilara taassuma oqaluffigivallaaraluarunniluunniit kamaannavianngikkaanga, nalunngilaralu paariuaannaraanga.“ Illittaaq Pinngortitsiserput piviusutut isigaajuk?

Ilinnut Guuti qanoq piviusuutigaa?

2. (a) Pinngortitsisoq qanoq ililluta piviusutut isigilersinnaavarput? (b) Angajoqqaat Guuti kinaassusilivittut meeqqaminnit isigineqarsinnaaleqqullugu qanoq iliorsinnaappat?

² Jehova taassumalu neriorsuutai ilinnut piviusutut issappata taanna silarsuarmilu nutaami naapertuilluassuseqarfiusumi Biibilimi eqqartorneqartumi siunissamik nuanningaartumik ilinnut neqeroorutaa ilinniaqqaartariaqarpatit. (sarĸúmersitat 21:3, 4) Angajoqqaavit tamakkuninnga oqaluttuutereersimappatsit qujamasunnissannut pissutissaqarputit, tamannami inassummik isumassarsiarititaasumik matuminnga malinninnissannik ajornarunnaarsitsivoq: ’Pinngortitsisit eqqaaniaruk inuusutsillutit.’ (akugdlîssup oĸausê 12:1) Niviarsiannguup mikisuunerminit angajoqqaaminit ajoqersorneqarsimanini ima oqaatigaa: „Inuunermi suut tamarmik Jehovamut atassuserneqartarput. Tamanna pissutaavoq Pinngortitsisinnik eqqaamannittuarsimaninnut.“ Niviarsiannguaq alla ima oqarpoq: „Angajoqqaakka qujamasuffigiuassavakka ajoqersorsimammannga Jehova kinaassusiliviusoq. Taassumunnga asanninnermik ilinniartippaannga piffissarlu tamaat kiffartortuunerup nuannaarutissartaanik oqaluttuuttarlunga.“

3, 4. Qanoq ililluta Jehova eqqarsaatitsinni piviusutut ilersissinnaavarput?

³ Inuilli ilarpassuisa Guuti kinaassusilivittut imminnik soqutiginnittutut isigissallugu ajornakusoortittarpaat. Illimmi? Inuusuttup ataatsip Guuti kinaassusilittut eqqarsaatigisinnaanerulersimavaa oqaatsit uku Napasuliaq Alapernaarsuiffik-miittut ikiortigalugit: „Jehova Guutip ’timikkut’ qanoq angitiginera naluarput.“ Soorunami Guutip ataqqinassusia ’timikkut’ angissusiatigut ilusiatigulluunniit nalilerneqarsinnaanngilaq, soorlu Napasuliaq Alapernaarsuiffik-mi tassani nangilluni ima allassimasoq: „Guutitut qanoq ittuunera angissusivianut aalajangiisuuvoq.“ Tassa Guutip angissusia pissusiisigut ersertarpoq, aalajaassusiatigut, naakkinnissusiatigut, asannissusiatigut isumakkeerfiginnikkumatussusiatigullu. * (2 Moses 34:6; 5 Moses 32:4; Tussiaat 86:5; Jâko 5:11) Illit Jehova ikinngutitut tatiginartutut erlinnangaartumik attaveqarfigisinnaasattut isigilersimaviuk? — Jesaja 41:8; Jâko 2:23.

 ⁴ Jesusip ajoqersukkani Guutimut attaveqalernissaannik ikiorsimavai. Taamaammat apustilip Johannesip qilammi inuunermut makititaanissani ima allaatigaa: ’Nalunngilagut [Guuti] erserpat assigilerumaaripput, qanoq-issusiagut assigilerumaaratsigu.’ (1 Juánase 3:2; 1 Korintumiut 15:44) Ullumikkuttaaq inuusuttut Guuti kinaassusilivittut, namminneq takusinnaanngikkaluarlugu ilisarisimalersinnaasamittut, isigilersinnaavaat. Angut inuusuttoq ima oqarpoq: „Angajoqqaama Jehovap eqqarsaatigisarnissaanut ikiorsimavaannga apersortarnermikkut, soorlu ima: ’Tamanna Jehovap qanoq isumaqarfigissavaa? Nammineq oqaatsinnik nassuiarsinnaaviuk? Qanoq isumaqarpa?’“ Apeqqutit taama ittut inuttut ataasiakkaatut Guutimut attaveqarnitsinnik eqqarsaatiginnilersinnginnerpaatigut?

