Qinullutit assatit iluaatsuitsut qullartakkit
Qinullutit assatit iluaatsuitsut qullartakkit
’Taamaattumik ima peqqusivunga: angutit qinusassasut sumiittaraangamilluunniit, assatillu iluaatsuitsut qullartassagaat kamannatik saqitsaannatillu.’ — 1 TIMÛTIUSE 2:8.
1, 2. (a) Timûtiusimut agdlagkat sujugdlît 2:8-mi allassimasoq qanoq Jehovap innuttaasa qinnutaannut attuumassuteqarpa? (b) Apeqqutit suut maanna misissornerussavavut?
JEHOVAP naatsorsuutigaa kiffani imminut ilumoorfiginnissasut imminnullu ilumoorfigeqatigiissasut. Apustili Paulusip ’iluaatsuinneq’ imaluunniit ilumoorfiginninneq qinunermut attuumassuteqartippaa ima allakkami: ’Taamaattumik ima peqqusivunga: angutit qinusassasut sumiittaraangamilluunniit, assatillu iluaatsuitsut qullartassagaat kamannatik saqitsaannatillu.’ (1 Timûtiuse 2:8) Paulusip kikkut tamarmik takkuanni, tassa kristumiut katersuuffigisaanni ’sumiluunniit’, qinusarneq eqqarsaatigigunarpaa. Ilagiit ataatsimiinneranni Guutip innuttaasa qinoqatigiinnerat kia siulersussavaa? Angutit illernartut, naapertuilluartut ataqqinnittullu Biibili naapertorlugu Guutimut akisussaaffimminnik tamanik peqqissaartumik naammassinnittut kisimik taamaaliorsinnaatitaapput. (Nalunaajaasup oqaasii 12:13, 14) Anersaakkut ileqqussatigullu minguitsuusariaqarput Jehova Guutimillu asannilluinnartariaqarlutik.
2 Ingammik ilagiinni utoqqaanertat ’assatik iluaatsuitsut qullarlugit’ qinusariaqarput. Jesus Kristus aqqutigalugu qamannga pisumik qinnutaat Guutimut ilumoorfiginninnermut ersiutaapput, taamaalillutillu kamanneq saqitsaannerlu ingalassinnaavaat. Tassami, angut kinaluunniit kristumiut ilagiissaasa qinoqatigiinnerannik siulersuinermik immikkut pisinnaatitaaffilik kamaataqassanngilaq, ajorisaqarnaniluunniit Jehovamulluunniit peqatigiissortaanullu ilumoorfiginninngitsuussanani. (Jâko 1:19, 20) Qinoqatigiinnermi siulersuisinnaasut Biibilimi sunik allanik unnersuunneqarpat? Nammineerluta ilaqutariittullu qinugaangatta najoqqutassiat Biibilimeersut suut malittariaqarpavut?
Suut qinnutigissanerlugit siumut eqqarsaatigikkit
3, 4. (a) Ataatsimiinnermi qinoqatigiinnermi aqutsisuussagaanni sooq iluaqutaassava qanoq oqaaseqassanerluni siumut eqqarsaatigissallugu? (b) Biibilimi qinnutit takissusiat pillugu qanoq allassimasoqarpa?
3 Qinoqatigiinnermi siulersueqquneqaraangatta qularnanngitsumik periarfissaqartarpugut suut qinnutigissanerlugit siumut eqqarsaatigissallugit. Taamaaliorutta eqqarsaatit pingaartut naleqqulluartullu qinunermi eqqaasinnaavavut qinnut takisuutinnagu ataqatigiinngitsuutinnagulu. Aamma nammineq inuttut qinugaangatta nipituumik qinusinnaavugut. Qinnutit taamaattut naatsuusinnaallutillu takisuujusinnaapput. Jesus apustilini aqqaneq-marluk toqqartinnagit unnuaq naallugu qinuvoq. Toqunerminilli eqqaaniaalluni nalliuttorsiortarnissaq pilersikkamiuk iffiaq viinnilu pillugit qinnutai naatsunnguusimagunarput. (Mákorse 14:22-24; Lúkarse 6:12-16) Nalunngilarpullu Jesusip qinnutai naatsut aamma Guutimut iluarisaasut.
