Ilaqutariissuit Guutimut kiffartornermi ataasiussuseqartut

„Ernerit Tassaapput [Jehovap] Tunissutai,“ Tussiaasiortoq Allappoq, „Arnap Timaata Iluani Inerittoq Tassaavoq Taassuma Akissarsiarititaa. Qarsutut Sorsuttussap Tigumiaasut Ipput Ernerit Inuusutsilluni Erniarisat. Pilluarpoq Angut Tamakkuninnga Qarsulivimminut Immiisoq.“ — Tussiaat 127:3-5.

MEEQQAT Jehovamit pilluaqqussutaasinnaapput. Soorlulu pisissaartartup qarsunik qarsuusivimminiittunik qanoq piseriussissanerluni ilisimanninnini nalerisimaarutigisaraa, taamatuttaaq angajoqqaat meeqqatik aqqutikkut inuunermut naassaanngitsumut sammisukkut aallartissinnaagaangamikkik nuannaarutigisarpaat. — Matîuse 7:14.

Ukiorpassuit matuma siornagut Guutip innuttaasa akornanni nalinginnaavoq angajoqqaat ’qarsuusivimminnik’ meerarpassuarnik imaqartitsisarnerat. Israelikkut Egyptenimi tigusaaqqanerat eqqarsaatigiinnariartigu: „Israelikkut kinguaassiorlutik amerlingaaramik kisissaajunnaarlutik nuna tamaat siammarfigaat.“ (2 Moses 1:7) Israelikkut Egyptenimut pisut amerlassusiat tamaanngaannit aallartut amerlassusiannut naleqqiukkaanni paasinarpoq ilaqutariit agguaqatigiissillugu qulinik meeraqarsimasut.

Tamatuma kingorna Jesus ilaqutariinni ullumikkut amerlagineqarsinnaasuni peroriartorpoq. Jesus angajulliliaavoq, Josef Marialu sisamanik allanik erneqarput arlalinnillu paneqarlutik. (Matîuse 13:54-56) Taama meeraqartigisimanerisa paasinarsisippaat sooq Maria Josefilu Jerusalemimiit angerlamut aallarsimasut Jesusip ilaannginnera maluginagu.

 Ullumikkut ilaqutariissuit

Ullumikkut kristumiorpassuit anersaamut aningaasanullu tunngasut inuttullu atugarisat pissutigalugit allamilluunniit pissuteqarlutik ilaquttamik angissusaat killilersimavaat. Taamaakkaluartoq inuiaqatigiinni amerlasuuni ilaqutariissuit nalinginnaapput. The State of the World’s Children 1997 naapertorlugu Afrikami Saharap kujataani meeqqiortoqarneruvoq, tamaani arnat agguaqatigiissillugu arfinilinnik meerartaartarmata.

Kristumiunut angajoqqaanut meerarpassualinnut Jehovamik asanninnissaannik perorsaanerat oqitsuinnaanngilaq, amerlasuulli iluatsittarput. Iluatsissappat ilaqutariit pallorfiginninnermi ilumoortumi ataasiussuseqartariaqarput. Apustili Paulusip Korinthimi ilagiinnut oqaasii ullumikkut kristumiunut ilaqutariinnut assigiimmik kajumissaaruteqarput: ’Oqaaqqissaarpassi, qatanngutikka, . . . tamassi assigiissumik oqaluttaqqullusi assuariissoqaqqunagulu ilissini, kisianni naammattunngussasusi assigiissumik eqqarsarlusi assigiissumillu isumaliorlusi.’ (1 Korintumiut 1:10) Ataasiussuseqarneq taamaattoq qanoq anguneqarsinnaava?

Angajoqqaat anersaakkut ittunik pingaartitsisariaqarput

Angajoqqaat namminneq tamakkiisumik Guutimut kiffartornissaat pingaartorujussuuvoq. Mosesip Israelikkunnut oqaasii eqqarsaatigiinnariartigit: „Tusaagit Israel! [Jehova] Guutigaarput. [Jehova] ataasiinnaavoq. [Jehova] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit. Oqaatsit taakku peqqussutillu ullumi ilinnut tunniussakka uummammiugiuassavatit. Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ — 5 Moses 6:4-7.

Malugiuk Mosesip erseqqissaraa angajoqqaat Guutip peqqussutai ’uummammiugiuassagaat’. Aatsaat taamaakkunik meeqqamik akuttoqatigiissumik anersaakkut siunnersortarnissaat kajumissuseqarfigissavaat. Angajoqqaat anersaakkut nukittuujugunik meeqqatik Biibilimik ilinniartikkusussavaat.