Eqqaamanninneq qanoq isumaqartoq

5. Eqqaamanninneq Biibilimit isigalugu qanoq isumaqarpa?

⁵ Pinngortitsisumik eqqaamanninnissamik peqqussummik malinninneq tassaannaanngilaq Jehovamik eqqarsaatiginninneq. Iliuuseqartariaqarpoq, taassuma iluarisaanik iliorluni. Pinerluttup Jesus ima qinnuigigamiuk: ’Naalagaallutit tikiukkuit eqqaaginga,’ kissaatigiinnanngilaa atini eqqaamassagaa. Kissaatigaa Jesus iliuuseqassasoq, tassa makitissagaani. (Lúkarse 23:42) Taamatuttaaq Josefip parnaarussaaqqasup Faraop imigassanut pilittaa qinnuigigamiuk Faraomut eqqaaqqulluni, taassuma iliuuseqarnissaa naatsorsuutigaa. Jobillu Guuti ilungersorluni qinnuigigamiuk ’eqqaaqqulluni’, Guutip siunissami iliuuseqarluni makitissagaani qinnutigaa. — 1 Moses 40:14, 23; Job 14:13.

6. Oqaaseq hebriiarisooq ’eqqaamavaa’-mik isumaqartoq aamma qanoq isumaqarsinnaava?

⁶ Oqaaseq hebriiarisooq „eqqaamavaa“-mik nutserneqartartoq aammagooq isumaqarsinnaavoq „tunniusimasumik eqqarsaatiginninneq iliuuseqarnerlu eqqarsaatiginninnerup nassatarisaa“. Eqqaamasat misigissutsillu imminnut atanerat erserpoq inuit ilumuunngitsut inoqajuitsumiitillutik oqaasiisigut ukunatigut: ’Aalisakkat eqqaallaaraavut Egyptenimi nerisartakkavut.’ Soorlu Jobip Guutimit ajunngitsumik eqqaamaneqarnissani qinnutigisimagaa, aammattaaq Ezekiasip, Nehemiasip, Davidip tussiaasiortullu ateqartinneqanngitsup aalajaannertik pillugu Jehovamit iluarisaasumik eqqaamaneqarnissartik qinnutigisimavaat. — 4 Môrsase 11:4, 5; 2 Kunngit 20:3;  Nehemja 5:19; 13:31; Tussiaat 25:7; 106:4.

7. Asannittumik Guutimik eqqaamanninnerput ileqqutsinnut qanoq sunniuteqassava?

⁷ Uagut imminut ima aperisinnaavugut: ’Pinngortitsiserput asannittumik eqqaamanerparput taamaalillutalu taassumunnga aliasuutaasumik iliuuseqarnaveersaarluta?’ Niviarsiannguaq ima eqqaamasaqarpoq: „Anaanama ikiorpaanga paasitillunga Jehova misigissuseqartoq, sulilu mikisuutillunga paasivara iliuutsikka taassuma isaani isumaqartut.“ (Tussiaat 78:40-42) Alla ima nassuiaavoq: „Nalunngilara iliuutsikka Satanip unammillerneranut Jehovap akissutaanut uppernarsaataanngikkunik assortuisuussasut. Jehovap uummataanik nuannaartitsinissara kissaatigaara, tamannalu iluaqutigisimavara, sulilu ullumikkut iluaqutigalugu.“ — Ussatit 27:11.

8. (a) Sumik inuunitsinni anguniagaqarnitsigut ersersissinnaavarput Jehova asannittumik eqqaamagipput? (b) Tamatumunnga atatillugu inuusuttut suna eqqarsaatigeqqissaartariaqarpaat?