4 Ilaquttatta nerilernermi qinoqatigiinnerat siulersorutsigu naatsumik qinusinnaavugut, suulluunniillu qinnutigineqaraluarpata nerisassat pillugit qujasariaqarpugut. Kristumiut ataatsimiinneranni najuuttut qinoqatigiinnerat siulersussagutsigu assigiinngitsorpassuit ilannguttariaqanngilavut qinnuterpullu takisuujusariaqarnani. Jesusip allakkanik ilisimasut isornartorsiorsimavai ’ilumuunngitsumik qinummersortarmata’. (Lúkarse 20:46, 47) Kristumiut taamaaliunngisaannassapput. Ilaannikkut immaqa qinoqatigiinnermi siulersuisup takilaartumik qinunissaa pissusissamisoorsinnaavoq. Utoqqaanertap ataatsimeersuarnermi qinoqatigiinnermi siulersuisussap siumut eqqarsaatigisariaqarpaa suut eqqaassanerlugit, qularnanngitsumillu arlalinnik eqqaasaqarusussaaq, tamatumanili qinnutit aamma takivallaartariaqanngillat.
Ataqqinnillutit Guuti saaffigiuk
5. (a) Qinoqatigiinnermi siulersuigaangatta suna eqqaamasariaqarparput? (b) Sooq ataqqinnittumik qinuneq naleqqulluartuua?
5 Qinoqatigiinneq siulersoraangatsigu eqqaamasariaqarparput inummut saaffiginninnginnata. Pinngortitaavugut ajortiliusut Naalakkamut kisimi oqartussaasumut Jehovamut qinunikkut saaffiginnittut. (Tussiaat 8:4-6, 10; 73:28) Taamaattumik ataqqinninnermik eqqortumik ersersitsisariaqarpugut taassumalu iluarinngisaanik oqaaseqarnissarput periaaseqarnissarpullu mianersuutigalugit. (Ussatit 1:7) Tussiaasiortoq David ima allassimavoq: „Uangali isersinnaavunga illit illunnut, uannut unneqqarissuugavit. Naalaffiit illernartoq saallugu pallorpunga mianeralutit.“ (Tussiaat 5:8) Taama isumaqarutta, Jehovap Nalunaajaasuisa ataatsimiinneranni qinoqatigiinnermi siulersuissagutta qanoq qinussaagut? Kunngi nunamiittoq oqaluffigissagutsigu soorunami ataqqinnittumik qinngaqqunnanngitsumillu sassariaaseqassaagut. Taava Jehova Guutimut, ’naassaanngissutsip Kunngianut’, ataqqinninnerulluta qinngaqqunnannginnerullutalu qinusariaqannginnerpugut? (sarĸúmersitat 15:3, NV) Taamaattumik qinugaangatta oqaatsit soorlu ’Kumoorn, Jehova’, ’Inuulluaqquatsigit’, imaluunniit ’Ajunnginniarna’ atornaveersaassavavut. Biibilimit ersarippoq Guutip ernituata Jesus Kristusip Ataatani qilammiusoq taama oqaluffiginngisaannaraa.
6. ’Saammaassisup issiavissaarsuanut sassaraangatta’ suna eqqaamasariaqarparput?
6 Paulus allassimavoq: ’Siooranata sassarniarta saammaassisup issiavissaarsuanut.’ (Eprîarit 4:16) Jesus Kristusip utertitsissutitut pilliutaanut upperatta ’siooranata’ Jehova saaffigisinnaavarput naak ajortiliugaluarluta. (apustilit suliait 10:42, 43; 20:20, 21) Kisianni ’sioorannginnerput’ ima paasisariaqanngilaq Jehovamut asuli oqalorusaaginnassasugut; aamma ataqqinninngitsumik oqaaseqartariaqanngilagut. Qinoqatigiinnermi qinnuterput Jehovap iluarissappagu qinngaqqunnanngitsumik ataqqinnittumillu qinusariaqarpugut, qinunerullu nalunaaruteqarnermut, inunnik aalajangersimasunik unnersuussinermut tusarnaartunilluunniit naveersinermut atornissaa naleqqutinngivippoq.
