Ilaqutassariit immikkut ajornartorsiutigisartagaat

ILAQUTASSARIIT PILLUARTUT — QANOQ ILILLUNI AJORNANNGILA?

Nunani assigiinngitsorpassuarni ilaqutassariit nalinginnaalersimapput, immikkullu ittunik ajornartorsiuteqarajuttarput. Inuppassuit isumaat naapertorlugu meeqqanik perorsaaneq ajornartorsiutit annerpaartaaraat. Ilaqutariinnili taamaattuni meeqqanik perorsaaneq iluatsitsisumik kinguneqarsinnaavoq, soorlu allaaserisani marlunni tulliuttuni takutinneqassasoq.

ATAATASSAT ANAANASSALLU AMERLANERTIGUT PITSAAVALLAANNGITSUTUT SAQQUMMIUNNEQARTARPUT. Amerlanersatta meeraagallaramik Askepot arnassaminit ajortumik pineqartuaannartoq pillugu oqaluttualiaq tusarsimavaat. Meerarpassuillu nalunngilaat Snehvide inuarullikkallu arfineq-marluk pillugit oqaluttualiaq, tassani Snehvidep arnassaa tassaasoq arnaq ilisiitsoq ajortoq.

Oqaluttualiat taamaattut ilaqutassariinnik piviusorsiortumik saqqummiussippaat? Ilumut angajoqqaarsiat tamarmik ajortuuppat? Soorunami naamik. Amerlanersaasa qitornarsiatik ajunnginnerpaaginnarmik kissaattarpaat. Ilaqutassariittulli inuuneq ajornartorsiuterujussuarmik nassataqarsinnaavoq.

Meeqqanik perorsaaneq

Aappariinneq siulleq iluatsinngitsooraangat aappariit tamarmik immikkut inersimalluannginnerat amerlanertigut pissutaasarpoq. Kingusinnerusukkut aappanneqqinnermi meeqqanik ajornartorsiutit aappariinnermut artorsartitsisinnaapput. Misissuinerit takutippaat ilaqutassariit quliugaangata sisamanit amerlanerusut ukiut tallimat qaangiutsinnagit avinnermik kinguneqartartut.

Qitornassat ataatassaq anaanassarluunniit pakatsinerat pissutigalugu kimut ilumoorfiginnissanerlutik nalornissuteqarnerat, sinnganerat kamannerallu katernaat maluginngitsoorsinnaavaat. Meeqqat immaqa isumaqarput ataataasup anaanaasulluunniit aappartaani imminnit asanerugaa. Ataataasullu anaanaasulluunniit aapparminit qimagaasimasup paasiuminaatsissinnaavaa meeqqat taassumunnga suli asanninnerat. Nukappiaqqap ataatavimminut ajunngitsumik attaveqarnini ima nassuiarniarpaa: „Anaana, nalunngilara ataatap ajortumik pigaatit, uangali ajunngitsumik pivaanga.“ Oqaatsit taamaattut ilumooraluarlutik anaanaasoq meeqqap ataataanut narrutsatserujussuarsinnaavaat.

Ataatassaq ima nassuerpoq: „Qitornassarisama perorsarneranni ajornartorsiutit takkuttartut iliuuseqarfigissallugit piareersimanngilluinnarpunga. Isumaqaraluarpunga anaanaannut katikkama meeqqat ataatagilissagaannga. Isumaqarpunga taama ajornaatsigissasoq — paasinngilaralu meeqqat ataatavimminnut asanninnerat. Arlaleriaqalunga kukkusarsimavunga.“

 Ingammik meeqqat perorsarneranni ajornartorsiuteqalersinnaasarpoq. Meeqqat asannittumik perorsaatissinneqarnissartik pisariaqartippaat, ilassiuminaatsissinnaalluguli, allaat ataatavimminnit anaanavimminnilluunniit pigaluarpat. Ataatassamilli anaanassamilluunniit naveerneqaraanni artornarnerungaassannginnerpa? Meeqqat anaanassaminnit ataatassaminnilluunniit perorsaatissinneqaraangamik oqarajuttarput: „Ataataviginngilakkit!“ imaluunniit: Anaanaviginngilakkit!“ Oqaatsit taamaattut angajoqqaassanut ajunngitsumik isumalinnut narrujuumminartorujussuusinnaasarput.

Ilaqutassariinni meeqqat ajunngitsumik kinguneqartumik perorsarneqarsinnaappat? Angajoqqaassat ilaqutariittut inuunermut pilluarnartumut peqataasinnaappat? Aap, ingammik ilaqutariit tamarmik Guutip oqaasiani isumassarsiarititaasumi, Biibilimi, unnersuussutigineqartut maleruartarpatigik.

[Qupp. 3-mi assiliartaq]

„Ataataviginngilakkit!“