Messias ilassisimassagaluarpiuk?

JESUS KRISTUSIP ukiuni pingasuni affarmilu Guutip oqaasia juutinut oqaluussissutigisimavaa. Nunarsuarmili kiffartornerata naangajalernerani taassuma nalaani inuusut amerlanersaasa taassuma Messiasiunera, imaluunniit ’Tanitaanera’, akueriumasimanngilaat. Sooq?

Ukiuni hundredelinni siullerni juutit Jesusip Messiasiuneranik akuersiumanngissimanerannut pissutaasunik arlalinnik Biibilimi nassaassaqarpoq. Pissutaasut tamakkua ilaat pingasut ullumikkuttaaq inuppassuit Jesusip Messiasitut Kunngiuneranik akuerinninnissaraluannut akornutaasarput.

 ’Nalunaaqqummik ilinnit takujumagaluaqaagut’

Ukiuni hundredelinni siullerni juutit Messiasimik ilassinninnginnerannut ilaatigut pissutaavoq Biibilimi Messiasimut tikkuussisunik akuerinnikkumannginnerat. Ilaanni inuit Jesusimik tusarnaartut piumasarisarpaat Guutimit aallartitaanini uppernarsarlugu nalunaaqqutiliussasoq. Assersuutigalugu, Matîuse 12:38-mi oqaatigineqarpoq allakkanik ilisimasut farisiiarillu ima oqartut: ’Ajoqersuisoq, nalunaaqqummik ilinnit takujumagaluaqaagut.’ Jesusip nalunaaqqutiliorfigereersimannginneramigit? Nalunaaqqutiliorfigereeraluarpai.

Taamani Jesus arlalissuarnik tupinnartulioreersimavoq. Imeq viinninngortissimavaa, nukappiaraq toqoqqajaasoq ajorunnaarsissimavaa, Peterip sakia arnaq napparsimasoq ajorunnaarsissimavaa, angut pupissoq ajorunnaarsissimavaa, angut nukillaarsimasoq pisussinnaalersissimavaa, angut ukiuni 38-ni napparsimasimasoq peqqissisissimavaa, angutip assaa toqungasoq uummartissimavaa, inuppassuit nappaataannit naalliunnartunit aniguisissimavai, sakkutuut naalagaata kiffaa ajorunnaarsissimavaa, uillarnerup ernera toqusunit makitissimavaa angullu tappiitsuullunilu oqajuitsoq ajorunnaarsissimallugu. Tupinnartuliarpassui tamakkua Kanami, Kapernaumimi, Jerusalemimi Nainimilu pisimapput, Judeamilu tamarmi eqqaanilu tusaamasaallutik. — Juánase 2:1-12; 4:46-54; Matîuse 8:14-17; 8:1-4; 9:1-8; Juánase 5:1-9; Matîuse 12:9-14; Mákorse 3:7-12; Lúkarse 7:1-10, 11-17; Matîuse 12:22.

Nalunanngitsumik Jesusip Messiasiuneranut uppernarsaatissat ikinngeqaat. Naak taama amerlatigisunik tupinnartulioreeraluartoq inuit upperinngilaat. Jesusip Guutimit aallartitaaneranut uppernarsaatissanik takunnikkaluarlutik taassuma Messiasiuneranik akuerinnikkumanngitsut anersaakkut tappiitsuupput. Uummataat manngertuullutillu sallusuissummit killissaanngillat. — Juánase 12:37-41.

Ullumikkummi? Inuit ilaat oqartarput takusinnaasatik kisiisa upperisinnaallugit. Tamannali silatusaarnerua? Biibilimi siulittuutit ersersippaat Jesus qilammi naalagaaffimmi Messiasikkoortumi kunnginngoreersimasoq. Takussaanngimmat aqutsinera, aamma pissutsit aaqqissuussaanerata ajortup matuma ullussaasa kingulliit aallartinnerannut nalunaaqutaasoq, paasisinnaassagutsigu nalunaaqutinik pisariaqarpugut. Nalunaaqutit tamakku takusinnaavigit? — Matîuse 24:3.