Maniguullutit qinusarit
7. Jehovap naalaffiutaata atoqqaartinneqarnerani Salomonip qinugami maniguunnera qanoq erserpa?
7 Nammineq qinugaangatta qinoqatigiinnerlu siulersoraangatsigu eqqaamasariaqarparput qinunermi maniguunnerup pingaaruteqarnera Biibilimi erseqqissarneqarmat. (2 Israelikkut 7:13, 14) Jerusalemimi Jehovap naalaffiutaata atoqqaartinneqarnerani kunngi Salomonip qinnutaa maniguuppaluppoq. Salomonip nunarsuarmi illuliat alutornangaarnerpaartaasa ilaat naammasseqqammerpaa. Taamaattorli maniguulluni ima qinuvoq: „Guuti nunarsuarmi najugaqarnerami? Naagga, qilaat tamarmik ilinnut najugassatut mikivallaareermata illu manna sanaara suli mikiginerujussuussavat.“ — 1 Kunngit 8:27.
8. Qinoqatigiinnermi siulersuisup maniguunnera qanoq malugineqarsinnaava?
8 Qinoqatigiinnermi siulersuigaangatta Salomonitut maniguuttariaqarpugut. Soorunami iluartuusaartutut nipeqarusunngilagut, kisianni maniguukkutta nipitsigut tusarneqarsinnaavoq. Maniguulluni qinnutit pikkunarsaartuunatillu pissuserinngisamik pissusilersornerunngillat. Qinusup imminut malunnartinniarnani qinnuigisaq malunnartinniartarpaa. (Matîuse 6:5) Aamma qinnutigisatsigut maniguunneq malugineqarsinnaavoq. Maniguukkutta Guuti uagut periaaserput atorlugu aalajangersimasumik iliornissaanik peqquserpalulluta qinnuivigissanngilarput. Akerlianik Jehova qinnuigissavarput piumasani illernartoq naapertorlugu ilioqqullugu. Tussiaasiortoq eqqortumik isumaqarluni ima qinuvoq: „[Jehova], annaatsigut! [Jehova], pilluaatissitsigut!“ — Tussiaat 118:25; Lúkarse 18:9-14.
Uummammit pisumik qinusariaqarpugut
9. Matîuse 6:7-imi Jesus qanoq pitsaasumik siunnersuiva, qanorlu ililluta tamanna maleruarsinnaavarput?
9 Qinoqatigiinnermi siulersuilluta imaluunniit nammineq inuttut qinnutivut Guutimut iluarisaassappata uummammit pisumik qinusariaqarpugut. Oqaatsivut eqqarsaatiginagit qinnut ataasiinnaq uteqattaaginnassanngilarput. Jesus qaqqami oqaluutsimini ima siunnersuivoq: ’Qinusaraangassili oqaatsisi Guutimik nalusutut amerlanaassanngilasi, taakku amerlasuunik oqaaseqaraangamik tusarneqassasorisarmata.’ Jesus ima oqarporlusooq: ’Asuli oqalorujuussanngilasi isumaqanngitsumilluunniit uteqattaarinasi.’ — Matîuse 6:7; aamma takuuk Ny Verden-Oversættelsen, quppernerup ataani ilanngussaq.
10. Sooq arlaleriarluni aalajangersimasumik qinnuteqarneq kukkunerunngila?
10 Soorunami aalajangersimasoq arlaleriarlugu qinnutigissallugu kukkunerunngilaq, Jesusimi oqarsimavoq: „Qinujuaritsi, tunineqassaasi taava; ujarlertuaritsi, nanisissaasi taava; kasuttortuaritsi, mappiunneqassaasi taava.“ (Matîuse 7:7, NV) Immaqa Jehovap oqaluussisarneq siuarsarmagu sumiiffimmi aalajangersimasumi naalagaaffilersaarfik nutaaq pisariaqartinneqarpoq. (Jesaja 60:22) Taava nammineq qinunitsinni aamma Jehovap innuttaasa ataatsimiinneranni qinoqatigiinnermi siulersuigaangatta naleqqulluassaaq pisariaqartitsineq tamanna eqqaasassallugu. Taamaaliorneq tassaanavianngilaq ’isumaqanngitsumik uteqattaarineq’.
Unnersiutiginninneq qutsaviginninnerlu eqqaamakkit
11. Filípimiut 4:6, 7-imi allassimasoq inuup nammineq qinnutaanut aammalu qinoqatigiinnermi siulersuilluni qinnutaanut qanoq attuumassuteqarpa?