Anersaakkut ittunik pingaartitsisuussagaanni uummammillu tamakkiisumik Jehova asassagaanni akuttoqatigiissumik Guutip oqaasia atuartariaqarpoq, eqqarsaatigeqqissaartariaqarluni ulluinnarnilu maleruarneqartariaqarluni. Tussiaasiortoq allappoq Jehovap inatsisaanik nuannarisaqartup „ullukkullu unnuakkullu“ atuartaraa, ’taassumalu assigigaa orpik kuunnguup killingani ikkunneqarsimasoq inerititaqarfissamigut inerititaqartartoq toqujuitsunillu pilutaqarluni. Qanoq iliornermini tamani iluatsitsisartoq.’ — Tussiaat 1:2, 3.

Soorlu orpik imerterneqartuaartoq ajunngitsunik inerititaqartartoq, taamatulli ilaqutariit anersaakkut inuussutissanik pisartut Jehovamut nersornaataasumik ajunngitsunik inerititaqartarput. Assersuutissaalluartut ilagaat ilaqutariit Uwadiegwukkut; Jehovap nalunaajaasorai Afrika Killermeersuusut. Uwadiegwu nulianilu arfineq-pingasunik meeraqarput, marluullutilli pioneeriupput, imaluunniit piffissaq tamaat oqaluussisartuullutik. Uwadiegwu oqaluttuarpoq: „Ilaqutariittut ukiut 20-t sinnerlugit akuttoqatigiissumik Biibili atuaqqissaartarsimavarput. Meeqqavut naalungiarsuuneranniilli Guutip oqaasianik ilinniartissimavavut, ilaqutariittut atuaqqissaarnerinnaanngitsukkut aammali oqaluussinikkut periarfissanilu allani. Meeqqavut tamarmik oqaluussisartuupput, nukarleq arfinilinnik ukiulik kisimi kuisimanngilaq.“

Suleqatigiinneq

„Ilisimassut atorlugu illu sananeqartarpoq,“ Biibilimi allassimavoq. (Ussatit 24:3) Ilisimassut ilaqutariinni suleqatigiinnermik kinguneqassaaq. Ilaqutariinni suleqatigiinnermi ataataasoq  siuttuuvoq; Guutip ilaqutariinnut qullersaasutut qinersimavaa. (1 Korintumiut 11:3) Apustili Paulusip isumassarsisitaasup qullersaasutut akisussaaffiup asuleerutassaannginnera erseqqissarpaa ima allakkami: ’Kialuunniit ilani annerusumillu inoqutini [timip piisigut anersaakkullu] isumaginngikkunigit, taassuma upperneq soraarussimavaa uppinngitsumit ajornerulluni.’ — 1 Timûtiuse 5:8.

Unnersuussut tamanna Guutip oqaasianeersoq isumaqarpoq kristumiut uiusut nuliatik anersaakkut isumagisariaqaraat. Nuliaasoq illumi pissussaaffeqarpallaaruni anersaakkut peqqissusianut ajoqutaalissaaq. Nunami Afrikamiittumi angut kristumiu kuiserlaaq ilagiinni utoqqaanertamut saaffiginnippoq nuliamilu anersaakkut ittunik soqutigisaqarunannginnera isumakuluutiginerarlugu. Nulia immaqa arlaatigut ikiortariaqartoq utoqqaanertat eqqaavaat. Taamaattumik uiusup illumi suliassanik ikiortalerpaa. Aammattaaq atuffarinnerulernissaanut Biibililu pillugu ilikkagaqarnerulernissaanut ikiorpaa. Ajunngitsumik qisuariarpoq, maannalu ilaqutariit tamarmiullutik Guutimut kiffartornermi ataasiussuseqarput.

Ataataasut aamma meeqqamik anersaakkut pisariaqartitaat isumagisariaqarpaat. Paulus allappoq: ’Ilissi angajoqqaat, qitornasi narrutsatseqinasigik, paariniarsigilli perorsarlugit inertertarlugillu [Jehovamit].’ (Evfisumiut 6:4) Angajoqqaat meeqqatik narrutsatseqqunagit kajumissaarut perorsaanissamullu inatsit malippassuk, meeqqat ilaqutariinni suleqatigiinnermut peqataasutut misigissapput. Qularnanngitsumik tamanna meeqqat ikioqatigiinnerannik anersaakkullu anguniagaqarnissamut kajumissaaqatigiinnerannik kinguneqassaaq.

