Periarfissaq asseqanngitsoq asiutinnaveeruk!

PETERIP * nakorsanngorniatut atuarnini ingerlallualereerlugu Biibilip annannissamik tusarliussaa soqutigilerpaa. Atuarnini naammassigamiuk napparsimmavimmilu nakorsatut sulilerami qaratsamik pilattaasartutut immikkut ilinniarnissaminik qullersaminit kajumissaarneqartualerpoq. Tamanna tassaavoq periarfissaq nakorsanngorlaat ilarpassuisa asiutikkumaneq ajugaat.

Peterili aalajangerpoq periarfissaq tamanna qaangiinnarniarlugu. Sooq? Anguniagaqarusussuseqannginnami imaluunniit piumassuseqannginnami? Naamik, neqeroorut isumaliutigeqqissaareersimagamiuk. Jehovamut nalunaajaasutut tunniulluinnarsimasutut kuisimasutullu kissaatigaa piffissami sapinngisani annertuup kristumiutut kiffartornermut atornissaa. Qaratsamimmi pilattaasartunngoraluaruni piffissani nukinilu annerujartuinnartut tassunga atortalissagaluarpai. Anguniagassamut neriunaatilimmut tamatumunnga naaggaarnera silatusaarnerua silatusaannginnerualuunniit?

Peterip aalajangernera immaqa inuit ilaasa sianiitsuliornertut isigissavaat. Biibilimili allassimasutut, soorlu Evfisumiunut agdlagkat 5:15, 16-imi allassimasutut, iliorusuppoq. Tassani apustilip Paulusip kristumioqatini ima kajumissaarpai: ’Taamaattumik mianersoqqissaaritsi saqilluarniarlusi, ilisimaatsutut pinnasi ilisimatuutulli; ullullu piginnaaffiusut asiutinnaveersigik, ullut ajormata.’

Malugiuk allassimammat ’ullut piginnaaffiusut’. Oqaaseq tamanna nutserneqarpoq griikerit oqaasiannit ingammik piffissamut pissutsinik aalajangersimasunik ilisarnaatilimmut imaluunniit suliassamut immikkut ittumut naleqquttumut atatillugu Biibilimi atorneqartartumit. Tassani Paulusip kristumiut pingaarutilinnut piffissaqarniartariaqarnerat erseqqissarpaa. Tassa ’sorliit iluarnersut misilittartariaqarpaat’, imaluunniit suut pingaarnerunersut paasiniartariaqarpaat. (Filípimiut 1:10) Pingaarnersiuilluni tulleriiaarisariaqarpoq.

Guutip nalitsinni suna siunertaraa? Guutip imminut asannittunut suna piumasaraa? Biibilimi siulittuutit nalunaatsumik takutippaat nalerput tassaasoq „naggatissaq“ imaluunniit ’ullussat kingulliit’. (Daniel 12:4; 2 Timûtiuse 3:1) Uagut nalitsinni suna pingaarnerpaatinneqartariaqartoq Jesus Kristusip erseqqissarsimavaa. Erseqqissumik oqarsimavoq pissutsit aaqqissuussaanerata ajortup matuma naalernerani ’naalagaaffimmik iivangkiiliu tamanna oqaluussissutigineqassasoq inuit najugaanni tamarsuarmi inuiaqatigiit tamarmik nalujunnaarutissaannik’. Aatsaanngooq tamanna nalunaajaassutigineqareerpat naggatissaq nalliutissaaq. — Matîuse 24:3, 14.

 Taamaattumik Guutip naalagaaffia pillugu nutaarsiassap nuannersup oqaluussissutiginissaanut ajoqersuganngortitsinissamullu periarfissat tamaasa atorluarniartariaqarpavut. (Matîuse 28:19, 20) Suliassaq tamanna kingorna uteqqinneqarnavianngimmat inuunermik annaassiniarluni sulinermi tamatumani sapinngisarput tamaat iliuuseqarnissatsinnut periarfissat kingullersaraat. Uagut nalerput tassaavoq ’nalliuttoq nuannersoq’, imaluunniit ’ulloq annaassivik’. — 2 Korintumiut 6:2.