11 Inuppassuit Guuti saaffigisarpaat aatsaat aalajangersimasumik qinnuteqarniaraangamik, Jehova Guutimulli asanninnitta killittariaqarpaatigut unnersiutigisarnissaanut qutsavigisarnissaanullu nammineq qinugaangatta qinoqatigiinnermilu siulersuigaangatta. Paulus ima allassimavoq: ’Suulluunniit pillugit isumakulunnaveeritsi, nungullugillu kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ (Filípimiut 4:6, 7) Taamaattumik kissaativut qinnutivullu aamma Jehovap tunissutai anersaakkut timikkullu ittut pillugit qujaniutit oqimaaqatigiissaartariaqarpavut. (Ussatit 10:22) Tussiaasiortoq ima allassimavoq: „Unnersiutiginnissummik Guuti pilliiffiginiaruk naammassillugillu Qutsinnerussaartumut neriorsuutitit.“ (Tussiaat 50:14) Davidilu tussiaasiorluni Guutimut ima qinusimavoq: „Guutip aqqa unnersiutigissavara erinalersorlunga qujaninnillu naalannarsisillugu.“ (Tussiaat 69:31) Uaguttaaq taamaaliortariaqannginnerpugut nammineq inuttut qinoqatigiinnermilu siulersuilluta qinugaangatta?
12. Tussiaat 100:4, 5-imi allassimasoq qanoq ililluni ullumikkut eqquuppa, taamaattumillu Guuti qutsavigissallugu unnersiutigissallugulu sunik pissutissaqarluarpugut?
12 Guuti pillugu tussiaasiortoq allassimavoq: „Isaaffiisigut iseritsi qujaniummik erinalersorlusi, silarliutaanut iseritsi unnersiutiginnissummik tussiarlusi. Qutsavigisiuk, aqqa unnersiutigisiuk! [Jehova] avaaginnittuummat, isumassuinera atammat naassaanngitsumut, unneqqarissusialu kinguaariikkuutaani.“ (Tussiaat 100:4, 5) Ullumikkut inuit inuiaqatigiinnit tamaneersut Jehovap ’naalaffiutaata silarliutaanut’ isaapput, tamannalu pillugu unnersiutigisinnaallugulu qutsavigisinnaavarput. Illit najukkanni naalagaaffilersaarfeqarneq pillugu Guuti qutsavigisarpiuk pingaartitsinerillu takutittarpiuk taassuminnga asannittut ilagalugit ataatsimiinnerit aalajaallutit najuuffigisarlugit? Ataatarput qilammiusoq asannittoq erinarsornikkut unnersiutigineqarlunilu qutsavigineqaraangat illit uummatikkut iluunngarlutit erinarsoqataasarpit?
Qinunissannut kanngusuppallaanngisaannarit
13. Assersuutip suup Biibilimeersup takutippaa Jehova qinunikkut saaffigisariaqaripput, allaat pisuussuteqartutut qinngaqqunnartutullu misigigaluarluta?
13 Allaat qinunissamut qinngaqqunnartutut misigigaluarutta nangaanata qamannga pisumik Guutimut qinusariaqarpugut. Juutit allamiunik nuliartaarnermikkut ajortuliormata Ezra seeqqummersimavoq assanilu ilummoorfiginnittut Guutimut isatsillugit ima qinulluni: „Guutiga! Isikka ilinnut aarlortissallugit kanngusukkaluarpunga nikanarsagaasutullu misigisimallunga, Guutiga! Ajortuliavummi amerlangaarmata artulerpavut, pillagassaassuterpullu angingaarami qilammut anngussimavoq. Siuaasatta nalaanniit manna tikivillugu angisuumik pillagassaassuteqarsimavugut . . . Atugarliuutit uatsinnut nalliussimasut annertoqaat suliavut ajortut pillagassaassutsittalu angissusia pissutaallutik. Illilli Guuterput, pinerlunnitsinnut naapertuuttumik pillarsimanngilatsigut, ilaatigullu pillarneqanngitsoortissimavatsigut. Inatsisitimmi unioqquteqqissanerpavut aappartaarluta inuit maajunnartuliortorsuit ilaannik? Taamaalioraluaruttami kamaateqqajaqaatsigut nungutillutalu amiakkuerulluta aniguisoqartinnatalu. [Jehova] Israelikkut Guutiat, iluartuuvutit. Taamaattumik ullumi uagut amiakkuuvugut aniguisimasut. Takuuk, maanna sassarfigaatsigit pillagassaalluta. Taama ajortigisunik pisoqarsimammat kinaluunniit ilinni atasinnaanngilaq.“ — Esra 9:1-15; 5 Moses 7:3, 4.
