Jehovap piumasaatut iliorput

Inuk inuit inuusimasut pingaarnerpaartaat maniguulluni kiffartuussivoq

JESUSIP nalunngilaa inuunermi nalunaaquttap-akunnerini kingullerni apustilimi ilaginissat pingaaruteqartoq. Tigusaanissaa qanillivoq, upperneralu aatsaat taama misilinneqartigisussanngorpoq. Aammattaaq Jesusip pilluaqquneqangaarnissani nalunngilaa. Qanittukkut Guutip talerpiata tungaanut akitsisinneqassaaq ateqartinneqalissallunilu ’aternit tamanit annerusumik, Jesusip aqqani seeqqut tamarmik qilammi nunamilu nunallu ataani ittut seeqqumiassallutik’. — Filípimiut 2:9, 10.

Taamaattumik toqunissani ernumaginermik akissarsiassanilu neriorsuutigisaasoq qilanaarinermik apustilimi pisariaqartitaat puiunngilai. ’Naggatissamut allaat asavai,’ kingusinnerusukkut Johannes iivangkiiliumini allappoq. (Juánase 13:1) Inuttullu naammalluinnartutut inuunermi nalunaaquttap-akunnerini kingullerni pingaaruteqartuni, Jesusip apustilini pingaaruteqartumik ilinniartippai.

Maniguunnissamut ilinniartitsineq

Jerusalemimi inimi qalianiittumi poorski nalliuttorsiutiginiarlugu apustilit Jesus ilagaat. Siusinnerusukkut kina annerunersoq assortuussutigigaat Jesusip tusaasimavaa. (Matîuse 18:1; Mákorse 9:33, 34) Apeqqummik taassuminnga Jesusip oqaloqatigisarsimavai tamannalu pillugu aatsaat naqqilinngilai. (Lúkarse 9:46) Maannali ilinniartitsinini allatut periaaseqarluni erseqqissaarpaa. Maniguunneq pillugu oqaluttuutiinnanngilai aammali qanoq maniguunnissaannik takutitsivigalugit.

Jesus ’nerrivimmit nikuippoq, annoraajarlunilu,’ Johannes allappoq. ’Annoraaminermik qiteruserluni saaliaquserpoq. Taavalu imeq puuguttamut kuivaa, ajoqersukkamilu isigaat uffalerpai annoraaminermillu saaliaqumminik allarterlugit.’ — Juánase 13:4, 5.

Itsaq Kangiani Qiterlermi kiattumi aloqutit ammasut aqqusinikkut pujoralattukkut pisuutigineqartarput. Inuup nalinginnaasup angerlarsimaffianut isertut pulaartitsisumit tikilluaqquneqartarput, taassumalu pulaartut isigaasa asaffissaat puuguttaq imerlu isumagisarpai. Angerlarsimaffinni pisuunerusuni inussiaq isikkanik asaasarpoq. — Eqqartuussisut 19:21; 1 Samuel 25:40-42.

Inimi qalianiittumi Jesus apustiliilu pulaartitsisoqanngillat. Pulaartitsisoqanngilaq puuguttamik isumaginnissinnaasumik inussiaqarnanilu isikkanik asaasinnaasumik. Taamaattumik Jesusip isikkatik asalermagit apustilit peqqusiileqilerput. Akornannimi pingaarnerpaartaat nikanarnerpaamik suliaqalerpoq.

Peter akerlioqqaaraluarpoq isikkani Jesusip asalermagit. Jesusilli oqarfigaa: ’Uffanngikkukkit pissarseqatigissanngilarma.’ Jesusip apustilimi isigai tamaasa asareeramigit oqarpoq: ’Sugissi paasivisiuk? Ajoqersortissinnik naalakkassinnillu taasarpassinga, oqarluarlusilu, taannagama. Uanga taava isikkasi uffarakkit, naak naalagaralungalu ajoqersortigigissinga, taamattaaq ilissi isikkasinnik uffaqatigiissaasi.’ — Juánase 13:6-15.

Jesusip isikkanik asaasarneq ileqqulersuutitut aallartinngilaa. Apustilinili nutaamik isumataarnissaannut ikiorniarpai — qatanngutimik iluaqutissaannik maniguullutik piumassuseqarlutillu nikanarnerpaamik suliaqarsinnaanissaannut. Piffissallumi ingerlanerani paasivaat. Ukiut arlallit qaangiuttut kipineqarneq pillugu apeqqummik apustilit eqqartueqatigiimmata qanoq pisoqartoq eqqarsaatigeriaruk. Naak ’sivisuumik saqitsaatigisimagaluarlugu’ najuuttut pissuserissaarput ilamillu isumaannut ataqqinnittumik tusarnaarlutik. Aammattaaq ajoqersugaq Jakob — apustiliunngitsoq, apustilit najuummata taakkua ilaattut ilimagineqarsinnaagaluartoq — ataatsimiinnermut aqutsisuusimagunarpoq. apustilit suliáinik agdlagkat-ni oqaluttuarineqartup tamatuma takutippaa apustilit maniguunnermik ersersitsinissamut siumukarsimasut. — apustilit suliait 15:6-29.

 Ilinniutissarput

Ajoqersukkami isigaasa asannerisigut maniguunnermik kimittuumik Jesus maligassiuivoq. Kristumiut isumaqartariaqanngillat ima pingaaruteqartigalutik allanit kiffartuunneqartuaannassallutik, aammattaaq ataqqineqarnissaq tusaamasaanissarlu anguniartariaqanngilaat. Akerlianik Jesusip maligassiunera malittariaqarpaat, taanna ’tikiutinngimmat kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik’. (Matîuse 20:28) Jesusip ajoqersugai imminnut nikanartillutik kiffartorfigerusussuseqartariaqarput.

Peter pissutissaqarluarluni ima allappoq: ’Tamassi ilissinnut nikanartinnermik assuuseritsi, anneruniartut Guutip akerartormagit, nikanartittulli saammaattarlugit.’ (1 Pîtruse 5:5) Griikerit oqaasiat ’assuuseritsi’-mik (nutsiinnavillugu: ’nimeritsi’-mik) nutserneqarsimasoq oqaatsimit ’inussiap saaliaqutaa’-nut atorneqartartumit naggueqarpoq. Saaliaqutip taamaattup iluatigut annoraamineq nerngunneqartarsimavoq. Uani Peterip pigunarpaa Jesusip allarummik qiterusernera apustilimilu isigaanik asaanera? Qularnaatsumik oqaatigineqarsinnaanngilaq. Taamaattoq Jesusip maniguulluni allanik kiffartuussinera Peterip puiugassaanngitsumik killinneqaatigisimavaa, Jesusimillu malinnikkusuttut tamarmik taamaattariaqarput. — Kulorsamiut 3:12-14. (wE 1/3 99)