Biibilimi allassimavoq Kristusip kunngitut Messiasiusutut naalakkersuilerneranut ilisarnaatit tassaassasut sorsunnerit, nunap sajuttarneri, kaannersuit nappaalanersuillu siornatigut taama annertutigisumik pisimanngisaannartut. ’Ullussani kingullernigooq’ inuit namminissarsiortuullutillu, piumatuujullutillu imminnut naalakkersinnaanngitsuussapput. (2 Timûtiuse 3:1-5; Matîuse 24:6, 7; Lúkarse 21:10, 11) Ukiunik naatsorsuinikkut uppernarsaatissat saniatigut ullussanut kingullernut ilisarnaatit 20-nit amerlanerusut tikkuussipput Messias 1914-imi naalakkersuilersimasoq. — Takuuk Napasuliaq Alapernaarsuiffik, 1. marsi 1993-imoortoq, qupperneq 5.

’Aningaaserituut’

Pigisanik pingaartitsivallaarneq juutit Jesusip Messiasiuneranik akuerinnikkumasimannginnerannut pissutaavortaaq. Pisuussutinik pingaartitsivallaarnertik inuppassuit Jesusimik malinninnissaraluaminnut akornutigisimavaat. Assersuutigalugu, farisiiarit ’aningaaserituutut’ ilisimaneqarsimapput. (Lúkarse 16:14) Ilaanni angutip inuusuttup pisuup Jesus ornippaa aperalugulu qanoq ililluni inuuneq naassaanngitsoq angusinnaanerlugu. Jesusip ima akivaa: ’Inatsisit maleruakkit.’ Taava angut inuusuttoq ima oqarpoq: ’Tamakku tamaasa malinniareersimavakka,’ imalu apereqqilluni: ’Suna suli pinngilara?’ Qularnanngitsumik taamatut aperivoq paasigamiuk inatsisinik aalajangersimasunik malinninnerinnaq naammanngitsoq. Jesusip ima akivaa: ’Iluarluinnarumaguit aallarlutit pisit tamaasa akigikkit piitsunullu tunniullugit, taava qilammi pequuteqalerumaarputit; taava qaallutit malinnga.’ Periarfissatsialassuaq — Messiasimut ajoqersuganngorneq! Taamaakkaluartorli angut inuusuttoq qimaguppoq aliasulluni. Sooq? Pisuussutit nunarsuarmiittut pisuussutinit  qilammiittunit pingaarnerutikkamigit. — Matîuse 19:16-22.

Pissutsit allanngorsimanngillat. Messiasimut kunngiusumut ajoqersuganngussagaanni ilumoortoq anersaamut tunngasut allanit tamanit, aamma pigisanit, salliutittariaqarput. Tamanna pigisanik pingaartitsisumut unamminiarnartuuvoq. Assersuutigalugu, aappariit kangiani nunat ilaanni ajoqersuiartortitat Biibili pillugu arnamik oqaloqateqarsimapput. Jehova Guuti taassumalu ernera, Jesus Kristus, pillugu ilikkagaqarnerorusussorigamikku Napasuliaq Alapernaarsuiffik-mik Iteritsi!-millu tuniumasimavaat. Arnaq qanoq qisuariarsimava? Ima aperisimavoq: „Atuagassiat aningaasarsiornerulernissannik ikiussavaannga?“ Sunaaffa arnaq anersaamut tunngasunik pinnani uinngulli piinik soqutigisaqarnerusoq.