Suleqatigiinneq aamma isumaqarpoq meeqqat piareeraangata anersaakkut ittunik akisussaaffilertarnissaat. Ataataq kristumiu utoqqaanertaasoq aqqanilinnillu meeraqartoq ullaakkut makiaartarpoq suliartortinnanilu meeqqat arlallit Biibilimik atuaqqissaaqatigisarlugit. Meeqqat annerusut kuisereernermik kingorna sinnerseraallutik qatanngutitik minnerusut ikiortarpaat, soorlu Biibilimik ilinniartillugit. Ataataasup nakkutigisarpai sulinerallu nersualaartarlugu. Arfinillit kuisimasuupput ilaasalu kuisinnissartik anguniarpaat.

Attaveqatigiilluarneq, ataatsimut anguniagaq

Ilaqutariit sallusuissummi ataasiussuseqartut attaveqatigiilluarnissaat ataatsimullu anersaakkut anguniagaqarnissaat pingaartuuvoq. Gordon, kristumiu utoqqaanertaq Nigeriamiu, meeqqanut arfineq-marlunnut aqqanilinniit 27-nut ukiulinnut ataataavoq. Arfinillit angajoqqaamissut pioneeriupput. Nukarleq, qanittukkut kuisissimasoq, ajoqersuganngortitsinermi sulinermut ilaqutariit sinneri ilagalugit akuttoqatigiissumik peqataasarpoq. Ernerit inersimasut marluk ilagiinni kiffartortuupput.

Gordonip meeqqat immikkut tamaasa Biibilimik atuaqqissaaqatigisarsimavai. Tamatuma saniatigut ilaqutariit annertusisamik Biibilimik ilinniartitaapput. Ullaat tamaasa allassimaffimmik Biibilimeersumik oqaloqatigiissuteqartarput ilagiillu ataatsimmiinnissaannut piareersartarlutik.

Ilaqutariit ilaasortaasa tamarmik anguniagaasa ilagaat Napasuliaq Alapernaarsuiffik-mi Iteritsi!-milu allaaserisat tamaasa atuarnissaat. Qanittukkut pilersaarutiminnut ullut tamaasa Biibilimik atuartarneq ilanngussimavaat. Atuakkamik oqaluuserisarnerisigut ileqqup pitsaasup tamatuma aalajangiusimanissaanut kajumissaaqatigiittarput.

Sapaatip-akunneranoortumik ilaqutariittut atuaqqissaqatigiinneq ima sungiusimatigaat arlaannaalluunniit eqqaasinneqartariaqarnani — tamarmik qilanaarisarpaat. Ukiut ingerlanerini ataataasup atuaqqissaaqatigiissutigisaq takissusialu meeqqat ukiuinut pisariaqartitaannullu naleqqussartarsimavaa. Ilaqutariit Guutip kiffaanut aalajaatsunut allanut qanimut attaveqarsimapput, tamannalu meeqqanut ajunngitsumik sunniuteqarsimavoq.

Ilaqutariittut sammisaqaqatigiilluartarput aliikkutassanullu piffissaqartarlutik. Sapaatip-akunneranut unnuk ataaseq „ilaqutariit unnoraat“, unnummi tamatumani pinnguaqatigiittarput, oqaluttuanik oqaluppalaannguanillu oqaluttuartoqartarluni, pattagiartoqartarluni qasuersaaginnartarlutilluunniit. Ilaannikkut sissamut nalunnguariartarput sumiiffiilluunniit allat takorusutatik takuniartarlugit.

 Jehova tatigiuk

Ilaqutariissuit isumaginissaat oqitsuinnaanngilaq. „Meeqqanut arfineq-pingasunut ataataalluarnissaq unamminiarnartuuvoq annertooq,“ kristumiu ataataq oqarsimavoq. „Timip piisigut anersaakkullu inuussutissanik naammattunik tunisinnaasariaqarput; pilersorniarlugit pisariaqartunik aningaasarsiniarlunga suleruloortariaqartarpunga. Meeqqat annerit maanna inuusuttuaraapput arfineq-pingasuullutillu tamarmik atuartuullutik. Nalunngilara anersaakkut ilinniartitaaneq pingaaruteqartorujussuusoq, meeqqalli ilaat uteriitsuupput naalasseriitsuullutillu. Nikallungassutigigajupakka, nalunngilarali aamma uanga ilaannikkut Jehova aliasutsittarlugu, isumakkeerfigisaraangalu. Taamaattumik nikallujuillunga meeqqakka oqaaqqissaartariaqarpakka eqqortumik ingerlalernissaasa tungaanut.