⁸ Miserratissaanngitsumik silarsuarmi ajortumi matumani oqitsuinnaasanngilaq Jehovap iluarisaanik tamakkiisumik kiffartoqataanikkut taassuminnga eqqaamanninnissaq. Ajussanngeqaarli inuusuttoq Timoteus ukiuni hundredelinni siullerni inuusimasoq — aammami ullumikkut meerarpassuit inuusuttorpassuillu Guutimik mianerinnittut — malissagukkit kristumiutut piffissaq tamaat kiffartorlutit pioneerinngornikkut! (apustilit suliait 16:1-3; 1 Tásalûníkamiut 3:2) Taamaakkaluartorli pioneeritut kiffartornermi imminut pilersorsinnaanissat qulakkeeqqaartariaqarpat. Katissaguillu ilaquttannik pilersuisinnaassavit? (1 Timûtiuse 5:8) Apeqqutit tamakkua pingaarutilerujussuupput, tamakkuninngalu isumaliutiginneqqissaarnissat pingaarluinnartuuvoq.

Siunertaqarluni ilinniagaqarneq

9. Ilinniagaqarnissamut atatillugu suna inuusuttut aalajangigassaraat?

⁹ Inuiaqatigiinni pissutsit ajornakusoornerujartuinnartillugit pioneeritut pisariaqavissunut akissaqarnissamut naammattumik suliffissarsisinnaassagaanni siornatigornit ilinniagaqarsimanerunissaq pisariaqarsinnaasarpoq. Qularnanngitsumik malugisimavat allaat ilinniarnertuutut ilinniarsimasut ilinniagaqaqqittariaqartartut ullumikkut sulisitsisunit  piumasarineqartut naammassisinnaajumallugit. Ilissi inuusuttut Guutip iluarisaanik iliorusuttusi: Qanoq annertutigisumik ilinniagaqarusuppisi? Aalajangernersi inassummut isumassarsiarititaasumut matumunnga naapertuuttariaqarpoq: ’Pinngortitsisit eqqaaniaruk inuusutsillutit.’

10. Ilinniarneqarsinnaasoq pitsaanerpaaq sunaava?

¹⁰ Allaat silarsuarmi oqartussaasuttaaq ilinniagassatut pitsaanerpaatut isigisaat anguniartariaqarpat, tassa Guutip oqaasianik atuaqqissaarnikkut pissarsiarineqartartoq. Taalliortoq tyskeq Johann Wolfgang von Goethe ima oqarsimavoq: „[Inuiaat] silassorissutsikkut siumukarnerujartortillugit, paasissutissiinermut tunngavissatut atortussatullu Biibilip iluaqutiginissaanut periarfissat amerliartortarput.“ Aap, inuusuttut inuunermut piginnaanngorsarnissaat eqqarsaatigalugu Biibilimik atuaqqissaarneq ilinniagassanit allanit akimorsimaneqanngilaq! — Ussatit 2:6-17; 2 Timûtiuse 3:14-17.

11. (a) Suliarisinnaasatsinni suna pingaarnersaava? (b) Suna siunertaralugu niviarsiannguup ilinniagaqaqqinnissani qinersimavaa?

¹¹ Guutimik ilisarsineq inuunermik tunisisuummat, ullumikkut suliarisinnaasaq pingaarnerpaaq tassaavoq ilisarsinermik tamatuminnga siaruarterineq. (Ussatit 3:13-18; Juánase 4:34; 17:3) Tamannali kinguneqarluarnerpaamik suliarisinnaassagaanni tunngaviusumik ilinniagaqarsimaneq iluaqutaasinnaavoq. Paasilertuisinnaasariaqarpoq, tunngaveqarluartumik oqalussinnaasariaqarluni aammalu atuarsinnaasariaqarluni allassinnaasariaqarlunilu — tamakkulu atuarfimmi ilinniarneqarsinnaapput. Taamaattumik Tracytut Floridamiutut atuarnerit pimoorunniaruk. Taanna soraarummeernermini angusilluarsimavoq neriulluaatinilu pillugit ima oqarluni: „Guutinnut, Jehovamut, piffissaq tamaat kiffartortunngornissara anguniagariuaannarsimavara, neriuppungalu ilinniagaqarnera iluaqutigalugu anguniagara tamanna piviusunngortissinnaassallugu.“

12. Ilinniaqqissagaanni suna siunertaasariaqarpa?

¹² Sooq atuarnerlutit eqqarsaatiginikuuiuk? Jehovamut pikkorillutit kiffartulernissannut piginnaanngorsarnissat pingaarnerpaamik siunertaraajuk? Taamaappat pimoorullugu isumaliutigeqqissaartariaqarpat ilinniakkat qanoq annertutigisumik siunertamut tamatumunnga naapertuunnersoq. Immaqa angajoqqaatillu oqaloqatigeereerlusi isumaqatigiippusi ilinniagaqarnerit inatsisitigut piumasarisaasunit sivisunerusumik ingerlatiinnassagit. Immaqa ilinniaqqinnikkut imminut pilersorsinnaanissannut naammattumik akissarsiorfigisinnaasannik suliffittaarsinnaassaatit, tamannalu ilutigalugu Guutip naalagaaffianut kiffartornermut tamakkiisumik peqataasinnaanissannut piffissaqarlutillu nukissaqassallutik. — Matîuse 6:33.