14. Ezrap nalaani pisimasut eqqarsaatigalugit Guutimit isumakkeerfigineqarusuttut qanoq iliortariaqarpat?
14 Guutimit isumakkeerfigineqassagutta nassuerlutalu peqqissimisariaqarpugut ’allamillu isumataarnermut naapertuuttunik inerititaqartariaqarluta’. (Lúkarse 3:8; Job 42:1-6; Jesaja 66:2) Ezrap nalaani Israelikkut allamik isumataaramik ajortuliatik aaqqinniarlugit iliuuseqarput, nuliatik allamiut peersillugit. (Esra 10:44; naleqqiuguk Korintumiunut agdlagkat aípait 7:8-13.) Sualuttumik ajortuliornitsinnik Guuti isumakkeerfigeqqulluta qinnuigigutsigu, taava qinunikkut maniguulluta ajortuliarput nassuerutiginiartigu allamillu isumataarnermut naapertuuttumik inerititaqalerluta. Allamik isumataarutta ajortuliornerullu iluarsinissaanik kissaateqarutta utoqqaanertanik anersaakkut ikiortissarsiussaagut. — Jâko 5:13-15.
Qinunikkut tuppallersaatissarsiorit
15. Hannap misigisaata qanoq takutippaa qinunikkut tuppallersarneqarsinnaasugut?
15 Arlaannik erloqissuteqangaaraluarutta qinunikkut tuppallersaatissarsisinnaavugut. (Tussiaat 51:19; Ussatit 15:13) Hanna ilumoorfiginnittoq taamaaliorsimavoq. Taamanikkut Israelikkut meerarpassuaqartarput, taannali meeraqanngilaq. Uia Elkana nuliami aappaanik, Peninnamik erneqarlunilu paneqarpoq, Peninnallu Hanna mitaatigisarpaa ernisuitsuummat. Hannap qamannga pisumik Guuti qinnuigaa neriorsuillunilu ernertaaruni taanna ’ulluni inuuffigisassamini tamani Jehovamut pigititaassasoq’. Qinnutini aamma palasiunerup Elip oqaasii tuppalliutigai ’aliasuppalukkunnaarlunilu’. Hanna ernertaarpoq taannalu Samuelimik atserlugu. Kingorna Jehovap illernartuutaani kiffartortunngortippaa. (1 Samuel 1:9-28) Jehovap imminut ajunngitsuliorfiginninnera qujamasuutigalugu qinuvoq Jehovalu nalissaqanngitsutut unnersiutigalugu. (1 Samuel 2:1-10) Hannatut qinuneq tuppallersaatigisinnaavarput tatigalugu Guutip qinnutigisavut tamaasa piumasaanut naapertuuppata piviusunngortissagai. Uummammiugisavut taassumunnga aniatereerutsigik erloqiunnaarsinnaavugut, taassuma erloqissuterput piissammagu imaluunniit atorsinnaanngortillugu. — Tussiaat 55:23.
16. Jakob assigalugu sooq ernumanitsinni siooranitsinnilu qinusariaqarpugut?
16 Ersigutta, aliasukkutta isumakuluuteqaruttaluunniit Guuti saaffigisariaqarparput qinunikkullu tuppallersaatissilluta. (Tussiaat 55:2-5) Assersuutigalugu Jakobip qatanngunni Esau akeraariittut avissaareerlutik naapeqqileramik siooratsangaarsimavoq. Jakobili ima qinuvoq: „[Jehova] siuaasama Abrahamip Guutia ataatamalu Iisaap Guutia, uannut oqarputit nunannut eqqarlinnullu uteqqullunga ajunngitsuliorfigiumaarlungalu! Isumassuineq ilumoornerlu angingaartoq uannut takutittarsimagakkit qinngaqqukkaluaqaanga; taamani Jordan ikaarpara ajaappiara kisiat pigalugu, maannali pigisaqalerpunga marluinngorlutik tammaartartunik. Angajuma Esauip assaanit annaanniannga-aat. Annilaangavungami tikiulluni uanga ilakkalu anaanat qitornaallu ilanngullugit toqorarnialeratarsinnaammatigut. Nammineq oqarputit ajunngitsuliorfigiumaarlunga, kinguaassakkalu sioqqatut sissamiittutut amerlatigilersikkumaarlugit kisissaanngitsunngorlugit.“ (1 Moses 32:9-12) Esauip Jakob inoqutaalu saassutinngilai. Jehovap taamaalilluni tamatumani Jakob ’ajunngitsuliorfigaa’.