Aappariit taakkua aamma angummik inuusuttumik Biibilimik atuaqqissaaqateqarsimapput naalagaaffilersaartarfimmut ataatsimiigiartalersumik. „Piffissat atulussinnarpat,“ angajoqqaavisa oqarfigisimavaat. „Suliffippit saniatigut unnukkut suliffittaartariaqaraluarputit aningaasarsiorneruniassagavit.“ Ajoraluaqaaq angajoqqaat ilaasa meeqqatik kajumissaartarmatigik kunngimik Messiasiusumik ilinniarnissaminnut taarsiullugu uinngup piinik pingaarnerutitsinissaannik! Kinamiut ima ussateqarput: „Naalagaq pigisani tamaasa akiliutigigaluarunigilluunniit ukiuni 10 tuusintini inuunermik pisisinnaanngilaq.“

Inuppassuit paasilersimavaat kunngimik Messiasiusumik ilinniassagaanni malinnissagaannilu aningaasanik asanninnissamut inissaqanngitsoq. Jehovap nalunaajaasuisa ilaat iluanaarutigilluakkaminik nammineq suliffeqarfiuteqarsimasoq ima oqarpoq: „Aningaasarpassuaateqarneq iluarusunnarsinnaasorujussuuvoq, pisariaqavissuunanili. Aningaasat inummik pillualersitsineq ajorput.“ Nalunaajaasoq taanna maannakkut Europami Napasuliaq Alapernaarsuiffiup Peqatigiiffiata immikkoortortaqarfiisa ilaanni Betelimi kiffartorpoq.

’Juutit ersigigamikkik’

Inunnut ersineq juutit Jesusip Messiasiuneranik akuerinnikkumannginnerannut pissutaasut ilagaat. Messiasiunerami kikkut tamarmik tutsaanni akuerigunikku tusaamaneqarnertik navianartorsiortissinnaavaat. Inuit ilaannut tamanna akisuallaaqaaq. Assersuutigalugu taaneqarsinnaavoq Nikodemus, juutit eqqartuussisuunerinut Sanhedrinimik taaguutilinnut ilaasortaasoq. Jesusip tupinnartuliai ajoqersuutaalu tupigusuutigalugit taanna ima oqarsimavoq: ’Ajoqersuisoq, ilisimavatsigit ajoqersuisuusutit Guutimit pisoq, ilittut nalunaaqqutiliortoqarsinnaanngimmat Guutip najunngippani.’ Taamaattorli Nikodemusip unnuami tarrup ataani Jesus ornissimavaa, qularnanngitsumik juutinit allanit takuneqarusunnginnami. — Juánase 3:1, 2.

Jesusip oqaasiinik tusarsimasut ilarpassuisa Guutimit iluarisaanissaminnut taarsiullugu inunnit iluarisaanissartik kissaatigineruaat. (Juánase 5:44) Jesus ukiumi 32-mi u.n.k. tupiusaliorfissioqataajartorluni Jerusalemimiimmat ’inuit isertortukkut oqaluuserisorujussuusimavaat’. Inuit Jesus ammasumik oqallisigiumasimanngilaat ’juutit ersigigamikkik’. (Juánase 7:10-13) Allaat angutip tappiitsup Jesusip ajorunnaarsitaata angajoqqaavisa tupinnartuliap tamatuma Guutip aallartitaanit naammassineqarnera upperiumasimanngilaat. Taakkuattaaq ’juutinut ersisimapput’. — Juánase 9:13-23.

Ullumikkuttaaq inuit ilaasa takusinnaavaat Jesus Messiasitut qilammi kunnginngorsimasoq, taamaattorli tamatuma ammasumik nassuerutiginissaanut ersillutik. Allanit isiginerlugaalerusunngilluinnarput. Assersuutigalugu, Tysklandimi Jehovap nalunaajaasuisa ilaata Biibili pillugu angut oqaloqatigisimavaa, angullu taanna ima nassuersimavoq: „Ilissi nalunaajaasut, Biibili pillugu oqaluussissutigisasi ilumoorput. Uangali nalunaajaasunngoraluaruma kikkut tamarmik ingerlaannaq paasissavaat. Suleqatikka, sanilikka klubbimilu ilaquttakkalu ilaaffigisatsinniittut qanoq eqqarsassappat? Tamanna sapissavara.“