Silatuumik aalajangerit

Peterip — angutip inuusuttup aallaqqaataani eqqartorneqartup — aalajanginnginnermini pissutsit isumaliutigeqqissaarpai periarfissanilu nalilersoqqissaarlugit. Nalunngilaa qaratsamik pilattaasartunngorniarluni atuaqqinnissaq ajunngikkaluartoq. Sunali pingaarnerpaatippaa? Kristumiutut kiffartornini, nalunnginnamiuk suliaq tamanna nukinginnartuusoq. Aammali naammassisariaqakkaminik pisussaaffeqarpoq. Nuliaqarpoq pilersortariaqakkaminik piffissaq tamaat oqaluussisartuusumik. (1 Timûtiuse 5:8) Aammattaaq ilinniarnermini akiitsuni akilersugassarai. Taava qanoq aalajangerpa?

Peter aalajangerpoq radiologi qinnguartaanerlu immikkut ilinniarniarlugit. Tamakkuninngami suliaqarsinnaassaaq nalinginnaasumik sivisussusilimmik, sungiusarninilu nalinginnaasumik suliffiup nalaani ingerlassinnaassavaa. Aap, immaqa inuit ilaasa tamanna suliffittut qutsippallaanngitsutut isigissavaat, kisianni Peter anersaakkut suliniutinut piffissaqarnerussaaq.

Aamma pissutsit allat Peterip eqqarsaatigai. Allat allatut aalajangertut eqqartuutinngikkaluarlugit nalunngilaa silarsuarmi pissutsinut akuliusimavallaarneq kristumiumut ulorianaateqartoq. Anersaakkummi akisussaaffinnik sumiginnaalissutaasinnaavoq. Taamaannera takuneqarsinnaavoq suliffimmik qinersinermut atatillugu pisimasukkut allakkut.

Piffissaq tamaat Guutip naalagaaffia pillugu oqaluussisartut ilaat eqqumiitsuliortuuvoq pikkorissoq. Assilialiaminik nioqquteqartarnini inuussutigisinnaavaa. Taamaalilluni kristumiutut kiffartornermut tamanit pingaarnermut piffissani annertooq atuutigalugu imminut sinnilimmik pilersorsinnaavoq. Eqqumiitsuliortutulli angusaqarnerunissaminik kissaataa alliartuinnarpoq. Qalipaaneq eqqumiitsuliornerlu tiguartilluinnarfigai, piffissaq tamaat oqaluussisartuujunnaarluni naggataatigullu Guutip naalagaaffianik oqaluussissutiginninneq aallukkunnaavillugu. Kingorna Biibilimut akerliusumik iliuuseqartalerpoq ilagiinnullu kristumiunut ilaasinnaajunnaarluni. — 1 Korintumiut 5:11-13.

Nalerput immikkut ittuuvoq

Ullumikkut Jehovamut kiffartortutut taassumunnga aalajaattuarnissarput kissaatigaarput. Nalunngilarput inuiaat oqaluttuarisaaneranni piffissami nalinginnaannginnerpaami inuulluta. Guutimut kiffartortuaannarumalluta ullumikkullu pissutsit pitsaasumik nammassinnaajumallugit assigiinngitsutigut allannguisariaqartarsinnaavugut. Tamanna nunaatillip katersuiffissaanut assersuussinnaavarput. Katersuiffik immikkut suliniarfiuvoq, sulisut immikkut iliuuseqartariaqarfiat pisariaqarpallu sivisunerusumik sulisariaqarfiat. Sooq? Piffissaq killilik tamatumunnga atorneqartussaammat.

Ullumikkut pissutsit aaqqissuussaanerata ajortup ullussai ikittuaraannanngorput. Kristumiut ilumoortut Jesusip maligassiaanik malinninniarlutik taassumalu tumaanik atuaaniarlutik ilungersorlutik iliuuseqarnissartik aatsaat taama pisariaqartitsigaat. Taassuma nunarsuarmi inuunermini nalunaatsumik takutissimavaa nammineq suna pingaarnerpaatillugu. Imami oqarsimavoq: ’Aallartitsisima suliareqqusai ulluugallartillugu suliarissavakka; unnuaq suliffigineqarsinnaanngitsoq nalliukkumaarpoq.’ (Juánase 9:4) Unnuap nalliukkumaarnera eqqaagamiuk Jesusip eqqarsaatigai eqqartuunneqarlunilu kikiattugaallunilu toqunissani, nunarsuarmi kiffartornermi naanissaa Ataatamilu qilammiusup suliaanik naammassinnissinnaajunnaarallarnissani.