17. Tussiaat 119:52 naapertorlugu sualuttumik misilinneqarutta qanoq qinunikkut tuppallersarneqarsinnaavugut?
17 Qinutilluta immaqa tuppallersarneqartarpugut Guutip oqaasiani allassimasumik eqqaasaqarnitsigut. Biibilimi tussiaatit takinerpaartaanni — qinnummi kusanartumi erinniukkami — kunngissaq Ezekiasiugunartoq ima erinarsorpoq: „Eqqaamavakka itsarsuarmit inassutitit tuppallersaatigisarlugillu, [Jehova].“ (Tussiaat 119:52) Sualuttumik misilinneqarluta Guuti maniguulluta qinnuigigutsigu immaqa najoqqutassiaq imaluunniit inatsit Biibilimiittoq eqqortumik ingerlanissatsinnut iluaqutigisinnaasarput eqqaassavarput. Taamaappat tuppalliutigisinnaavarput nalunnginnatsigu Ataatatsinnut qilammiusumut iluarisaalluta.
Guutimut ilumoorfiginnittut qasusuillutik qinussapput
18. Suna pillugu ’ilumoortut tamarmik Guuti qinnuigissavaat’?
18 Jehova Guutimut ilumoorfiginnittut tamarmik ’qasusuillutik qinusassapput’. (Rûmamiut 12:12) Tussiaat 32-mi immaqa Davidip Batsebamik ajortulioqateqarnermi kingorna allakkamini allaatigai isumakkeerfigineqarnissaminik qinunnginnermini anniaatini, aammalu allamik isumataarami ajortuliorninilu Guutimut nassuerutigigamiuk qanoq eqqissiallatsiginini. Taava nangilluni David erinarsorpoq: „Taamaattumik [ilumoorlutik peqqissimisut Jehovap isumakkeerfigisarmagit] ilumoortut tamarmik qinnuigaatsit nanisassaatillutit.“ — Tussiaat 32:6.
19. Sooq qinulluta ’assavut iluaatsuitsut qullartariaqarpavut’?
19 Jehova Guutimut attaveqarnerput pingaartikkutsigu taanna Jesus Kristusip utertitsissutitut pilliutaa tunngavigalugu nallittuinissaanik qinnuigissavarput. Upperluta ’siooranata saammaassisup issiavissaarsuanut’ sassarsinnaavugut piffissami eqqortumi isumakkeerfigineqaqqulluta ikiorneqaqqullutalu. (Eprîarit 4:16) Aap, pissutissarpassuaqarpugut Guutimut qinunissatsinnut. Taamaattumik ’kipisuitsumik qinuniarta’ uummammillu pisumik Guuti akuttunngitsumik unnersiutigisarlugu qutsavigisarlugulu. (1 Tásalûníkamiut 5:17) Ullukkullu unnuakkullu Guutimut qinulluta ’assavut iluaatsuitsut qullartarniartigik’. (wE 15/1 99)
Qanoq akissavigit?
□ Qinoqatigiinnermi aqutsisuussagaanni sooq iluaqutaassava qanoq oqaaseqassanerluni siumut eqqarsaatigissallugu?
□ Sooq ataqqinnittumik naleqqulluartumillu qinusariaqarpugut?
□ Qinugaangatta qanoq isumaqarfiginnittariaqarpugut?
□ Suna pillugu pingaaruteqarpa qinunikkut Guuti unnersiutigissallugu qutsavigissallugulu?
□ Maligassiat suut Biibilimeersut takutippaat qinunikkut tuppallersarneqarsinnaasugut?
[Atuaqqissaarnermi apeqqutit]
[Qupp. 17-imi assiliartaq]
Jehovap naalaffiutaata atoqqaartinneqarnerani kunngi Salomon najuuttut qinoqatigiinneranni aqutsigami maniguuppaluppoq
[Qupp. 18-imi assiliartaq]
Hannatut qinunikkut tuppallersarneqarsinnaavugut