Jehovap kamagittarnera, inuit tamarmik allamik isumataarnissaannik kissaateqartitsisoq, ilaarniartarpara. Ilaquttakka atuaqqissaaqatigisarpakka, meeqqallu ilaasa kuisinnissartik anguniagaraat. Imaanngilaq nammineerlunga kinguneqartumik suliaqarsinnaasutut imminut tatigisunga, iliuuserisinnaasakkami annikeqaat. Qinunikkut Jehova suli qaninnerulerniarsaraara ussatinilu allassimasoq maleruarniarsaralugu: ’[Jehova] tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.’ Meeqqama ilinniartinnerisa naammassinissaannut Jehovap ikiussavaanga.“ — Ussatit 3:5, 6.

Nakkaannanngisaannarit!

Meeqqanik perorsaaneq ilungersunartuusinnaasarpoq, nakkaannanngisaannarilli. Qasusuisaarit! Meeqqavit ilungersuutitit maannakkorpiaq pingaartinngippatigik ajunngitsumilluunniit qisuariarfiginngippatigik imaassinnaavoq kingusinnerusukkut taamaaliortut. Meeqqap peroriartornera kristumiutullu anersaakkut inerititaqaleriartornera sivikitsuinnaanngilaq. — Galâsiamiut 5:22, 23.

Monica Kenyameersoq qulingiluanik qatannguteqarpoq. Oqarpoq: „Angajoqqaama mikisuusugulli sallusuissummik Biibilimeersumik ilinniartippaatigut. Sapaatip-akunneri tamaasa ataatap kristumiut atuagassiaataannik atuffattarpaatigut. Suliffia pissutigalugu atuaqqissaaqatigiittarnerput sapaatip-akunnerani aalajangersimasuujuaannarsimanngilaq. Ilaannikkut angerlaraangat silami pinnguartarpugut, taava oqartarpoq minutsit tallimat qaangiuppata iserluta Biibilimik atuaqqissaassasugut. Atuaqqissaareeraangatta apeqquteqaqqusarpaatigut ajornartorsiutigisinnaasatsinnilluunniit oqaluttuaqqulluta.

Ataatap qulakkeertarpaa kristumiut meerartaannik peqateqartarnerput. Akuttoqatigiissumik atuarfiliartarpoq ilinniartitsisullu aperalugit qanoq ileqqoqarnersugut. Ataatsimik tusarpaa anikka pingasut nukappiaqqallu allat paasimasut ilaannikkullu pissusiluttuusartut. Pissusiluttuunerat pillugu ataatap oqaaqqissaarpai, aammattaarli Biibili atorlugu sooq kristumiutut pissusilersortariaqartut piffissaqarfigaa.

Angajoqqaatta ataatsimiinnerit naleqarnerinik ilinniartippaatigut piareersarfiginissaannut ikiuinermikkut. Angerlarsimaffimmi sungiusarnikkut oqaluussisartutut ilinniartitaavugut. Mikisuullutali angajoqqaavut oqaluussinermi ilagisarpavut.

Ullumikkut anikka marluk specialpioneeriupput, angajora ataaseq nalinginnaasumik pioneeriuvoq, angajoralu alla ueqarpoq meeraqarlunilu ilagiinnilu oqaluussisartuulluni aallussilluartoq. Nukkakka marluk arfineq-marlunnik qulingiluanillu ukiullit oqaluussisartuupput kuisimanngitsut. Aqqalussakka minnerit marluk ilinniartinneqarput. Uanga nammineq Jehovap Nalunaajaasuisa immikkoortortaqarfianni Kenyami ukiuni pingasuni kiffartorpunga. Angajoqqaakka asavakka pingaarteqalugillu anersaakkut ittunik pingaartitsimmata; maligassiorluarpaatigut.“

Qassinilluunniit meeraqaraluaruit inuunermut naassaanngitsumut sammisumut siulersornissaat naakkaannarfiginngisaannaruk. Ilungersornitit Jehovap pilluaqquppagit apustili Johannesitut oqarsinnaassaatit, anersaakkut meeqqani pillugit ima oqarsimagami: ’Matumannga annerusumik tipaatsuutigisaqanngilanga: qitornakka tusaraangakkit sallusuissut eqqorlugu saqisut.’ — 3 Juánase 4. wE 15/2 99