Inunnut ersineq sumik pissuteqarpa? Pingaarniassuseq, ilaquttanit ikinngutinillu nuannarineqarunnaarusunngissuseq, illaruaatigineqarnissamik nikanarsagaanissamillu  annilaanngatiginninneq inunnillu amerlanernit allaanerorusunnginneq. Misigissutsit tamakku Jehovap nalunaajaasui peqatigalugit Bibilimik atuaqqissaartalersunut misilinneqaataasaqaat. Assersuutigalugu, arnap inuusuttup Paratiisi Naalagaaffiup Messiasikkoortup Jesus Kristusimit aqunneqartup nunarsuarmi pilersitassaa tusaramiuk nuannaartorujussuusimavoq. Qitigiarnerli nuannarisorujussuuaa, inunnullu ersinini pissutigalugu neriuut tamanna allanut oqaluusererusunngilaa. Kiisamili sapiillisariarluni Biibili ammasumik oqallisigisalerpaa. Qitigiaqatinnaavisa alarpaat, uiali angajoqqaavilu soqutiginninnermik ersersitsipput. Kingorna arnaq inuusuttoq anaanaalu kuisipput, uialu ataataalu Biibilimik atuaqqissaartalerlutik. Inunnut ersinerup ajugaaffigineratigut akissarsiaq angeq!

Illit Messias ilassiviuk?

Jesusip qisummi toqujartornerani ajoqersugaasa ilaat najuupput. Taakkua taanna Messiasitut siulittuutigisaasutut ilassisimavaat. Juutit siuttui, suli nalunaaqqummik takusaqarusuttut, aamma taamani najuupput. ’Imminik annaakkili, taannaaguni Kristus Guutip qinigaa.’ (Lúkarse 23:35) Nalunaaqqummik takunissartik piumasariuaannassaneramikku? Jesus arlalippassuarnik tupinnartulioreersimavoq. Kiisalu inunngornera, kiffartornera, misilinneqarneri, toqutaanera makititaaneralu Allakkani Hebriiarisuuni siulittuuterpassuarnik eqquutitsipput. — Takuuk Hele Skriften er inspireret af Gud og gavnlig-ni, Napasuliaq Alapernaarsuiffiup Peqatigiiffia naqitigaani, qupperneq 343-44.

Sanioqquttut, Messiasiuneranut takussutissanik upperinninngitsut, Jesus mitaatigaat. (Matîuse 27:39, 40) Sakkutuut pisseritorpalaaqalutik Jesusip atisai akunnerminni agguarpaat ilullialu immeraatigalugu. (Juánase 19:23, 24) Allat inunnut ersinertik pissutigalugu Jesus Messiasitut akueriumanngilaat. Assersuutigalugu, Josef Arimatæamiu, Sanhedrinimut ilaasortaasoq, taaneqarsinnaavoq. Taannagooq ’Jesusip ajoqersugaasa ilagaat, kisianni juutit ersigalugit isertortukkut pisoq’. Messiasip toqunerata kingorna taassuma Nikodemus ilagalugu Jesusip timaa isumagisimavaa, tassuuna erserluni Josefip inunnut ersinini anigorsimavaa. — Juánase 19:38-40.

Illit ukiuni hundredelinni siullerni inuusimasuuguit Jesus Messiasitut ilassisimassagaluarpiuk? Taamaaliorsinnaassaguit tamatumunnga Biibilimi takussutissat akuerisariaqarpatit, uinngup piinik pingaartitsinaveersaartariaqarlutit inunnullu ersinermut nakkaannarnaveersaartariaqarlutit. Ullussani kingullerni makkunani tamatta immitsinnut ima aperisariaqarpugut: ’Jesus Messiasitut qilammi kunngiusutut ilassivara?’ Qanittukkut taanna nunarsuarmut aqutsilissaaq. Taamanikkussamut Jesus Kristusimik Messiasitut neriorsuutigisaasutut ilassinnittut akornanniissavit? (wE 15/11 96)

[Qupp. 29-mi assiliartaq]

Jesusip Messiasitut kunngiuneranut takussutissat tunuartinngisaannakkit

[Qupp. 32-mi assiliartaq]

Messias pillugu ilinniarnermi inuit allat qanoq oqarnissaannut ersineq amerlasuutigut ajugaaffiginiartariaqartarpoq