13. Russit kristumiut ilinniagaqartut marluk sumik inuunermi anguniagaqarnertik qanoq ersersissimavaat?

¹³ Ilaat taamatut ilinniagaqaqqinnerminni piffissaq tamaat kiffartulereersinnaasimapput. Nadia Marinalu, niviarsissat Moskvami najugallit marluk taamaaliorsimapput. Marluullutik apriilimi 1994-imi kuisipput ikiorti-pioneerinngorlutillu. Kinguninngua ilinniarnertuunngorniat atuarfiannit soraarummeerput ukiunilu marlunni naatsorsuuserinermik ilinniarlutik. Ilinniarnerminni angusarissaaqaat, aamma maajimi 1995-imi pioneeritut nalinginnaasutut aallartinnerminni. Tamatuma saniatigut sapaatip-akunneranut katillugit 14-inik Biibilimik atuaqqissaaqateqartarput. Niviarsissat neriupput ilinniagartik iluaqutigalugu piffissaq tamaat kiffartornerminni imminnut pilersorsinnaanissaminnut naammattumik akissarsiorfissaminnik suliffissarsiumaarlutik.

14. Qanorluunniit annertutigisumik ilinniagaqarnissarput qineraluarutsigu inuunitsinni suna pingaarnerpaatittariaqarparput?

¹⁴ Tunngaviusumit annertunerusumik ilinniagaqaruit silatusaassaatit taamaaliorninnut pissutitit isumaliutigeqqissaassallugit. Tusaamasaalernissat pigisanillu katersuinissat  anguniagaraajuk? (Jeremia 45:5; 1 Timûtiuse 6:17) Imaluunniit ilinniagaqaqqinnerpit Jehovamut kiffartornermi suliniuteqarnerulernissannut atornissaa anguniagaraajuk? Lydia, ilinniagaqaqqinniarluni aalajangersimasoq, takutitsivoq assut sianisuumik iliorluni anersaamut tunngasut tunaartariuarlugit, ima oqarami: „Annerusumik ilinniagaqarsimasut ilaat pigisanik pingaartitsinermut tiguartissimapput Guutilu tunussimallugu. Uannut pingaarnerpaaq tassaavoq Guutimut attaveqarnera.“ Tamatta taamatut isumaqartariaqarpugut.

15. Ukiuni hundredelinni siullerni kristumiut ilinniagarisimasaat qanoq assigiinngitsigippat?

¹⁵ Ukiuni hundredelinni siullerni kristumiut ilinniagarisimasaasa assigiinngissusii qimerloorlugit ilikkagaqarnarpoq. Assersuutigalugu, Peter Johannesilu ’ilinniartitaanngitsutut ilisimaatsutullu’ isigineqarsimapput juutit ajoqersuisuisa atuarfiini ilinniarsimannginnamik. (apustilit suliait 4:13) Apustilili Paulus ullumikkut ilinniarnertuujunermut naapertuuttumik ilinniagaqarsimavoq. Ilinniagaqarsimanini tamanna imminut takoqqusaarutitut atunngilaa, inunnulli inuiaqatigiinni assigiinngitsunik inissisimaffilinnut oqaluussinermini iluaqutitut atortarlugu. (apustilit suliait 22:3; 1 Korintumiut 9:19-23; Filípimiut 1:7) Manaenilu, ’Herodesip nunamut ilaannarmut naalagaasup perorsagaaqatigisimasaa’, Antiochiami ilagiinni siuttunut ilaasimavoq. — apustilit suliait 13:1.

Aningaasanik atorluaaneq

16. (a) Sooq akiitsoqaraanni Pinngortitsisumik eqqaamanninnissaq ajornakusoornerussava? (b) Jesusip assersuusiaata ilaata aningaasanik atuilinnginnermi eqqarsaqqaarnissap pingaaruteqassusianik qanoq ililluni ilinniartippaatigut?

