Qeqertaaraq avinngarusimasoq

PISSUSILERISSUTIT qeqertamut Sankt Helenamik eqqartuinermi atorneqarajuttut tassaapput „mikisoq“ aamma „avinngarusimasoq“. Naleqqulluarput, tassami qeqertaq tamanna kilometerisut 17-isut isorartutigaaq kilometerisullu qulisut atitutigaluni sinerissamullu qaninnerpaamut, tassa Afrikap kitaata kujataata sineriaanut, kilometerisut 2000-isut ungasitsigaluni. Napoleon Bonaparte nunaminit peersitaagami qeqertamut tamaannga aallartitaasimavoq, inuunermilu sinnerani ajorsartitaasimasutut tamaani najugaqarsimalluni.

Qeqertaq immamit isigalugu pallittaalisatut ajugaaffigineqarsinnaanngitsutut isikkoqarpoq. Iluamilli oqaatigalugu tassaavoq innermik anitsisartoq anitsiunnaarsimasoq qaarsunik qutaarluusunik sinerialik ilaatigut immamit Atlantikumit meterisut 500-sut 700-sulluunniit qatsitsigisunik. Qaqqaq meterisut 818-isut portutigisoq Mount Actaeon qeqertap qaqqaasa portunersaraat. Qeqertaq nerumittumik atoruminartumillu silaannaqarpoq, anorimik nillataartumik immallu sarfaanik nillertumik pissuteqartumik. Nunalli timaani qaqqani sila naasoqassuserlu sinerissamit atsissumit allaanerujussuupput.

Sankt Helena 1600-kkut naangajalernerannilli Tuluit Nunaannut atavoq. Inui ikittunnguit 5000-sut Europamiunik, Asiamiunik Afrikamiunillu naggueqarput. Qeqertami tamarmi inuit immikkuullarissumik nipilimmik tuluttut oqalupput. Qeqertami timmisartoqarfeqanngilaq. Immakkut angallanneq kisimi avammut attaveqaataavoq, aalajangersimasumillu Afrika-kujallermut Tuluillu Nunaannut umiarsuaqartarpoq. Aatsaat 1990-kkut qiteqqunneranni qeqertarmiut satellitikkut attaveqaatit iluaqutigalugit TV-kkut isiginnaarsinnaalerput.

Guutip naalagaaffia pillugu nutaarsiassaq nuannersoq 1930-kkut aallartinneranni qeqertamut siullermeerluni annguppoq. (Matîuse 24:14) Ukiut ingerlaneranni qeqertap inuisa ilarpassuisa erlinnartuut tamanna, timikkut pisuussutinik pingaassuseerutitsisoq, ilassisimavaat. (Matîuse 6:19, 20) Ullumikkut qeqertap inui 31-ugaangata ataatsimik oqaluussisartoqarpoq, naleqqiussillunilu kisitsit tamanna silarsuarmi pitsaanersaavoq!

 [Qupp. 26-mi nunap assingi]

(Allassimasut qanoq inissisimanersut naqitami takuneqarsinnaavoq)

Sankt Helena

JAMESTOWN

AFRIKA

IMAQ ATLANTIKOQ

Sankt Helena

Levelwood