Ukiuni pingasuni affarmilu Jesusip kiffartornermini piffissami ilaa tupinnartuliornermut  napparsimasunillu ajorunnaarsitsinermut atortarpaa, piffissanili annerpaaq Guutip naalagaaffia pillugu nutaarsiassamik nuannersumik oqaluussissutiginninnermut upperisarsiornermillu ilumuunngitsumit ’aallarussaasut iperarneqarnissaannik torlulaatiginninnermut’ atortarpaa. (Lúkarse 4:19; Matîuse 4:17) Jesus kiffartornermini ilungersuussilluartuusimavoq ajoqersukkanilu tunngaviliussaminik ineriartortitsisinnaaqqullugit sunniuteqarluartumillu oqaluussinermik ingerlatsisinnaaqqullugit ilinniartinnissaannut piffissaqarfigisarsimallugit. Guutip naalagaaffiata soqutigisaata siuarsarnissaannut periarfissat tamaasa asiutinnaveersaartarpai ajoqersukkamilu aamma taamaliornissaat kissaatigalugu. — Matîuse 5:14-16; Juánase 8:12.

Jesusitut iliorluta uagut ullumikkut taassumunnga malinnittuusugut pissutsit inuiaat atugaat Jehova Guutip tamakkuninnga isiginnittaasiatut isigisariaqarpavut. Pissutsit aaqqissuussaanerata matuma ullussai naangajalerput, Guutillu naakkinnilluni kissaatigaa kikkut tamarmik annannissamut periarfissaqassasut. (2 Pîtruse 3:9) Taamaattumik silatusaarnerussannginnerpa Jehovap piumasaatut iliornissaq allanit tamanit salliutissallugu? (Matîuse 6:25-33) Ingammik ulluni immikkorluinnaq ittuni makkunani inunnit allanit pingaartutut isigineqartut kristumiutut inuunitsinni pingaannginneroriataarsinnaapput.

Inuunitsinni Guutip piumasaatut iliornermik sallerpaanngortitsisimanerput arlaannattaluunniit peqqissimissutigissavaa? Naamerluinnaq, imminummi pilliutigeriaannaassuseqarluta kristumiutut inuunerput pilluaqqusaangaassutigissavarput. Assersuutigalugu, Jesusip ajoqersukkani ima oqarfigisimavai: ’Ilumut oqarfigaassi: inuup kialuunniit illuni qatanngutiniluunniit angutit qatanngutiniluunniit arnat arniluunniit angunniluunniit qitornaniluunniit nunaatiniluunniit qimakkaluarunigit uanga iivangkiiliulu pilluta, hundredeleriarlugit maanna matumani pisaassavoq illussaminik qatanngutissaminillu arnassaminillu qitornassaminillu nunaatissaminillu, qinugineqaraluartilluni, silallu aappaani inuuneq naassaanngitsoq pissavaa.’ — Mákorse 10:29, 30.

Piffissamik Jehovamik unnersiutiginninnermut Guutillu naalagaaffia pillugu tusarliussamik oqaluussissutiginninnermut atuinikkut pilluaqqusaanerit angingaartut aningaasanik nalilerneqarsinnaanngillat. Pilluaqqusaanerit tamakkua ilaatigut tassaapput ikinngutit ilumoortut, Guutip piumasaatut iliornikkut nalerisimaarneq, Guutimit iluarisaaneq inuunermillu naassaanngitsumik siunissaqarneq. (sarĸúmersitat 21:3, 4) Inunnik allanik anersaakkut ikiuineq Jehovallu nalunaajaasuisut taassuma aqqanik illernartumik ataqqinartitsineq ilumut immikkut pisinnaatitaanerupput nalissaqanngitsut! ’Ullunik piginnaaffiusunik asiutitsinaveersaarneq’ qularutissaanngitsumik silatusaarneruvoq annertuumillu pilluaqqusaanarluni. Ulluni atukkatsinni Guutip naalagaaffia pillugu nutaarsiassamik nuannersumik oqaluussissutiginninneq aatsaat taama nukinnginnartigaaq! Periarfissaq asseqanngitsoq tamanna asiutinnaveersaarusuppiuk? (wE 15/11 96)

[Quppernerup ataani ilanngussaq]