¹⁶ Aningaasaatitit paarilluarsinnaanngikkukkit Pinngortitsisinnik eqqaamanninnissat taassumalu iluarisaanik iliornissat ajornakusuulersissinnaavat. Aningaasanimmi attartoruit oqartoqarsinnaavoq allamik naalagaqalersutit. Tamanna Biibilimi ima oqaatigineqarpoq: „Taarsigassarsialik taarsigassarsisitsisumut inussiaataalersarpoq.“ (Ussatit 22:7) Aningaasanik atuilersinnani eqqarsarluaqqaarnissap pingaaruteqassusia Jesusip ima assersuusiorluni erseqqissarpaa: ’Kinami ilarsi qaqiffiliorumaguni ingikkallassannginnerpa akissaa naatsorsorlugu, inernissaanut atortussat piginerini? Tunngavilersimallugu inerneq ajuleruniuk takunnittunut tamanut mitaatigileqqunani.’ — Lúkarse 14:28, 29.

17. Sooq aningaasanik atuivallaarnaveersaarnissaq ajornakusoorsinnaava?

¹⁷ Taamaattumik silatusaarnerussaaq najoqqutassaq tunngaviusoq Biibilimiittoq manna malissallugu: „Akiitsoqarfeqarnaveeritsi, asaqatigiinnermik taamaallaat.“ (Rûmamiut 13:8, NV) Tamanna ajornakusoorsinnaavoq sorpassuit nutaaliat pinngitsoorsinnaanngisatsitut nipeqartillugit ussassaarutigineqartuartillugit. Ataataasoq meeqqaminik siuneqarsuseqalersitsiniarsimasoq ima oqarpoq: „Suut pisariaqartitaanersut suullu kissaataannaanersut nalunaaquttap-akunnerpassuini oqallisigisarsimavavut.“ Akisussaassuseqartumik aningaasatigut naatsorsuusiorneq atuarfinni ilinniartitsissutigineqarpiarneq ajorpoq. „Pingasunik teqeqqulik sanerai marluk takeqatigiit sipaarnissamit ilisimasaqarfiginerullugu ilinniarnertuussat atuarfiannit naammassisarpugut,“ inunnik isumaginninnermi siunnersorti oqarpoq. Aningaasanik silatuumik atuinissaq qanoq ililluni ilinniarneqarsinnaava?

18. Inuunermi najoqqutassap suup aningaasanik silatuumik nakkutiginninnissamik ilinniartippaatigut, soorlu najoqqutassaq tamanna atorluarsinnaava?

¹⁸ Aamma aningaasanik silatuumik nakkutiginninnissaq eqqarsaatigalugu inuunermi najoqqutassaq manna iluaqutaasumik malinneqarsinnaavoq: ’Pinngortitsisit eqqaaniaruk inuusutsillutit.’ Tamatuminnga malinninneq iluaqutaasarpoq tamatuminnga malinnittup, aamma aningaasanik atuineq eqqarsaatigalugu, Jehovap iluarisaanik iliornissani taassumunngalu tunniusimanissani pingaarnerpaatittarmagit. Taamaattumik aamma taamaaliortup inuttut kissaatini sutigut tamatigut Jehovamut asanninnerminik sanngiillisitsisinnavianngilai.  (Matîuse 16:24-26) Ersarissumik takunnissinnaassuseqarnissaq ilungersuutigissavaa, tassa Guutip naalagaaffia taassumalu piumasaatut iliorneq tunaartariuassavaa. (Matîuse 6:22-24) Taamaalilluni Biibilimi kajumissaarutip matuma malinnissaata immikkut pisinnaatitaaffittut isiginissaa ilikkarneqassaaq: „[Jehova] ataqqinaaseruk pigisannik.“ — Ussatit 3:9.

Inuusuttut ilaartariallit

19. Itsaq inuusuttut qanoq ilillutik Pinngortitsisertik eqqaamasimavaat?

¹⁹ Nuanneqaaq itsaq ullumikkullu meeqqat inuusuttullu taama amerlatigisut Pinngortitsisertik eqqaamasimammassuk. Nukappiaraq Samuel illernartuummi kiffartornermini aalajaattuarsimavoq naak kiffartoqatini kanngunartumik maligassiuigaluartut. (1 Samuel 2:12-26) Anguseriniartup, Potifarip nuliata, inuusuttoq Josef kanngunartuliornissaanut ussersinnaasimanngilaa. (1 Moses 39:1-12) Jeremias inuusuttunnguulluni akerlilersorneqaraluaqaluni sapiilluni oqaluussisimavoq. (Jeremia 1:6-8) Niviarsiaqqap Israelikkuusup sakkutuut naalagaanertaat aramiiariusoq sapiilluni siunnersorsimavaa Israelimi, Jehova pillugu tusagaqarfigisinnaasamini, ikiortissarsiornissaanik. (2 Kunngit 5:1-4) Daniel inuusuttoq ikinngutaalu Guutip nerisassat pillugit inatsisaanut naalannermikkut misilinneqaramik ilumoortuarsimapput. Danielillu ikinngutaasa, Sjadrakip, Mesjakip Abed-Negollu, inuusaliamik pallorfiginninnikkut Guutimut ilumuunnginnissamut taarsiullugu aatsitsivimmut innerinnaasumut iginneqarnissartik qinersimavaat. — Daniel 1:8, 17; 3:16-18; 2 Moses 20:5.

20. Ullumikkut inuusuttorpassuit qanoq ilillutik Pinngortitsisertik eqqaamasimavaat?

²⁰ Ullumikkut inuusuttut 19-it 25-llu akornanni ukiullit 2000-init amerlanerusut Jehovap Nalunaajaasuisa qullersaqarfianni New Yorkimiittumi kiffartorput. Taakkua inuusuttorpassuit nunarsuarmi sumi tamaaniittut Pinngortitsisiminnik eqqaamannittut ilaannamininnguaraat. Itsaq Josefitut iliorlutik ileqqussatigut minguissusertik taamaatikkumanngilaat. Ilarpassuisa kimut kiffartornissaminnik pinngitsooratik qinersisinniarneqarnerminni Guuti naalakkamissut inunnit naalannerusarsimavaat. (apustilit suliait 5:29) Polenimi 1946-mi Henryka Zur 15-inik ukiulik guutipilussiorumannginnini pillugu naalliutsinneqarsimavoq. „Sumilluunniit upperisaqarsinnaavutit,“ taassuminnga naalliutsitsisut ilaat oqarsimavoq, „katuullisulli sanningasulittut ittumik ussersuinnassaatit.“ Aalajaattuarmat orpippassuarnukaassimavaat aallaallugulu, upperisanili aalajangiusimallugu toquvoq. *

21. Kajumissaarut suna malittariaqarparput, taamaalioruttalu qanoq kinguneqassava?

²¹ Meeqqat inuusuttullu ukiut ingerlaneranni imminik eqqaamannissimasut eqqarsaatigalugit Jehova uummammigut nuannaartarsimassaqaaq! Kajumissaarutaa manna illit ilassiumaviuk: ’Pinngortitsisit eqqaaniaruk inuusutsillutit’? Taassuma ilinnut iliuuserisimasai iliuuseriumaagassaalu ullut tamaasa eqqarsaatigisakkit, kajumissaarullu manna ilassiuk: ’Ilisimatuuniarit, erninnguara, uummatigalugu tipaatsutsinniaruk, mitallersinnut akissutissaqaqqullunga.’ — ússatit 27:11. (wE 1/12 96)

[Quppernerup ataani ilanngussat]

Makku eqqaamavigit?

□ Meeqqat inuusuttullu Guutimik kinaassusilivittut isiginninnissartik qanoq ilillutik ilikkarsinnaavaat?

□ Pinngortitsisimik eqqaamanninneq qanoq paasisariaqarpa?

□ Ilinniagaqarnermi suna siunertaasariaqarpa?

□ Sooq aningaasanik silatuumik nakkutiginnissinnaanissaq pingaartuua?

□ Meeqqat inuusuttullu kikkut maligassaalluarpat?

[Atuaqqissaarnermi apeqqutit]

[Qupp. 16-mi assiliartaq]

Sooq atuarnerlutit eqqarsaatigisimaviuk?

[Qupp. 17-mi assiliartaq]

Aningaasanik silatuumik nakkutiginninnissat ilikkarsimaviuk?